SPAIN calo umwaba abantu abalekanalekana kabili mwaba impanga ishalekanalekana. Impanga iikalamba mu spain mwaba amabala ya ng’ano, aya myangashi, na ya miolife. Ku masamba ya ici calo kwaliba bemba uwacilekanya ku cishi ca Africa. Ukufuma ku Spain ukufika ku Africa paba fye amakilomita 14.

Abantu abengi, pamo nga abena Phoenicia, abaGriki, na bena Carthage e baile muli ici calo cabela ku Europe. Ilyo abena Roma bafikile muli ici calo muli ba 200 B.C.E., batendeke ukwita ici calo icipya ico basanshile ukuti Hispania. Mu kuya kwa nshita abena Visigoth na bena Moor, balifikile muli ici calo kabili balishamo intambi shabo.

Mu mwaka umo uwa nomba line, abantu ukucila pa mamilioni 68 balitandalile icalo ca Spain. Abatandashi abengi besa mukontela akasuba, mu kwangala mu mucanga  wa ku lulamba lwa bemba, e lyo na mu kumona ifintu fya kale ifyo baalenga ne fyo bakuula. Ifya kulya ifyaba muli ici calo na fyo filalenga muleya abatandashi abengi. Ifya kulya balya sana fya kulya fya muli bemba, inkumba, umuto, ama salads, e lyo na umusalu uo bepika no kubikamo amafuta ya miolife. Ifya kulya ifyo beta ukuti Spanish omelet, paella, ne fyo beta ukuti tapas, fyalishibikwa ku bantu abengi.

Abena Spain baliba bwino kabili bansansa. Abengi balanda ukuti ni ba Katolika lelo banono fye abaya ku mapepo. Mu myaka ya nomba line, abantu ukufuma ku Africa, ku Asia, na ku Latin America balikukila ku Spain. Abengi pali aba balitemwa ukulanshanya pa fyo basuminamo. Inte sha kwa Yehova balilashanya na bantu abengi muli ici calo kabili balibafwa ukwishiba ifyo Baibolo ilanda pa fintu ifingi.

Mu 2015, Inte sha kwa Yehova ukucila pali 10,500, baliipeeleshe ukubombako umulimo wa kukuula nelyo ukuwamya ififulo umo balonganina 70 ifyo beta ukuti Amayanda ya Bufumu. Abalashi babuteko e babapele apa kukuula Amayanda ya Bufumu yamo. Pa kwafwa abantu abafuma mu fyalo fimbi ukulanonkelamo mu kulongana, Inte sha kwa Yehova tababomfya fye iciSpanish lelo balikwata ne filonganino umo balanda ndimi na shimbi ukucila pali 30. Mu 2016, abantu ukucila pali 186,000, balisangilweko ilyo Inte sha kwa Yehova balelongana Icibukisho ca Mfwa ya kwa Yesu Kristu.