Cinshi Abantu Balekela Ukucindika Ubumi?

TINIKENI

ICO UKUCINDIKA UBUMI KWACINDAMINA

Nga ca kuti mulecita ifintu ifingabika ubumi bwenu nelyo ubumi bwa bantu bambi mu kapoosa mweo, ninshi tamwacindika ubumi.

Ukupeepa fwaka kulalenga umuntu alwala kansa kabili kulalenga no mubili walafilwa ukulwisha ubu ubulwele. Na kabili Nga ca kuti abantu 10 bafwa kuli kansa ya kuli bapwapwa, ninshi 9 pali aba icalengele balwale ubu bulwele, ni fwaka.
Cila mwaka kulaba abantu abengi nga nshi ababa no bulanda pa mulandu ne fipondo ifilasa abantu abengi imfuti apabula umulandu. Lipoti ya pa Stanford University yatile: “Nangu fye bantu abapusuka ilyo ifipondo filelasa abana be sukulu imfuti, balatwalilila ukuba no bulanda pa myaka iingi ica kuti balafilwa no kulabomba bwino imilimo.
Abantu abensha imyotoka ninshi nabakolwa nelyo nababomfya imiti iyabindwa balabika ubumi bwabo no bumi bwa bantu bambi mu busanso. Umuntu nga talecindika ubumi, abena mupalamano bakwe balaculilamo.

IFYO MWINGACITA

Mulecingilila ubumi bwenu. Mwilamona kwati inshita yalipita iya kuti mwingaleka ukupeepa fwaka, ukunwesha ubwalwa, nelyo ukubomfya imiti yabindwa. Ukucita ifi fintu kulanga ukuti tamwacindika ubumi bwenu no bumi bwa bena mupalamano benu, ukubikako fye na balupwa lwenu.

“Tuisangulule kuli fyonse ifikowesha umubili.”—2 Abena Korinti 7:1.

Muleicingilila ku masanso. Pa kuti muicingilile ku masanso mulewamya ifileonaika ku ng’anda yenu. Mule-ensha bwino motoka kabili mulewamya ifileonaikako ifingaleta amasanso. Mwilaleka abantu balemupatikisha ukucita ifintu ifingalenga mwaicena nelyo mwafwa.

“Nga wakuula ing’anda, ulingile no kukuula icibumbili mu mbali ya mutenge, pantu nga taucitile ifi, iwe na ba mu ng’anda yobe mukaba no mulandu wa mulopa nga ca kuti umo apona pa mutenge.”—Amalango 22:8. a

Muleba ne cikuuku ku banenu. Nga twalicindika ubumi tatwakapate abantu pa mulandu no mushobo wabo, icalo bafumako, nelyo ifyo baikala. Pantu na kuba akapatulula no lupato e filenga mu calo muleba sana ubunkalwe ne nkondo.

“Tekwesha nangu panono ukuba ne mpatila, icipyu, ubukali kabili tekwesha nangu panono ukusasuka, ukuba no musaalula kabili mwilacita ifyabipa ifya misango yonse. Lelo muleba ne cikuuku ku banenu.”—Abena Efese 4:31, 32.

IFYO INTE SHA KWA YEHOVA BALANGA UKUTI BALICINDIKA ABANTU

Inte sha kwa Yehova balakoselesha abantu ukubika amano ku bumi. Ifyo tusambilisha abantu mu Baibo filabafwa ukuleka ukucita ifintu ifyabipa ifyo babelesha ukucita.

Tulaicingilila bwino ilyo tulekuula ifikuulwa. Abaipelesha ukukuula ifikulwa fyesu ifya kupepelamo no kutwala umulimo wa kusambilisha abantu Baibo pa ntanshi balabasambilisha ifya kuicingilila ku masanso yengabako ilyo balekuula. Libili libili tulaceeceeta ifikuulwa fyesu pa kuti tumone nga nafilingana ne fyo amafunde ayalanda.

Tulafwilisha abaponenwa na masanso ayakalamba. Mu myeshi 12 iyapita, twalyafwilishe abantu abaponenwe na masanso ayakalamba ayali 200 kabili twabomfeshe indalama amadola ya ku America 12 milioni (mupepi na 325 milioni Kwacha) isho tusangula pa kuti tulebomba uyu umulimo.

Ilyo ubulwele bwa Ebola ubwaipeye abantu abengi mu West Africa bwatendeke mu mwaka wa 2014, na mu Democratic Republic of Congo mu mwaka wa 2018, twalisambilishe abantu ifya kucita pa kuti tabasalangenye ubu ubulwele ubwaleipaya sana. Twalitumine abantu abakulanda na bantu abali mu tumabumba ilyashi ilyakwete umutwe uwaleti “Icumfwila Cilapususha.” Twalibikile no to abantu abesa mu kulongana bengasambapo ku minwe, pa fifulo fyonse ifya kulonganinapo. Na kabili twalelanda sana pa co cacindamina ukusamba ku minwe e lyo na pa nshila shimbi isha kuicingililamo.

Mu Sierra Leone, balibilishe pa cilimba ukutasha Inte sha kwa Yehova pa fyo baleafwa ba Nte banabo na bashili ba Nte ukuicingilila ku bulwele bwa Ebola.

Akakusambapo ku minwe pa Ng’anda ya Bufumu ilyo kwali icikuko ca Ebola mu Liberia mu 2014

a Akale ku Middle East, abalekonka ili ifunde balelanga ukuti balibikile amano ku kucingilila indupwa shabo na bantu bambi ku masanso.

LOLENI!