Aba mu kabungwe ka United Nations balitendeka ukukoselesha abantu bonse ukulamona ifilecitika mwi sonde lyonse ukuti nafibakuma. Balefwaya sana ukuti abantu bonse balecindika insambu sha bantu bambi no kusunga bwino isonde pa kuti lionaika. Mulandu nshi balecitila ifi? Ba Maher Nasser balandile mu lupapulo beta ukuti UN Chronicle ukutila, “ifintu pamo nga ukwaluka kwa miceele, ubunkalwe, umusobolola, ifimfulunganya, abantu abengi ukufulumuka mu fyalo fyabo, ifipondo, amalwele, e lyo ne fyapala ifi, fyaba fye mpanga yonse.”

Kwaliba na bantu abafwaya ukupanga ubuteko ubwakulateka icalo conse. Ifi fine e fyo na bantu pamo nga Dante umwina Italy uwasambilile sana amano ya bantunse ne fikansa fya calo kabili uwalelemba imishikakulo balefwaya (aliko ukufuma mu 1265 ukufika mu 1321). Umbi uwalefwaya ifi ukucitika ni Albert Einstein (aliko ukufuma mu 1879 ukufika mu 1955) uwasambilile sana ifya sayansi. Dante alemona kwati mu calo kuti mwaba umutende nga ca kuti ubuteko bumo e buleteka abantu bonse. Alandile amashiwi ya kwa Yesu Kristu ayatila “ubufumu bonse ubuleilwisha ubwine bulonaika.”—Luka 11:17.

Ilyo Inkondo ya Calo iya Bubili yapwile, umo babomfesheko na mabomba yabili ayakalamba sana, Albert Einstein alilembele kalata ku kabungwe ka General Assembly of the United Nations. Atile: “Akabungwe ka United Nations kalingile ukwangufyanya ukubikako ubuteko ubwingalenga mu calo mwaba umutende.”

Nomba bushe abengaba muli ubu buteko kuti baba aba cishinka, kuti balateka bwino abantu kabili te kuti balebacusha? Nelyo bushe kuti balateka abantu nga filya bakateka bambi ababipa bacita? Aya amepusho yalatwibukisha amashiwi ayo Lord Acton uwa ku Britain uwasambilile sana ilyashi lya kale alandile, atile: “Ilingi line umuntu nga apeelwa amaka ya kutungulula alabipa, kabili nga ca kuti e ukwatishe amaka pali bonse e lyo abipisha.”

Pa kuti fwe bantu tuleikala mu mutende kabili tuleumfwana bwino, tulingile ukwikatana. Nomba finshi tulingile ukucita pa kuti tuleikala mu mutende kabili tuleumfwana? Bushe ca cine abantu kuti baikala mu mutende no kulaumfwana? Baibolo ilanda ukuti abantu bakekala umutende kabili bakekatana. Cinshi cikalenga bakekale umutende no kwikatana? Amabuteko ya bantunse te yakalenga ifi fikacitike, lelo buteko bwa kwa Lesa. Ne cacilapo ukucindama ca kuti Lesa, uwalinga ukuteka abantu, akabomfya ubu ubuteko pa kuteka abantu. Bushe ubu bwine ubuteko ni cinshi? Baibolo ita ubu ubuteko ukuti “Ubufumu bwa kwa Lesa.”—Luka 4:43.

Yesu Kristu aletontonkanya pa Bufumu bwa kwa Lesa ilyo alandile mwi pepo lya we Shifwe ukuti: “Ubufumu bwenu bwise. Ukufwaya kwenu kucitwe pano isonde.” (Mateo 6:9, 10) Ubufumu bwa kwa Lesa bukalenga ukufwaya kwa kwa Lesa kukacitike pano isonde, te kufwaya kwa bantunse abafwaisha ukulateka abantu banabo kabili bakaitemwe.

Ubufumu bwa kwa Lesa bwitwa no kuti “Ubufumu bwa mu muulu.” (Mateo 5:3) Mulandu nshi? Pantu bukaba ku muulu ilyo bukalateka abantu pe sonde. Ici cilolele mu kuti, ubu ubufumu tabwakalekabila indalama kabili tabwakalesonkesha imisonko. Ici cikalenga abantu bakabe sana ne nsansa.

Nga fintu ciba ku mabufumu yonse, Ubufumu bwa kwa Lesa nabo bwalikwata Imfumu. Yesu Kristu e o Lesa asonta ukuba imfumu. Baibolo ilanda pali Yesu ukuti:

• “Bukateka bukaba pa kubeya kwakwe . . . Ukuteka kwakwe kukaba fye konse konse na ku mutende wakwe takwakabe impela.”—Esaya 9:6, 7.

•   ‘Bamupeele ukuteka no bukata no bufumu, pa kuti abantu na bantu bonse, aba nko ne ndimi bamubombele. Ukuteka kwakwe . . . takwakapite.’—Daniele 7:14.

• “Ubufumu bwa calo nomba bwaba Bufumu bwa kwa Shikulwifwe [Lesa] no bwa kwa Kristu wakwe.”—Ukusokolola 11:15.

Pa kufikilisha ifyo Yesu alandilepo mwi pepo lya we Shifwe, Ubufumu bwa kwa Lesa bukalenga ukufwaya kwa kwa Lesa kukacitwe pano calo. Ilyo ubu Bufumu bukalateka, abantu bonse bakasambilila ifya kusunga bwino isonde pa kutila likabe ifyo lyali pa kutendeka kabili mukabe ifya mweo ifingi.

Ne cacindamisha ca kuti, Ubufumu bwa kwa Lesa bukalasambilisha abantu abo bukalateka ifikabafwa ukulaikala bwino. Abantu bonse bakalasambilila amafunde yamo yene kabili mu calo tamwakabe amalekano. Baibolo pali Esaya 11:9 itila: ‘Tabakacite ububi nangu ubonaushi . . . pantu isonde likesulamo ukwishiba Yehova filya amenshi yaisula muli bemba.’

Ubufumu bwa kwa Lesa bukalenga abantu mwi sonde lyonse bakaleikala mu mutende kabili bakekatane, lelo akabungwe ka United Nations kalifilwa ukucita ifi. Baibolo pa Amalumbo 37:11 ilanda ukuti abantu “bakasekelela nga nshi pantu umutende ukafula.” Mu kupita kwa nshita tukaleka ukulanda pa “bunkalwe,” “ukukowesha umwela na menshi,” “ifipowe” ne “nkondo.” Nomba ni lilali ifi fikacitika? Ni lilali Ubufumu bwa kwa Lesa bukatendeka ukuteka isonde lyonse? Cikaba shani pa kuti bukatendeke ukuteka isonde lyonse? Kabili finshi mulingile ukucita pa kuti mukanonkelemo ilyo Ubufumu bukalateka? Lekeni tulande pali aya mepusho.