1. Bushe ifyo Yehova abumba filanga shani ukuti ni kapekape?

NANGU ca kuti Yehova ali fye eka ilyo ashilatendeka ukubumba ifintu, taletontonkanya fye pa fingamuwamina. Lelo alipeele bamalaika na bantu ubumi. Apo Yehova ni “Lesa wa nsansa,” alitemwa ukupeela ifintu ifisuma. (1 Tim. 1:11; Yako. 1:17) Na kabili apo afwaya tuleba ne nsansa, alatusambilisha ukuba bakapekape.—Rom. 1:20.

2, 3. (a) Mulandu nshi ukupeela kulengela twaba ne nsansa? (b) Finshi twalasambilila?

² Lesa abumbile umuntu mu cipasho cakwe. (Ukute. 1:27) Ici calola mu kuti atubumbile mu musango wa kuti tuleba ne mibele iyo akwata. Pa kuti tuleba ne nsansa tufwile ukulabika amano ku bantu no kuba bakapekape nga fintu Yehova aba. (Fil. 2:3, 4; Yako. 1:5) Mulandu nshi? Pantu e fyo Yehova atubumbile. Nangu ca kuti tatwapwililika, kuti twaba bakapekape nga fintu Yehova aba.

³ Baibolo ilatweba ifyo twingaba bakapekape. Natulande  pali fimo ifyo Amalembo yatusambilisha pa kuba bakapekape. Twalasambilila ifyo ukuba bakapekape kulenga Lesa atutemwa kabili twalamona ifyo ukuba bakapekape kulenga twalabomba umulimo uo Lesa atupeela. Twalasambilila ne fyo ukuba bakapekape kulenga twaba ne nsansa no mulandu tulingile ukutwalilila ukuba bakapekape.

4, 5. Bushe Yehova na Yesu balanga shani ukuti ni bakapekape?

⁴ Yehova afwaya abantu bakwe balemupashanya, kanshi alatemwa nga tuli bakapekape. (Efes. 5:1) Ifyo Lesa atubumba ne fyo ifintu abumba fimoneka bwino filanga ukuti afwaya abantu baleba ne nsansa. (Amalu. 104:24; 139:13-16) Kanshi nga tulecita ifilenga abantu baleba ne nsansa, ninshi tulemucindika.

⁵ Abena Kristu ba cine balapashanya Kristu, uwatulangile ifyo tufwile ukuba bakapekape. Yesu umwine alandile ati: “Umwana wa muntu taishile ukuti balemubombela, lelo aishile mu kubombela abantu no kupeela umweo wakwe icilubula pa kuti alubule abengi.” (Mat. 20:28) E co umutumwa Paulo aebele Abena Kristu ati: “Mube no mutima uyu wine uwali na muli Kristu Yesu . . . Aisangwile uwa fye no kubuula icipasho ca busha.” (Fil. 2:5, 7) Bonse tufwile ukuyipusha atuti, ‘Finshi ningacita pa kuti ndepashanya sana Yesu ukucila ifyo mupashanya?’—Belengeni 1 Petro 2:21.

6. Finshi Yesu atusambilisha mu cilangililo ca mwina Samaria musuma? (Moneni icikope pa ntendekelo ya cino cipande.)

⁶ Yehova kuti atutemwa nga ca kuti tulebika amano ku bantu kabili tulebafwa nga filya ena na Kristu bacita. Yesu alandile icilangililo ca mwina Samaria musuma pa kulanga abasambi bakwe ukuti alefwaya baleyafwa abantu ukubikako fye na bashali abaYuda. (Belengeni Luka 10:29-37.) Bushe muleibukisha icipusho baipwishe Yesu icalengele alande icilangililo ca mwina Samaria musuma? UmuYuda amwipwishe ati: “Nga kanshi umunandi nani?” Ifyo Yesu ayaswike filanga ukuti nga tulefwaya Lesa atutemwe tufwile ukulaitemenwa ukupeela nga filya umwina Samaria acitile.

7. Bushe ukuba bakaitemwe nelyo bakapekape kwakuma shani umulandu uukalamba uo Satana aimishe?

⁷ Kwaliba ifintu ifingi ififwile ukulenga Abena Kristu babe bakapekape. Ku ca kumwenako, umulandu uo Satana aimishe mwi bala lya Edeni walikuma bukapekape. Cinshi twalandila ifi? Satana alandile ukuti Adamu na Efa ukubikako fye na bantu bonse kuti balaikala bwino nga ca kuti balebika fye amano ku fingabawamina ukucila ukulaumfwila Lesa. Efa taumfwilile Lesa pantu alefwaisha ukuba nga Lesa. Ifyo Adamu acitile filanga ukuti alefwaisha ukusekesha Efa. (Ukute. 3:4-6) Bonse twalimona ifyafuma mu fyo bacitile. Bukaitemwe tabulenga umuntu aba ne nsansa. Nga tuli bakapekape tulanga ukuti twalishininkisha ukutila nga tulekonka ifyo Lesa atweba ifintu filatuwamina.

8. Mulandu nshi Adamu na Efa balingile ukubikila amano ku fyali no kuwamina abana abo bali no kukwata?

⁸ Lesa alyebele Adamu na Efa ifya kucita ifyali no kulenga balatontonkanya pa kubika amano ku bantu, nangu ca kuti bali fye  babili mwi bala lya Edeni. Yehova alibapaalile kabili abebele ukuti bafule, bakumane pe sonde no kulimapo. (Ukute. 1:28) Apo Kabumba alibikile sana amano ku fyo abumbile, Adamu na Efa nabo balingile ukubika amano ku fintu ifyali no kulenga abana abo bali no kukwata bakabe ne nsansa. Isonde lyonse lyali no kuba Paradaise pa kuti abana ba kwa Adamu bakaleikala bwino. Pa kuti uyu mulimo uukalamba ubombwe, bonse aba mu lupwa lwa kwa Adamu balingile ukulabombela pamo.

9. Mulandu nshi ukulenga isonde lyonse lyaba Paradaise kwali no kulengela abantu baba ne nsansa?

⁹ Pa kuti umulimo wa kulenga isonde lyonse libe Paradaise ubombwe, abaume na banakashi abapwililika bali no kulabombela pamo na Yehova ne ci cali no kulenga baingila mu kutuusha kwakwe. (Heb. 4:11) Tontonkanyeni pa fyo uyu mulimo wali no kulenga abantu baba ne nsansa! Ukubika amano ku bantu banabo kwali no kulenga bapaalwa nga nshi kabili baba sana ne nsansa.

10, 11. Finshi tulingile ukucita pa kuti tulebomba umulimo uo Lesa atupeela uwa kubila imbila nsuma no kulenga abantu baba abasambi?

¹⁰ Muno nshiku Yehova alipeela abantu bakwe umulimo wa kubila imbila nsuma no kulenga abantu baba abasambi. Pa kubomba bwino uyu mulimo tulingile ukubika sana amano ku bantu. Kuti twatwalilila ukubomba uyu mulimo nga ca kuti twalitemwa Lesa na bantu.

¹¹ Mu nshita ya batumwa, Paulo alandile ukuti ena na bo alebomba nabo ‘balebombela pamo na Lesa’ pantu balebomba umulimo wa kubyala no kutapilila imbuto sha cine pa Bufumu. (1 Kor. 3:6, 9) Muno nshiku na ifwe kuti ‘twalabombela pamo na Lesa’ nga tulebomfya inshita yesu, ifyo twakwata, na maka yesu ku kubomba umulimo wa kubila imbila nsuma uo Lesa atupeela. Ala ukubombela pamo na Lesa mucinshi uukalamba nga nshi uo atupeela!

12, 13. Landeni ifyo mwapaalwa mu mulimo wa kulenga abantu baba abasambi.

¹² Nga tulebomfya inshita yesu na maka ku kubila imbila nsuma no kulenga abantu baba abasambi tulasekelela nga nshi. Abengi abasambilisha abantu Baibolo ica kuti balunduluka no kulunduluka bakamweba ukuti fintu fye ifinono ifilenga baleba ne nsansa. Balaba ne nsansa nga nshi nga bamona abo basambilisha batemwa pa kwishiba icine, baba ne citetekelo, bayaluka, kabili batendeka no kwebako abantu icine. Yesu na o ali ne nsansa ilyo abasambi 70 abo atumine ku kubila “babwelele bali ne nsansa” pa mulandu wa kuti balibombele bwino umulimo.—Luka 10:17-21.

¹³ Bakasabankanya mwi sonde lyonse balasekelela  nga bamona imbila nsuma yayalula abantu. Natulande pali nkashi umushimbe uo twalaita ati Anna, uwakukiile ku Eastern Europe uko ababila imbila nsuma bacepa. Uyu nkashi alembele ati: “Cimo ico natemwa sana ca kuti abantu kuno balafwaya ukusambilila Baibolo. Umulimo momba ulalenga ndesekelela nga nshi. Nga nabwelela ku ng’anda, nshikwata inshita ya kubika amano ku finkumine, lelo ntontonkanya pa mafya na masakamika ayo abo nsambilisha Baibolo bakwata. Ndatontonkanya pa fyo ningacita pa kubakoselesha no kubafwa mu fyo balekabila. Kabili nalishininkisha ukuti ‘mwaliba insansa ishingi mu kupeela ukucila ishaba mu kupokelela.’”—Imil. 20:35.

14. Kuti twacita shani pa kuti tuleba ne nsansa ilyo tulebila imbila nsuma nga ca kuti bantu fye abanono abakutika?

¹⁴ Kuti twaba ne nsansa nga tulebila imbila nsuma ku bantu nangu bakaane ukukutika. Na kuba umulimo tubomba muno nshiku walipalana no mulimo kasesema Esekiele alebomba uo Yehova aebele ati: “Ukabebe ifyebo fyandi, nampo nga bakomfwa nelyo bakakaana ukumfwa.” (Esek. 2:7; Esa. 43:10) Nangu abantu bakaane ukukutika nelyo basumine, Yehova alatasha pa fyo tubombesha. (Belengeni AbaHebere 6:10.) Kasabankanya umo alembele pa fyo amona umulimo abomba uwa kubila imbila nsuma ati, “Twalibyala, twalitapilila kabili tulapepa ukuti Yehova akalenge abantu bakatemwe ukusambilila.”—1 Kor. 3:6.

15. Bushe tufwile ukuba fye bakapekape nga ca kuti abantu baletutasha? Londololeni.

¹⁵ Yesu afwaya tulepeela pa kuti tuleba ne nsansa. Abantu abengi balatemwa nga ca kuti tuli bakapekape. Yesu atile: “Mulepeela, na imwe abantu bakulamupeela. E lyo bakamupeela muli tumba wenu icipimo icisuma, icashindailwa, ico basunkanya bwino bwino kabili icaisula. Pantu ku cipimo ico mupiminako bambi, e ko na imwe bakamupimina.” (Luka 6:38) Kwena te bantu bonse abatasha pali bukapakape bwesu, lelo bamo nga batutasha nabo kuti baba bakapekape. E ico  mulepeela nangu abantu bamutashe nelyo iyo. Te kuti mwishibe ifisuma ifingacitika nga mwapeelako bamo fimo.

16. Finshi fifwile ukulenga twaba bakapekape?

¹⁶ Kwena bakapekape ba cine cine tabapeela pa kuti nabo bakabapeele. Yesu aletontonkanya pali ifi ilyo alandile ati: “Ilyo wapekanya umutebeto, ita abapiina, abalemana, na balemana amolu, e lyo ne mpofu; e lyo ukaba ne nsansa, pantu tabakwete ica ku kulambula nangu cimo.” (Luka 14:13, 14) Kalemba wa Baibolo umo atile: “Uwa menso ya luse akapaalwa.” Umbi na o atile: “Alipaalwa onse uwafwilisha umupiina.” (Amapi. 22:9; Amalu. 41:1) Cine cine tufwile ukuba bakapekape pantu tulaba ne nsansa nga tuleyafwa abantu.

17. Finshi mwingapeela ifingalenga mwaba ne nsansa?

¹⁷ Ilyo Paulo ayambwile amashiwi Yesu alandile aya kuti “mwaba insansa ishingi mu kupeela ukucila ishaba mu kupokelela,” talelanda fye pa kupeelana ifintu lelo alelanda na pa kukoselesha, pa kutungulula, na pa kwafwa abantu mu fyo balekabila. (Imil. 20:31-35) Mu fyo umutumwa alelanda na mu fyo alecita atusambilishe ukuti tulebomfya bwino inshita, amaka yesu no kuti tufwile ukulabika amano ku bantu no kubatemwa.

18. Finshi abasambilila abengi balanda pa kuba bakapekape?

¹⁸ Abafwailisha pa fyo abantu baba nabo balimona ukuti abantu nga ni bakapekape balaba ne nsansa. Icipande cimo citila, “abantu balaba ne nsansa nga bacitila abanabo ifisuma.” Na kabili abafwailisha batile, nga twayafwa abantu banensu tulaba ne nsansa. E ico abasambilila sana balakoselesha abantu ukulabombako imilimo ya kwafwa abantu banabo pa kuti baleba no bumi ubusuma kabili baleba ne nsansa. Ifi balanda tafipapusha abasumina ukuti Baibolo Cebo ca kwa Yehova, Kabumba wa bantu uwaba no kutemwa.—2 Tim. 3:16, 17.

19, 20. Mulandu nshi mulefwaila ukubela bakapekape?

¹⁹ Nga ca kuti twikala na bantu ababika fye amano ku fingabawamina ukucila ukubika amano ku bantu banabo kuti cayafya ukutwalilila ukuba bakapekape. Lelo Yesu alandile ukuti amafunde yabili ayakalamba yatila tuletemwa Yehova no mutima wesu onse, umweo wesu onse, ukutontonkanya kwesu konse na maka yesu yonse no kutemwa abanensu nge fyo twaitemwa. (Marko 12:28-31) Nga fintu twasambilila muli cino cipande, abatemwa Yehova balamupashanya. Yehova na Yesu ni bakapekape. Kabili bafwaya na ifwe tulepeela pantu nga tulepeela tulaba ne nsansa nga nshi. Nga ca kuti tuleibikilishako ukuba bakapekape kuli Lesa na ku bantu banensu, tukalenga Yehova akacindikwe, ifintu fikalatuwamina kabili fikalawamina na bantu banensu.

²⁰ Ukwabula no kutwishika mulaibikilishako pa kuti muleyafwa abantu maka maka aba bwananyina. (Gal. 6:10) Nga mwatwalilila ukucita ifi, abantu bakamutemwa kabili bakalamutasha, ne ci cikalenga mukabe ne nsansa. Baibolo pa Amapinda 11:25 itila: “Umuntu wa bukapekape akakwata ifingi, no uliisha bambi na o bakamuliisha.” Kwena fingi twingacita mu mikalile yesu iya Bwina Kristu na mu mulimo tubomba pa kulanga ukuti tuli bakapekape. Mu cipande cikonkelepo tukalanda pali fimo.