NAFYELWE mu 1923 mwi tauni lya Hemsworth mu citungu ca Yorkshire mu calo ca England. Nalikwete umukalamba wandi umwaume ishina lyakwe ni Bob. Ilyo nali ne myaka nalimo 9, batata abashatemenwe ubumbimunda ubwali mu mipepele, balibapeele ifitabo ifyalelanda pa fisambilisho ifyaba mu kupepa kwa bufi. Batata balitemenwe ifyo babelengele. Pa numa ya myaka inono, ba Bob Atkinson balishile pa mwesu, kabili balitulishiishe ilyashi pa cilimba ca maseleti, ili lyashi ni limo pa malyashi ayo munyinefwe Rutherford alandile. Twalilwike ukuti lilya lyashi lyafumine kuli balya bene abasabankenye filya fitabo batata bapokele! Abafyashi bandi balandile ukuti munyinefwe Atkinson aleisa cila bushiku ku kuliila pamo na ifwe umulalilo pa kuti aleyasuka amepusho ayengi ayo twakwete pa fya mu Baibolo. Balitwitile ukuyasangwa ku kulongana ukwabelele pa ng’anda ya kwa munyinefwe, tapalepele sana ukufuma apo twaleikala. Tatwaikete na ku cani twalile, kabili icilonganino icinono calipangilwe mwi tauni lya Hemsworth. Tapakokwele twatendeke ukupokelela ababomfi ba calo (abo twita pali ino nshita ati bakangalila ba muputule) pa ng’anda pa mwesu kabili twaleita na bapainiya abaleikala mupepi ku kuliila pamo ifya kulya. Ukwampana na aba aba bwananyina kwalengele natemwa sana ifya kwa Lesa.

Pali ilya nshita ninshi ulupwa lwesu lwalitendeke ukupanga no kushitisha ifipuna. Lelo batata baebele ndume yandi ukuti, “Nga ulefwaya ukuya mu kubomba bupainiya, tukaleka ubu ubukwebo.” Ba Bob balisumine, kabili balile mu kubomba bupainiya ninshi bali ne myaka 21. Pa numa ya myaka ibili, balinsontele ukuba painiya ninshi ndi ne myaka 16. Pa mpela ya mulungu kwali abo nalebomba nabo umulimo wa kubila, lelo mukati ka mulungu nalebomba fye neka, nalebomfya kardi ya kupeelelapo ubunte ne cilimba ca maseleti. Lelo Yehova alingafwile ukusanga uwa kusambilisha Baibolo uwalundulwike bwangu sana. Abengi aba mu lupwa lwa uyu musambi nabo basukile basambilila icine. Umwaka wakonkelepo, ine na ba Mary Henshall balitunsontele ukuba bapainiya baibela. Batutumine ku cifulo ukushali abalebila imbila nsuma mu citungu ca Cheshire.

Ilyo Inkondo ya Calo iya Cibili yakosele, abanakashi balebeba ukulabomba imilimo ya kwafwilisha inkondo. Apo twalebomba umulimo wa nshita yonse, twalemona kwati bali no kutusuminisha ukukanabombako imilimo ya kwafwilisha inkondo nga fintu basuminishe bambi abalebomba umulimo wa nshita yonse. Lelo ifilye fyalikeene, e ico balinkakile inshiku 31. Umwaka wakonkelepo ilyo nafishishe  imyaka 19, nalilembeshe ku buteko ukukaana umulimo wa bushilika pa mulandu wa kampingu yandi. Balintwele ku filye fibili, lelo ifilye tafyansangile na umulandu e fyo umulandu wapwile. Ilyo ifi fyalecitika, nalishibe ukuti umupashi wa mushilo walengafwa no kuti Yehova alikete ukuboko kwandi, kabili alenkosha.—Esa. 41:10, 13.

Nakumene na ba Arthur Matthews mu 1946. E lyo babafumishe fye mu cifungo umo baikele imyeshi itatu pantu balikeene ukwingila ubushilika pa mulandu na kampingu yabo, kabili baile mu kwikala na bandume nabo ba Dennis abali bapainiya baibela mwi tauni lya Hemsworth. Bashibo e babasambilishe pali Yehova ninshi bali fye abaice, kabili ba Arthur babatishiwe ninshi bali ne myaka 17, e lyo ba Dennis bali na 16. Tapakokwele ba Dennis babatumine ukuya mu kubomba bupainiya bwaibela ku Ireland, e ico ba Arthur bashele beka ukwabula uwa kubomba nabo. Ilyo abafyashi bandi bamwene ukuti ba Arthur balebombesha kabili bali ne mibele iisuma balibetile ukuti baleikala pa mwesu. Ilyo naile ku ng’anda mu kutandala, ine na ba Arthur twalitemenwe ukusamfya ifipe nga twapwisha ukulya. Twasukile twatendeka ukulembeshanya amakalata. Mu 1948 ba Arthur balibakakile na kabili pa myeshi itatu. Twaupene mu January mu 1949 kabili twalefwaisha ukutwalilila ukubomba umulimo wa nshita yonse. Apo Yehova aletupaala kabili twalebomfya bwino ifintu, twalebomfya inshiku tushalebomba bupainiya ukuya mu kwafwa abalesombola ifisabo pa kuti tupange indalama sha kubomfya, ukucita ifi kwalengele twatwalilila ukubomba bupainiya.

Pa numa ya mwaka umo, batwebele ukuya mu kubombela ku Northern Ireland, twabalile mwi tauni lya Armagh, lyena twaile kwi tauni lya Newry. Muli aya matauni yabili mwalifulile ba Katolika. Abantu balipatile sana abamipepele imbi, e ico twaleba abacenjela kabili twaleiluka ilyo tulingile ukulanda na bantu pa mbila nsuma. Twalelonganina mu ng’anda ya kwa munyinefwe no mwina mwakwe abaleikala apalepele amakilomita 16 ukufuma apo twaleikala. Abantu 8 e balesangwa ku kulongana. Nga batweba ukusendama ku mwabo, twalelaala pa nshi kabili ulucelo twalelya ifya kulya ifingi pa mwikulo. Ala naliba ne nsansa pantu pali ino nshita muli ici cifulo mwaliba ba Nte abengi nga nshi.

Bandume yandi na bena mwabo ba Lottie balebomba bupainiya bwaibela mu Northern Ireland, kabili mu 1952 ifwe bonse bane twalisangilwe ku kulongana kwa citungu ukwaliko mu musumba wa Belfast. Munyinefwe umo aliitemenwe ukutupokelela ku ng’anda ku mwakwe capamo na ba Pryce Hughes abali ababomfi ba musambo mu Britain. Icungulo bushiku cimo, twalilanshenye pa katabo kafumine akaleti, Ifyo Lesa Alanga Ukutemwa (God’s Way Is Love) ako balembeele maka maka abaleikala mu calo ca Ireland. Munyinefwe Hughes alandile pa fyo cayafishe ukushimikila ba Katolika abekala mu calo ca Irish Republic. Aba bwananyina balebatamfya mu mayanda kabili baleboma ku bantu abo bashimapepo baletuma. Ba Pryce batile, “Tulefwaya abaupana abakwata imyotoka abakubomba umulimo waibela uwa kupeela abantu mu calo conse akatabo.” * Apo pene fye twayaswike atuti,  “Kuti twabomba!” Ifi e fyalengele ukuti nande amashiwi ayali pa ntendekelo ya lino lyashi.

Pa ng’anda ya ba Ma Rutland bankashi abombela Lesa pa myaka iingi mu musumba wa Dublin, epo bapainiya balefikila lyonse. Ilyo twaikeleko panono pali ba Rutland kabili pa numa ya kushitisha ifipe fimo ifyo twakwete, ifwe bane twaninine pali honda iyakwete na ica kwikalamo ku mbali kabili twaile mu kufwaya motoka ya kushita. Twalisangile abaleshitisha motoka iyo babomfyapo kabili twabebele ukuti bailete uko twaleikala pantu ifwe bonse tatwaishibe ukwensha. Bulya bushiku ba Arthur tabaleele, baikele fye pa busanshi baleisambilisha ifya kwensha motoka. Ubushiku bwakonkelepo ulucelo ilyo baleesha ukufumya motoka umo yali, ba Mildred Willett abali bamishonari (abaishileupwa kuli ba John Barr) balishile. Bena balishibe ukwensha, kabili balitusambilishe ifya kwensha, lyena pa numa twalimine ubulendo!

Cimbi ico twalefwaya mwakwikala. Balitusokele ukuti tatwalingile ukulaala mwitolokoshi pantu abapatile ba Nte kuti balyoca, e ico twaile mu kufwaya ing’anda, lelo tatwaisangile. Bulya bushiku ifwe bonse bane twaleele muli motoka. Ubushiku bwakonkelepo, twasangile fye akalitolokoshi umwali atumasanshi twakutentekanya tubili. Muli aka akalitolokoshi emo twatendeke ukwikala. Caliweme ukuti abakwete ifarmu balitusuminishe ukubikapo akalitolokoshi. Twalishimikile mu cifulo apalepele amakilomita nalimo pa kati ka 16 na 24 ukufuma apo twaleikala. Pa numa ya kushimikila muli ici cifulo, twalibwelele ku kushimikila abantu abaleikala mu cifulo twaimike akalitolokoshi.

Twalitandalile abantu bonse abaleikala ku lubali lwa ku kapinda ka ku kulyo aka calo ca Irish Republic ukwabula ubwafya nangu bumo, kabili twapeele abantu ututabo ukucila pali 20,000 kabili twalitumine ku musambo wa mu Britain amashina ya balefwaya ukusambilila Baibolo. Ala Yehova alipaalile pantu pali ino nshita muli ici calo mwaliba ba Nte abengi nga nshi!

Mu kupita kwa nshita batutumine ukuya mu kubombela ku kapinda ka ku kulyo aka musumba wa London. Papitile fye imilungu iinono, ba Arthur balibatumiine foni ukufuma ku musambo wa ku Britain, babebele ukuti ubushiku bwakonkelepo bakatendeke ukutandalila ifilonganino! Pa numa ya kutusambilisha ifya kubomba uyu mulimo pa mulungu umo, twaile ku muputule batupeele ku Scotland. Ba Arthur tabakwete inshita ya kupekanya amalyashi, lelo ifyo baleitemenwa ukubomba umulimo wa kwa Yehova nangu ifintu fyafye shani fyalenkoselesha sana. Twalitemenwe sana umulimo wa muputule. Pa myaka iingi twalebombela mu cifulo umushali ba Nte abalebilamo imbila nsuma, lelo twalyumfwile bwino ilyo twatendeke ukubombela mu cifulo umwali aba bwananyina abengi.

Ilyo ba Arthur babetile kwi Sukulu lya Gileadi mu 1962 pa myeshi 10, twalingile ukupingula bwino ifya kucita. Twapingwile ukuti ba Arthur bakayesangwa kwi sukulu, nangu ca kuti nali no kushala neka. Apo nshali no kukwata uwa kubomba nankwe, banjebele ukubwelelamo kwi tauni lya Hemsworth uko nali no kulabomba bupainiya bwaibela. Ilyo ba Arthur babwelele pa numa ya mwaka umo, batupeele umulimo wa bukangalila bwa citungu mu Scotland, ku kapinda ka kuso aka calo ca England, na ku Northern Ireland.

Mu 1964, ba Arthur babapeele umulimo umbi, uwa kuba umubomfi wa musambo mu calo ca Irish Republic. Apo twalitemenwe sana umulimo wa kwenda, ilyo batupeele uyu mulimo nalisakamene sana. Pali nomba ndatasha pa kutupeela ishuko lya kubombela pa Bethel. Nalishininkisha ukuti nga bakupeela umulimo e lyo wasumina nangu ca kuti tauutemenwe, Yehova akakupaala. Nalebomba imilimo ya mu ofeshi, ukulonga impapulo, ukwipika, no kuwamya. Pa myaka iingi twabombele umulimo wa bukangalila bwa citungu kabili twalishibene na ba bwananyina abekala mu ncende ishalekanalekana muli ici calo. Na kabili ukumona ifyo abasambi ba Baibolo balelunduluka kwalengele twatemwana sana na ba bwananyina mu calo ca Ireland. Yonse aya mapaalo icine cine!

Ukulongana kwa kubalilapo ukwa fyalo ifingi ukwaliko mu calo ca Ireland kwabelele mu musumba wa Dublin mu 1965. * Nangu ca kuti baletukaanya sana, ukulongana kwalyendele fye bwino. Abantu 3,948 e basangilweko, kabili abantu 65 balibatishiwe. Bonse abapokelele aba bwananyina 3,500 abaishile ku kulongana ukufuma ku fyalo fimbi, balibalembeele amakalata ya kubatasha. Abapokelele aba bwananyina mu mayanda yabo nabo balitashishe abaishile mu kulongana pa mibele yabo iisuma. Ala uku kwali kwaluka mu calo ca Ireland.

Mu 1966 iofeshi lya musambo mu musumba wa Dublin lyatendeke ukwangalila umulimo ku kapinda ka ku kuso na ka ku kulyo aka calo ca Ireland, ifi bacitile fyalipuseneko sana ne fyo imipepele imbi e lyo na bamapolitiki bali pantu abali muli ifi fitungu fibili tabaleumfwana. Twalitemenwe nga nshi ukumona ba Katolika abengi basambilila icine kabili batendeka no kubombela pamo na ba bwananyina abali mu mipepele imbi ilyo bashilasambilila icine.

Mu 2011 ifintu fyalyalwike nga nshi ilyo baisele umusambo mu Ireland no kukuushisha imilimo ku musambo wa ku Britain, kabili na ifwe e ko batwebele ukuya mu kubombela. Ifi fyacitike ilyo natendeke ukusakamikwa pa bumi bwa ba Arthur. Ba Arthur balibasangile no bulwele bwa Parkinson’s disease (ubulwele bwa lukanko). Pa 20 May, 2015 e lyo umwina mwandi uo twaikele nankwe pa myaka 66 afwile.

Mu myaka iinono iyapita, naleba sana no bulanda. Ilyo ba Arthur tabalafwa, balensakamana. Ndabafuluka sana! Kwena ukupita mu mafya ya musango uyu, kwalilenga napalama sana kuli Yehova. Na kabili ndomfwa bwino ukumona ifyo abantu batemenwe ba Arthur. Ifibusa fyesu ifya ku calo ca Ireland, ku Britain na ku United States balintumine amakalata. Amakalata banembeele ne fyo ba Dennis bandume nabo baba Arthur na bena mwabo ba Mavis, na banasenge bandi Ruth na Judy bankoselesha fyalingafwa ica kuti te kuti nkwate na mashiwi ya kulondolola ifyo bankoselesha.

Ilembo ilinkoselesha sana ni Esaya 30:18, litila: “Yehova akatwalilila ukulolela ukumupaala, kabili akema pa kuti amubelele uluse. Pantu Yehova ni Lesa wa mulinganya. Ba nsansa bonse abamulolela.” Ndasansamushiwa icine cine ukwishiba ukuti Yehova alalolela inshita ilyo akapwisha amafya no kutupeela imilimo iikalenga tukaleba ne nsansa mu calo cipya.

Nga natontonkanya pa milimo twabomba, ndamona ifyo Yehova atungulula no kupaala umulimo wa kubila imbila nsuma mu calo ca Ireland! Naliba ne nsansa ifi nabombeleko uyu mulimo uwalenga abantu abengi basambilile icine. Kanshi nshitwishika no kutwishika ukuti nga tulecita ifyo Yehova atweba tukapaalwa.