Ukweshiwa, kutunkwa ukucita ifintu ifyo umuntu akumbwa, maka maka ifyabipa. Ku ca kumwenako, ilyo muleshita ifintu kuti mwakumbwa icipe cimo kabili kuti mwatontonkanya ukuti nga mwaiba cilya cipe te kuti bamwikate. Na lyo line, kampingu kuti yamukaanya, kabili mwaleka no kutontonkanyapo. Nga mwacita ifyo ninshi mwacimfya ubwesho kabili tamubembwike.

IFYO BAIBOLO ILANDA

Nga mwaeshiwa tacipilibula ukuti muli bantu ababi. Baibolo itila bonse fye tuleshiwa. (1 Abena Korinti 10:13) Ifyo tucita nga twaeshiwa e filenga twaba abantu abasuma nelyo iyo. Abantu bamo balatwalilila ukutontonkanya pa fintu ifyo balekumbwa kabili tapakokola balabembuka. Na lyo line, abantu bamo nga bamona ukuti ifyo baletontonyapo nafibipa, tabatwalilila ukufitontonkanyapo.

“Umuntu onse atunkwa ilyo ulunkumbwa lwakwe umwine lwamusembeleka no kumubeleleka.”—Yakobo 1:14.

Baibolo yalilanda pa fyo ciba pa kuti umuntu abembuke. Yakobo 1:15 itila: “Ulunkumbwa, ilyo lwaimita, lufyala ulubembu.” Nga filya umwanakashi afwile fye ukukwata umwana nga ca kuti aimita e fyo ciba nga twatwalilila ukutontonkanya pa fyabipa, kuti twasuka twabembuka. Na lyo line, kuti twacitapo fimo pa kuti tatubembwike.

IFYO BAIBOLO INGATWAFWA

Nga filya fine twingatontonkanya pa fyabipa, twalikwata na maka ya kuleka ukutontonkanyapo. Kuti twacita shani ifyo? Kuti twaleka ukutontonkanya pa fyabipa nga twabika amano kuli fimbi pamo nga ukubomba imilimo imo, ukulanda na cibusa, nelyo ukulatontonkanya pa fintu ifisuma. (Abena Filipi 4:8) Fimbi ifingatwafwa kulatontonkanya pa fingacitika nga ca kuti twabembuka, pamo nga ifyo twingalaumfwa ububi, pa malwele twingalwala na pa fyo bucibusa bwesu na Yehova bwingaba. (Amalango 32:29) Ipepo na lyo kuti lyatwafwa sana. Yesu Kristu atile: “Akupepeni, pa kuti mwiingila mu matunko.”—Mateo 26:41.

“Mwilufiwa: Lesa tatumpikwa. Pantu ico umuntu alebyala, e co akalobolola.”—Abena Galatia 6:7.

IFYO MUFWILE UKWISHIBA PA KWESHIWA

Mufwile ukwishiba ukuti umuntu nga aeshiwa alabelelekwa ukucita ifintu ifingamuletela amafya. (Yakobo 1:14) Ifi e fyo ciba maka maka ku muntu uwabelelekwa ukucita ubulalelale.—Amapinda 7:22, 23.

IFYO BAIBOLO INGATWAFWA

Yesu Kristu atile: “E ico kanshi ilinso lyobe ilya ku kulyo nga lilekulenga ukulufyanya, lilobole no kulipoosa.” (Mateo 5:29) Kwena ilinso Yesu alelandapo ukulobola te linso lya cine cine ilyo twakwata. Lelo aloseshe mu kuti nga tulefwaya ukucita ifyo Lesa afwaya no kwisaikala umuyayaya, tufwile ukuleka ukucita fyonse ifingalenga tuletontonkanya pa kucita ifyabipa. (Abena Kolose 3:5) Kanshi tulingile ukwesha na maka ukukanacita ifyabipa nga twatunkwa. Umwaume wa cishinka umo, apepele kuli Lesa ukuti: “Lengeni amenso yandi ukukanalolesha ifya fye.”—Amalumbo 119:37.

Calyafya ukuilama pantu ‘umubili walinaka.’ (Mateo 26:41) Kanshi ici cilalenga tulebembuka. Na lyo line, nga twalapila no kwesha na maka ukukanacita ifyabipa, Kabumba wesu, Yehova Lesa, kuti atwelela pantu “wa nkumbu kabili wa mutembo.” (Amalumbo 103:8) Ukwishiba ifi kulatusansamusha!

“Imembu nga e sho mulolekesha, mwe Jah, Mwe Yehova, nani uwingeminina?”—Amalumbo 130:3.