IFICITIKA

Amasakamika yalalenga umuntu aaba no mwenso e lyo na malangulushi. Apo twikala mu calo umo ifintu fyayafya sana, uuli onse kuti asakamikwa.

IFYO BAIBOLO ILANDA

Imfumu Davidi yalembele ati: “Kufika lilali ndi no kukaanya umweo wandi, no kuba no bulanda mu mutima wandi ubushiku bonse?” (Amalumbo 13:2) Cinshi cayafwile Davidi ukushipikisha? Aleeba Lesa fyonse ifyali ku mutima kabili alishibe ukuti Lesa uwaba ne cikuuku kuti amwafwa. (Amalumbo 13:5; 62:8) Na kuba, Lesa alitweba ukuti tufwile ukulamweba fyonse ifiletusakamika. Baibolo pali 1 Petro 5:7 itila: “Mulepoosa amasakamika yenu yonse pali [Lesa], pantu asakamana imwe.”

Na lyo line, kwaliba ifyo twingacita pa kuti twilasakamikwa sana. Ku ca kumwenako, ilyo Paulo uwalembeleko Baibolo ‘asakamene nga nshi pa mulandu wa filonganino fyonse,’ alibombeshe pa kuti akoseleshe no kusansamusha aba mu filonganino. (2 Abena Korinti 11:28) Kanshi kuti twatila filya Paulo asakamikwe fyali fye bwino pantu fyalilengele ayafwa aba mu filonganino. Na ifwe bene ifi fine e fyo tufwile ukuba. Nga tatulebika amano ku filecitikila abantu bambi, ninshi tatwabatemwa.—Amapinda 17:17.

“Tamubika fye amano ku fyo mulefwaya fye mwe bene, lelo mulabika amano na ku fyo bambi bafwaya.”—Abena Filipi 2:4.

IFICITIKA

Abantu balasakamikwa pa fyabipa ifyo bacitile kale, ifikacitika ku ntanshi, e lyo na pa ndalama. *

IFYO BAIBOLO ILANDA

Abasakamikwa pa fyabipa ifyo bacitile kale: Abantu bamo abaliko mu nshita ya batumwa, baali ni bacakolwa, balecenjesha abanabo, baali aba bulalelale, kabili baali bapuupu ilyo bashilaba Abena Kristu. (1 Abena Korinti 6:9-11) Ilyo balekele ukucita ifyabipa, balilekele ukumfwa ububi pa fyo balecita pantu balishibe ukuti Lesa alibabeleele uluse nga filya eleela bonse abalapila. Baibolo pa Amalumbo 130:4 itila: “Kuli imwe [Lesa] kwaba ukwelela kwa cine, pa kuti abantu bamubele akatiina.”

Ukusakamikwa pa fya ku ntanshi: Yesu Kristu atile, “Mwilasakamikwa pa bushiku bwa mailo, pantu ubwa mailo bukaba na masakamika ya buko.” (Mateo 6:25, 34) Cinshi Yesu alelandapo? Tamufwile ukulasakamikwa pa fya ku ntanshi. Tamulingile ukulatontonkanya pa mafya ya ku ntanshi pantu kuti yalenga mwafilwa ukubomba bwino. Mufwile no kulaibukisha ukuti ifintu ifingi ifimusakamika taficitika no kucitika.

Ukusakamikwa pa ndalama: Umuntu uwali sana na mano apepele ukuti: “Mwimpeela ubupiina nangu ifyuma.” (Amapinda 30:8) Uyu muntu alefwaya ukukwata fye ifyuma ifyalinga, kabili ifi fine e fyo Lesa afwaya. Baibolo pa AbaHebere 13:5 itila, “Mu mikalile yenu mwilatemwa indalama, lelo muteke imitima ku fintu ifyo mukwete. Pantu [Lesa] atila: ‘Nshakakushe nakalya nangu ukukulekelesha nakalya.’” Te mu fintu fyonse umo indalama shingatwafwa, lelo Lesa alikwata amaka ya kwafwa abantu abamucetekela kabili abashatemwa ifyuma.

“Nshatalamona uwalungama nalekeleshiwa, nelyo abana bakwe balelombelesha ifya kulya.”—Amalumbo 37:25.

IFYO ABANTU BALANDA

Ba Harriet Green balandile muli magazini ya The Guardian iya mu 2008 ukutila: “Pali ino nshita, ifintu ifitusakamika te fyo aba kale balesakamikwapo.” Mu 2014, ba Patrick O’Connor, balembele muli magazini ya The Wall Street Journal ukuti: “Abena America balasakamikwa sana ukucila ifyo balesakamikwa kale.”

IFYO BAIBOLO ILANDA

“Amasakamika yalenga umutima wa muntu ukufinininwa, lelo amashiwi ayasuma yalenga umutima ukusekelela.” (Amapinda 12:25) “Amashiwi ayasuma” sana kuti mwayasanga mu mbila nsuma iya Bufumu bwa kwa Lesa. (Mateo 24:14) Ubufumu bwa kwa Lesa, bukafumyapo fyonse ifilenga tulesakamikwa ukubikako fye na malwele ne mfwa ifyo fwe bantunse tushingafumyapo. Baibolo itila: “[Lesa] akafuuta ifilamba fyonse ku menso [yesu], ne mfwa tayakabeko na kabili, takwakabe no kuloosha nangu ukuteta nangu ukukalipwa na kabili.”—Ukusokolola 21:4.

“Shi Lesa uumupeela isubilo alenge ukuti mube ne nsansa nga nshi kabili mube no mutende pa mulandu wa citetekelo cenu.”—Abena Roma 15:13.