Ukupanga ifyo ufwaya ukucita kwalipusana no kufwaya ukuti icintu cimo cikacitike. Nga kwaliba ifyo upanga ukucita, ulingile ukuipekanya bwino, taufwile ukuumina kumo, kabili ulingile ukulabombesha.

Kwaliba ifyo wingapanga ukucita mu nshiku ishinono, mu milungu, mu myeshi, mu mwaka, nelyo ukucilapo. Nga kwaliba ifyo upanga ukucita pa numa ya mwaka nelyo ukucilapo, kuti watala wafikilisha ifyo wapanga ukucita mu nshiku ishinono na mu myeshi.

Nga wafishapo ifyo walepanga ukucita, ukaicetekela, ukalaumfwana sana ne fibusa kabili ukalaba ne nsansa.

Ukuicetekela: Nga ulefikilisha ifyo upanga ukucita mu nshiku ishinono nelyo imilungu, ukamona ukutila kuti wafikilisha ne fyo upanga ukucita pa numa ya mwaka nelyo imyaka iingi. Na kabili tawakulaba no mwenso nga wakwata amafya pamo ngo kufwaya ukukonkelela ifibusa.

Ukumfwana ne fibusa: Abengi balatemwa ukupanga bucibusa na bantu abakwata ifyo bapanga ukucita kabili ababombesha ukufifikilisha. Na kuba, umuntu nga alefwaya ukukosha bucibusa no muntu umbi, alingile ukulabombela pamo nankwe pa kufikilisha ifyo bonse bapanga.

Ukuba ne nsansa: Nga wapanga kabili wafikilisha ifyo wapanga, kulaba ukuba ne nsansa.

“Nalitemwa ukupangila libela ifyo nkacita, kabili ici cilalenga lyonse ndekwata ifya kucita. Na kabili, nga wafikilisha ifyo walepanga kabili watontonkanya na pa fyo wabombeshe, ukalaba sana ne nsansa.”—E fyalandile Christopher.

ILEMBO ILINGAKWAFWA: “Uulolekesha imikuukile ya mwela takatande; no umona imyendele ya makumbi takaseepe.”—Lukala Milandu 11:4.

Nga ulefwaya ukupanga ukucita fimo e lyo no kufifikilisha, ulecita ifyakonkapo.

Ishiba ifyo ulepanga ukucita. Lemba ifyo ulepanga ukucita, lyena sala ificindeme ifyo ulefwaya ukubalilapo ukucita e lyo ne fikakonkapo.

Pekanya ifyo ukacita. Pa kuti ukafikilishe ifyo upanga ukucita, ulingile ukucita ifyakonkapo:

• Ufwile ukubika ubushiku ubo wingafikilisha ifyo wapanga.

• Ufwile ukupekanya ifyo ukacita pa kufikilisha ifyo wapanga.

• Ufwile ukwishiba ifingalenga wafilwa ukufikilisha ifyo wapanga no kwishiba ifyo wingacita nga fyacitika.

Ulebombelapo. Wilalolela ukuti ukeshibe fyonse bwino e lyo ukatendeke ukucita ifyo wapanga. Uleyipusha ukuti, ‘Finshi mfwile ukubalilapo ukucita pa kufishapo ifyo napanga?’ Nga wafishiba, ufwile ukuficita. Uleibebeta pa kuti ulemona nga ca kuti ulekonka ifyo wapekenye.

ILEMBO ILINGAKWAFWA: “Amapange ya wacincila yamulenga ukubomba bwino.”—Amapinda 21:5.