Ukubika Amano ku fya kwa Lesa
Nga fintu tulandilepo pa ntendekelo ya ino magazini, abantu abengi balishiba ukutila Baibolo citabo icilanda pa fya mapepo. Na kabili abantu abengi balimona ukuti nga balebelenga no kukonka ifyo Baibolo ilanda, bucibusa bwabo na Lesa bulakoselako kabili balaba ne nsansa.
Ifyo umuntu acita, e filanga ukutila alibika amano ku fya kwa Lesa nga fintu Baibolo ilanda. (Yuda 18, 19) Umuntu uwabika amano ku fya kwa Lesa, tabika sana amano ku fyo afwaya, lelo abika amano ku fyo Lesa afwaya.—Abena Efese 5:1.
ISUBILO
IFYO BAIBOLO ILANDA: “Bushe ulanenuka mu bushiku bwa macushi? Awe ninshi amaka yobe yanono.”—Amapinda 24:10.
UMWALOLA AYA AMASHIWI: Nga tuli na mafya kuti twafuupulwa ica kuti twafilwa no kuyapwisha. Nomba nga natukwata isubilo, kuti twashipikisha amafya tukwete. Nga tuli ne subilo tuleshiba ukutila amafya ayengi ayo tukwata yakapwa mu kuya kwa nshita.
IFYO MWINGACITA: Mulingile ukutontonkanya pa fintu ifisuma ifikacitika ku ntanshi. Mu nshita ya kusakamikwa pa fingacitika nelyo ukulalolela ukutila fimo fikacitike e lyo mukatendeke ukucita ifyo mufwaya, mufwile ukutendeka ukuficita pali ino ine inshita. Icishinka ca kuti “ifintu fyabula ukwenekela” kuti fyacitika. (Lukala Milandu 9:11) Na kuba, te lyonse ifintu fibipa nge fyo twaleenekela. Baibolo itila: “Ulucelo tanda imbuto shobe ukufika icungulo wileka ukuboko kobe kutuushe; pantu tawishibe ishikamena, ishi napamo shilya, nangu nga shonse shikaba ishisuma.”—Lukala Milandu 11:6.
AMASUKO KU MEPUSHO YACINDAMA AYO ABANTU BEPUSHA
IFYO BAIBOLO ILANDA: “Nengeni ukwiluka, . . . Icebo cenu conse ca cine.”—Amalumbo 119:144, 160.
UMWALOLA AYA AMASHIWI: Baibolo ilasuka amepusho yacindama ayo abantu abengi bepusha. Ku ca kumwenako, ilasuka amepusho pamo nga
-
Bushe twaishilebako shani?
-
Cinshi twabela pano calo?
-
Bushe umuntu aba shani nga afwa?
-
Bushe ifintu fikatwalilila ukuba ifi fine fyaba?
Abantu abengi nga nshi mwi sonde balisanga amasuko kuli aya mepusho kabili ici calilenga baba sana ne nsansa.
IFYO MWINGACITA: Pa kusanga amasuko ku mepusho ayacindama, mulebelenga Baibolo. Na kabili mukeshiba ifingi nga mwaeba Inte sha kwa Yehova ukuti balemusambilisha Baibolo. Kuti mwaya na pa webusaiti yesu iya jw.org/bem nelyo ukulongana na ifwe. Umuntu uuli onse kuti alongana na ifwe kabili takuba ukulipilisha.
FIMBI IFYO BAIBOLO ILANDA IFINGAMWAFWA
Tambeni vidio itila Mulandu Nshi Mulingiile Ukusambilila Baibolo? pa jw.org/bem. Kuti mwatamba iyi vidio mu ndimi ukucila pali 880
MUFWILE UKWISHIBA UKUTILA MULAKABILA IFYA KWA LESA.
“Balipaalwa abaishiba ukuti balakabila ifya kwa Lesa.”—MATEO 5:3.
MULINGILE UKWISHIBILAPO NA FIMBI PALI LESA.
‘Fwayeni Lesa . . . no kumusanga . . . Taba kutali kuli ifwe umo umo.’—IMILIMO 17:27.
MULEBELENGA BAIBOLO NO KUTONTONKANYA PA FYO ILANDA.
‘Alipaalwa umuntu uusekelela mu mafunde ya kwa Yehova, * kabili . . . uuyatontonkanyapo akasuba no bushiku. . . . Conse ico acita cikatunguluka.’—AMALUMBO 1:1-3.
^ para. 23 Baibolo ilanda ukuti Yehova e shina lya kwa Lesa.
Nalimo Kuti Mwatemwako ne fi
ULUPUNGU LWA KWA KALINDA
Bushe Baibolo Kuti Yangafwa Shani Ukulaikala Bwino?
Muli ici icitabo ca kale mwaliba ifyebo ifingamwafwa.
