KUTI MWAYASUKA SHANI?

Asukeni nga ca kuti ifili pe samba fya cine nelyo fya bufi.

CINE BUFI

1. Inte sha kwa Yehova Bena Kristu.

2. Inte sha kwa Yehova basumina ukuti icalo cabumbilwe mu nshiku 6 isha ma awala 24.

3. Inte sha kwa Yehova tabafwaya ukubondapa nga nabalwala.

4. Inte sha kwa Yehova balisumina muli Baibolo yonse fye.

5. Inte sha kwa Yehova babomfya fye Baibolo yabo.

6. Inte sha kwa Yehova balyalula Baibolo yabo pa kuti ileumfwana ne fyo basumina.

7. Inte sha kwa Yehova tababombako imilimo iilenga mu calo bekala muleba ubuyantanshi.

8. Inte sha kwa Yehova balisuula abantu ba mu filonganino fya mapepo fimbi.

Amasuko kuli aya amepusho yaali pa mabula yakonkelepo.

1.  1 CINE. Tulakonka sana ifyo Yesu Kristu alesambilisha e lyo ne fyo alecita. (1 Petro 2:21) Na lyo line, kwaliba ifintu ifingi ifyo twasumina, ifyo aba mu filonganino fya mapepo fimbi abatila Bena Kristu bashasumina. Ku ca kumwenako, twaishiba ukuti Baibolo tailanda ukuti muli Lesa umo mwaba abene batatu, lelo itila Yesu, Mwana wa kwa Lesa. (Marko 12:29) Twasumina ukuti umweo ulafwa kabili twasumina ukuti Baibolo taisambilisha ukuti Lesa alakanda abantu mu mulilo wa pe. Na kabili twasumina ukuti abatungulula icilonganino tabafwile ukukwata amalumbo ya kubatatakwilako kwati balicila abantu bambi.—Lukala Milandu 9:5; Esekiele 18:4; Mateo 23:8-10.

2. 2 BUFI. Twasumina ukuti Lesa e wabumbile ifintu fyonse. Na lyo line, tatwasumina ukuti abumbile ifintu fyonse mu nshiku 6, isha ma awala 24. Mulandu nshi? Pantu ifintu ifingi ifyo abantu abasumina ukuti icalo cabumbilwe mu nshiku 6, isha ma awala 24 balanda filapusana ne fyo Baibolo ilanda. Ku ca kumwenako, batila Lesa abumbile ifintu fyonse mu nshiku 6, isha ma awala 24. Na lyo line, Baibolo nga yabomfya ishiwi lya kuti “ubushiku,” inshita shimo ninshi ilelanda pa myaka iingi. (Ukutendeka 2:4; Amalumbo 90:4) Bamo pa bantu abatila icalo cabumbilwe mu nshiku 6 isha ma awala 24, balanda ukuti tapapita imyaka iingi nga nshi apo icalo cabumbilwe. Na lyo line, Baibolo ilanda ukuti inshiku 6 umo Lesa abumbile ifintu shatendeke ninshi imyulu ne sonde fyalibumbwa kale.—Ukutendeka 1:1.

3. 3 BUFI. Tulasumina ukutundapa nga natulwala. Na kuba, ba Nte bamo ni badokota, nga filya Luka, Umwina Kristu uwaliko mu nshita ya batumwa aali. (Abena Kolose 4:14) Na lyo line, tulakaana nga balefwaya ukutundapa ukubomfya inshila iyapusana ne fyo Baibolo ilanda. Ku ca kumwenako, tulakaana nga balefwaya ukutubikamo umulopa, pantu Baibolo yalikaanya ukulya umulopa.—Imilimo 15:20, 28, 29.

   Na lyo line, tulaya kabili tulatwala balupwa wesu ku fipatala uko bengatundapa bwino. Na kuba, inshila aba ku fipatala batendeke ukundapilamo ba Nte ukwabula ukubabikamo umulopa, balitampa ukushibomfya na pa kundapa abantu bambi. Mu fyalo ifingi, abalwele nomba kuti basalapo ukubondapa ukwabula ukubabikamo umulopa, ne ci cilelenga baleicingilila ku malwele ayo umuntu engalwala nga bamubikamo umulopa.

4. 4 CINE. Twasumina ukuti Baibolo yonse fye “yafuma kuli Lesa kabili ya mulimo.” (2 Timote 3:16) Twasumina ukuti Icipingo ca Kale ne Cipingo Cipya fyonse fyalicindama, e mulandu wine twitila Icipingo ca Kale ukuti Amalembo ya ciHebere e lyo Icipingo Cipya ukuti Amalembo ya ciGriki aya Bena Kristu. Ifi filalenga cilemoneka ukuti Baibolo yonse yalicindama kabili takwaba iciputulwa icaleka ukubomba.

5.  5 BUFI. Tulabomfya ama Baibolo ayalekanalekana ilyo tulesambilila Baibolo. Na lyo line, tulabomfya sana Baibolo ya Amalembo ya Calo Cipya nga ca kuti yalipilibulwa mu lulimi ulo twaishiba, pantu mwaliba ishina lya kwa Lesa, yalipilibulwa bwino kabili yalyanguka ukumfwa. Lekeni tulande pe shina lya kwa Lesa ilya kuti Yehova. Pa ntendekelo ya Baibolo imo, paliba amashina ya bantu 79, ababombele imilimo iyalekanalekana ilyo balepilibula iyo Baibolo, lelo muli iyo Baibolo balifumyamo ishina lya kwa Lesa, Yehova, umwine wa Baibolo. Nomba abalepilibula Baibolo ya Amalembo ya Calo Cipya bena balibwekeshamo ishina lya kuti Yehova monse umo lilingile ukuba.

6. 6 BUFI. Nga twasanga ukuti pali fimo ifyo twasumina ifyapusana ne fyo Baibolo ilanda, tulaaluka mu fyo twasumiine. Ilyo tushilatendeka ukupilibula Baibolo ya Amalembo ya Calo Cipya mu 1950, twalebomfya ama Baibolo yambi ayaliko kabili ifyo twalebelenga muli ayo ama Baibolo e fyo twalesumina.

7. 7 BUFI. Umulimo tubomba ulaafwa abantu abengi mu calo. Twalyafwa abantu abengi ukuleka ukucita ifyabipa pamo nga ukubomfya bubi bubi imiti e lyo no kunwa sana ubwalwa. Na kabili tulasambilisha abantu abengi mwi sonde lyonse ukwishiba ukulemba no kubelenga. Nga kuli akayofi, tulafwilishako ba Nte e lyo na bashili ba Nte abaponenwe na kayofi. Tulakoselesha abantu abaponenwa no tuyofi kabili tulabebako ne fyo Baibolo ilanda.

8. 8 BUFI. Tulakonka filya Baibolo itweba ukuti “mulecindika abantu aba misango yonse.” Kanshi tulacindika abantu bonse, kumo fye nabo tushipepa nabo. (1 Petro 2:17) Ku ca kumwenako, nangu ca kuti twalifula sana mu fyalo fimo, tatweba aba buteko ukuti balekaanya imilimo iyo aba mu filonganino fya mapepo fimbi bacita. Na kabili tatweba aba mu buteko ukuti bapange amafunde ayakweba abantu ukuti balecita ifyo ifwe ba Nte twasumina. Na kuba, filya fine tufwaya abantu balecita kuli ifwe, e fyo na ifwe tucita kuli bena.—Mateo 7:12.

Ifyebo fili muli cino cipande fifumine pa webusaiti yesu iya jw.org/bem. Nga mulefwaya ukwishibilapo na fimbi, kabiyeni apo balemba ati PA NTE SHA KWA YEHOVA > AMEPUSHO ABANTU BEPUSHA SANA.