Nomba line fye Ubufumu bwa kwa Lesa ubo tulolela bukateka isonde lyonse, kabili bukalenga abantu bakaleikala mu mutende kabili bakabe abaikatana. Nga fintu Baibolo ilanda pa Amalumbo 72:7, “umutende ukafula.” Nomba ni lilali Ubufumu bwa kwa Lesa bukatendeka ukuteka isonde lyonse? Cikaba shani pa kuti Ubufumu bukatendeke ukuteka isonde lyonse? Kabili finshi mulingile ukucita pa kuti mukanonkelemo ilyo Ubufumu bukalateka?

Baibolo yalilanda pa fintu ifingi ifyali no kulacitika ifilanga ukuti Ubufumu bwa kwa Lesa nabupalama. Ifi fintu pamo nga inkondo, ifipowe, amalwele, ifinkukuma, e lyo no kufula kwa bantu abacita ifyabipa.—Mateo 24:3, 7, 12; Luka 21:11; Ukusokolola 6:2-8.

Baibolo ilanda no kuti: “Mu nshiku sha kulekelesha mukesaba inshita ishayafya nga nshi. Pantu abantu bakaba abaitemwa, abatemwa indalama, . . . abashumfwila abafyashi babo, abashitasha, abashaba na cishinka, abashatemwa abantu, abashifwaya ifipangano, aba lwambo, abashailama, abankalwe, abashatemwa ubusuma, . . . aba cilumba, abatemwa ukwangala ukucila ukutemwa Lesa.” (2 Timote 3:1-4) Nangu ca kuti ukufuma fye na kale abantu balaba ne yi mibele, pali ino nshita ababa ne yi imibele balifula sana.

Ifyo Baibolo yalandapo fyatendeke ukufikilishiwa mu 1914. Na kuba abasambilila ilyashi lya kale, aba mu fikansa fya calo e lyo na bakalemba ba malyashi, balilanda pa fyo ifintu fyayalwike pa numa ya uyu mwaka. Ku ca kumwenako, ba Peter Munch aba ku Denmark kabili abasambilila ilyashi lya kale balembele ukuti: “Ilyo inkondo yatendeke mu 1914, ifintu ifingi fyalyalwike. Ilyo uyu mwaka ushilafika, abantu balemona kwati ifintu mu calo fyaleya filewaminako, . . . lelo ifintu fyalyaluka ica kuti mu calo mwaliba ulupato, tamwaba umutende kabili mulacitika ne fintu fimbi ifyabipa.”

Icawama ca kuti ifi ifyabipa nga fyafumapo, ifintu fikawama mu calo. Na kabili, ifilecitika mu calo filelanga fye ukuti Ubufumu bwa kwa Lesa bwalatendeka ukuteka nomba line. Na kuba, Yesu alilandile na pa fisuma ifyali no kulanga ukuti impela ili mupepi ilyo atile: “Ne mbila nsuma iyi iya bufumu ikabilwa ku bantu bonse aba pe sonde ku kuba ubunte ku nko shonse; e lyo impela ikesa.”—Mateo 24:14.

Iyi imbila nsuma e yo Inte sha kwa Yehova babila sana. Na kuba ulupapulo ba Nte basabankanya sana, balwita ukuti Ulupungu lwa kwa Kalinda Ulusabankanya Ubufumu bwa kwa Yehova. Pali ino nshita Ulupungu lwa kwa Kalinda balalupilibula mu ndimi ukucila pali 338, kabili lulanda sana pa fisuma ifyo Ubufumu bwa kwa Lesa bukacitila abantu ne fyo bukawamya isonde.

Pa kwasuka ici cipusho lekeni tulande pa fishinka 4 ifyacindama:

1. Ubufumu bwa kwa Lesa tabwakabomfye bakateka abantunse abateka pali ino nshita.

2. Bakateka abantunse bakafwaya ukutwalilila fye ukulateka, kabili ici cikalenga bakatendeke ukulwisha Ubufumu bwa kwa Lesa.—Amalumbo 2:2-9.

3. Ubufumu bwa kwa Lesa bukonaula amabuteko ya bantunse ayafwaya ukutwalilila fye ukuteka abantu. (Daniele 2:44; Ukusokolola 19:17-21) Inkondo umo amabuteko ya bantunse yonse bakayonaula baita ukuti Armagedone.—Ukusokolola 16:14, 16.

4. Bonse abanakila Ubufumu bwa kwa Lesa bakapusuka pa Armagedone kabili bakengila mu calo cipya umukaba umutende. Aba e bo Baibolo ita ukuti “ibumba ilikalamba,” kabili bakaba abengi nga nshi.—Ukusokolola 7:9, 10, 13, 14.

 FINSHI MULINGILE UKUCITA PA KUTI MUKANONKELEMO ILYO UBUFUMU BUKALATEKA?

Ica kubalilapo ico mulingile ukucita nga mulefwaya ukulatekwa no Bufumu bwa kwa Lesa, kusambilila pali Lesa. Na kuba Yesu apepele kuli Lesa ati: “Nomba pa kuti babe no mweo wa muyayaya, kano baishiba imwe mwe Lesa wa cine mweka, na Yesu Kristu uo mwatumine.”—Yohane 17:3.

Abantu balanonkelamo sana nga baishiba ukuti Yehova Lesa e ko aba kabili kuti baba ifibusa fyakwe. Natulande pa fintu fibili ifyo benganonkelamo: Ica kubalilapo, balacetekela sana Lesa. Nga batontonkanya pa filanga ukuti Lesa e ko aba, balamucetekela kabili balacetekela no kuti Ubufumu bwa kwa Lesa e ko bwaba kabili bwalatendeka ukuteka nomba line. (AbaHebere 11:1) Icalenga bubili, balatemenwako Lesa e lyo na bantu. Ukutemwa Lesa kulalenga balemumfwila ukufuma pa nshi ya mutima. Ukutemwa abantu kulalenga balekonka ifyo Yesu alandile. Atile: “Ifyo mufwaya abantu bamucitile, e fyo na imwe mulebacitila.”—Luka 6:31.

Nga filya fine umufyashi uwaba no kutemwa aba, Kabumba wesu afwaya ifintu filetuwamina. Afwaya tukakwate “umweo wine wine,” nga fintu Baibolo ilanda. (1 Timote 6:19) Pali ino nshita tatwakwata “umweo wine wine.” Abantu abengi balacula kabili cilabafya ukusanga ifyo bakabila. Natulande pa fisuma fimo ifyo Ubufumu bwa kwa Lesa bukacitila abo bukalateka, ifilanga ifyo “umweo wine wine” ukaba.