1-2. (a) Bushe Yehova alanda shani na bantu? (b) Finshi twalalandapo muli cino cipande?

YEHOVA alitemwa ukulanda na ifwe. Kale alebomfya bakasesema, bamalaika no Mwana wakwe Kristu Yesu pa kweba abantu ifyo alefwaya bacite. (Amose 3:7; Gal. 3:19; Ukus. 1:1) Muno nshiku alanda na ifwe ukupitila mu Cebo cakwe, Baibolo. Ico atupeelela Icebo cakwe ni co afwaya twishibe ifyo atontonkanya e lyo ne fyo afwaya tulecita.

² Ilyo Yesu ali pano isonde, Yehova alilandile ukufuma ku muulu pa miku itatu. Natulande pa fyo Yehova alandile. Twalalanda na pa fyo twingasambilila ku fyo alandile e lyo ne fyo tunonkelamo.

3. Ukulingana ne lembo lya kwa Marko 1:9-11, finshi Yehova alandile ilyo Yesu abatishiwe, kabili fishinka nshi ifyo amashiwi alandile yalenga twaishiba?

³ Pali Marko 1:9-11 paba ifyo Yehova alandile pa muku wa kubalilapo ilyo alandile ukufuma ku muulu. (Belengeni.) Alandile ati: “Ni we Mwana wandi uo natemwa; ni we nsekelamo.” Ilyo Yesu aumfwile Wishi alanda ifyo amutemenwe ne fyo amucetekele afwile alitemenwe nga nshi! Amashiwi Yehova alandile yalenga twaishiba ifishinka fyacindama fitatu pali Yesu. Ica kubalilapo ca kuti, Yesu Mwana wa kwa Lesa. Ica bubili ca kuti, Yehova alitemwa Umwana wakwe. Ne ca butatu ca kuti, Yehova alasekela mu Mwana wakwe. Natulande pa cishinka cimo na cimo.

4. Bushe Yesu aishileba shani Umwana wa kwa Lesa mu nshila na imbi ilyo abatishiwe?

⁴ “Ni we Mwana wandi.” Aya mashiwi Yehova alandile yalolele  mu kuti Yesu Umwana wakwe uo atemwa aishileba Umwana wakwe mu nshila na imbi. Ilyo Yesu ali ku muulu, ali mupashi kabili ali Mwana wa kwa Lesa. Lelo ilyo abatishiwe, alisubilwe no mupashi wa mushilo. Ilyo asubilwe no mupashi wa mushilo, Lesa alangile ukuti Yesu nomba alesubila ukuti akabwelela ku muulu ku kuba Imfumu iyo Lesa asonta kabili Shimapepo Mukalamba. (Luka 1:31-33; Heb. 1:8, 9; 2:17) Kanshi e calengele Wishi alande ati: “Ni we Mwana wandi” ilyo Yesu abatishiwe.—Luka 3:22.

5. Finshi tufwile ukulacita pa kuti tulelanga ukuti twalitemwa abantu kabili tulabakoselesha nga filya Yehova acita?

⁵ “Ni we . . . natemwa.” Filya Yehova aebele Umwana wakwe ukuti alimutemwa kabili e o asekelamo filetusambilisha ukuti na ifwe tufwile ukulakwatako inshita ya kukoselesha abantu. (Yoh. 5:20) Tulatemwa nga ca kuti uo twabikako amano alelanga ukuti alitutemwa kabili alatasha pa fisuma ifyo tucita. Bamunyinefwe na bankashi mu cilonganino e lyo na ba mu lupwa lwesu nabo balafwaya tulebatemwa kabili tulebakoselesha. Nga tuletasha aba bwananyina, ninshi tulekosha icitetekelo cabo kabili ninshi tulebafwa ukulabombela Yehova ne cishinka. Abafyashi maka maka balingile ukulakoselesha abana babo. Abafyashi nga baletasha abana babo ukufuma pa nshi ya mutima kabili nga balebatemwa, abana bakakoselako mu fya kwa Lesa.

6. Cinshi cingalenga twacetekela Yesu Kristu?

⁶ “Ni we nsekelamo.” Aya mashiwi yalanga ukuti Yehova alicetekele ukuti Yesu ali no kufikilisha ukufwaya kwa kwa Wishi. Yehova alicetekela Umwana wakwe. E ico na ifwe kuti twacetekela ukuti Yesu akafikilisha fyonse ifyo Yehova atulaya. (2 Kor. 1:20)  Nga tuletontonkanya pa fyo Yesu ali, tulafwaisha ukusambililako fimo kuli ena kabili tulafwaisha ukulamupashanya. Na kabili Yehova alicetekela ukuti ababomfi bakwe bonse pamo bakatwalilila ukusambilila ku Mwana wakwe.—1 Pet. 2:21.

7. Ukulingana na Mateo 17:1-5, ni lilali Yehova alandile ukufuma ku muulu, kabili finshi alandile?

⁷ Belengeni Mateo 17:1-5. Umuku walenga bubili uo Yehova alandile ukufuma ku muulu ni lintu Yesu ‘ayalwike.’ Yesu aile na Petro, Yakobo na Yohane pa muulu wa lupili. Ilyo bali pa lupili, aba abatumwa bamwene icimonwa icabapapwishe. Icinso ca kwa Yesu calibekele kabili ifya kufwala fyakwe na fyo fyalibekele. Bamwene abantu babili abaleimininako Mose na Eliya balelanda na Yesu pa mfwa ali no kufwa e lyo na pa kubuuka kwakwe. Nangu ca kuti abatumwa bakwe “baleshipula,” bamwene ici icimonwa ca kupapusha ilyo bashibwike. (Luka 9:29-32) Lyena ikumbi ilyabeka lyalibakupikile, kabili baumfwile ishiwi lya kwa Lesa ukufuma mwi kumbi! Na uyu wine muku Yehova alandile amashiwi yamo yene ayo alandile ilyo Yesu abatishiwe. Atile: “Uyu e Mwana wandi, uo natemwa, uo nsekelamo.” Lelo uyu muku wena Yehova alilundilepo ne shiwi lya kuti: “Muumfweni.”

8. Bushe icimonwa cayafwile shani Yesu na basambi bakwe?

⁸ Cilya cimonwa calelanga ubukata na maka ifyo Yesu ali no kukwata nga atendeka ukuteka mu Bufumu bwa kwa Lesa. Ukwabula no kutwishika, Kristu balimukoseleshe kabili balimukoseshe pa kuti akashipikishe amacushi mpaka ne mfwa. Na kabili cilya cimonwa calengele icitetekelo ca basambi cakoselako. Ici calengele baipekanye ukushipikisha amesho ayo bali no kukwata ku ntanshi kabili calengele baipekanye ukubomba bwino umulimo uwakosa. Pa numa ya myaka nalimo 30, umutumwa Petro alilandile pali ici cimonwa kabili ifi alandilepo filanga ukuti tacilabile.—2 Pet. 1:16-18.

9. Finshi Yesu aebele abasambi bakwe ifyali no kubafwa?

⁹ “Muumfweni.” Ifi Yehova alandile filanga fye apabuuta tuutu ukuti afwaya tulekutika ku Mwana wakwe kabili tulemumfwila. Finshi Yesu alandile ilyo ali pano calo? Alilandile ifintu ifingi ifyo tulingile ukukutika! Ku ca kumwenako, alisambilishe abasambi bakwe ifya kubila imbila nsuma, kabili pa miku iingi alebeba ukuti balingile ukuba abalola. (Mat. 24:42; 28:19, 20) Na kabili alibakoseleshe ukulabombesha no kukananenuka. (Luka 13:24) Yesu akonkomeshe abasambi bakwe ukuti balingile ukutemwana, ukutwalilila ukuba abaikatana, no kulakonka amafunde yakwe. (Yoh. 15:10, 12, 13) Ala ifi Yesu aebele abasambi bakwe fyali no kubafwa sana! Na muno nshiku mwine ifi Yesu aebele abasambi bakwe filatwafwa sana.

10-11. Finshi tufwile ukulacita pa kuti tulelanga ukuti tulomfwa ishiwi lya kwa Yesu?

¹⁰ Yesu atile: “Onse uwaba ku cine, omfwa ishiwi lyandi.” (Yoh. 18:37) Tulanga ukuti tulomfwa ishiwi lyakwe nga ‘tuleshipikishanya no kubelelana uluse.’ (Kol. 3:13; Luka 17:3, 4) Na kabili tulanga ukuti tulomfwa ishiwi lyakwe nga tuli abacincila ilyo tulebila imbila nsuma “mu nshita iiweme, na mu nshita iishiweme.”—2 Tim. 4:2.

¹¹ Yesu atile: “Impaanga shandi shilomfwa ishiwi lyandi.” (Yoh. 10:27) Abasambi ba kwa Kristu balanga ukuti balomfwa ishiwi lya kwa Yesu nga balekutika ifyo alanda kabili nga baleficita no kuficita. Tabapumbulwa na “masakamika ya mikalile.” (Luka 21:34) Lelo babika sana amano ku kukonka ifyo Yesu abeba na  lintu ifintu fyafishe. Aba bwananyina abengi balashipikisha amesho ayakalamba, pamo nga ukubacusha, ubupiina bwa kapela makufi, na masanso ayakalamba. Nangu ca kuti balikwata aya amafya, balitwalilila ukuba aba cishinka kuli Yehova. Yesu alaya aba aba bwananyina ati: “Uwasumina amafunde yandi no kuyakonka, e wantemwa. Kabili uwantemwa, Tata akamutemwa.”—Yoh. 14:21.

12. Cinshi cimbi ico tulingile ukulacita pa kuti tulelanga ukuti tulomfwa ishiwi lya kwa Yesu?

¹² Moneni na cimbi ico tulingile ukucita pa kuti tulelanga ukuti tulomfwa ishiwi lya kwa Yesu: tufwile ukulaumfwila no kulanakila abo asala ukulatutungulula. (Heb. 13:7, 17) Mu myaka fye iinono iyapitapo, ifintu ifingi fyalyaluka mu cilonganino ca kwa Lesa pamo nga ifya kubomfya impapulo ishipya, inshila sha kubililamo imbila nsuma, ifyo ukulongana kwa mu kati ka mulungu kuba, ifya kukuula Amayanda ya Bufumu, ifya kuyawamya, e lyo ne fya kuyasunga. Ala icilonganino ca kwa Lesa cilatutungulula bwino sana kabili cilatusakamana! Kuti twacetekela ukuti Yehova akalatupaala nga tuleibikilishako pa kuti tulekonka ifyo icilonganino cakwe citweba pa nshita iyalinga.

13. Busuma nshi bwaba mu kukonka ifyo Yesu atusambilisha?

¹³ Ifintu filatuwamina nga tulekonka fyonse ifyo Yesu atusambilisha. Yesu alaile abasambi bakwe ukuti ifyo alebasambilisha fyali no kulenga baleba ne nsansa. Alandile ati: “Mwalasanga ukutuusha. Pantu ikoli lyandi talyafina, ne cipe candi calyanguka.” (Mat. 11:28-30) Icebo ca kwa Lesa umwaba na mabuuku ya Mbila Nsuma yane ayalanda pali Yesu na pa fyo alebomba umulimo wa kubila imbila nsuma, cilatusansamusha, cilenga twaba abakosa mu fya kwa Lesa kabili cilatupanda amano. (Amalu. 19:7; 23:3) Yesu atile: “Abapaalwa ni abo abomfwa no kukonka icebo ca kwa Lesa!”—Luka 11:28.

14-15. (a) Cinshi cacitike icalenga butatu icalembwa pali Yohane 12:27, 28, ilyo Yehova alandile ukufuma ku muulu? (b) Mulandu nshi amashiwi Yehova alandile yasansamushishe Yesu no kumukosha?

¹⁴ Belengeni Yohane 12:27, 28. Ibuuku lya Mbila Nsuma ilya kwa Yohane lyalilanda pa muku walenga butatu uo Yehova alandile ukufuma ku muulu. Ilyo kwashele inshiku ishinono ukuti Yesu afwe, aile ku Yerusalemu ku kusefya Ica Kucilila ico alekelesheko ukusefya.  Alandile ati: “Umweo wandi wasakamikwa.” Lyena apepele ati: “Tata, cindikeni ishina lyenu.” Wishi alyaswike, alandile ku muulu ati: “Nindicindika e lyo nkalicindika na kabili.”

¹⁵ Icalengele Yesu asakamikwe ni co alingile ukutwalilila ukuba uwa cishinka kuli Yehova. Yesu alishibe ukuti bali no kumucusha sana no kumwipaya buluku buluku. (Mat. 26:38) Ico Yesu abikileko sana amano kucindika ishina lya kwa Wishi. Yesu bamubepeshe ukuti alesaalula Lesa, kabili alisakamene ukuti imfwa yakwe yali no kulenga abantu balapontela Lesa. Ukwabula no kutwishika, amashiwi Yehova aebele Yesu yalimukoseshe! Yalengele ashininkishe ukuti Yehova ali no kulenga ishina lyakwe lyacindikwa. Na kabili amashiwi ayo Wishi amwebele yafwile yalimusansamwishe sana kabili yalimukoseshe pa kuti akashipikishe amacushi ali no kukwata ilyo ashilafwa. Nangu ca kuti nalimo ni Yesu fye aumfwile amashiwi ayo Wishi alandile, Yehova alilengele aya mashiwi yalembwa pa kuti na ifwe yaletusansamusha kabili yaletukosha.—Yoh. 12:29, 30.

16. Mulandu nshi inshita shimo twingasakamanina pa fyo abantu bengapontela ishina lya kwa Lesa?

¹⁶ Nga filya fine Yesu asakamene, na ifwe kuti twasakamana pa fyo abantu bapontela ishina lya kwa Lesa. Nalimo balatufyenga nga filya fine bafyengele Yesu. Nelyo nalimo tulomfwa ububi pa mulandu na malyashi ya bufi ayo abatusuusha basabankanya pali ifwe. Nalimo  kuti twatontonkanya pa fyo aya malyashi yalenga abantu balapontela ishina lya kwa Lesa e lyo ne cilonganino cakwe. Ifya musango uyu nga fyacitika, amashiwi Yehova alandile kuti yatusansamusha nga nshi. Tatufwile ukusakamikwa ukucila mu cipimo. Kuti twacetekela ukuti “umutende wa kwa Lesa uwacila amatontonkanyo yonse ukalinda imitima [yesu] na matontonkanyo [yesu] muli Kristu Yesu.” (Fil. 4:6, 7) Yehova te kuti afilwe ukucindika ishina lyakwe. Akabomfya Ubufumu bwakwe pa kufumyapo ifyabipa ifyo Satana ne ci calo baleta pa babomfi bakwe aba cishinka.—Amalu. 94:22, 23; Esa. 65:17.

17. Ukulingana na Esaya 30:21, bushe Yehova alanda shani na ifwe muno nshiku?

¹⁷ Na muno nshiku mwine Yehova alalanda na ifwe. (Belengeni Esaya 30:21.) Kwena tatumfwa ishiwi lya kwa Lesa ukufuma ku muulu. Lelo alitupeela Icebo cakwe, Baibolo umo atweba ifyo tulingile ukulakonka. Na kabili umupashi wa kwa Yehova ulenga “kangalila wa cishinka” atwalilila ukupeela ababomfi ba kwa Yehova ifya kulya fya ku mupashi. (Luka 12:42) Ala uyu kangalila alitupeela ifya kulya fya ku mupashi ifingi mu mpapulo shapulintwa ne shaba pa Intaneti, mu mavidio, e lyo na mu mpapulo sha kukutikako!

18. Bushe ifyo Yehova alanda fikosha shani icitetekelo cenu kabili filenga shani mwaba abashipa?

¹⁸ Natuleibukisha amashiwi ayo Yehova alandile ilyo Umwana wakwe ali pano isonde! Amashiwi ayo Lesa umwine alandile ayalembwa mu Baibolo, nayalelenga tulecetekela ukuti Yehova alikwata amaka pa fintu fyonse kabili akafumyapo ifyabipa fyonse ifyo Satana na ba muli ici calo baleta. Kabili natulebika sana amano kwi shiwi lya kwa Yehova. Nga tulecita ifi, twakulashipikisha amafya yonse ayo twakwata pali ino nshita e lyo na ayo tukakwata ku ntanshi. Baibolo itweba aiti: “Mukabila ukushipikisha, pa kuti, ilyo mwacita ukufwaya kwa kwa Lesa, mukapokelele ifyo bamulaya.”—Heb. 10:36.