Ukweleela kusuula ku cilubo ico umuntu engacita e lyo no kukanasunga icintu ku mukoshi. Ukweleela tacipilibula ukuti tulecefya icilubo ico umuntu atulufyenye nelyo tulecita kwati tapali ico atulufyenye.

ILEMBO ILINGAMWAFWA: “Muleshipikishanya no kubelelana uluse nga umo ali ne ca kuilishanya ku munankwe.”—Abena Kolose 3:13.

“Nga ca kuti walitemwa umuntu, takuba ukubika amano ku filubo apanga, lelo kuba ukubika amano ku fisuma ifyo uyo muntu aleesha ukucita.”—E fyalandile ba Aaron.

Nga mulesunga icintu ku mukoshi kuti mwalwala kabili kuti mwalenga icupo cenu caba mu bwafya.

“Bushiku bumo abena mwandi balilombele ubwelelo pa numa ya kunkalifya sana. Nshalefwaya ukubeleela. Nomba mu kuya kwa nshita nalibeleele, lelo nalyumfwile ububi ukuti palipitile inshita pa kuti mbeleele. Ifyo nacitile fyalengele twaleka ukumfwana mu cupo cesu.”—E fyalandile ba Julia.

TONTONKANYENI PALI IFI

Ilyo umwina mwenu akalanda nelyo ukucita ifikamukalifya, mukayipushe ukuti:

• ‘Bushe ndafulwa bwangu?’

• ‘Bushe icilubo umuntu apangile cikulu sana ica kuti alingile ukulomba ubwelelo nelyo kuti nasuulako fye?’

LANSHANYENI NA BENA MWENU

• Bushe palapita sana inshita pa kuti tweleelane no mwina mwandi?

• Finshi tulingile ukucita pa kuti twilakokola ukweleelana?

IFINGAMWAFWA

• Nga ca kuti abena mwenu bamukalifya, mwilamona kwati bacimukalifya fye ku mufulo.

• Mwilabika sana amano ku fyo abena mwenu balufyanya, lelo muleibukisha ukuti “bonse tulaipununa imiku iingi.”—Yakobo 3:2.

“Cilanguka ukweleelana nga ca kuti bonse namulufyanya, lelo cilafya sana nga ca kuti natwishiba ukuti umuntu umbi e utulufyenye. Umuntu uweleela bambi ninshi aliicefya.”—E fyalandile ba Kimberly.

ILEMBO ILINGAMWAFWA: ‘Muleyangufyanya ukumfwana.’—Mateo 5:25.