1-2. Langilileni ifyo mwingacita pa kuti mulebelenga no kuisambilisha Baibo bwino.

 ELENGANYENI ukuti mulefwaya ukushita ing’anda. Finshi mwingatemwa ukwishiba pali iyo ng’anda ilyo tamulashita? Bushe kuti mwatemwa ukumona fye ifyo imoneka ku nse? Awe. Ukwabula no kutwishika kuti mwafwaya ukuyamona iyo ng’anda mwe bene, ukumona ifyo imoneka ne fyo imiputule mu kati baipanga. Kuti mwatemwa no kumonako pulani ya ng’anda pa kuti mwishibe ifyo baikuulile. Kwena kuti mwafwaya ukwishiba bwino ing’anda iyo mulefwaya ukushita.

² Ifi fine e fyo twingacita ilyo tulebelenga no kuisambilisha Baibo. Uwasambilila ifya mu Baibo umo atile Baibo yaba kwati “cikuulwa icikulu kabili icitali icakuulwa pa mufula uwashika.” Nomba kuti twaishiba shani ifyaba mu Baibo? Nga mulebelenga Baibo lubilo lubilo kuti mwaishiba fye amasambililo ya kutendekelapo, e kutila “ifya kubalilapo ukwishiba mu mashiwi ya mushilo aya kwa Lesa.” (Heb. 5:12) Nomba nga filya fine mwingatemwa ukwingila mu kati ka ng’anda iyo mulefwaya ukushita pa kuti mumone ifyo baikuula, ilyo mulebelenga Baibo mufwile ukumfwikisha ifishinka ifyo mulebelenga. Fimbi ifyo mwingacita pa kuti mulebelenga bwino Baibo, kumona ifyo balumbwile pa cikomo cimo fyampene ne fyo balumbula pa cikomo cimbi. Mwilafwaya fye ukwishiba icine lelo muleishiba no mulandu mwasuminina ico icine.

3. Cinshi umutumwa Paulo aebele Abena Kristu banankwe ukulacita, kabili mulandu nshi? (Abena Efese 3:​14-19)

³ Pa kuti tumfwikishe fyonse ifyaba mu Cebo ca kwa Lesa, tufwile  ukuisambilisha icine icashika icaba mu Baibo. Umutumwa Paulo akoseleshe Abena Kristu banankwe ukulabelenga Icebo ca kwa Lesa pa kuti baleishiba “ifyaba ubwipi no butali no kulepa no kushika” kwa cine. Ukucita ifi kwali no kulenga baba “abalimbwa kabili abakuulwa” mu citetekelo. (Belengeni Abena Efese 3:​14-19.) Na ifwe tufwile ukulacita fimo fine. Lekeni nomba tusambilile pa fyo twingalaisambilisha Icebo ca kwa Lesa pa kuti tuleishiba ifyo cilandapo.

4. Finshi twingacita pa kuti tupalame sana kuli Yehova? Landeni pa fya kumwenako.

⁴ Fwe Bena Kristu, tatufwaya fye ukwishiba amasambililo ya kutendekelako aya mu Baibo. Apo umupashi wa mushilo uwa kwa Lesa ulatwafwa, tulafwaisha ukusambilila “ifyashika ifya kwa Lesa.” (1 Kor. 2:​9, 10) Kanshi kuti mwatendeka ukuisambilisha sana ifyaba mu Baibo pa kuti mukapalame sana kuli Yehova. Ku ca kumwenako, kuti mwaisambilisha pa fyo Yehova alelanga ukutemwa ku babomfi bakwe aba ku kale. Na kabili kuti mwasambilila pa fyo ifi Yehova atemenwe ababomfi bakwe filanga ukuti alimutemwa na imwe bene. Kuti mwasambilila na pa fyo Yehova alefwaya abena Israele balemupepa e lyo mwafilinganya ku fyo afwaya ukuti tulemupepa muno nshiku. Nelyo kuti mwaisambilisha pa masesemo ayo Yesu afikilishe ilyo ali pano isonde.

5. Lyashi nshi ilya mu Baibo ilyo mwingatemwa ukuisambilishapo sana?

⁵ Bamo abaisambilisha sana Icebo ca kwa Lesa balilandileko pa malyashi yamo ayo bengatemwa ukuisambilishapo. Fimo ifyo balandilepo nabafilemba mu kabokoshi akaleti “ Fimo ifyo Mwingaisambilishapo mu Cebo ca kwa Lesa.” Kuti mwasambilila ifingi nga mulebomfya Icisontelelo ca Mpapulo sha Watch Tower nelyo Icitabo ca Kwafwa Inte sha kwa Yehova Ukusanga Ifyebo. Nga muleisambilisha ifyashika ifyaba mu Baibo mukaba ne citetekelo icakosa kabili “no kwishiba Lesa [mukakusanga].” (Amapi. 2:​4, 5) Lekeni nomba tusambilile pa cine icashika icaba mu Baibo ico twingaisambilishapo.

6. (a) Bupusano nshi bwaba pa kupanga ifya kucita e lyo no kucita ifyo mwapanga? (b) Mulandu nshi twingalandila ukuti ifyo Yehova afwaya ukucitila abantu ne sonde fikatwalilila ukubako umuyayaya? (Abena Efese 3:11)

⁶ Ku ca kumwenako, tontonkanyeni pa fyo Lesa afwaya ukucitila abantu ifyo Baibo yalandapo. Paliba ubupusano pa kupanga ukucita fimo e lyo no kucita ifyo mwapanga. Kuti twalinganya ukupanga ukucita fimo, ku nshila iitwala uko tulefwaya ukuya. Lelo nga mwasanga inshila nabacilika, te kuti mufike uko mulefwaya ukuya. Nomba ukucita ifyo twapanga kuti twakulinganya ku cifulo uko tulefwaya ukuya. Apo natwishiba icifulo uko tuleya kuti twabomfya inshila ishalekanalekana. Ifi fine e fyo Yehova acita. Tulatasha sana ifi panono panono atweba “ukufwaya kwakwe” muli Baibo. (Efes. 3:11) Yehova kuti abomfya inshila ishalekanalekana pa kuti acite ifyo alefwaya kabili lyonse alacita ifyo afwaya pantu “conse caliba ne co Yehova acipangiile.” (Amapi. 16:4) Kabili ifyo Yehova acita fikatwalilila ukubako umuyayaya. Finshi Yehova afwaya ukucitila abantu kabili finshi acitapo pa kuti afikilishe ifyo afwaya ukucita?

7. Ilyo abantu ba kubalilapo babembwike, bushe Yehova ayalwile shani inshila ali no kufikilishishamo ifyo alefwaya ukucitila abantu? (Mateo 25:34)

⁷ Lesa alyebele abantu ba kubalilapo umulandu ababumbile. Abebele ukuti “Fyaleni, fuleni, kumaneni pe sonde no kulimapo, kabili muleteka . . . na fyonse ifya mweo” pe sonde. (Ukute. 1:28) Ilyo Adamu na Efa babembwike kabili ulubembu lwaingila na mu bantu bonse, Yehova ta-alwile ifyo alefwaya ukucitila abantu. Alyalwile inshila ali no kufikilishishamo ifyo alefwaya ukucitila abantu. Yehova alipekenye Ubufumu mu muulu ubo ali no kubomfya pa kufikilisha ifyo alefwaya ukucitila abantunse e lyo ne sonde. (Belengeni Mateo 25:34.) Pa nshita yakwe umwine, Yehova alitumine Umwana ibeli lyakwe pano isonde ku kusambilisha abantu pa Bufumu bwakwe no kutulubula ku lubembu ne mfwa. Lyena Yesu balimubushishe no kubwelelamo ku muulu uko aileba Imfumu ya Bufumu bwa kwa Lesa. Nomba fingi twingasambilila pa fyo Lesa afwaya ukucitila abantunse.

8. (a) Cinshi icacindama ico Baibo ilandapo sana? (b) Nga fintu amashiwi yaba pa Abena Efese 1:​8-11 yalanda, cinshi ico Yehova afwaisha ukucita? (Moneni icikope icili pa nkupo.)

⁸ Cimo icikalamba ico Baibo ilandapo ca kuti ishina lya kwa Lesa likaba ilya mushilo ilyo akafikilisha fyonse ifyo alaya ukucita pano isonde ukubomfya Ubufumu ubo Umwana wakwe akalateka. Tapali uwinga-alula ifyo Yehova afwaya ukucita. Alitulaya ukuti fyonse fikacitika fye filya fine afwaya. (Esa. 46:​10, 11; Heb. 6:​17, 18) Mu kuya kwa nshita, isonde likaba paradaise, kabili abana ba kwa Adamu na Efa aba cishinka bakaba no “mweo wa muyayaya” kabili bakapwililika. (Amalu. 22:26) Nomba kwaliba na fimbi ifingi ifyo Yehova akafikilisha. Ico afwaisha kulenga ifibumbwa fyakwe ifya ku muulu e lyo ne fya pe sonde ukwikatana. Na bakaba aba mweo pali ilya nshita bakasumina ukuti Lesa e walinga ukuteka. (Belengeni Abena Efese 1:​8-11.) Ukwabula no kutwishika natutemwa sana ifi Yehova alefikilisha ifisuma ifyo alaya.

9. Ilyo tulebelenga Baibo, finshi twingeshiba pa fikacitika ku ntanshi?

⁹ Natulandeko pa busesemo ubo Yehova alandile mwi bala lya Edeni ubwalembwa pa Ukutendeka 3:15. b Bulya busesemo bwalandile pa  fintu ifikalacitika ifikafikilisha ifyo Lesa afwaya ukucita. Nomba ifyo ubu busesemo bwalelandapo fyali no kucitika imyaka iingi ku ntanshi. Ku ca kumwenako, Yehova aebele Abrahamu ukuti pa numa ya nkulo ishingi, mu lupwa lwakwe e mwali no kufyalilwa Mesia. (Ukute. 22:​15-18) Lyena mu mwaka wa 33, Yesu balimusumine ku citende nge fyo ubusesemo bwalandile. (Imil. 3:​13-15) Lyena ubusesemo bwa kuti umwana ali no kufwanta insoka ku mutwe, buli no kufikilishiwa imyaka ukucila 1,000 ileisa ku ntanshi. (Ukus. 20:​7-10) Kabili Baibo yalilondolola na pa fikacitika ilyo abantu abakonka ifyo Satana atungulula ababa muli cino calo bakapata sana abantu ba kwa Yehova.

10. (a) Finshi fili no kucitika nomba line? (b) Kuti twaipekanishisha shani limo ku fili no kucitika? (Moneni futunoti.)

¹⁰ Tontonkanyeni pa fikacitika ku ntanshi ifyo Baibo yasobela. Ica kubalilapo, inko shikabilisha ukuti kuli “umutende no mutelelwe!” (1 Tes. 5:​2, 3) Mu “kupumikisha” ubucushi bukalamba bukatendeka ilyo inko shikonaula ukupepa konse ukwa bufi. (Ukus. 17:16) Pa numa ya ifi, kukaba ica kupapusha icikacitika. Imitundu yonse ikamona “Umwana wa muntu aleisa pa makumbi ya mu muulu ali na maka no bukata ubukalamba.” (Mat. 24:30) Lyena Yesu akapingula inko, kabili akapaatukanya impaanga ku mbushi. (Mat. 25:​31-33, 46) Pali iyi nshita, Satana akatwalilila ukubombesha. Pa mulandu wa kuti alipata abantu ba kwa Lesa, akaleka inko shikomane akapi, isho Baibo ita ukuti Goge wa mu calo ca Magoge pa kuti shikasanse abantu ba kwa Yehova. (Esek. 38:​2, 10, 11) Lyena pa nshita imo abasubwa bakalongana ku muulu pamo na Yesu no kuipekanya ukwisa mu kulwa inkondo ya kulekeleshako, inkondo ya Armagedone. c (Mat. 24:31; Ukus. 16:​14, 16) Lyena Yesu akatendeka ukuteka isonde pa myaka 1,000.—Ukus. 20:6.

11. Bushe ukwikala umuyayaya kwamukuma shani? (Moneni ne cikope.)

¹¹ Pali ino nshita muletontonkanya pa fyo ifintu fikaba ku ntanshi. Baibo ilanda ukuti Kabumba wesu “alibika ne nshita ya muyayaya mu mitima [yesu].” (Luk. Mil. 3:11) Baleni  tontonkanyeni pa fyo aya mashiwi yamukuma e lyo no kukuma bucibusa mwakwata na Yehova. Icitabo citila Palameni Kuli Yehova, pe bula 319 cilondolola ukuti: “Pa numa ya kwikala amabilioni ya myaka, tukeshibilapo na fimbi pali Yehova Lesa ukucila ifyo twaishiba lelo. Na lyo line tukalaumfwa ukuti kucili ifisuma ifingi ifyo tushilasambilila. Tukalafwaisha ukusambilila na fimbi. . . . Umweo wa muyayaya ukabamo ubufwayo ica kuti kuti twafilwa no kwelenganya, kabili kukaba ifyalekanalekana. E lyo ukupalama kuli Yehova lyonse kukaba cintu cikawamako sana ku mweo wa muyayaya.” Nomba ilyo tuletwalilila ukusambilila Icebo ca kwa Lesa, finshi fimbi twingasambilila?

12. Bushe kuti twaishiba shani ifyaba mu muulu? Landeni pa ca kumwenako.

¹² Baibo yalitulondolwela ukuti Yehova “ekala mu muulu.” (Esa. 33:5) Baibo yalilondolola ifintu ifisuma pali Yehova e lyo na pa cilonganino cakwe ica ku muulu. (Esa. 6:​1-4; Dan. 7:​9, 10; Ukus. 4:​1-6) Ku ca kumwenako, kuti twabelenga pa fintu ifisuma ifyo Esekiele amwene ilyo “umuulu waiswike, [amwene] ne fimonwa ifyafumine kuli Lesa.”—Esek. 1:1.

13. Ukulingana na mashiwi yaba pa AbaHebere 4:​14-16, mumfwa shani pa fyo Yesu alebomba ku muulu?

¹³ Tontonkanyeni na kabili pa fyo Yesu aletucitila ifi aba ni Mfumu yesu kabili Shimapepo Mukalamba uwa luse. Ukupitila muli Yesu, “tupalamina ukwabula umwenso ku cipuna ca bufumu ica cikuuku ca kwa Lesa,” mwi pepo no kulomba Lesa ukuti atubelele uluse “pa nshita tulekabila ubwafwilisho.” (Belengeni AbaHebere 4:​14-16.) Kanshi cila bushiku tulingile ukulatontonkanya pa fyo Yehova na Yesu batucitila e lyo ne fyo baletucitila pali ino nshita ku muulu. Ifyo batutemwa filingile ukutufika pa mutima kabili filingile ukutulenga ukulabombesha ilyo tulebombela Yehova.—2 Kor. 5:​14, 15.

14. Cintu nshi cimo icacindama ico twingacita pa kutasha Yehova na Yesu pa fyo batucitila? (Moneni ne cikope.)

 ¹⁴ Cimo ico twingacita pa kulanga ukuti tulatasha sana pa fyo Lesa no Mwana wakwe batucitila, kulenga abantu bambi baba Inte sha kwa Yehova kabili abasambi ba kwa Yesu. (Mat. 28:​19, 20) Ifi fine e fyo umutumwa Paulo acitile pa kutasha Lesa na Kristu. Alishibe ukuti ico Yehova afwaisha ukucita kuti “abantu balekanalekana bakapusuke no kwishiba bwino bwino icine.” (1 Tim. 2:​3, 4) Alebomba apo engapesha mu mulimo wa kubila imbila nsuma “pa kuti mu nshila iili yonse apususheko bamo.”—1 Kor. 9:​22, 23.

15. Ukulingana na mashiwi yaba pa Amalumbo 1:​2, cinshi icingalenga twaba ne nsansa?

¹⁵ Uwaimbile amalumbo alondolwele umuntu uwa nsansa ukuti “asekelela mu mafunde ya kwa Yehova” kabili ‘ayatontonkanyapo akasuba no bushiku.’ (Amalu. 1:​1-3) Umwaume umo uwapilibwileko Baibo alandile pali ici cikomo ukuti, umuntu “uulefwaya ukuti Lesa alemutungulula afwile ukulafwaya Icebo ca kwa Lesa, ukulacibelenga, kabili afwile no kulatontonkanya pa fyo alebelenga pa nshita yalepa.” Kabili alandile no kuti “nga ca kuti uulebelenga Baibo afilwa ukubelenga pa bushiku bumo ninshi aonaula fye inshita.” Na imwe kuti mwatemwa sana ukubelenga Baibo kabili ilyo mulebelenga mulemona ifyo amalyashi mulebelenga e lyo na malyashi yambi yaikatana. Ala calicindama sana ukubelenga ifyebo fyonse ifyo balemba mu Cebo ca kwa Lesa!

16. Finshi tukasambilila mu cipande cikonkelepo?

¹⁶ Ifyebo ifyo Lesa alemba mu Cebo cakwe tafyakosa ukumfwa. Mu cipande cikonkelepo tuli no kusambilila icine icashika, e kutila itempele lya mampalanya ilikalamba ilya kwa Yehova, ilyo Paulo alandile muli kalata alembeele Abena Kristu AbaHebere. Lekeni ifyo tukasambilila muli ici cipande fikalenge mukalesekelela.