Ifi e fyo ibumba limo ilya bafwailisha pa kwaluka kwa miceele basangile. Nga mwalicetekela ukuti Kabumba uusakamana abantunse eko aba, ninshi ifi basayantisti balanda kuti fyalenga mwalatontonkanya pa nshila shalekanalekana, isho Lesa abikako ishilenga isonde lileibukulula ukulingana ne fyo alipanga.

Na lyo line, ukulingana napo abantu bafika mu kukowesha isonde, te kuti litwalilile ukuibukulula iline lyeka, kano Lesa acitapo fimo. Nomba cinshi cingalenga twacetekela ukuti Lesa ali no kucitapo fimo?

Moneni ifyo amalembo mu kabokoshi yalenga twashininkisha ukuti isonde likatwalilila ukubako kabili likawama nganshi.

• Lesa e wapangile isonde. “Pa kutendeka Lesa apangile umuulu e lyo ne sonde.”—Ukutendeka 1:1

• Lesa e mwine we sonde. “Pano isonde pa kwa Yehova a na fyonse ifyabapo, umushili na bonse abaikalapo.”—Amalumbo 24:1

• Lesa apangile isonde ukuti likatwalilile ukubako. “Mwashimpile isonde pa cifulo ca liko icapampamikwa; talyakatelentenshiwe umuyayaya, umuyayaya.”—Amalumbo 104:5

• Lesa alilaya ukuti ifya mweo fikatwalilila ukubako pe sonde. “Lesa wa cine, Kapanga we sonde, ushalipangiile apa fye, lelo uwalipangiile ukuti lileikalwamo.”—Esaya 45:18

• Lesa alilaya ukuti abantu bakekala pe sonde umuyayaya. “Abalungama e bakekala mu calo, Kabili bakekalamo umuyayaya.”—Amalumbo 37:29

Lesa alipanga isonde mu nshila ya kuti abantunse baleikalamo ukwabula ukulyonaula. Baibo yalilanda ukuti Lesa mu nshita yakwe iyalinga akafumyapo fyonse ifilenga isonde ukonaika.—Ukusokolola 11:18

Lesa alilaya muli Baibo ukuti akawamya isonde no kulilenga ukuba paradaise kabili akafumbatula iminwe yakwe no “kupeela ica mweo conse ifyo cilefwaya.”—Amalumbo 145:16