Cinshi Abantu Balekela Ukucindika Abantu Banabo?

TINIKENI

ICO UKUBA NO MUCINSHI KWACINDAMINA

Nga tuli no mucinshi ku bantu ifintu filabako bwino nga ca kuti natupusana nabo.

Ipinda lya mu Baibo litila: “Ukwasuka ukwafuuka kunasha ubukali, lelo amashiwi ya kukalifya yalenga umuntu ukukalipa.” (Amapinda 15:1) Ukulanda amashiwi ayabipa nelyo ukusaalula umuntu mu nshila imbi kuti kwalenga ifintu ukubipilako.
Yesu atile: “Umuntu alanda ifyaisula mu mutima wakwe.” (Mateo 12:34) Umuntu uusaalula bambi alanga fye ukuti tacindika abantu abo apusana nabo umushobo, umutundu, icalo, nelyo ifyo baikala.

Ilyo abafwailisha ifintu baipwishe abantu 32,000 abekala mu fyalo 28, basangile ukuti ukucila pali hafu ya iyi impendwa bamona ukuti abantu pali ino nshita balileka ukuba no mucinshi ukucila ifyo bali kale.

IFYO MWINGACITA

Nga muli ku sukulu nelyo ku ncito, mulecindika abantu bonse nangu mwalipusana nabo mu fyo mumona ifintu fimo. Muleishiba ifintu ifyo mwingasuminishanya nabo. Nga mulecita ifi tamwakulaumina kumo nelyo ukulapingula bambi.

“Mwilapingula bambi pa kuti na imwe bemupingula.”—Mateo 7:1.

Mulecitila abanenu ifyo mwingatemwa bamucitila. Nga muli ne cikuuku kuli bambi kabili mulebacitila ifisuma, nabo bakulamucitila ifisuma.

“Ifyo mufwaya abantu bamucitile, e fyo na imwe mulebacitila.”—Luka 6:31.

Mule-elela. Nga ca kuti umuntu amweba amashiwi ayabipa nelyo amukalifya mwila-angufyanya ukumona kwati acilafwaya fye ukumukalifya.

“Umuntu wa mano takalipa bwangu, kabili atemwa ukusuulako fye ku filubo.”—Amapinda 19:11.

IFYO INTE SHA KWA YEHOVA BALANGA UKUTI BALICINDIKA ABANTU

Inte sha kwa Yehova balalenga abantu abo bekala nabo, na bo babomba nabo bacindikana.

Tulasambilisha abantu Baibo ukwabula ukubalipilisha, kabili tatubapatikisha ukusumina ifyo twasuminamo. Lelo, tulabasambilisha ifyo Baibo ilanda ninshi tuli “no mutima uwafuuka na katiina.”—1 Petro 3:15; 2 Timote 2:24.

Tatwaba na kapaatulula kabili tulapokelela bonse abesa mu kulongana, abafwaya ukwishiba ifyo Baibo isambilisha te mulandu no ko bafuma. Tatubika amano ku fyo twapusana na bantu bambi, lelo tulacindika “abantu aba misango yonse.”—1 Petro 2:17.

Twalicindika ubuteko ubuteka icalo twikalamo. (Abena Roma 13:1) Tulomfwila amafunde ya calo kabili tulalipila imisonko. Nangu ca kuti ifwe tatuitumpa mu fikansa fya calo, tulacindika ifyo abantu basalapo ukucita.

LOLENI!