Amashiwi ayaba pali ili ilembo yalanga ukuti umutumwa Paulo alelanda pa bufwayo bwa kwa Lesa ubwaba mu Baibolo.

Ilingi line, mu mpapulo shesu tulanda pe lembo lya AbaHebere 4:12 pa kulanga ukuti Baibolo yalikwata amaka ya kwalula abantu, kabili ca cine yalikwata amaka ya kwalula abantu. Na lyo line, kuti cawama ukwishibilapo na fimbi pa fyaba mu cipandwa 4 ice buuku lya AbaHebere. Paulo alekoselesha Abena Kristu abaHebere ukulacita ifintu ukulingana no bufwayo bwa kwa Lesa ubwalembelwe mu malembo ya mushilo. Paulo alandile pa bena Israele abo Lesa alubwile mu Egupti ukuti baali no kwingila mu calo ‘umwali umukaka no buci,’ umo baali no kwikala mu mutende.—Ukufu. 3:8; Amala. 12:9, 10.

Ubu bwali bufwayo bwa kwa Lesa. Lelo abena Israele balitalamika imitima yabo kabili tabatwalilile ukuba ne citetekelo, e ico abengi tabaingile mu kutuusha. (Impe. 14:30; Yosh. 14:6-10) Na lyo line, Paulo alilandile no kuti kucili “ubulayo bwa kwingila mu kutuusha kwakwe” e kutila mu kutuusha kwa kwa Lesa. (Heb. 3:16-19; 4:1) Ubu “ubulayo” lubali lwa bufwayo bwa kwa Lesa. Na ifwe bene kuti twabelenga pa bufwayo bwa kwa Lesa mu Baibolo no kulacita ukulingana no bufwayo bwakwe. Pa kulanga bwino bwino ukuti ubu ubulayo bwa mu Malembo, Paulo ayambwile amashiwi ayaba pa Ukutendeka 2:2 na pa Amalumbo 95:11.

Tufwile ukulasekelela ‘apo kucili ubulayo bwa kwingila mu kutuusha kwa kwa Lesa.’ Twalicetekela ukuti ubu bulayo bwa mu Baibolo bukafikilishiwa, kabili twalitendeka na kale ukwingila muli uku kutuusha. Pa kwingila muli uku kutuusha tatukonka Amafunde ya kwa Mose nelyo ukulabomba imilimo imbi iisuma pa kuti Yehova atutemwe. Lelo tulingile ukuba ne citetekelo pa kuti tutwalilile ukucita ifintu ukulingana no bufwayo bwa kwa Lesa. Na kabili, nga fintu tulandilepo kale, abantu abengi mwi sonde lyonse balitendeka ukusambilila Baibolo no kwishiba ubufwayo bwa kwa Lesa. Abengi balyaluka, balikwata icitetekelo kabili balibatishiwa, ne ci cilelangilila fye ukuti “icebo ca kwa Lesa ca mweo kabili ca maka.” Ubufwayo bwa kwa Lesa ubwaba muli Baibolo bwalyalula ubumi bwesu kabili bukatwalilila ukutwalula.