1. Milimo nshi twingabombela pamo na Yehova?

KABUMBA alishibe ukuti abantu abapwililika bali no kulabombela pamo nankwe pa kuti ukufwaya kwakwe kwingafikilishiwa. Nangu ca kuti tatwapwililika, abantu aba cishinka kuti babombela pamo na Yehova cila bushiku. Ku ca kumwenako, ‘tulabombela pamo na Lesa’ nga tulebila imbila nsuma ya Bufumu no kulenga abantu baba abasambi. (1 Kor. 3:5-9) Ala lishuko nga nshi ukubombela pamo na Kabumba wa maka yonse mu mulimo uo acindamika sana! Na lyo line, ukubila imbila nsuma no kulenga abantu baba abasambi te nshila fye yeka iyo tubombelamo pamo na Yehova. Muli cino cipande, twalalanda na pali fimbi ifyo twingacita pa kuti tulebombela pamo na Yehova. Twalalanda pa kwafwa aba mu lupwa lwesu na ba bwananyina, pa kupokelela abeni, pa kuitemenwa ukubombako imilimo imo mu cilonganino ca kwa Lesa e lyo na pa kubombesha mu mulimo wa kubila imbila nsuma.—Kol. 3:23.

2. Mulandu nshi mushilingile ukulailinganishisha ku ba bwananyina ilyo mulebomba umulimo wa kwa Yehova?

² Ilyo tulesambilila cino cipande, mwilalinganya ifyo mwingacita mu mulimo wa kwa Yehova ku fyo aba bwananyina bambi bengacita. Muleibukisha ukuti ifyo mwingacita kuti fyapusana ne fyo bambi  bengacita pa mulandu no mushinku, ubumi bakwata, ifyo ifintu fyaba, na maka bakwata. Lesa alengele umutumwa Paulo alembe ati: “Umo na umo alange umulimo wakwe, e lyo akasansamuka pa mulimo wakwe, te kuilinganya ku muntu umbi iyo.”—Gal. 6:4.

3. Mulandu nshi twingalandila ukuti onse uusunga ulupwa lwakwe abombela pamo na Lesa?

³ Yehova afwaya ababomfi bakwe balesakamana indupwa shabo. Ku ca kumwenako, nalimo mufwile ukubomba pa kuti mulekwata indalama sha kusakamaninamo aba mu lupwa lwenu. Abafyashi abanakashi abengi bekala fye pa mayanda pa kuti balelela abana abanono. Abana abakalamba bamo nalimo balasakamana abafyashi babo abalwalilila. Fyonse ifi twalandapo fyalicindama. Icebo ca kwa Lesa citila: “Umuntu nga tasakamana abantu bakwe, maka maka aba mu ng’anda yakwe, ninshi nakaana icitetekelo kabili abipa ukucisha no ushatetekela.” (1 Tim. 5:8) Nga mwalikwata imilimo nge yi twalandapo, nalimo kuti camukosela ukukwata inshita ya kubomba imilimo ya kwa Lesa nga fintu mwingafwaya ukulabomba. Lelo mwisakamana! Yehova alatemwa nga mulefwaila indupwa shenu ifyo shikabila.—1 Kor. 10:31.

4. Bushe abafyashi kuti bacita shani pa kuti babike umulimo wa kwa Lesa pa ntanshi, kabili fisuma nshi fingacitika?

⁴ Abafyashi Abena Kristu nga baleeba abana babo ukubombako umulimo wa kwa Yehova ninshi balebombela pamo nankwe. Abafyashi abengi abacita ifi basanga ukuti abana babo abaume na banakashi balaya mu kubomba umulimo wa nshita yonse ukutali. Abana bamo ni bamishonari; bambi babomba bupainiya ku ncende uko ababila pa Bufumu bacepa; e lyo bambi bena babombela pa Bethel. Apo babombela ukutali no kwikala abafyashi babo, ilingi line tabamonana nga fintu bengafwaya. Nangu cabe ifi, abafyashi abaipeelesha balakoselesha abana babo ukutwalilila ukumubombela uko baya. Cinshi bacitila ifi? Ni co balaba sana ne nsansa pantu balishiba ukuti abana babo balibika Ubufumu intanshi. (3 Yoh. 4) Nalimo abafyashi abengi bomfwa nga fintu Hana aleumfwa, uwalandile ukuti ‘alyashimishe’ Yehova umwana wakwe umwaume Samwele. Abafyashi ba musango uyu bamona ukuleka abana babo balabombela Yehova ukuti lishuko ilikalamba nga nshi. Te kuti bafwaye abana babo baleka ukubombela Yehova.—1 Sam. 1:28.

5. Finshi mwingacita pa kwafwa aba bwananyina mu cilonganino? (Moneni icikope pa ntendekelo ya cino cipande.)

⁵ Nga ca kuti tamwakwata sana imilimo ya kusakamana ulupwa, bushe te kuti mwafwilisheko aba bwananyina abasakamana balupwa lwabo abalwalilila, abakote, nelyo abalekabila ukubasakamana mu fintu fimbi? Bushe te kuti mumone aba bwananyina mu cilonganino abalekabila ukubafwa? Nalimo kuti mwalasakamanako abafyashi abakalamba aba kwa nkashi ilyo ena alebomba imilimo imbi. Nalimo kuti mwalabasendako pa kuya mu kulongana nelyo mu kushita fimo, kuti mwaya bashitilako tumo, nangu kuti mwaya nabo ku kupempula abalwele ku cipatala. Nga mulecita ifi ninshi mulebombela pamo na Yehova ilyo aleyasuka ipepo lyabo.—Belengeni 1 Abena Korinti 10:24.

6. Bushe calola mwi ukupokelela abeni?

⁶ Ababombela pamo na Yehova babeshibila ku kupokelela abeni. Mu Amalembo ya ciGriki aya Bena Kristu, ishiwi bapilibula ukuti “ukulapokelela abeni” lyalola mu kuti “ukuba ne cikuuku ku bo mushaishiba.” (Heb. 13:2) Mu Cebo ca kwa Lesa mwaba amalyashi ayatusambilisha ukutemwa abantu. (Ukute. 18:1-5) Lyonse tulingile ukulayafwa bonse nampo nga bantu “batetekela banensu” nelyo iyo.—Gal. 6:10.

7. Busuma nshi bwaba mu kupokelela ababomba umulimo wa nshita yonse?

 ⁷ Nga ca kuti mulepokelela ababomba umulimo wa nshita yonse ninshi mulebombela pamo na Lesa. (Belengeni 3 Yohane 5, 8.) Nga mulebapokelela, ‘bakalamukoselesha e lyo na imwe mukalabakoselesha.’ (Rom. 1:11, 12) Natulande pa fyo cali kuli ba Olaf ilyo bali abaice. Balandile ukuti pa nshita imo, takwali nangu umo mu cilonganino uwalefwaya ukupokelela kangalila wa muputule uwali umushimbe. Ba Olaf baipwishe abafyashi babo abashali ba Nte nga kuti basumina ukwikala na kangalila wa muputule pa ng’anda pa mwabo. Abafyashi balisumine lelo batile ba Olaf bakulalaala pa cipuna. Ba Olaf balisumine kabili tabasakamene ukulalaala pa cipuna. Ba Olaf batile, “Uyu mulungu waliweme nga nshi! Ine na kangalila wa muputule twalebuuka ku macaca cila bushiku kabili ilyo twalelya umwikulo twalelanshanya amalyashi ayengi ayasuma. Ifyo kangalila wa muputule ankoseleshe fyalengele nalafwaisha ukutendeka umulimo wa nshita yonse.” Pa myaka 40 iyapitapo, ba Olaf balibomba bumishonari mu fyalo ifyalekanalekana.

8. Mulandu nshi tulingile ukubela ne cikuuku ku bantu nangu ca kuti tabaletasha? Landeni pa cacitike.

⁸ Fingi mwingacita pa kulanga ukuti mwalitemwa abo mushaishiba nangu ca kuti pa kubala tabaletasha ifyo tulebacitila. Natulande pa cacitike. Ilyo kasabankanya umo mu Spain alesambilisha Yesica uwafumine ku Ecuador Baibolo, amwene ukuti umusambi alelila fye. Kasabankanya alimwipwishe ico alelilila. Yesica alandile ukuti ilyo ashilakukila ku Spain ali mupiina sana ica kuti bushiku bumo takwete ne fya kulya. Akwete fye amenshi e yo alepeela umwana wakwe umwanakashi. Yesica alesunsuntila umwana pa kuti alaale uku ninshi alepepa ukuti Lesa amwafwe. Tapakokwele ba Nte babili baile pa ng’anda pa mwakwe, lelo Yesica alibasasukile kabili alilepawile magazini iyo bamupeele. Abepwishe ati, “Bushe ifi e fya kulya mulefwaya mpeele umwana?” Bankashi balyeseshe ukumusansamusha lelo balifililwe. Pa numa bamutwalile ifya kulya no kufisha pa mwinshi. Ifyo bacitile fyalikete Yesica ku mutima kabili alyumfwile ububi ilyo aibukishe ukuti tabikile amano ku fyo Lesa ayaswike ipepo apepele. Nomba pali iyi nshita alefwaisha ukulabombela Yehova. Ala filya bankashi bali bakapekape mwalifumine ifisuma!—Luk. Mil. 11:1, 6.

9, 10. (a) Ni nshita nshi Baibolo yalandapo ilyo ababomfi ba kuitemenwa balefwaikwa? (b) Milimo nshi iyo aba bwananyina baitemenwa ukubomba mu cilonganino?

⁹ Kale mu Israele, kwaleba inshita shimo ilyo ababomfi bakuitemenwa balefwaikwa. (Ukufu. 36:2; 1 Imila. 29:5; Nehe. 11:2) Muno nshiku, na imwe mwalikwata ishuko lya kuitemenwa ukubomfya inshita yenu, ifyo mwakwata ne milimo mwaishiba mu kwafwilisha bamunyinefwe na bankashi. Nga mwacita ifi, mukaba sana ne nsansa kabili mukapaalwa nga nshi.

¹⁰ Icebo ca kwa Lesa cikoselesha abaume ukulafwaya ukubombako imilimo no kulatungulula mu cilonganino pa kuti balebombela pamo na Yehova. (1 Tim. 3:1, 8, 9; 1 Pet. 5:2, 3) Abacita ifi bafwaya ukulayafwilisha aba bwananyina mu fyo bakabila na mu fya kwa Lesa. (Imil. 6:1-4) Bushe baeluda balitala abamwipushapo nga kuti mwabomba bukapyunga nelyo nga kuti mwabombela ku mpapulo, pa fifulo fya kubilamo imbila nsuma, ukuwamya ifileonaika pa ng’anda ya Bufumu nelyo imilimo imbi? Ababomba iyi imilimo kuti bamweba ukuti balaba ne nsansa ilyo baleyafwa aba bwananyina.

11. Bushe ifibusa ifyo nkashi umo apangile ilyo alebomba imilimo ya kwa Lesa fyamwafwa shani?

¹¹ Ilingi line abaitemenwa ukubombako imilimo ya kwa Lesa balapanga ifibusa. Natulande  pali nkashi Margie, uwabombapo umulimo wa kukuula Amayanda ya Bufumu pa myaka 18. Pa myaka iingi alesambilisha bankashi bacaice abengi ifya kubomba imilimo. Ba Margie basanga ukuti uyu mulimo ni nshila iisuma nga nshi iilenga aba bwananyina abaitemenwa ukubomba balekoseleshanya. (Rom. 1:12) Ba Margie nga bakwata amafya, balabakoselesha ku fibusa ifyo bapanga mu mulimo wa makuule. Bushe na imwe mwalibombapo mu makuule? Nampo nga mwalishiba imilimo imo nelyo iyo, bushe te kuti muitemenwe ukubombako uyu mulimo?

12. Finshi mwingacita pa kwafwa abaponenwe no busanso ubukalamba?

¹² Nga kwaba amasanso ayakalamba, abantu ba kwa Lesa balabombela pamo na Lesa ilyo baleyafwa aba bwananyina mu fyo balekabila. Ku ca kumwenako, balasangula indalama sha kwafwilisha abaponenwe no busanso. (Yoh. 13:34, 35; Imil. 11:27-30) Na fimbi ifyo bacita pa kwafwa abaponenwe no busanso kubombako umulimo wa kuwamya nelyo ukukuula cipya cipya ifikuulwa ifyaonaike. Nkashi Gabriela umwina Poland uo ing’anda yakwe yaonaike ilyo yabundile, alisansamwike ilyo aba bwananyina ba mu filonganino fya mupepi baile mu kumwafwa. Alandile ukuti, “Nshilefwaya ukulanda pa fipe fyandi ifyaonaike pantu fipe fye, lelo ndefwaya ukumweba ifyo nanonkele. Ifyo aba bwananyina bacitile fyalengele nashininkisha ukuti ukuba mu cilonganino ca kwa Lesa lishuko nga nshi kabili kulalenga ndeba ne nsansa.” Abengi abo bafwa nga baponenwa no busanso bomfwa nge fyo uyu nkashi aumfwile. Na babombela pamo na Yehova pa kwafwa abaponenwa na masanso balaba ne nsansa nga nshi.—Belengeni Imilimo 20:35; 2 Abena Korinti 9:6, 7.

13. Bushe ukuitemenwa ukubombako imilimo kukosha shani bucibusa bwesu na Yehova? Landeni pa cacitike.

¹³ Ba Stephanie na bakasabankanya bambi baali ne nsansa ilyo babombele pamo na Lesa pa kwafwa ba Nte imbutushi ababutukile ku calo ca United States. Balibombeleko umulimo wa kufwaila aba bwananyina ababutwike inkondo amayanda no kubabikilamo ifipe. Uyu nkashi atile, “Twalitemenwe ilyo twamwene ifyo baali ne nsansa ne fyo batashishe pa fyo aba bwananyina mwi sonde lyonse babalangile ukuti balibatemwa.  Aba aba bwananyina balemona ukuti twalibafwile, lelo fwebo bayafwile sana ni fwe. Ifyo baali abatemwana, abaikatana, ifyo baali ne citetekelo ne fyo bashintilile pali Yehova fyalenga twatemenwako Yehova, ne ci calenga tuletasha sana pali fyonse ifyo atupeela ukupitila mu cilonganino cakwe.”

14, 15. (a) Bushe kasesema Esaya alangile shani ukuti aliitemenwe ukubomba? (b) Bushe ababila imbila nsuma ya Bufumu muno nshiku bamupashanya shani?

¹⁴ Bushe kuti mwatemwa ukulabombela sana pamo na Yehova? Bushe kuti mwaitemenwa ukukukila ukwaba ukukabila? Kwena ababomfi ba kwa Lesa tabalingile fye ukukukila ukutali pa kuti balange ukuti ni bakapekape. Lelo nga ca kuti ifintu fili fye bwino, aba bwananyina bamo balaipeelesha ukuya mu kubombela ukwaba ukukabila. Bacita nga filya kasesema Esaya acitile. Ilyo Yehova aipwishe ati, “Nani ndetuma, kabili nani akaba inkombe yesu?” Esaya atile: “E po ndi! Ntumeni.” (Esa. 6:8) Bushe na imwe kuti mwaitemenwa kabili kuti mwakwanisha ukubombako imilimo mu cilonganino ca kwa Yehova? Milimo nshi imo mwingabombako?

¹⁵ Yesu alandile pa mulimo wa kubila imbila nsuma no kulenga abantu ukuba abasambi ati: “Umulimo wa kulobolola ukalamba, lelo ababomfi bena nabacepa. E ico, lombeni Umwine wa mulimo wa kulobolola ukuti atume ababomfi mu mulimo wakwe uwa kulobolola.” (Mat. 9:37, 38) Bushe kuti mwatemwa ukuya mu kubomba bupainiya uko ababila imbila nsuma bacepa? Nelyo bushe kuti mwayafwa uwa bwananyina pa kuti aye ukwaba ukukabila? Bamunyinefwe na bankashi abengi bamona ukuti inshila iisuma iya kulangilamo ukuti balitemwa Lesa na bantu kuya mu kubomba bupainiya ku cifulo uko aba kubomba umulimo wa kulobolola bacepa. Finshi fimbi mwingacita pa kuti mulebombesha mu mulimo wa kwa Lesa? Nga mulebombesha mukalasekelela nga nshi.

16, 17. Finshi fimbi ifyo mwingacita pa kuti mulebombela sana Yehova?

¹⁶ Bushe kuti mwaitemenwa ukuya mu kubombela pa Bethel nelyo ukubombako umulimo wa kukuula ifikuulwa fya cilonganino ca kwa Lesa pa nshita iinono nelyo ukulaya mu kubombako inshiku shimo mu mulungu? Aba kubomba imilimo konse uko bengabatuma kabili abengabomba umulimo onse uo bengabapeela balafwaikwa. Kuti babapeela umulimo uulefwaikwa ukubombwa nangu ca kuti baishiba umulimo umbi. Yehova alatasha abaipeelesha ukubomba imilimo iilefwaikwa ukubombwa konse uko babatuma.—Amalu. 110:3.

¹⁷ Bushe kuti mwatemwa ukumusambilisha na fimbi pa kuti mwingeshiba bwino ifya kubomba umulimo wa kwa Lesa? Nga kuti mwatemwa, nalimo kuti mwafikapo ukuya kwi Sukulu lya Bakabila ba Mbila Nsuma ya Bufumu. Muli ili isukulu basambilisha bamunyinefwe na bankashi ababomba umulimo wa nshita yonse pa kuti balebombesha mu cilonganino ca kwa Lesa. Bonse abaya kuli ili isukulu balingile ukuitemenwa ukuya konse uko bengabatuma nga bapwisha isukulu. Bushe kuti mwatemwa ukuya kuli ili sukulu pa kuti mukabombeko imilimo na imbi mu cilonganino ca kwa Lesa?—1 Kor. 9:23.

18. Finshi mukakwata nga mulebombela pamo na Yehova cila bushiku?

¹⁸ Apo tuli bantu ba kwa Yehova tuli bakapekape, tulacitila abantu ifisuma, tuli ba cikuuku, twalitemwa abantu kabili cila bushiku tulababikako amano. Ifi tucita filenga tulesekelela, tuleba no mutende, kabili tuleba ne nsansa. (Gal. 5:22, 23) Te mulandu ne fyo ifintu fyaba mu mikalile yenu, kuti mwaba ne nsansa nga muli bakapekape nga filya Yehova aba kabili mukalabombela pamo nankwe!—Amapi. 3:9, 10.