1. Ilyo kwashele imyaka iinono ukuti umutumwa Petro afwe, mulimo nshi uo Yehova amwebele ukubomba?

 UMUTUMWA Petro alibombele Yehova ne cishinka pa myaka iingi. Alibombele pamo na Yesu umulimo wa kubila imbila nsuma, alitendeke ukubila imbila nsuma ku bashali abaYuda, kabili aishileba na mwi bumba litungulula. Ilyo kwashele imyaka iinono ukuti Petro afwe, Yehova alimupeele imilimo na imbi iingi. Nalimo mu 62 ukufika mu 64 ninshi Yesu alibwelelamo ku muulu, Yehova alibomfeshe Petro ukulemba amakalata yabili aya mu Baibo, e kutila, 1 na 2 Petro. Petro alicetekele ukuti Abena Kristu bali no kusambililako kuli aya makalata yabili pa numa ya mfwa yakwe.—2 Pet. 1:​12-15.

2. Mulandu nshi twingalandila ukuti amakalata Petro alembele, yalembelwe pa nshita yalinga?

² Petro alembele aya makalata pa nshita ilyo Abena Kristu banankwe bali no “bulanda pa mulandu wa macushi ayalekanalekana.” (1 Pet. 1:6) Abantu abalecita ifyabipa balefwaya ukuleta ifisambilisho fya bufi ne mibele yabipa mu cilonganino ca Bena Kristu. (2 Pet. 2:​1, 2, 14) Tapali na kukokola, “impela ya fyonse” yali no kwisa pa Bena Kristu abaleikala mu Yerusalemu. Abashilika abena Roma bali no konaula umusumba wa Yerusalemu e lyo ne mitekele ya baYuda. (1 Pet. 4:7) Ukwabula no kutwishika, amakalata ayo Petro alembele yali no kulenga Abena Kristu ukutwalilila aba cishinka te mulandu na mafya bakwete, kabili yali no kubalenga baipekanya ku mafya ayali no kwisa. b

3. Mulandu nshi tulingile ukubelengela amakalata yabili ayo Petro alembele?

 ³ Nangu ca kuti Petro alembeele Abena Kristu ba kubalilapo aya makalata, Yehova alilengele yaba mu Cebo Cakwe. Kanshi fingi twingasambililako kuli aya makalata. (Rom. 15:4) Apo twikala mu calo umo abantu baba ne mibele yabipa, na ifwe tulakwata amafya ayengalenga catukosela ukubombela Yehova. Na kabili, nomba line kuli no kuba ubucushi ubukalamba ukucila pa bucushi ubwaonawile imitekele ya baYuda. Kwaliba fimo ifyacindama ifyo tusanga mu makalata yabili ayo Petro alembele. Ifyo tubelenga muli aya makalata kuti fyalenga twalaipekanishisha ku bushiku bwa kwa Yehova, twaleka ukulatiina abantu, kabili twatemwana nga nshi. Na kabili kuti fyalenga baeluda balasakamana bwino impaanga.

4. Ukulingana na amashiwi yaba pali 2 Petro 3:​3, 4, finshi fingalenga icitetekelo cesu canaka?

⁴ Twikala na bantu abashacetekela amasesemo yaba mu Baibo. Abakaanya kuti balatupumya ukuti kale twatendeka ukulanda ukuti impela ili no kwisa. Bamo batila impela tayakese. (Belengeni 2 Petro 3:​3, 4.) Nga ca kuti uulelanda aya mashiwi untu tuleshimikilako, uo tubomba nankwe nelyo ni lupwa wesu, kuti twafilwa ukuba ne citetekelo. Petro alilandile pa fingatwafwa.

5. Cinshi cingalenga twatekanya ilyo tulelolela ukuti impela ikese? (2 Petro 3:​8, 9)

⁵ Bamo batontonkanya ukuti Yehova alekokola ukuleta impela. Ifyo Petro alembele kuti fyalenga twalamona ifintu nge fyo Yehova afimona, pantu filatwibukishako ukuti ifyo Yehova amona inshita fyalipusana ne fyo tuimona. (Belengeni 2 Petro 3:​8, 9.) Kuli Yehova imyaka 1,000 aimona fye ngo bushiku bumo. Yehova alitekanya, tafwaya umuntu nangu umo ukonaulwa. Ilyo ubushiku bwakwe bukafika, akaleta impela. Kanshi nacicindama ukubomfya inshita iisheleko ukulabila imbila nsuma ku bantu aba pe sonde.

6. Finshi twingacita pa kuti ‘tulefulukisha’ ubushiku bwa kwa Yehova? (2 Petro 3:​11, 12)

⁶ Petro atukoseleshe ‘ukulafulukisha ukubapo kwa bushiku bwa kwa Yehova.’ (Belengeni 2 Petro 3:​11, 12.) Kuti twafuluka shani ubushiku bwa kwa Yehova? Kuti twacita ifi nga ca kuti cila bushiku tuletontonkanya pa mapaalo tukaipakisha mu calo cipya. Mule-elenganya ukuti mulepeema akamwela akasuma, mulelya ifya kulya ifisuma, mulesengela ifibusa na balupwa ababuushiwe, kabili mulesambilisha abantu abaliko akale sana ifyo amasesemo ya mu Baibo yafikilishiwe. Nga mule-elenganya ifi, mukalaipekanishisha ku bushiku bwa kwa Yehova kabili mukashininkisha ukuti tuli mu nshiku sha kulekelesha. “Ukwishibila libela ifi fintu,” kuti kwalenga ‘twikasendelwa pamo’ na bakasambilisha ba bufi.—2 Pet. 3:17.

7. Finshi fingacitika nga ca kuti tuletiina abantu?

⁷ Apo twalishiba ukuti ubushiku bwa kwa Yehova nabupalama, tulabomba apapelele amaka yesu ukubila imbila nsuma. Lelo inshita shimo tulomfwa umwenso ukubila imbila nsuma. Mulandu nshi tumfwila umwenso? Pantu limo tulatiina ifyo abantu bengatontonkanya nelyo ifyo bengatucita nga tulebila imbila nsuma. Ifi fine e fyacitike kuli Petro. Mu nshita ya bushiku ilyo Yesu ashilafwa, Petro alyumfwile umwenso ukuisokolola ukuti musambi wa kwa Yesu kabili alikeene na Yesu. (Mat. 26:​69-75) Nomba Petro alilekele ukutiina abantu kabili pa numa alembele ukuti: “Mwilatiina ico batiina kabili mwilasakamana.” (1 Pet. 3:14) Amashiwi Petro alembele  yalalenga twashininkisha ukutila kuti twaleka ukutiina abantu.

8. Cinshi icingalenga twaleka ukutiina abantu? (1 Petro 3:15)

⁸ Finshi twingacita pa kuti tuleke ukutiina abantu? Petro atile: “Mulecindika Kristu mu mitima yenu ukuti ni Shikulu.” (Belengeni 1 Petro 3:15.) Tufwile ukulaibukisha ukuti Kristu Yesu ni Mfumu yesu kabili alikwata sana amaka. Nga ca kuti muleumfwa umwenso nelyo insoni sha kubila imbila nsuma, muleibukisha ukuti Yesu ni Mfumu yesu. Mule-elenganya ukuti aleteka mu muulu ninshi kuli na bamalaika abengi nga nshi. Muleibukisha ukuti balimupeela “amaka yonse mu muulu na pano isonde,” no kuti akulaba “na imwe inshiku shonse mpaka na ku mpela ya calo.” (Mat. 28:​18-20) Petro atukoseleshe ukuti “lyonse muleba abaiteyanya” ukulanda pa fyo mwasuminamo. Finshi mwingacita nga mulefwaya ukulabila imbila nsuma pa ncito, pa sukulu, nelyo ku fifulo fimbi? Muletontonkanishisha limo ilyo mwingabila imbila nsuma, e lyo na pa fyo mwalayalanda. Mulepepa kuli Yehova ukuti mushipe kabili mulecetekela ukuti akamwafwa ukuleka ukutiina abantu.—Imil. 4:29.

9. Bushe inshita imo Petro alangile shani ukuti alifililwe ukutemwa abantu? (Moneni ne cikope.)

⁹ Petro alisambilile ukuti alingile ukutemwa abantu. Na kuba, epo ali ilyo Yesu atile: “Ndemupeela  ifunde ilipya, ilya kuti muletemwana; ifyo namutemenwe, e fyo na imwe muletemwana.” (Yoh. 13:34) Nangu ca kuti Petro alisambilile ukutemwa abantu, inshita imo alilekele ukuliila pamo na ba bwananyina abashali abaYuda pa mulandu wa kuti aletiina Abena Kristu abali abaYuda. Umutumwa Paulo aebele Petro ukuti ali no “bumbimunda.” (Gal. 2:​11-14) Petro alyumfwile ifyo bamulungike kabili alisambilileko. Mu makalata yonse yabili ayo alembele, alandile ukuti tatulingile fye ukumfwa ukuti twalitemwa aba bwananyina lelo tulingile no kulabalanga ukuti twalibatemwa.

10. Cinshi cingalenga ‘tuletemwa aba bwananyina ukwabula ubumbimunda’? (1 Petro 1:22)

¹⁰ Petro alembele ukuti tufwile “ukutemwa aba bwananyina ukwabula ubumbimunda.” (Belengeni 1 Petro 1:22.) Nga tulecita ifi ninshi ‘tuleumfwila icine.’ Muli ici icine mwaba no kusambilila ukuti “Lesa taba na kapaatulula.” (Imil. 10:​34, 35) Te kuti tumfwile ifunde ilyo Yesu atupeele ilya kuti muletemwana nga ca kuti tuletemwa fye aba bwananyina bamo. Kwena kuti twatemwa aba bwananyina bonse, lelo te kuti tubatemwe cimo cine nga filya cali na kuli Yesu. (Yoh. 13:23; 20:2) Lelo Petro aletwibukishako ukuti tufwile “ukutemwa aba bwananyina” pantu lupwa lwesu.—1 Pet. 2:17.

11. Bushe amashiwi ya kuti “muletemwana nga nshi ne mitima yenu yonse,” yalola mwi?

¹¹ Petro atukoseleshe ukuti “muletemwana nga nshi ne mitima yenu yonse.” Amashiwi ya kuti “muletemwana nga nshi” ayo Petro alandilepo pali ili lembo, yalosha mu kuti tufwile ukutemwa na bantu abo citukosela ukubatemwa. Ku ca kumwenako, kuti twacita shani nga ca kuti uwa bwananyina atukalifya? Nalimo kuti twalafwaya na ifwe ukumukalifya mu nshita ya kumutemwa. Nomba Petro alisambilile kuli Yesu ukuti ukubwesesha ububi pa bubi kulafulwisha Lesa. (Yoh. 18:​10, 11) Petro alembele ukuti: “Mwilabwesesha ububi pa bubi atemwa umusaalula pa musaalula, lelo mulepaala.” (1 Pet. 3:9) Nga muli no kutemwa, mukaba ne cikuuku kabili mukalalangulukilako na bamukalifya.

12. (a) Bushe ukutemwa aba bwananyina kuti kwalenga twacita finshi? (b) Ukulingana ne fyo mwatambile muli vidio itila Tulecita Ifingalenga Twatwalilila Ukuba Abaikatana, finshi mulefwaisha ukulacita?

¹² Muli kalata ya kubalilapo, Petro alibomfeshe amashiwi yamo yene aya kuti “muletemwana nga nshi.” Uku kutemwa, “kufimba pa membu ishingi.” (1 Pet. 4:8) Nalimo ico Petro alandile aya mashiwi ni co alibukishe ifyo Yesu abasambilishe pa kwelela, imyaka ku numa. Pali ilya nshita, Petro alemona ukuti nga aelela umuntu munankwe ukufika ku “miku 7” ninshi muntu umusuma. Nomba Yesu alisambilishe Petro ifyo na ifwe tusambilila ukuti tufwile ukwelela umuntu “imiku 77,” e kutila ukwabula ukupenda. (Mat. 18:​21, 22) Nga ca kutila cilamukosela ukwelela, te kwesha ukunenuka. Limo fwe babomfi ba kwa Yehova cilatukosela ukwelela bambi pantu tatwapwililika. Nacicindama sana pali ino nshita ukwesha apo mwingapesha ukwelela aba bwananyina no kutendeka ukumfwana. c

13. Mulandu nshi cingafisha kuli baeluda ukucema aba bwananyina?

¹³ Petro afwile talabile ifyo Yesu amwebele ilyo abuushiwe. Amwebele ati: “Cema utwana twandi utwa mpaanga.” (Yoh. 21:16) Nga ni mwe baeluda, mwalishiba ukuti na imwe mufwile ukucema utwana twa mpaanga. Nomba limo baeluda cilabakosela ukusanga inshita ya  kubomba uyu mulimo wacindama. Baeluda bafwile ukushininkisha ukuti aba mu lupwa lwabo nabakwata fyonse ifyo balekabila, bafwile ukushininkisha no kuti nababika na mano ku ba mu lupwa lwabo, kabili bafwile no kulenga aba mu lupwa lwabo ukupalama sana kuli Yehova. Na kabili baeluda e baba pa ntanshi mu kubila imbila nsuma, ukupekanya e lyo no kulanda amalyashi pa kulongana, pa kulongana kwa muputule e lyo no kwa citungu. Baeluda bamo baliba na mu Amakomiti ya Kumfwaninamo ne Fipatala nelyo balabombako imilimo imo mu LDC. Ukwabula no kutwishika baeluda balikwata imilimo iingi!

14. Cinshi cingalenga baeluda ukulacema impaanga? (1 Petro 5:​1-4)

¹⁴ Petro aebele baeluda banankwe ukuti: “Mulecema umukuni wa kwa Lesa.” (Belengeni 1 Petro 5:​1-4.) Nga ni mwe baeluda, twalishiba ukuti mwalitemwa aba bwananyina kabili mulafwaya sana ukubacema. Lelo inshita shimo kuti mwalaumfwa kwati mwalikwatisha ifya kucita ifingi ica kuti mwafilwa no kulacema aba bwananyina. Finshi mwingacita nga muleumfwa ifi? Mulepepa kuli Yehova no kumweba ifyo muleumfwa. Petro alembele ukuti: “Uulebombela bambi, abombe ku maka ayo Lesa amupeela.” (1 Pet. 4:11) Aba bwananyina bamo nalimo balikwata amafya ayashingapwa muli cino calo cabipa. Muleibukisha ukuti Yesu Kristu “umucemi mukalamba,” e wingabafwa bwino sana ukucila ne fyo mwingabafwa. Kuti abafwa pali ino nshita kabili akabafwa na mu calo cipya. Ico Yehova afwaya fye baeluda ukulacita, kutemwa aba bwananyina, ukulabacema e lyo no kuba “abantu abo umukuni wingapashanya.”

15. Bushe eluda umo acema shani impaanga? (Moneni ne cikope.)

¹⁵ Ba William ababomba bueluda pa myaka iingi balimona ifyo ukucema impaanga kwacindama. Ilyo icikuko ca COVID-19 catendeke, ba William e lyo na baeluda banabo balitendeke ukulalanshanya na bakasabankanya mu mabumba baba cila mulungu. Balilandile umulandu balecitila ifi, batile: “Aba bwananyina abengi baali beka pa mayanda kabili ifi baleba beka nalimo kuti batendeka ukutontonkanya pa fyabipa.” Uwa bwananyina nga nakwata ubwafya, ba William balakutikisha pa kuti beshibe ifimusakamike nelyo ifyo alekabila. Lyena balafwaya impapulo nelyo  amavidio pa webusaiti yesu ayo bengabomfya pa kukoselesha uwa bwananyina. Ba William balandile ukuti: “Ino e nshita tulingile ukucema sana bakasabankanya. Filya tubombesha ukwafwa abantu abengi ukusambilila pali Yehova, e fyo tulingile no kubombesha ukucema impaanga sha kwa Yehova pa kuti batwalilile ukuba mu cine.”

16. Kuti twabomfya shani ifyo twasambilila mu makalata yabili ayo Petro alembele?

¹⁶ Twalanda fye pa fintu ifinono ifyo twingasambililako ku makalata yabili ayo Petro alembele. Nalimo namumonako mumo umo mulekabila ukwaluka. Ku ca kumwenako, bushe kuti mwatemwa ukulatontonkanya sana pa mapaalo ayo mukakwata mu calo cipya? Bushe mulefwaisha ukulabila imbila nsuma pa ncito, pa sukulu, nelyo ku fifulo fimbi? Bushe namumonako fimo ifyo mwingacita pa kuti mulelanga aba bwananyina ukuti mwalibatemwa nga nshi? Baeluda, bushe mulefwaisha ukulacema impaanga sha kwa Yehova mu kuitemenwa? Nga mwatontonkanya sana pali ifi fipusho nalimo kuti mwamona umo mulingile ukwaluka, lelo mwifuupuka. “Shikulu wa cikuuku,” kabili akamwafwa ukwaluka. (1 Pet. 2:3) Petro atukoseleshe ukuti: “Lesa . . . umwine akapwisha ukumusambilisha, akamwikasha, kabili akamukosha.”—1 Pet. 5:10.

17. Finshi ifikafumamo nga ca kuti twatwalilila ukubombela Yehova no kuleka ukuti apwishe ukutusambilisha?

¹⁷ Petro pa kubala, talemona kwati alingile ukuba pamo na Yesu. (Luka 5:8) Nomba apo Yehova na Yesu balemwafwa, Petro alitwalilile ukuba umusambi wa kwa Kristu. Ne ci calengele Yehova ukusuminisha Petro “ukwingila mu bufumu bwa muyayaya ubwa kwa Shikulwifwe kabili Umupusushi Yesu Kristu.” (2 Pet. 1:11) Ici cali cilambu icisuma! Na imwe nga mwatwalilila ukubombela Yehova kabili mwaleka na Yehova apwisha ukumusambilisha, mukaba no mweo wa muyayaya. Kabili “mukapokelela icikafuma mu citetekelo cenu, e kutila ipusukilo lya myeo yenu.”—1 Pet. 1:9.