IFYO CALI KULI DAMI

Pa kubala twalemona kwati batata balwele fye umutwe kabili balabafye bwino, lelo umutwe walitendeke ukukalipisha. E ico bamayo baitile aba ku cipatala ukubasenda. Ncili ndebukisha ifyo cali ilyo aba ku cipatala balebasenda. Nshaishibe ukuti ulya e wali no kuba umuku wa kulekeleshako ukumonana na batata. Ilyo papitile inshiku shitatu, batata balifwile ku bulwele bwa aneurysm, ubulenga imishipa ukufimba no kulepuka. Pali ilya inshita nali fye ne myaka 6.

Pa myaka iingi naleipeela imilandu ukuti nine nalengele batata bafwe. Naleibukisha ifyo cali ilyo aba ku cipatala balebasenda, no kulaipusha ukuti: ‘Cinshi naimininine fye ukwabula ukucitapo nangu cimo?’ Mu kuya kwa nshita bamayo balingafwile ukulalanda ifili ku mutima. Na kabili apo tuli Nte sha Yehova, aba mu cilonganino balitwafwile sana.

Abantu bamo batila umuntu aloosha fye ilyo afwilwa no kulabako, nomba ine te fyo cali. Nshaleumfwa ubulanda mpaka ilyo nacilile imyaka 13.

Kuti natemwa ukwebako abacaice abo abafyashi bafwa ukuti, “Bafwile ukulashimikilako bambi ifyo baleumfwa. Nga ca kuti washimikilako bambi ifyo uleumfwa bwangu, kuti watendeka ukumfwako bwino bwangu.”

Ndomfwa ububi nga kwaba ifyacindama ifyacitika mu bumi bwandi e lyo naibukisha ukuti batata balifwa. Na lyo line, ndomfwako bwino nga nabelenga amashiwi yaba pa Ukusokolola 21:4, ayatila nomba line fye Lesa “akafuuta ifilamba fyonse ku menso [yesu], ne mfwa tayakabeko na kabili, takwakabe no kuloosha nangu ukuteta nangu ukukalipwa na kabili.”

IFYO CALI KULI DERRICK

Ndebukisha ifyo caleba nga twaya na batata mu kuloba isabi nangu mu kwangala mu mpili. Batata balitemenwe impili.

Batata balilwele ubulwele bwa ku mutima, kabili ndebukisha ukuti ilyo nali umwaice nalileko ku cipatala umuku umo nelyo ibili mu kubapempula. Na lyo line, nshaishibe ukutila kuti bwabepaya. Batata bafwile ku bulwele bwa mutima ninshi ndi ne myaka 9.

Ilyo bafwile nalililile, ica kuti nalefwaya no kupwilila kabili nshalefwaya ukulanda no muntu uuli onse. Nshatalile umfwapo ububi mu bumi bwandi nga ifyo naumfwile ilyo batata bafwile kabili nshalefwaya ukulacita icili conse. Abaali mu kalibumba ka bacaice ako nalimo ku calici balimbikileko amano pa kubala, lelo mu kuya kwa nshita balilekele.  Abantu ba muli ili ibumba balitemenwe ukulanda ati, “Yali ni nshita ya ba wiso ukufwa” nelyo “Lesa nabeta” nelyo “Baliya ku muulu.” Ifi fyonse balenjeba fyalenenga ukukwata amepusho ayengi, pantu shaishibe ifyo Baibolo isambilisha pali ifi fyonse.

Lyena bamayo batendeke ukusambilila Baibolo ne Nte sha kwa Yehova, kabili mu kuya kwa nshita ine na ndume inandi twalitendeke ukusambilila Baibolo. Twalisambilile ifyo ciba ku muntu nga afwa na pa fyo Lesa atulaya ukuti akabuusha abafwa. (Yohane 5:28, 29) Nomba ilembo ilyangafwile sana ni Esaya 41:10 apo Lesa alanda ukuti: “Witiina, pantu ndi na iwe. Wilasakamana, pantu nine Lesa obe. Nkakukosha. Nkakwafwa.” Ukwishiba ukuti Yehova aali na ine kwalinsansamwishe sana ilyo naleloosha, kabili napali ino nshita kulansansamusha.

IFYO CALI KULI JEANNIE

Ilyo nali ne myaka 7, bamayo balifwile ku bulwele bwa kansa. Ifyacitike pali bulya bushiku fyalimfulungenye. Ndebukisha ukuti bafwilile pa ng’anda ninshi na bamama na bashikulu epo bali. Bonse pa ng’anda baali fye tondolo. Ndebukisha no kuti ica kulya ca bushiku twaliile, mani. Natendeke ukumfwa kwati ifintu fyatendeka ukwaluka panono panono.

Ukufuma apo bamayo bafwilile e lyo na pa myaka yakonkelepo, nalemona fye kwati nalingile ukushipa pa kuti ndesakamana umwaice wandi. E ico nalesungila fye ifyo naleumfwa mu mutima. Na pali ino ine nshita, nga naumfwa ububi ndasungila ifyo ndeumfwa mu mutima. Kwena, nalishiba ukuti ukucita ifi te kusuma.

Ndebukisha ifyo aba mu cilonganino ca Nte sha kwa Yehova batwafwile no kutulanga ukutemwa. Nangu ca kutila e lyo fye twatendeke ukulaya ku Ng’anda ya Bufumu mu kulongana, aba mu cilonganino balitwafwile kwati tuli bantu abo baishibe akale. Batata tabalecula ukutwipikila ifya kulya pa mwaka uutuntulu pantu lyonse fye aba mu cilonganino baletuletela ifya kulya.

Amashiwi yamo ayo natemwisha yaba pa Amalumbo 25:16, 17. Pali ili ilembo kemba wa malumbo alombele Lesa ukuti: “Ndolesheni, kabili mbeleleni uluse; Pantu ndi neka kabili nacula. Ubulanda bwa ku mutima wandi bwafula; Mfumyeni mu macushi ayamponene.” Ndomfwa bwino ukwishiba ukuti nga tuli no bulanda tatuba fweka, lelo Lesa alaba na ifwe. Ifyebo fyaba mu Baibolo fyalingafwa ukulaumfwako bwino no kulatontonkanya pa fintu ifisuma pamo nga ifyo Lesa atulaya ukuti akabuusha abafwa. Ndafwaisha ukwisa mona bamayo no kubeshiba ilyo tukakwata ubumi ubusuma mu paradaise pe sonde.—2 Petro 3:13.

Bushe kuti mwatemwa ukwishiba ifyo Baibolo ikoselesha abaleloosha. Belengeni broshuwa itila “Ilyo Untu Watemwa Afwa.” Abalemba iyi broshuwa ni Nte sha kwa Yehova.