1-3. Cinshi nalimo calengele ukuti Yuodia na Suntuki bapusane, kabili kuti twacita shani pa kuti ifya musango uyu filacitika? (Moneni icikope pa muulu wa cino cipande.)

ABABOMFI ba kwa Yehova balicindika sana icitabo ca mushilo ica kwa Lesa, Baibolo. Apo tatwapwililika, inshita shimo kuti batufunda ukubomfya Baibolo. Bushe tucita shani nga batufunda? Natulande pali Yuodia na Suntuki, Abena Kristu abaliko mu nshita ya batumwa. Aba abanakashi abali abasubwa, inshita imo balipusene. Finshi fyalengele bapusane? Kwena Baibolo tayalanda icalengele. Natwelenganye fye ukuti ifi twalalandapo e fyacitike.

² Tutile Yuodia alitile aba bwananyina ku ng’anda ku mwakwe pa kuti baliile pamo ica kulya. Lelo Suntuki ena tamwitileko, aumfwile fye ukuti abo baitile baliipakishe icine cine. Suntuki nalimo aletontonkanya ati: ‘Kwena Yuodia, kuti akaana ukunjitako! Nalemona kwati ni cibusa wandi sana.’ Suntuki alyumfwile ububi kabili amwene kwati Yuodia alimupatile. E ico na o alitile aba bwananyina bamo bene ku mwakwe ukwabula ukwitako  Yuodia! Ifi aba banakashi bapusene, nalimo fyalilengele mu cilonganino mwiba umutende. Lelo ilyo umutumwa Paulo afundile aba banakashi nalimo balyumfwile.—Fil. 4:2, 3.

³ Na muno nshiku mwine ifya musango uyu nga fyacitika kuti fyalenga mu filonganino fya kwa Yehova mwiba umutende. Na lyo line, nga tulekonka ifyo Icebo ca kwa Lesa Baibolo citufunda, kuti tulepwisha amafya ya musango uyu, kabili nalimo te kuti tuleyakwata no kuyakwata. Na kabili nga twalicindika sana Icitabo ca kwa Yehova, tukalakonka ifyo citufunda.—Amalu. 27:11.

4, 5. Finshi Icebo ca kwa Lesa citufunda ifingatwafwa ukuilama?

⁴ Kwena cilafya ukuilama nga ca kuti batufyenga. Kuti twaumfwa sana ububi nga ca kuti baletucusha pa mulandu ne ntambi shesu, umushobo nelyo ifyo tumoneka. Ala kuti catukalipa sana nga ca kuti uuletucusha wa bwananyina! Bushe mu Cebo ca kwa Lesa mwaliba ifyo twingakonka nga ca kuti ifya musango uyu fyatucitikila?

⁵ Ukutula fye na pa kutendeka, Yehova alishiba bwino ifyo abantu baba. Alishiba ifyo tucita nga twakalipa. Nga twakalipa kuti twalanda nelyo kuti twacita ifintu ifingalenga twaumfwa ububi pa numa. Kanshi kuti cawama sana nga tulekonka ifyo Baibolo itufunda ukuti tulelama ubukali kabili twilakalipa bwangu! (Belengeni Amapinda 16:32; Lukala Milandu 7:9.) Ukwabula no kutwishiba bonse tulingile ukusambilila ukukanakalipa bwangu no kulaelela abanensu. Yesu alandile ukuti Yehova te kuti atubelele uluse nga ca kuti tatulebelela bambi uluse. (Mat. 6:14, 15) Bushe mulingile ukucitapo fimo pa kuti muleitemenwa ukubelela bambi uluse nelyo pa kuti muleilama?

6. Mulandu nshi uo tushilingile ukulasungila ifilubo?

⁶ Ilingi line abantu abafilwa ukuilama balasunga ifilubo, ne ci cilenga abantu balabataluka. Umuntu uusunga ifilubo kuti alenga aba mu cilonganino nabo balacita cimo cine. Nalimo kuti alaifungushanya kwati tasunga ifilubo mu mutima nelyo kwati tapata nangu umo, lelo ifyaba mu mutima wakwe ‘fikafimbulwapo mu lukuta.’ (Amapi. 26:24-26) Nalimo baeluda kuti bamufunda pa kuti eshibe ukuti abantu ba kwa Lesa tabalingile ukusunga ifilubo no kupata abantu. Ifi fine e fyo ne Citabo ca kwa Yehova cilanda. (Lebi 19:17, 18; Rom. 3:11-18) Bushe mulakonka ifyo cilanda?

7, 8. (a) Bushe Yehova atungulula shani icilonganino cakwe ica pe sonde? (b) Finshi fimo ifyo Lesa atweba mu Cebo cakwe, kabili mulandu nshi tulingile ukulakonkela ifyo citweba?

⁷ Yehova e utungulula no kusambilisha ababa mu cilonganino cakwe ica pe sonde. Abomfya “umusha wa cishinka kabili uwashilimuka” uutungululwa na Kristu “umutwe wa cilonganino.” (Mat. 24:45-47; Efes. 5:23) Uyu musha alicetekela Icebo ca kwa Lesa kabili alicicindika sana nga filya fine ibumba litungulula ilyaliko mu nshita ya batumwa lyacicindike. (Belengeni 1 Abena Tesalonika 2:13.) Finshi fimo ifyo Baibolo yatweba ukulacita ifitwafwa?

⁸ Baibolo itweba ukuti tulingile ukulasangwa ku kulongana lyonse. (Heb. 10:24, 25) Baibolo ilatukoselesha ukuti tulingile ukusumina mu fintu fimo fine ifyo isambilisha. (1 Kor. 1:10) Icebo ca kwa Lesa cilatweba ukubika intanshi Ubufumu mu bumi bwesu. (Mat. 6:33) Na kabili Amalembo yalalanda  sana pa mulimo twapeelwa uwa kubila imbila nsuma ku ng’anda ne ng’anda, ku cintubwingi, e lyo no bunte bwa mu lyashi. (Mat. 28:19, 20; Imil. 5:42; 17:17; 20:20) Mu Citabo cakwe, Lesa alyeba baeluda ukulasunga icilonganino icasanguluka. (1 Kor. 5:1-5, 13; 1 Tim. 5:19-21) Na kabili Yehova alanda ukuti bonse ababa mu cilonganino cakwe balingile ukuba aba busaka lwa ku mubili na lwa ku mupashi.—2 Kor. 7:1.

9. Ni nshila nshi iyo Yehova abomfya ku kutwafwa ukumfwikisha Icebo cakwe?

⁹ Abantu bamo bamona kwati kuti baumfwa ifyo Baibolo ilanda ukwabula uwa kubalondolwela. Lelo Yesu alisonta “umusha wa cishinka” ukuti e ukalapekanya ifya kulya fya ku mupashi. Ukutula mu 1919, Imfumu Yesu Kristu abomfya uyu umusha ku kwafwa abasambi bakwe ukumfwikisha ifyaba mu Citabo ca kwa Lesa no kulacita ifyo cilanda. Kanshi nga tulekonka ifyo Baibolo itufunda, icilonganino kuti caba icasanguluka, ica mutende kabili kuti twaikatana. E ico bonse tulingile ukuyipusha atuti, ‘Bushe ndakonka ifyo umusha wa cishinka atweba?’

10. Bushe icilonganino ca kwa Yehova ica ku muulu bacilondolola shani mwi buuku lya kwa Esekiele?

¹⁰ Icebo ca kwa Yehova cilatwafwa ukwishiba ifyo icilonganino cakwe ica ku muulu caba. Ku ca kumwenako, kasesema Esekiele balimulangile icimonwa umwali iceleta ilya ku muulu ilimininako icilonganino ca kwa Lesa ica ku muulu. (Esek. 1:4-28) Yehova e wensha ili iceleta kabili liya konse uko umupashi wakwe wafwaya ukuti liye. Ifyo icilonganino cakwe ica ku muulu cicita filakuma icilonganino cakwe ica pe sonde. Cine cine iceleta lilebutukisha! Tontonkanyeni pa fintu ubwingi ifyayaluka mu myaka 10 iyapitapo. Yehova e ulelenga ukuti kuleba uku ukwaluka. Apo nomba Kristu na bamalaika bali no konaula ici calo cabipa, iceleta lya kwa Yehova lilebutukisha ku kulenga cishibikwe ukuti Yehova e walinga ukuteka ku muulu na pano isonde na ku kulenga ishina lyakwe ukuba ilya mushilo!

11, 12. Milimo nshi imo iyo icilonganino ca kwa Yehova cilebomba?

¹¹ Tontonkanyeni pa milimo ubwingi iyo icilonganino ca kwa Lesa ica pe sonde cilebomba muli shino nshiku sha kulekelesha. Amakuule. Aba bwananyina abengi nga nshi balibombeshe pa kukuula amaofeshi ya kalamba aya Nte sha kwa Yehova ku Warwick, mu musumba wa New York, ku U.S.A. Aba bwananyina abengi balabombesha pa kukuula Amayanda ya Bufumu na pa kukuulilapo ifikuulwa na fimbi pa maofeshi ya musambo. Dipartimenti ya Makuule iya mwi Sonde Lyonse e yangalila uyu mulimo. Ala tulatasha sana aba bwananyina abaitemenwa ukubombesha muli aya amakuule! Yehova alapaala bakasabankanya ba Bufumu mwi sonde lyonse abasangula imisangulo pa kuti  umulimo wa makuule ulebombwa.—Luka 21:1-4.

¹² Amasukulu ya Bulesa. Natulande pa masukulu ayalekanalekana ayo tusambililamo ifya kwa Lesa. (Esa. 2:2, 3) Kwaliba Isukulu lya Bapainiya, Isukulu lya Bakabila ba Mbila Nsuma ya Bufumu, Isukulu lya Gileadi, Isukulu lya Babombela pa Bethel, Isukulu lya Bakangalila wa Muputule na Bena Mwabo, Isukulu lya Baeluda, Isukulu lya Butumikishi bwa Bufumu ne Isukulu lya Baba Muli Komiti ya Musambo na Bena Mwabo. Ala Yehova alitemwa ukusambilisha abantu bakwe! Pa webusaiti yesu iya jw.org paliba Baibolo ne mpapulo shimbi mu ndimi ishingi nga nshi. Na kabili pali iyi webusaiti paliba na ifyebo fya bana, ifya ndupwa ne filecitika mwi sonde. Bushe mulabomfya ifyaba pali webusaiti ya jw.org ilyo mulebila imbila nsuma na lintu muli pa mapepo ya lupwa?

13. Apo tuli bakapepa ba kwa Yehova aba cishinka, finshi tulingile ukulacita?

¹³ Ala lishuko nga nshi ukuba mu cilonganino ca kwa Yehova! Apo twalishiba amafunde ya kwa Lesa, tulingile ukulacita ifyalungama ne filanga ukutila twalisumina ukuti e walinga ukuteka ku muulu na pano isonde. Apo ifintu muli cino calo filebipilako fye, ifwe tulingile ‘ukupata ifyabipa’ nga fintu Yehova afipata. (Amalu. 97:10) Tatufwaya ukuba nga bantu ba muli cino calo abatila: “Ubusuma bubi no bubi abati busuma.” (Esa. 5:20) Kabili apo tulafwaya ukulasekesha Lesa, tufwile ukubombesha pa kuti tutwalilile ukuba aba busaka, aba mibele iisuma kabili abasanguluka. (1 Kor. 6:9-11) Twalitemwa Yehova kabili twalimucetekela; e ico twalisalapo ukulakonka amafunde yakwe ayaba mu Citabo cakwe pa kuti tuleba aba cishinka kuli ena. Na kabili tulakonka amafunde yakwe konse uko tuli, pa mayanda yesu, mu cilonganino, pa ncito na pa sukulu. (Amapi. 15:3) Natumone ifintu na fimbi ifyo twingalacita pa kulanga ukuti tuli ba cishinka kuli Lesa.

14. Bushe abafyashi kuti balanga shani ukuti ba cishinka kuli Lesa?

¹⁴ Ukukusha Abana. Abafyashi balalanga ukuti baliba ne cishinka kuli Yehova nga balesambilisha abana ukulingana ne fyo Icebo cakwe cilanda. Abafyashi tabakonka intambi isho abantu abashaishiba Lesa bakonka pa kukusha abana. Abena Kristu tabalingile ukulacita ifyo abantu abengi aba muli cino calo bacita. (Efes. 2:2) Umufyashi umwaume tafwile ukutontonkanya ati, ‘Mu calo cesu abanakashi e basambilisha abana.’ Baibolo tayapita na mu mbali, yatila: “Mwe bashibo . . . mulebakusha [abana benu] ukulingana no kusalapula kwa kwa Yehova no kukonkomesha kwakwe.” (Efes. 6:4) Abafyashi abatiina Lesa bafwaya abana babo baba nga Samwele uo Baibolo yalandapo ukuti Yehova ali nankwe ilyo alekula.—1 Sam. 3:19.

15. Bushe tulanga shani ukuti tuli ba cishinka kuli Yehova ilyo tulepingula pa fintu?

¹⁵ Ilyo tulepingula pa fintu. Nga ca kuti ilyo tulepingula pa fintu tulekonka ifyo tusambilila mu Cebo ca kwa Lesa ne fyo icilonganino cakwe citweba, ninshi tulelanga ukuti tuli ba cishinka kuli ena. Natulande pa ca kumwenako cimo. Abantu bamo abaya ku fyalo fimbi nga bakwata umwana, balamutwala kuli balupwa ku calo uko bafuma pa kuti batwalilile ukubomba no kupanga indalama. Ca cine ukuti umuntu umwine e ufwile ukupingulapo ifya kucita, lelo tulingile ukwishiba ukuti  tukalubulula kuli Lesa pa fyo tupingulapo ukucita. (Belengeni Abena Roma 14:12.) Bushe kuti caba fye bwino ukupingula pa fikumine ulupwa lwesu nelyo pa fitukumine ukwabula ukufwailisha ifyo Baibolo yalandapo? Awe! Tulakabila ukutungululwa na Shifwe wa ku muulu pantu te kuti tutungulule intampulo shesu.—Yer. 10:23.

16. Ilyo umufyashi umo akwete umwana, finshi alingile ukupingulapo ukucita, kabili cinshi camwafwile ukupingula bwino ifya kucita?

¹⁶ Umwanakashi umo uwakwete umwana umwaume ninshi ekala mu calo cimbi alefwaya ukutwala umwana kuli banakulu ku calo uko afumine. Ilyo uyu mwanakashi akwete umwana, atendeke ukusambilila Baibolo ne Nte sha kwa Yehova. Uyu mwanakashi alilundulwike kabili alisambilile ukuti e o Lesa apeele umulimo wa kusambilisha umwana pali Yehova. (Amalu. 127:3; Amapi. 22:6) E ico alipepele kuli Yehova no mweo onse nga fintu Amalembo yatweba ukulacita. (Amalu. 62:7, 8) Na kabili alyebeleko no walemusambilisha Baibolo e lyo na ba bwananyina bambi mu cilonganino. Nangu ca kuti balupwa wakwe ne fibusa fyakwe balemupatikisha ukutuma umwana wakwe kuli banakulu, uyu mwanakashi alikeene. Umwina mwakwe alitemenwe ifyo aba bwananyina bayafwile uyu mwanakashi no mwana wakwe ica kuti na o alitendeke ukusambilila Baibolo e lyo no kulongana. Ukwabula no kutwishika Yehova alyaswike ipepo lya uyu mwanakashi.

17. Finshi icilonganino ca kwa Yehova catweba pa basambi ba Baibolo?

¹⁷ Ukukonka ubutungulushi. Inshila iikalamba iyo tulangilamo ukuti tuli ba cishinka kuli Lesa, kulakonka ubutungulushi bwa cilonganino cakwe. Natulande pa fyo batweba pa basambi ba Baibolo. Balitweba ukuti nga twatendeka fye isambililo lya Baibolo mu citabo ca Bushe Cinshi Baibolo Isambilisha? tulingile ukwafwa umuntu ukwishiba icilonganino ca kwa Lesa. Pa mamineti ayanono kuti twamutambisha vidio iitila Finshi Ficitika pa Ng’anda ya Bufumu? nelyo ukulanshanya nankwe ifyaba muli broshuwa iitila Ni Bani Bacita Ifyo Yehova Afwaya Muno Nshiku? Nga twapwisha ukusambilisha umusambi uulelunduluka mu citabo ca Ico Baibolo Isambilisha, balitweba ukutendeka ukumusambilisha mu citabo ca Ikalilileni mu Kutemwa kwa kwa Lesa nangu ca kuti alibatishiwa pali iyi nshita. Tulingile ukulakonka ifyo icilonganino ciletweba pa kuti abasambi abapya babe “ne citetekelo icakosa.” (Kol. 2:7) Bushe mulakonka ifyo icilonganino ca kwa Yehova citweba?

18, 19. Fintu nshi fimo ifyo tulingile ukulatashishapo Yehova?

¹⁸ Ala fingi ifyo twingatashishapo Yehova! E walenga ukuti tube no mweo, tule-enda no kuti tubeko. (Imil. 17:27, 28) Alitupeela ubupe ubusuma nga nshi, icitabo cakwe, Baibolo. Twalicipokelela ukuti Cebo ca kwa Lesa kabili twalicicetekela nga filya fine Abena Kristu mu Tesalonika bacitile.—1 Tes. 2:13.

¹⁹ Apo twalikwata Icebo ca kwa Lesa, twalipalama kuli ena kabili na o alipalama kuli ifwe. (Yako. 4:8) Shifwe wa ku muulu alitupeela ishuko lya kuba mu cilonganino cakwe. Ala tulatasha nga nshi pali aya amapaalo ayo atupeela! Uwaimbile amalumbo atile: “Tooteleni Yehova, pantu musuma; pantu icikuuku cakwe ca muyayaya.” (Amalu. 136:1) Mu Amalumbo 136 amashiwi ya kuti “icikuuku cakwe ca muyayaya” yabamo imiku 26. Nga tuli aba cishinka kuli Yehova na ku cilonganino cakwe tukashininkisha ukuti aya amashiwi ya cine pantu tukekala umuyayaya!