Bushe Ifya Kupangapanga Filenga Mwalaumfwana Shani ne Fibusa?
Ifya kupangapanga filalenga tulelanshanya bwino na banensu ababa ukutali ukubomfya amafoni, amameseji nelyo amavidio. Ukubomfya ifya kupangapanga muli iyi nshila kwaliba fye bwino.
Nomba abantu abekalila fye ukubomfya ifya kupangapanga pa kulanshanya ne fibusa balakwata amafya pamo nga . . .
-
ukukanalangulukilako ifibusa fyabo.
-
ukutalalilwa.
-
ukuba na bukaitemwe.
IFYO MUFWILE UKWISHIBA
UKULANGULUKILAKO
Pa kuti tulangulukileko umuntu tulingile ukukwata inshita ya kutontonkanya pa fyo aleumfwa. Nomba te kuti tucite ifyo nga ca kuti inshita iikalamba tupoosa mu kutumishanya amameseji.
Nga ca kuti ifya kupangapanga fyalimuteka ubusha mukuya kwa nshita mukalamona kwati cintu cakosa sana no kutumina fye cibusa wenu meseji. Mukalabika fye amano ku kubwesesha amameseji abamutumine ukwabula ukubika amano ku fyo cibusa wenu alekabila.
TONTONKANYENI PALI ICI: Kuti mwalanga shani ukuti ‘mulelangulukilako’ umuntu ilyo muletumishanya amameseji?—1 PETRO 3:8.
UKUTALALILWA
Abasambilila sana basanga ukuti, abantu abatemwa ukuposa inshita iikalamba pa Intaneti balomfwa sana ububi. Na kabili basangile ukuti, abantu abekalila fye ukutamba ifikope e lyo ne fyebo ifyo abantu babika pa Intaneti balatendeka ukumona ukuti “tapali ifyacindama ifyo bena bacita”.
Na kabili ukumona ifikope ifisuma ifyo abantu babika pa Intaneti kulalenga batendeka ukuilinganya kuli bena. Na kuba ukutamba ifikope kuti kwalenga fye twalamona kwati abanensu baliba ne nsansa e lyo ninshi ifwe ifintu tafili bwino.
TONTONKANYENI PALI ICI: Nga mulebomfya Intaneti kuti mwacita shani pa kuti mwilailinganya kuli bambi?—ABENA GALATIA 6:4.
UKUBA NA BUKAITEMWE
Kafundisha umo alembele ukuti, abana be sukulu bamo bali ni bakaitemwe ica kuti balefwaya fye abanabo ukulabacitila ifintu. Abakwata ifibusa fya musango uyu bafwaya fye abanabo e bo balebacitila fimo. Ici kuti calenga umuntu alamona ifibusa fyakwe nga foni nelyo kompyuta iyo engabomfya pa nshita imo e lyo no kuibika ilyo alefwaya.
TONTONKANYENI PALI ICI: Bushe ifyo mubika pa Intaneti filalenga abantu balamona ukuti ni mwe bakaitemwe nelyo mulafwaya ukucimfyanya nabo?—ABENA GALATIA 5:26.
IFYO MWINGACITA
MULEMONA NGA CA KUTI MULABOMFYA SANA IFYA KUPANGAPANGA
Ifya kupangapanga nga tafimutekele ubusha mwakulaipakisha ukulanshanya ne fibusa kabili mwakulakosha bucibusa bwenu.
IFYO BAIBOLO ILANDA: “Mu kutemwa . . . tamwaba ukucita ifya kuisekesha.”—1 ABENA KORINTI 13:4, 5.
Moneni fimo ifyo mwingatemwa ukucita nelyo lembeni fimo ifyo mwingamona ukutila kuti fyamwafwa.
-
Mwilabelesha ukulanshanya na bantu ukubomfya foni nelyo meseji lelo mulelanda nabo pa kanwa nkati
-
Nga mulelanshanya na bantu mwilaba na foni nelyo muleibika apa kuti tailepanga icongo
-
Mwilapoosa inshita iikalamba pa Intaneti
-
Nga mulelanshanya na bantu mulekutikisha
-
Mulelanshanyako ne fibusa abali na mafya
Nalimo Kuti Mwatemwako ne fi
LOLENI!
Finshi Filenga Umuntu Aba Cibusa Musuma?
Abantu abengi balishiba ukuti calicindama ukukwata ifibusa ifisuma. Finshi mufwile ukucita pa kuba cibusa musuma? Cino cipande cilelanda pa fintu 4 ifyo Baibolo yalandapo ifingamwafwa.
ABACAICE BEPUSHA UKUTI
Finshi Ningile Ukwishiba pa lwa Kutuma Ifikope pa Intaneti?
Ukubika ifikope ifyo watemwa pa akaunti yobe iya pa Intaneti, ni nshila imo iyo wingalanshanishishamo na ba lupwa ne fibusa, lelo nga taucenjele kuti wailetelela.
