5 Bushe Ukucula Kukatala Akupwa?
Umulandu Cacindamina Ukwishiba Icasuko
Ukukwata isubilo lya kuti ukucula kukapwa kuti kwakuma ifyo tumona ubumi ne fyo twaishiba Lesa.
Tontonkanyeni Pali Ifi
Abantu abengi kuti batemwa ukufumyapo amafya, lelo tabakwata amaka ya kucita ifyo. Tontonkanyeni pa fishinka fyakonkapo:
Nangu ca kuti ababomba mu fipatala balisanga inshila sha kundapilamo amalwele ayengi . . .
-
Amalwele ya ku mutima yalepaya abantu abengi sana ukucila amalwele yambi.
-
Ubulwele bwa kansa bulepaya abantu abengi sana.
-
Ba Dr. David Bloom balembele mu lupapulo lwa Frontiers in Immunology ukuti: “Amalwele ya kale yalitwalilila ukucusha abantu, kabili kwaliba na malwele ayaisa nomba line e lyo na yapwile, lelo ayatendeka ukubwela.”
Nangu ca kuti ifyalo fimo fikankaala . . .
-
Cila mwaka abana abengi sana balafwa kabili abafwa sana bana abekala mu fyalo ifipiina.
-
Abantu abengi bekala mu ncende umwaba sana ubusali.
-
Abengi tabakwata amenshi aya busaka.
Nangu ca kuti abantu abengi balishiba insambu bakwata . . .
-
Lipoti imo iya ba United Nations yalandile ukuti mu fyalo ifingi balitwalilila ukushitisha abantu, kabili “mu fyalo fimo tabekata abashitisha abantu pantu tabaishiba ukuti mwaliba ubu bwafya, e lyo bambi tabaishiba ne fya kucita pa kubekata.”
ISHIBILENIPO NA FIMBI
Tambeni vidio itila Bushe Ubufumu bwa kwa Lesa ni Cinshi? pa jw.org/bem.
Ifyo Baibolo Ilanda
Lesa alitubikako amano.
Alomfwa ububi nga tulecula.
Baibolo itila: “[Lesa] tasuula nangu ukumona ukucula kwa mulanda nge ca bunani; Kabili tafisa icinso cakwe kuli ena, kabili ilyo akuutile kuli ena alyumfwile.”—AMALUMBO 22:24.
Baibolo itila: “Mulepoosa amasakamika yenu yonse pali ena, pantu asakamana imwe.”—1 PETRO 5:7.
Ukucula kukapwa.
Baibolo itweba ukuti ifyo Lesa alefwaya ifintu ukuba ilyo abumbile fye abantu fikacitika.
Baibolo itila: “Lesa . . . akafuuta ifilamba fyonse ku menso yabo, ne mfwa tayakabeko na kabili, takwakabe no kuloosha nangu ukuteta nangu ukukalipwa na kabili. Ifya ntanshi nafiya.”—UKUSOKOLOLA 21:3, 4.
Lesa akafumyapo ifilenga tulecula.
Akabomfya Ubufumu bwakwe nelyo ubuteko bwakwe.
Baibolo itila: “Lesa wa mu muulu akemya ubufumu ubushakonaulwe nakalya. Kabili ubo bufumu tabwakashiilwe ku bantu bambi. . . . Bwena bukeminina umuyayaya.”—DANIELE 2:44.
