Cinshi Abantu Balekela Ukucindika Indupwa Shabo?
ICO UKUCINDIKA ULUPWA KWACINDAMINA
Nga ca kuti aba mu lupwa na bacindikana, abalume, abakashi, na bana balaba ne nsansa kabili balomfwa ukuti balicingililwa.
-
Icitabo ca The Seven Principles for Making Marriage Work citila, abaupana nga balecindikana balalanga ukuti balitemwana, kabili balacita ifi “mu fintu ifikalamba e lyo ne finono cila bushiku.”
-
Abafwailisha pa fintu basanga ukuti abana abasambilila ukuba no mucinshi balaicetekela, balomfwana bwino na bafyashi babo, kabili tabalwala sana amalwele ya muntontonkanya.
IFYO MWINGACITA
Lanshanyeni no lupwa lwenu ifyo mwakulacita pa kuti mulelanga umucinshi. Ica kubalilapo mufwile ukwishiba umo ukuba no “mucinshi” kwalola. Ica bubili, lembeni ifyo mule-enekela aba mu lupwa bonse ukulacita ne fyo mulemona ukuti tabafwile ukulacita. Ica butatu, lanshanyeni na bonse aba mu lupwa pa kuti baishiba ifyo bafwile ukulacita.
Mulebalilapo ukuba no mucinshi. Bushe mulakalipila aba mu lupwa lwenu nga ca kuti balufyanya, ukubapumya pa fyo batontonkanya, nelyo ukukanababikako amano e lyo no kubacilima ilyo balefwaya ukumweba fimo?
Ifingamwafwa: Mulemona ukuti mulingile ukucindika abena mwenu na bana benu, kabili tabalingile ukucitapo fimo pa kuti fye mubacindike.
Muleba no mucinshi nangu tamulesuminishako ku fyo uwa mu lupwa alanda. Nga mulelanda mwilabomfya amashiwi pamo nga “lyonse e fyo mucita nelyo e fyo mulanda” nelyo “tamwatala.” Amashiwi ya musango uyu kuti yakalifya uwa mu lupwa kabili kuti yalenga no bwafya ukukulilako.
IFYO INTE SHA KWA YEHOVA BALANGA UKUTI BALICINDIKA ABA MU LUPWA
Inte sha kwa Yehova balakoselesha aba mu lupwa ukulacindikana, kabili ilingi line balalemba mu fipande, ifitabo, na mu ma broshuwa ifyo aba mu lupwa bengalacindikana. Balabika ifi fyebo na mu mavidio. Kabili ifi fyonse tabalipilisha.
ABAUPANA: Amalyashi ayaba mu cipande citila Ifingafwa Indupwa kuti yalenga abalume na bakashi ukwishiba . . .
-
ifya kukutika bwino
-
ifya kucita nga tabalesoshanya
-
ifya kucita pa kuti baleke ukuumana
(Fwayeni “Ifingafwa Indupwa” pa jw.org/bem)
ABAFYASHI: Amalyashi ayaba mu cipande citila Ifingafwa Indupwa kuti yalenga abafyashi baishiba ifya kusambilisha abana . . .
-
ukuba ne cumfwila
-
ukulabombako imilimo ya pa ng’anda
-
ukuba no mucinshi no kulatasha
(Fwayeni “Ifya kukusha Abana” na “Ifya Kukusha Imisepela” pa jw.org/bem)
Moneni na ifyebo na fimbi, “Amepusho Abafyashi Bepusha,” mu citabo icitila Ifipusho Abacaice Bepusha ne Fyasuko Ifingabafwa, Ibuuku 1. (Fwayeni “Amepusho Abafyashi Bepusha” pa jw.org/bem)
ABACAICE: Pa jw.org paliba icipande icitila Imisepela, apaba ifipande ifyo mwingabelenga, amavidio, e lyo na pa kulemba ifingafwa abacaice . . .
-
ukulaumfwana na bafyashi na bana banabo
-
ukulanshanya na bafyashi mu mucinshi pa mafunde ya pa ng’anda
-
ukuti abafyashi babacetekele
(Fwayeni “Imisepela” pa jw.org/bem)
Tatulipilisha pa kubomfya webusaiti ya jw.org. Nga mwaya pali iyi webusaiti tatwakamulipilishe, tatwakamwebe ukuti mulembeshe nelyo ukumulomba ukuti muilondolole.
