Abafyashi abafwaya abana ukubapashanya balacita ifyo balanda. Ku ca kumwenako, umwana wenu te kuti abe uwa cishinka nga ca kuti aumfwa mulelanda ati, “Bebe ati nshilipo,” pa mulandu fye wa kuti tamulefwaya ukulanda na beshile pa ng’anda.

“Abengi balanda ukuti ‘Ulekonka ifyo nanda, wilakonka ifyo ncita.’ Nomba ifi tafibomba ku bana, pantu nga filya ubutonge bonka fyonse ifili apo mwabubika, abana nabo balapashanya fyonse ifyo tulanda ne fyo tucita. Na kabili balatweba nga ca kuti tatulecita ifyo tubeba.”—E fyalandile ba David.

ILEMBO ILINGAMWAFWA: “Iwe, we ubila auti ‘Wilaiba,’ bushe uleba?”—Abena Roma 2:21.

Abana abanono ne misepela balapashanya sana abafyashi ukucila ifyo bapashanya abanabo nelyo abantu bambi. E ico mwe bafyashi ni mwe mwingasambilisha bwino abana ukuba ne mibele isuma, kulila fye mulecita ifyo mubasambilisha.

“Kuti twamona kwati umwana tomfwa nga twamweba pa cintu cimo imiku iingi. Nomba na ifwe nga twafilwa ukucita ifyo tulanda, umwana kuti atwebelapo. Abana balabika amano kuli fyonse ifyo tucita, na lintu tulemona kwati tababikileko amano.”—E fyalandile ba Nicole.

ILEMBO ILINGAMWAFWA: “Amano ayafuma ku muulu . . . tayalenga umuntu ukuba uwa bumbimunda.”—Yakobo 3:17.

Muleibebeta. Finshi mwatemwa ukutamba? Bushe mulacindika abena mwenu na bana benu? Fibusa nshi mwakwata? Bushe mwalibika amano ku bantu bambi? Bushe mucita ifintu ifyo mufwaya abana benu ukulapashanya?

“Ine na bena mwandi tatweba abana ukucita ifintu ifyo ifwe tufilwa ukucita.”—E fyalandile ba Christine.

Mulelomba ubwelelo nga mwalufyanya. Abana balishiba ukuti tamwapwililika. Nga mulelomba ubwelelo ku bena mwenu na ku bana benu ilyo mwalufyanya, kuti basambilila ukuba aba cishinka no kuba abaicefya.

“Abana balingile ukumona ukuti nga twalufyanya tulasumina no kulomba ubwelelo. Nga tatucita ifi, abana nabo te kuti balesumina nga balufyanya.”—E fyalandile ba Robin.