1. Mulandu nshi ifintu fyonse fyabela fya kwa Yehova? (Moneni icikope pa muulu.)

IFINTU fyonse fya kwa Yehova! “Imyulu ya myulu, pamo ne sonde na fyonse ifyabapo” fyakwe. (Amala. 10:14; Ukus. 4:11) Apo Yehova e wabumbile abantu, ifwe bonse tuli bakwe. (Amalu. 100:3) Na lyo line ukutula fye na kale, Lesa alasala abantu bamo ukuba abantu bakwe abaibela.

2. Ni bani Baibolo ilandapo ukuti bantu ba kwa Yehova abaibela?

² Ku ca kumwenako, Amalumbo 135 yalanda pa bena Israele abali ne cishinka ukuti bali “bantu bakwe abaibela.” (Amalu. 135:4) Na kabili mwi buuku lya kwa Hosea mwalembelwe ubusesemo bwa kuti bamo abashali bena Israele bali no kuba abantu ba kwa Yehova. (Hos. 2:23) Ubusesemo bwa kwa Hosea bwafikilishiwe ilyo Yehova atendeke ukusala na bashali abaYuda ukuba pa bakateka na Kristu. (Imil. 10:45; Rom. 9:23-26) Ulu “uluko lwa mushilo” luko ‘ulwaibela’ ulwa kwa Yehova. Ababa muli ulu luko balisubwa no mupashi wa mushilo kabili abasala ukuti bakaleikala ku muulu. (1 Pet. 2:9, 10) Bushe Yehova amona shani Abena Kristu abengi ababa ne cishinka abakwata isubilo lya kwikala pano calo? Nabo bene Yehova abeta ukuti “bantu bandi” kabili “abasalwa bandi.”—Esa. 65:22.

3. (a) Ni bani ababa ifibusa fya kwa Yehova muno nshiku? (b) Finshi twalasambilila muli cino cipande?

 ³ Muno nshiku, ababa mu “mukuni unono” bakwata isubilo lya kuya ku muulu e lyo aba mu “mpaanga shimbi” bakwata isubilo lya kwikala pano isonde. Aya mabumba yabili yapanga “umukuni umo” kabili Yehova abamona ukuti bantu bakwe. (Luka 12:32; Yoh. 10:16) Ukwabula no kutwishika, tulatasha Yehova pa kutusuminisha ukuba ifibusa fyakwe. Muli cino cipande twalasambilila pa fyo twingacita pa kuti tuletasha pa fyo Yehova atupeela ishuko lya kuba abantu bakwe.

4. Cinshi cimo ico tulingile ukucita pa kutasha Yehova pa kutusuminisha ukuba ifibusa fyakwe, kabili Yesu acitile shani ifi?

⁴ Tulanga ukuti tulatasha Yehova no mutima onse nga twaipeela kuli ena. Nga twabatishiwa, tulanga pa cintubwingi ukuti tuli ba kwa Yehova kabili e o tunakila. (Heb. 12:9) Ifi fine e fyo Yesu acitile ilyo abatishiwe, cali kwati aleeba Yehova ati: “Ukucita ukufwaya kwenu, mwe Lesa wandi, e ko natemwa.” (Amalu. 40:7, 8) Yesu aliipeele ku kucita ukufwaya kwa Yehova, nangu ca kuti ukutula apo afyalilwe ali mu lupwa ulwaipeele kuli Lesa.

5, 6. (a) Bushe Yehova acitile shani ilyo Yesu abatishiwe? (b) Mulandu nshi Yehova atashisha nga twaipeela kuli ena nangu ca kuti ifintu fyonse fyakwe? Langilileni.

⁵ Bushe Yehova aumfwile shani ilyo Yesu abatishiwe? Baibolo itila: “Ilyo Yesu abatishiwe, apo pene afumine mu menshi; kabili, moneni! umuulu waliswike, kabili amwene umupashi wa kwa Lesa uleika kwati ni nkunda, uleisa pali ena. Moneni! kabili, kwali ne shiwi ukufuma mu muulu aliti: ‘Uyu e Mwana wandi, uwatemwikwa, uo nsekelamo.’” (Mat. 3:16, 17) Nangu ca kuti ukutula na kale Yesu ali wa kwa Wishi wa ku muulu, Yehova alitemenwe ukumona Umwana wakwe aitemenwa ukucita ukufwaya kwakwe. Yehova alatemwa nga twaipeela kuli ena kabili akatupaala.—Amalu. 149:4.

⁶ Natulangilile, elenganyeni ukuti umufyashi umwaume apeela akamwana akakashana ifya kulya ifisuma. Lyena kabulapo fimo kapeela bawishi. Bushe ifi ifya kulya tafyacifuma kuli bawishi? Bushe kuti kapeela shani bawishi ifya kulya ifyo bacikapeela? Umufyashi uwatemwa umwana wakwe te kuti atontonkanye na pa mepusho ya musango uyu. Lelo kuti apoka ubupe ubo umwana wakwe amupeela pantu ninshi umwana alelanga ukuti alimutemwa. Yehova na o alatemwa sana nga twaipeela kuli ena eka fye.—Ukufu. 34:14.

7. Finshi Malaki alandile pa fyo Yehova omfwa pa baitemenwa ukumubombela?

⁷ Belengeni Malaki 3:16. Nga tamulaipeela kabili tamulabatishiwa, tontonkanyeni pa busuma bwaba mu kuipeela no kubatishiwa. Kwena ukutula apo mwafyalilwa muli ba kwa Yehova nga filya fine abantu bonse baba. Lelo muletontonkanya pa fyo Yehova engatemwa nga mwaipeela kuli ena ku kucita ukufwaya kwakwe pa kulanga ukuti e walinga ukuteka ku muulu na pano isonde. (Amapi. 23:15) Yehova na o alishiba abafwaya ukumubombela kabili alalemba amashina yabo mwi “buuku lya kwibukisha.”

8, 9. Finshi Yehova afwaya abalembwa mwi “buuku lya kwibukisha” balecita?

⁸ Tufwile ukucita fimo pa kuti Yehova alembe amashina yesu mwi “buuku lya kwibukisha.” Malaki alandile ukuti tufwile ‘ukulatiina Yehova no kulatontonkanya pe shina  lyakwe.’ Nga tulepepa umuntu nelyo icintu cimbi, Yehova kuti afumya amashina yesu mwi buuku lya mweo.—Ukufu. 32:33; Amalu. 69:28.

⁹ Kanshi ukuipeela te kulaya fye Yehova ukuti tukalacita ukufwaya kwakwe no kubatishiwa twabatishiwa pantu tuipeela fye no kubatishiwa umuku umo, lelo ukupepa Yehova kwena ni lyonse. Pa kuti twingatwalilila ukuba ku lubali lwa kwa Yehova, tulingile ukulamumfwila muli fyonse ifyo tucita cila bushiku.—1 Pet. 4:1, 2.

10. Bupusano nshi bulingile ukuba pa babombela Yehova na pa bashimubombela?

¹⁰ Mu cipande cafumineko twasambilile pali Kaini, Solomone na pa bena Israele. Aba bonse balemona kwati balepepa Yehova, lelo tabali ne cishinka kuli ena. Ifyo aba bantu bacitile filanga ukuti abantu ba kwa Yehova balingile ukutemwa ubulungami no kupata ifyabipa. (Rom. 12:9) E mulandu wine pa numa Malaki alanda pe “buuku lya kwibukisha,” Yehova alandiile ukuti pakaba ubupusano pa “mulungami no mubifi,” na pa “ubombela Lesa no ushimubombela.”—Mal. 3:18.

11. Finshi tulingile ukucita pa kuti abantu belatwishika ukuti tubombela Yehova eka?

¹¹ Inshila imbi twingalangilamo ukuti tulatasha pa fyo Yehova atusala ukuba abantu bakwe, kulakula mu fya kwa Lesa pa kuti abantu bonse “balemona” ukuti tulelunduluka. (1 Tim. 4:15; Mat. 5:16) Yipusheni amuti: ‘Bushe abantu balamona ukuti ndi wa cishinka kuli Yehova? Bushe ndaitendekela ukweba abantu ukuti ndi Nte ya kwa Yehova?’ Apo Yehova alitusala ukuba abakwe, kuti aumfwa sana ububi nga ca kuti tuleshimunuka ukweba abantu ukuti tuli bantu bakwe.—Amalu. 119:46; belengeni Marko 8:38.

12, 13. Finshi ba Nte bamo bacita ifilenga abantu bafilwa ukubeshiba ukuti ni Nte sha kwa Yehova?

¹² Ku ca bulanda ba Nte bamo balakonkelela  “umupashi uwa ici calo” ica kuti tabapusana sana na bantu abashipepa Yehova. (1 Kor. 2:12) Uyu mupashi ulalenga umuntu aba no ‘lunkumbwa lwa mubili.’ (Efes. 2:3) Ku ca kumwenako, nangu ca kuti balatufunda imiku iingi pa mifwalile na pa misakwile ne fyo tuiyemfya, bamo balasalapo ukufwala ifya kufwala ifishili fya mucinshi kabili balacilamo ukuiyemfya. Balafwala ifya kufwala ifyapapatila kabili ifyabengela nangu fye ni ku kulongana. Na kabili balabeya, balaluka no kusakula umushishi nga bantu abashipepa. (1 Tim. 2:9, 10) Nga bali pamo na bantu bambi kuti cayafya no kwishiba Inte ya kwa Yehova no uushili Nte.—Yako. 4:4.

¹³ Kwaliba na fimbi ifyo ba Nte bamo bacita ifilanga ukuti tabapata imisango ya muli cino calo. Ifyo bacinda ne fyo bacita ilyo bali ku maparte te fyo Umwina Kristu alingile ukucita. Balabika ifikope fyabo pa Intaneti kabili balalemba ifyebo pa mawebusaiti yamo ifilanga ukuti batungululwa no mupashi wa ici calo. Nangu ca kuti nalimo tabacitapo ulubembu ulukalamba ulwa kuti baeluda babafundilapo, kuti balenga aba bwananyina abaleesha ukuba ne mibele iisuma balamona kwati ifyo balecita fili fye bwino.—Belengeni 1 Petro 2:11, 12.

14. Finshi tulingile ukulacita pa kuti bucibusa bwesu na Yehova bwikapwa?

¹⁴ Fyonse ifya muli cino calo filenga abantu baba no “lunkumbwa lwa mubili no lunkumbwa lwa menso, no kuitakishisha pa fyo umuntu akwata.” (1 Yoh. 2:16) Lelo apo tuli ba kwa Yehova, tulingile “ukukaana imikalile iishili ya bwina Lesa no lunkumbwa lwa pano calo,” kabili tufwile ‘ukuba na mano, ukuba abalungami no kuba na bukapepa muli buno bwikashi bwa nomba.’ (Tito 2:12) Imilandile yesu, imiliile ne minwene, imifwalile ne misakwile, ifyo tubomba imilimo, e kutila fyonse ifyo tucita filingile ukulenga abantu bamona ukuti tupepa fye Yehova eka.—Belengeni 1 Abena Korinti 10:31, 32.

15. Mulandu nshi tulingile ukubela ne cikuuku ku ba bwananyina no kubatemwa?

¹⁵ Ifyo tucita ku ba bwananyina filalanga nampo nga tulatasha pa kuba ifibusa na Yehova nelyo iyo. Nabo bene ba kwa Yehova. Nga tuletontonkanya pali ici cishinka, lyonse tukalaba ne cikuuku ku ba bwananyina kabili tukalabatemwa. (1 Tes. 5:15) Yesu aebele abasambi bakwe ati: “Nga muletemwana, e lyo bonse bakeshiba ukuti muli basambi bandi.”—Yoh. 13:35.

16. Finshi Amafunde ya kwa Mose yalandapo ifilanga ifyo Yehova omfwa pa bantu bakwe?

¹⁶ Pa kuti twishibe ifyo tufwile ukulamona aba bwananyina mu cilonganino, tontonkanyeni pali ifi. Ifipe fyonse ifya pe tempele lya kwa Yehova fyalipeelwe kuli ena, nelyo fyalipaatwilweko, balefibomfya fye mu kupepa kwasanguluka. Mu Mafunde ya kwa Mose balilondolwele ifyo balingile ukulasunga ifi ifipe, kabili abashalekonka ifyo amafunde yalandile balebepaya. (Impe. 1:50, 51) Nga ca kuti Yehova alecingilila ifipe ifishipema ifyo balebomfya mu kupepa, ninshi alacilapo ukucingilila abantu bakwe abaipeela kuli ena abo asala ukuba abantu bakwe! Yehova aebele abantu bakwe ati: “Uwakumya pali imwe ninshi akumya pa mboni ya linso lyandi.”—Seka. 2:8.

17. Finshi Yehova ‘abikako amano no kukutika’?

¹⁷ Malaki alandile pali Yehova ukuti “aalebikako amano no kukutika” ilyo abantu bakwe balelanshanya. (Mal. 3:16) Ca cine Yehova “alishiba abakwe.” (2 Tim. 2:19) Alishiba fyonse ifyo tucita ne fyo tulanda. (Heb. 4:13) Nga tatuli ne cikuuku ku ba bwananyina, Yehova ‘alabikako amano kabili alakutika.’ Nga tulapokelelana, tulapeelana, tulabelelana uluse kabili nga tuli ne cikuuku, Yehova alamona.—Heb. 13:16; 1 Pet. 4:8, 9.

18. Finshi tufwile ukulacita pa kulanga ukuti tulatasha pa kuba abantu ba kwa Yehova?

¹⁸ Ukwabula no kutwishika, tulafwaya sana ukulanga Yehova ukuti tulatasha pa fyo atusala ukuba abantu bakwe. Twalishiba ukuti tulingile ukuipeela kuli ena pa kulanga ukuti twalisumina ukuba abakwe. Nangu ca kuti twikala “mu nkulo iyapondama kabili iyapotama,” tufwaya abantu balemona ukuti ‘tatwaba na mulandu kabili tuli ba kaele,’ kabili ‘tubalika nge fyengelo muli ici calo.’ (Fil. 2:15) Tulakaana ifyabipa. (Yako. 4:7) Na kabili twalitemwa aba bwananyina kabili tulabacindika, twalishiba ukuti nabo bene ba kwa Yehova.—Rom. 12:10.

19. Bushe Yehova alambula shani abantu bakwe?

¹⁹ Baibolo yatulaya ukuti: “Yehova takalekeleshe abantu bakwe.” (Amalu. 94:14) Nangu twingakwata ubwafya ubukalamba shani ubu bulayo bukafikilishiwa. Nangu fye ni mfwa te kuti ilenge Yehova aleke ukututemwa. (Rom. 8:38, 39) Baibolo itila, “Nga tuli no mweo, ni kuli Yehova tubela aba mweo, kabili nga twafwa, ni kuli Yehova tufwila. E ico nga tuli aba mweo kabili nangu nga twafwa, tuli ba kwa Yehova.” (Rom. 14:8) Tulafwaisha ubushiku bukafike ilyo Yehova akabuusha ifibusa fyakwe fyonse ifya cishinka. (Mat. 22:32) Na pali ino ine nshita Yehova alatupaala. Baibolo itila, “lwalipaalwa uluko ulo Yehova e Lesa wa luko, abantu abo asala ukuba abakwe.”—Amalu. 33:12.