UBWAFYA

Ifintu mu Calo Nafibipa Sana

TINIKENI

“Muno nshiku abantu nabeshiba sana ukupanga ifintu, nabeshiba ifingi pali sayansi kabili balelundulukilako fye mu fya makwebo . . . Na lyo line, ifintu fileya filebipilako fye [mu mitekele ya calo na mu fya bunonshi. Na kabili ifyo abantu balecita kuti fyaonaula isonde.]”—E fyalandile aba mu kabungwe ka World Economic Forum muli lipoti ya The Global Risks Report 2018.

CINSHI ABANTU ABENGI ABASAMBILILA SANA BALESAKAMANINA PA FYO IFINTU FILEBIPILAKO MU CALO? NATULANDEKO PA MAFYA YAMO AYALI MU CALO.

ABACITA IFYABIPA UKUBOMFYA INTANETI: Inyunshipepala ya The Australian yalandile ukuti, “Abantu abengi balatiina ukubomfya Intaneti pantu palaba abafwaya ukucenda abana, abacusha abantu, abalemba amalyashi ayengalenga abantu bapusana, e lyo nabeeba ifyebo ku bantu abaya pa Intaneti. Na kuba icimusango ca kwiba ifyebo ku bantu abaya pa Intaneti naciseeka sana. . . . Abantu abengi cilabangukila ukucita ifyabipa nga bali pa Intaneti.”
ABANTU ABANONO E BAKWATISHA ICUMA E LYO ABASHALA BAPIINA: Tapalakokola ukutula apo aba mu kabungwe ka Oxfam International balandiile ukuti nga twasansha icuma ico abantu 8 abakwatisha icuma bakwata, kuti calingana ne cuma ico abantu nalimo amabilioni 3.6 abashakwatisha icuma bakwata. Balandile no kuti, “Ubunonshi bwa calo tabwaba bwino, kabili ici cilalenga abakankaala balekwatilako icuma e lyo abapiina, maka maka abanakashi, balebeelako abapiina.” Abantu bamo balatiina ukuti ifi twalandapo kuti fyalenga mu calo mwaba ifimfulunganya.
IFIMFULUNGANYA E LYO NO KUCUSHA ABANTU: Mu 2018, aba mu kabungwe ka United Nations Refugee Agency balandile ukuti: “Pali ino nshita abantu balebutuka sana mu fyalo fyabo ukucila kale.” Abantu ukucila pa mamilioni 68 balifulumuka uko baleikala. Icalenga abengi ukufulumuka ni co balebacusha nelyo kwali ifimfulunganya mu calo cabo. Aba muli aka akabungwe balandile no kuti “Mu masekondi fye yabili, nalimo umuntu umo alafulumuka mu calo ekala.”
UKONAULA ISONDE: Lipoti ya The Global Risks Report iya mu 2018 yalandile ukuti: “Pali ino inshita ifya mweo fileloba sana ukucila ifyo fyaleloba kale. Ukukowesha umwela ne mimana na ko nakulenga amalwele ukufula.” Na kabili mu fyalo fimo utushiishi tulecepelako fye. Apo utushiishi tulalenga ifimenwa ukutwalilila ukubako, abasambilila sana sayansi balelanda ukuti ifilecitika kuti fyalenga ifya mweo ukuloba pa calo.

Bushe kwaliba ifyo twingacita pa kuti ifintu fingabako bwino muno calo? Abantu bamo balanda ukuti amasambililo e yengalenga ifintu ukubako bwino. Nomba masambililo nshi ayengalenga fintu ukubako bwino? Twalayasuka aya amepusho mu fipande fikonkelepo.

LOLENI!