IFYO ABANTU BALANDA

Abantu abengi bamona kwati umuntu uwaba ne citetekelo alingile fye ukusumina muli fimo ukwabula no kushininkisha nga ca kuti fya cine. Ku ca kumwenako, umuntu uwatemwa ifya mapepo nalimo kuti atila, “Nalisumina muli Lesa.” Nga ca kuti uyo muntu balimwipwishe ukuti, “Cinshi calenga usumine muli Lesa?” nalimo kuti ayasuka ukuti, “E fyo naishiba ukutula ku bwaice” nelyo, “E fyo bansambilisha ukutula ku bwaice.” Aba bantu balenga calamoneka kwati ukuba ne citetekelo takwapusana sana no kulasumina fye icisuminesumine.

IFYO BAIBOLO ILANDA

“Icitetekelo kulolela kwashininkishiwa ukwa kuti ifintu tulesubila fikacitika, kabili e bushininkisho bwa kuti ifintu nangu tafilamoneka, fya cine cine.” (AbaHebere 11:1) Pa kuti umuntu ashininkishe ukuti ifintu fimo fikacitika, pafwile ukuba ifishinka ifilelangilila ukuti fikacitika. Na kuba, ishiwi lya ciGriki ilyo bapilibula ukuti “ukulolela kwashininkishiwa,” talipilibula fye ifyo umuntu aleumfwa nelyo ukwelenganya fye ifikacitika. Kanshi ukuba ne citetekelo kukwata ifishinka ifilelangilila ukuti ifyo fintu fikacitika.

“Imibele yakwe [Lesa], ukutula fye apo abumbile umuntu, bailukila ku fyo abumba, muli ifi e mo belukila amaka yakwe aya pe pamo na buLesa bwakwe.”—Abena Roma 1:20.

IFYO BAIBOLO ILANDA

“Ukwabula icitetekelo te kuti tusekeshe Lesa, pantu uupalamina kuli Lesa afwile ukusumina ukuti e ko aba no kuti alalambula abamufwaisha.”—AbaHebere 11:6.

Nga fintu tulandilepo pa kubala, abantu abengi basumina muli Lesa pa mulandu fye wa kuti e fyo babeba. Nalimo kuti batila ‘E fyo naishiba ukutula ku bwaice.’ Na lyo line, Lesa afwaya ukuti abamupepa baleshininkisha ukuti e ko aba no kuti alibatemwa. E mulandu wine Baibolo itwebela libili libili ukuti tulefwayafwaya Lesa, pa kuti tukamwishibe bwino.

“Palameni kuli Lesa, na o akapalama kuli imwe.”—Yakobo 4:8.

IFYO BAIBOLO ILANDA

Baibolo itila: “Umuntu atetekela ilyo aumfwa amashiwi.” (Abena Roma 10:17) Kanshi ico umuntu alingile ukubalilapo ukucita pa kuba ne citetekelo ‘kumfwa’ ifyo Baibolo isambilisha. (2 Timote 3:16) Ukusambilila Baibolo kuti kwamwafwa ukusanga amasuko ku mepusho yacindama pamo nga: Bushe Lesa ni nani? Finshi filanga ukuti e ko aba? Bushe Lesa alansakamana? Bushe Lesa afwaya ukuti isonde likabe shani ku ntanshi?

Inte sha kwa Yehova kuti batemwa ukumwafwa ukusambilila Baibolo. Amashiwi yaba pa webusaiti yesu iya jw.org/bem yatila, “Fwe Nte sha kwa Yehova twalitemwa ukusambilisha abantu ifya mu Baibolo, lelo tatubapatikisha ukuti balepepa na ifwe. Tubalondolwela fye ifyo Baibolo yalanda, twalishiba ukuti cila muntu alikwata insambu sha kusala ifyo alefwaya ukusuminamo.”

Kanshi pa kuti mube ne citetekelo mulingile ukushininkisha ukuti ifyo mwabelenga mu Baibolo fya cine. Nga mulecita ifi, ninshi mukapashanya Abena Kristu ba kubalilapo abo ‘imitima yabo yalefwaisha nga nshi ukupokelela amashiwi ya kwa Lesa kabili abalefwailisha mu Malembo cila bushiku pa kuti bashininkishe nga ca kutila ifi fintu fya cine.’—Imilimo 17:11.

“Nomba pa kuti babe no mweo wa muyayaya, kano baishiba imwe mwe Lesa wa cine mweka, na Yesu Kristu uo mwatumine.”—Yohane 17:3.