1, 2. (a) Cilambu nshi abantu ba kwa Lesa bafwaisha ukupokelela? (b) Finshi fingatwafwa ukubika imitima pa cilambu? (Moneni icikope pa muulu.)

NGA filya cali ku mutumwa Paulo, na Bena Kristu basubwa muno nshiku nabo balikwata isubilo lya kupokelela “icilambu ca bwite bwa ku muulu ubwafuma kuli Lesa.” (Fil. 3:14) Balafwaisha ukuya mu kubombela pamo na Yesu Kristu mu Bufumu bwakwe ubwa ku muulu no kwafwa abantu ukuba abapwililika. (Ukus. 20:6) Ala Lesa alibapeela isubilo ilisuma nga nshi! Aba mu mpaanga shimbi bena bakwata isubilo limbi. Balafwaisha ukupokelela icilambu ca mweo wa muyayaya muli paradaise pano calo, ala nabo bene balikwata isubilo ilisuma nga nshi!—2 Pet. 3:13.

² Pa kwafwa abasubwa banankwe ukuba aba cishinka pa kuti bakapokelele icilambu, Paulo abakoseleshe ati: “Bikeni imitima yenu pa fya ku muulu, te pa fya pano isonde.” (Kol. 3:2) Abasubwa balingile ukulatontonkanya pe subilo bakwete ilya kupokelela icilambu ca ku muulu. (Kol. 1:4, 5) Ukwabula no kutwishika, nga tuletontonkanya pa fyo Yehova akapaala abantu bakwe, tukalabika  imitima pa cilambu twakwata, nampo nga ca ku muulu nelyo nga ca kwikala pano calo.—1 Kor. 9:24.

3. Finshi Paulo aebele Abena Kristu ukuti fyali no kulenga bafilwa ukupokelela icilambu?

³ Paulo na kabili alyebele Abena Kristu banankwe pa fyali no kulenga bafilwa ukupokelela icilambu. Ku ca kumwenako, alembeele abali mu cilonganino ca mu Kolose pa Bena Kristu ba bufi abashatetekele Kristu lelo abalekonka Amafunde pa kuti Lesa abatemwe. (Kol. 2:16-18) Paulo alilandile pa fintu ifyabako na pali lelo ifingalenga twafilwa ukwisapokelela icilambu. Ku ca kumwenako, alilondolwele ifya kucita pa kuti twilaba no lunkumbwa lwa kucita ifyabipa, ifya kupwisha amafya nga twapusana na Bena Kristu banensu, ne fya kupwisha amafya mu lupwa. Ifyo afundile pali aya malyashi filatwafwa na muno nshiku. Kanshi natulande pali fimo ifyo Paulo alandile pa kusoka abali mu cilonganino ca mu Kolose.

4. Bushe ukuba no lunkumbwa lwa kucita ifyabipa kuti kwalenga shani twapanya icilambu?

⁴ Pa numa Paulo acinkulako aba bwananyina pe subilo bakwete, abalembeele ati: “E ico, ipayeni ifilundwa fya mubili wenu umumonekela imibele yabipa, e kutila ubulalelale, ukukowela, insuuna, ulunkumbwa, no mufimbila.” (Kol. 3:5) Ulunkumbwa lwa kucita ifyabipa lulabeleleka sana kabili kuti lwalenga bucibusa bwesu na Yehova bwapwa, twapanya ne cilambu. Ilyo munyinefwe umo uo ulunkumbwa lwabeleleke abwelele mu cilonganino atile, “Ulunkumbwa lwalimbeleleke sana ica kuti nalifililwe ukuleka ukucita ifyabipa mpaka naleka ukulongana.”

5. Kuti twaicingilila shani ku fingalenga twalufyanya?

⁵ Tufwile ukuba abalola maka maka nga kwaba ifingalenga twafilwa ukukonka amafunde ya kwa Yehova ayalanda pa kuba ne mibele iisuma. Ku ca kumwenako, kuti caba bwino nga ca kuti abalefwaya ukupana ilyo batendeka fye ukwishishanya balanshanya ukwabula ukupita na mu mbali pa fintu pamo nga ukwikatana, ukufyompana, nelyo ukuba ku ncende uko bengaba fye beka. (Amapi. 22:3) Umwina Kristu nga aya mu kubombela ukutali nelyo nga alebomba no ushili mwaume munankwe nelyo umwanakashi munankwe nalimo kuti atunkwa ukucita ifyabipa. (Amapi. 2:10-12, 16) Nga kwaba ifingalenga mwatunkwa, muleilondolola ukuti muli Nte ya kwa Yehova, mulecita ifilanga ukuti muli ba mucinshi, kabili muleibukisha ukuti nga mulesengasenga umuntu kuti mwacita ubulalelale. Na kabili kuti twacita ifyabipa nga ca kuti tuli no bulanda nelyo nga natutalalilwa. Pali iyi nshita kuti nalimo twalafwaisha ukuba no muntu uwa kutusansamusha. Nalimo kuti twalafwaisha ukuba no muntu wa kutusansamusha ica kuti twasumina fye onse uwaisa. Ifya musango uyu nga fya mucitikila, mulelomba ukuti Yehova na bantu bakwe balemwafwa pa kuti mwikapanya icilambu.—Belengeni Amalumbo 34:18; Amapinda 13:20.

6. Finshi tushilingile ukulaba ilyo tulesala ifya kuleseshamo icitendwe?

⁶ Tatulingile ukulatamba, ukulakutika, nelyo ukulabelenga ifingalenga twafilwa ukwipaya ulunkumbwa lwa kucita ifyabipa. Ifingi ifiba mu fya kuleseshamo icitendwe ifyo bapanga fyaba fye kwati ni filya abena Sodomu na Gomora balecita. (Yuda 7) Abapanga ifya kuleseshamo icitendwe balenga abantu balamona ukuti ukucita ubulalelale kwaliba fye bwino, no kuti tamufuma ifyabipa. Tulingile ukucenjela ku fya kuleseshamo icitendwe umwaba ifyabipa. Tatufwile ukulatamba, ukulakutika, nelyo ukulabenga ifingalenga twafilwa ukubika imitima pa cilambu.—Amapi. 4:23.

7. Mafya nshi nalimo twingakwata mu cilonganino?

⁷ Bonse fye twalishiba ukuti ukuba mu cilonganino ca Bwina Kristu lipaalo. Ifyo tusambilila mu Cebo ca kwa Lesa pa kulongana ne fyo twafwana na ba bwananyina filatwafwa ukubika imitima pa cilambu. Na lyo line inshita shimo kulaba ifilenga aba bwananyina mu cilonganino bapusana. Nga ca kuti tatupwishishe aya mafya kuti twalaenda ne cikonko ku mukoshi.—Belengeni 1 Petro 3:8, 9.

8, 9. (a) Mibele nshi iyo tulingile ukukwata iikalenga tukapokelela icilambu? (b) Finshi fingatwafwa ukuba aba mutende nga ca kuti Umwina Kristu munensu atukalifya?

⁸ Tatulingile ukulaenda ne cikonko ku mukoshi pantu kuti twafilwa ukwisapokelela icilambu? Paulo aebele abena Kolose ati: “Apo mwalisalwa kuli Lesa, mwe ba mushilo kabili abatemwikwa, fwaleni umutima wa nkumbu, icikuuku, ubupete, ukufuuka, no kushishimisha. Muleshipikishanya no kubelelana uluse nga umo ali ne ca kuilishanya ku munankwe. Ifyo Yehova amubelela uluse, e fyo na imwe mulebelelana uluse. Lelo, pali ifi fyonse, fwalilenipo no kutemwa, pantu e cikakilo cafikapo ica kwikatana.”—Kol. 3:12-14.

⁹ Nga tuli no kutemwa ne cikuuku tukalaelelana. Ku ca kumwenako, nga ca kuti ifyo Umwina Kristu munensu alanda nelyo acita fyatukalifya, tufwile ukwibukisha ilyo na ifwe twalandile nelyo twacitile ifyakalifye bambi. Tufwile tulatasha pa fyo aba bwananyina batulangile ukutemwa ne cikuuku ilyo basuulileko ku fyo twabalufyenye. (Belengeni Lukala Milandu 7:21, 22.) Tulatasha sana pa cikuuku ca kwa Kristu pa kulenga bakapepa ba cine baikatana. (Kol. 3:15) Bonse twatemwa Lesa umo wine, tubila imbila nsuma imo ine, kabili amafya ayengi ayo tukwata yamo yene. Nga tulebelelana uluse, tulekatana na ba bwananyina kabili tulabika imitima pa cilambu.

10, 11. (a) Mulandu nshi umufimbila wabipila? (b) Finshi twingacita pa kuti twikafilwa ukupokelela icilambu pa mulandu wa mufimbila?

¹⁰ Ku bantu abalembwa mu Baibolo tulasambililako ukuti nga tuli no mufimbila tatwakapokelele icilambu. Ku ca kumwenako, Kaini alifimbiile munyina Abele kabili alimwipeye. Kora, Datani, na Abiramu balifimbiile Mose kabili balimupondokele. Nangu fye ni Mfumu Shauli yalifimbiile Davidi kabili yalefwaya ukumwipaya. E mulandu wine Icebo ca kwa Lesa cilandila ukuti: “Pantu ukuli ubufuba no kukansana, e kuli icimfulumfulu, na conse icabipa.”—Yako. 3:16.

¹¹ Nga ca kuti twaba no kutemwa ne cikuuku, te kuti tube no mufimbila. Icebo ca kwa Lesa citila: “Mu kutemwa mwaba ukushishimisha ne cikuuku. Mu kutemwa tamwaba ubufuba.” (1 Kor. 13:4) Pa kuti twiba no mufimbila, tufwile ukulamona ifintu nge fyo Lesa afimona, ukulamona aba bwananyina ukuti tuli filundwa fya mubili umo. Nga tulecita ifi tukalalangulukilana, nga fintu amalembo ya mushilo yalanda, yatila: “Icilundwa cimo nga cacindikwa, ninshi ifilundwa fyonse fyasekelela pamo na co.” (1 Kor. 12:16-18, 26) Kanshi nga ca kuti ifintu fyawamina aba bwananyina tatufwile ukuba no mufimbila, lelo tulingile ukusekelela. Natulande pali Yonatani umwana wa Mfumu Shauli. Ilyo Davidi bamusalile ukuba imfumu, Yonatani tamufimbiile lelo alimukoseleshe. (1 Sam. 23:16-18) Bushe te kuti ciwame na ifwe twaba ne cikuuku no kutemwa nge fyo Yonatani aali?

12. Finshi Baibolo ifunda ifingalenga aba mu lupwa bonse bakapokelele icilambu?

¹² Nga ca kuti aba mu lupwa balekonka ifyo Baibolo ilanda kuti baba no mutende ne  nsansa kabili kuti bapokelela icilambu. Finshi Paulo alandile pa kufunda indupwa sha Bena Kristu mu Kolose? Atile: “Mwe bakashi, mulenakila abalume benu, pantu e cawama mu menso ya kwa Shikulu. Mwe balume, muletemwa abakashi benu kabili mwilaba ne cipyu kuli bena. Mwe bana, muleumfwila abafyashi benu muli fyonse, pantu ukucita ifi e cawama mu menso ya kwa Shikulu. Mwe bashibo, mwilakalifya abana benu, epali baba no bulanda.” (Kol. 3:18-21) Ukwabula no kutwishika na muno nshiku mwine nga ca kuti abalume, abakashi na bana balekonka ifyo Paulo afundile, mu lupwa mulaba insansa.

13. Finshi nkashi uwaupwa ku ushili Nte alingile ukucita pa kuti umwina mwakwe asambilile icine?

¹³ Finshi mwingacita nga ca kuti mwaupwa ku ushili Nte kabili tamusunga bwino? Bushe ifintu kuti fyawama nga ca kuti mulemumanya pa misango yakwe? Nangu ca kutila kuti mwalenga alacita ifyo mufwaya, bushe kuti fyalenga asambilila icine? Nakalya. Lelo nga mulecindika abena mwenu apo e mutwe wa lupwa, mu lupwa kuti mwaba umutende, mukalalumbanya Yehova, kabili nalimo kuti mwalenga abena mwenu batendeka ukupepa Lesa wa cine; ici kuti calenga bonse babili mwaisapokelela icilambu.—Belengeni 1 Petro 3:1, 2.

14. Finshi Umwina Kristu uwaupa uushili Nte alingile ukucita nga ca kuti umwina mwakwe tamucindika?

 ¹⁴ Finshi mwingacita nga ca kuti mwaupa uushili Nte kabili tamucindika? Bushe nga mulemupatila pa kuti eshibe ukuti ni mwe mutwe wa lupwa, akalamucindika? Nakalya! Lesa afwaya ukuti mulepashanya Yesu pa kuti muletungulula bwino ulupwa lwenu. (Efes. 5:23) Yesu umutwe wa cilonganino, aliba no kutemwa, kabili alatekanya ilyo aletungulula icilonganino cakwe. (Luka 9:46-48) Umwaume nga alepashanya Yesu kuti alenga umwina mwakwe aisa mu kupepa kwa cine.

15. Bushe umwaume Umwina Kristu kuti alanga shani ukuti alitemwa umwina mwakwe?

¹⁵ Baibolo ifunda abaupa ukuti: “Mwe balume, muletemwa abakashi benu kabili mwilaba ne cipyu kuli bena.” (Kol. 3:19) Umulume uwatemwa umwina mwakwe alanga ukuti alimucindika nga ca kuti alekutika ifyo umwina mwakwe alelanda no kumweba ukuti ifyo alanda naficindama. (1 Pet. 3:7) Nangu ca kuti te kuti acite fyonse ifyo umwina mwakwe alefwaya, nga ca kuti alemwipushako kuti alepingula bwino pa fintu. (Amapi. 15:22) Umulume nga aliba no kutemwa takalepatikisha umwina mwakwe ukumucindika lelo akalacita ifikalenga umwina mwakwe alaitemenwa ukumucindika. Umulume uwatemwa umwina mwakwe na bana alalenga ulupwa lwakwe lwalabombela Yehova ne nsansa, kabili ku ntanshi, kuti baisapokelela icilambu ca mweo.

16, 17. Nga uli wacaice, finshi ulingile ukulacita pa kuti wilafulwa pa fyo abafyashi bobe bakusalapula?

¹⁶ Finshi wingacita nga ca kuti uli wacaice kabili umfwa kwati abafyashi bobe balikosha amafunde kabili tabaishiba ifyo umfwa? Nga ulekalipa kuti walatwishika nga ca kuti mu kubombela Yehova mwaliba ubusuma. Nga waleka ukubombela Yehova, ukaimwena ukuti takuli nangu umo uwa kubikako amano ukucila pa fyo abafyashi bobe abatemwa Lesa ne fyo aba mu cilonganino bakubikako amano.

¹⁷ Abafyashi bobe nga tabalekulungika, bushe kuti watila balikutemwa? (Heb. 12:8) Nalimo ico ushatemwa ni nshila abafyashi bobe bakusalapwilamo. Mu cifulo ca kulakalipa pa nshila abafyashi bobe bakusalapwilamo, uleishiba ukuti kwaliba ifilenga balekusalapwila muli iyo nshila. Kanshi uletekanya kabili wilafulwa bwangu nga bakukalipila. Icebo ca kwa Lesa citila: “Onse uulama ululimi lwakwe alicenjela, no wiluka aba no mutima uwatekanya.” (Amapi. 17:27) Uleesha na maka yonse ukukanafulwa ilyo balekufunda, kabili ulekonka ifyo bakufunda ukucila ukusakamana sana pa nshila bakufundilamo. (Amapi. 1:8) Nga walikwata abafyashi abatemwa Yehova ninshi walipaalwa. Bakakwafwa pa kuti ukapokelele icilambu ca mweo wa muyayaya.

18. Mulandu nshi musalilepo ukubika umutima wenu pa kupoka icilambu?

¹⁸ Nampo nga tukakwata icilambu ca kwikala ku muulu nelyo nga tukaba no mweo wa muyayaya muli paradaise pano calo, bonse fye tulafwaisha ukwikala bwino ku ntanshi. Tatutwishika ukuti ifi fikacitika pantu uwatulaya ni Kabumba umwine. Lesa alanda pa fyo Paradaise pano calo ikaba ati: “Isonde likesulamo ukwishiba Yehova.” (Esa. 11:9) Lesa akasambilisha bonse abakaikala pano isonde. Ukwabula no kutwishika ici, cilambu icisuma nga nshi ico bonse tufwile ukubombesha pa kuti tukacipokelele. E ico mulebika imitima pa fyo Yehova amulaya, kabili tamulingile ukuleka nangu cimo cikalenge mukafilwe ukupoka icilambu!