1. Mulandu nshi twashininkishisha ukuti Icebo ca kwa Lesa ca maka? (Moneni icikope pa muulu.)

FWE bantu ba kwa Yehova tatutwishika ukuti Icebo ca kwa Lesa “ca mweo kabili ca maka.” (Heb. 4:12) E lyo fwe bengi Baibolo yalitwalula. Bamunyinefwe na bankashi bamo bali bapuupu, balitekelwe ubusha ku miti e lyo bamo balecita ubulalelale. Bamo balikwete icuma lelo tabali ne nsansa mu bumi bwabo. (Luk. Mil. 2:3-11) Abantu abengi abashakwete isubilo balyaluka pa mulandu na maka Baibolo yakwata ayakwalula abantu. Nalimo mwalibelengapo pa fyo Baibolo yaalwile abantu bamo mu cipande icifuma lyonse mu Ulupungu lwa kwa Kalinda icitila, “Baibolo Ilaalula Abantu.” Na kabili mwalimona ukuti na pa numa ya kusambilila icine, Amalembo yalatwalilila ukwafwa Abena Kristu ukutwalilila ukulunduluka mu fya kwa Lesa.

2. Finshi fyacitike mu nshita ya batumwa ifilanga ukuti Icebo ca kwa Lesa ca maka?

² Bushe tufwile ukupapa ukuti abantu abengi muno nshiku balyaluka sana pa mulandu wa kubelenga Icebo ca kwa Lesa? Awe nakalya! Ifi abantu baluka filenga twaibukisha aba bwananyina abayalwike mu nshita ya batumwa, abaali ne subilo lya kwikala ku muulu.  (Belengeni 1 Abena Korinti 6:9-11.) Ilyo umutumwa Paulo apwishishe ukulanda pa bantu abalekanalekana abashakengile mu Bufumu bwa kwa Lesa, alandile ati: “Imwe bamo e fyo mwali.” Aba bantu balyalwike pa mulandu wa kuti Amalembo no mupashi wa mushilo fyalibafwile. Lelo na pa numa ya kusambilila icine bamo balicitile imembu ishikalamba ishali no kulenga bucibusa bwabo na Yehova bupwe. Baibolo yalilanda pa Mwina Kristu umo uwali uwasubwa uo batamfishe mu cilonganino lelo pa numa alibweshiwe. (1 Kor. 5:1-5; 2 Kor. 2:5-8) Bushe tatukoseleshiwa nga twamona amafya ayalekanalekana ayo aba bwananyina bakwata lelo ayo Icebo ca kwa Lesa cibafwa ukupwisha?

3. Finshi twalasambilila muli cino cipande?

³ Apo Icebo ca kwa Lesa ca maka kabili twalicikwata no kucikwata, tulingile ukulacibomfya sana. (2 Tim. 2:15) Muli cino cipande twalasambilila pa fyo twingabomfya sana amaka ya Cebo ca kwa Lesa (1) mu bumi bwesu, (2) ilyo tulebila imbila nsuma, na (3) ilyo tulesambilisha pa cisebele. Ifyo twalasambilila fyalatwafwa ukwishiba ifyo twingalanga ukuti twalitemwa kabili tulatasha Shifwe wa ku muulu uwaba no kutemwa, uutusambilisha ifingatuwamina.—Esa. 48:17.

4. (a) Finshi tulingile ukulacita pa kuti Icebo ca kwa Lesa ciletwafwa? (b) Mucita shani pa kuti mulekwata inshita ya kubelenga Baibolo?

⁴ Pa kuti Icebo ca kwa Lesa ciletwafwa, tulingile ukulacibelenga lyonse, nangu fye cila bushiku nga kuti twakumanisha. (Yosh. 1:8) Kwena fwe bengi twalikwata ifya kucita ifingi. Na lyo line, tatulingile ukuleka icintu nangu cimo nangu fye milimo iyo twakwata yalenga twalafilwa ukubelenga Baibolo lyonse. (Belengeni Abena Efese 5:15, 16.) Abantu ba kwa Yehova abengi balabelenga Baibolo cila bushiku, bamo bakwata inshita ya kubelenga Baibolo ulucelo, bambi akasuba e lyo bambi icungulo. Bomfwa nga filya uwaimbile amalumbo aumfwile uwatile: “Amafunde yenu naliyatemwa icine cine! Akasuba konse e yo ntontonkanyapo.”—Amalu. 119:97.

5, 6. (a) Mulandu nshi cacindamina ukutontonkanya sana pa fyo tulebelenga? (b) Kuti twacita shani pa kuti tuletontonkanya bwino pa fyo tulebelenga? (c) Busuma nshi mwasanga mu kubelenga Icebo ca kwa Lesa no kutontonkanya sana pa fyo mulebelenga?

⁵ Nga twabelenga Baibolo tulingile no kutontonkanya pa fyo twabelenga. (Amalu. 1:1-3) Nga tuletontonkanya pa fyo tulebelenga cikatwangukila ukulabomfya amano twanonka. Nampo nga tulebelenga Baibolo pali foni nangu pali tabuleti nelyo tulebelenga iyo bapulinta, ico tulingile ukufwaisha, kulaleka ifyo tulebelenga filetufika pa mutima.

⁶ Finshi twingacita pa kuti tuletontonkanya bwino pa fyo tulebelenga? Abengi basanga ukuti cilabafwa ukulaimininako pa numa ya kubelenga  iciputulwa cimo mwi lembo no kuyipusha amepusho pamo nga: ‘Bushe ifi nabelenga filensambilisha finshi pali Yehova? Bushe ifi nabelenga mfibomfya shani mu bumi bwandi? Ni mwi umo nshilecita bwino umo ningile ukuwamyako?’ Nga tuletontonkanya sana pa Cebo ca kwa Lesa, tukalafwaisha ukulabomfya sana ifyo tulesambilila. Nga tulecita ifi, twakulabomfya sana amaka ya Cebo ca kwa Lesa mu bumi bwesu.—2 Kor. 10:4, 5.

7. Kuti twacita shani pa kuti tulebomfya bwino Icebo ca kwa Lesa ilyo tulebila imbila nsuma?

⁷ Finshi fingatwafwa ukulabomfya bwino Icebo ca kwa Lesa ilyo tulebila imbila nsuma? Ica kubalilapo tulingile ukulabomfya Icebo ca kwa Lesa ilyo tulebila imbila nsuma na lintu tulesambilisha. Munyinefwe umo atile, “Bushe nga mwaile ku kubila imbila nsuma na Yehova ku ng’anda ne ng’anda, kuti mulelanda fye mweka ukwabula ukuti na o alelandapo?” Ico uyu munyinefwe alelandapo ca kuti: Nga tulebelenga Icebo ca kwa Lesa ilyo tulebila imbila nsuma, ninshi tuleleka Yehova alelanda ku muntu uo tulelandako. Nga mwasala ilembo ililingile, umuntu mulelandako kuti lyamufika sana pa mutima ukucila amashiwi mwingamweba. (1 Tes. 2:13) Muleyipusha amuti, ‘Bushe ndabomfya Icebo ca kwa Lesa lyonse ilyo ndebila imbila nsuma?’

8. Mulandu nshi uo tushilingile ukupelela fye pa kubelenga amalembo ilyo tuleshimikila abantu imbila nsuma?

⁸ Kwena tatulingile ukupelela fye pa kubelengela umuntu ilembo. Mulandu nshi? Pantu abengi baishiba fye ifinono pa fyo Baibolo isambilisha e lyo bambi tabaishiba nangu fimo. Ifi fine e fyo cali na mu nshita ya batumwa. (Rom. 10:2) Kanshi tatulingile ukutontonkanya ukuti umuntu tulebelengela alaishiba icishinka tulebelenga mu cikomo nga twamubelengela fye. Tufwile ukusobolapo amashiwi yamo pa cikomo twabelenga, nalimo kuti twabwekeshapo ukubelenga amashiwi ayo tulefwaya uyo muntu omfwe no kulondolola umo yalolele.  Nga tulecita ifi, tukalenga Icebo ca kwa Lesa cikalefika abo tulelanshanya nabo pa mutima.—Belengeni Luka 24:32.

9. Finshi twingacita ilyo tushilabelenga ilembo pa kuti abantu bacindike Baibolo? Langilileni.

⁹ Na kabili amashiwi tulanda ilyo tushilabelenga ilembo yalingile ukulenga abantu tulelandako bacindika Baibolo. Ku ca kumwenako, nalimo kuti twatila, “Natumone ifyo Kabumba wesu alandapo pali ili lyashi.” Nga mulelanshanya no uushili Mwina Kristu, nalimo kuti mwatila, “Moneni ifyo Amalembo ya Mushilo yatweba.” E lyo nga tulebila imbila nsuma ku muntu uushabika amano ku fya kwa Lesa, kuti twamwipusha atuti, “Bushe mwalibala amumfwapo ili pinda lya kale?” Kanshi, tulingile ukumona ifyo umuntu tulelandako ali, no kwalula ifyo twalalanda nankwe.—1 Kor. 9:22, 23.

10. (a) Landeni pa fyo munyinefwe umo acitile. (b) Finshi mwamonapo mu mulimo wenu uwa kubila imbila nsuma ifilanga ukuti Icebo ca kwa Lesa ca maka?

¹⁰ Abengi basanga ukuti nga balebomfya Icebo ca kwa Lesa ilyo balebila imbila nsuma balafika abantu pa mutima. Natulande pa cacitike. Munyinefwe aile ku kumona umwaume umukalamba. Uyu mwaume alibelengele magazini yesu pa myaka iingi. Mu cifulo ca kumupeela fye Ulupungu lwa kwa Kalinda ulupya, munyinefwe amubelengele ilembo ilyali muli ulu Ulupungu. Amubelengele 2 Abena Korinti 1:3, 4 apaba amashiwi ayatila: ‘Shifwe wa nkumbu kabili Lesa wa cisansamushi conse, alatusansamusha mu macushi yesu yonse.’ Uyu mwaume alyumfwile bwino pa mashiwi bamubelengele, ica kuti aebele munyinefwe ukuti abelenge ilembo na kabili. Lyena alandile ukuti ena no mwina mwakwe balefwaya sana ukusansamushiwa, kabili pali ino nshita alitemwa ubukombe bwa mu Baibolo. Bushe tamulesumina ukuti Icebo ca kwa Lesa calikwata amaka?—Imil. 19:20.

11. Mulimo nshi uo bamunyinefwe abasambilisha pa cisebele bakwata?

¹¹ Bonse tulomfwa bwino ukusangwa ku kulongana kwa cilonganino ukubikako fye no kulongana kwa muputule no kwa citungu. Ico twila mu kulongana maka maka ni ku kupepa Yehova. Na kabili tulanonkelamo sana mu fyo tusambilila pa kulongana. Bamunyinefwe abalanda amalyashi pa cisebele balikwata ishuko lya kusambilisha. Pa nshita imo ine balingile ukwishiba ukuti ukusambilisha mulimo uukalamba. (Yako. 3:1) Lyonse balingile ukushininkisha ukuti ifyo balesambilisha filefuma mu Cebo ca kwa Lesa. Nga bamupeela ilyashi lya kulanda pa cisebele, kuti mwabomfya shani amaka ya Cebo ca kwa Lesa ilyo mulesambilisha?

12. Bushe uulelanda ilyashi kuti acita shani pa kuti alebomfya Amalembo ilyo alelanda ilyashi?

¹² Mulingile ukushininkisha ukuti mulebomfya Amalembo ilyo mulelanda ilyashi. (Yoh. 7:16) Finshi fyabimbwamo mu kulanda ilyashi? Cimo ca kuti, tamufwile ukuleka ifilangililo mulebomfya, ifyacitike ifyo muleshimika mu lyashi nelyo imilandile yenu yalenga abantu bafilwa ukubika amano ku Malembo mulebelenga. Cimbi, mulingile ukulaibukisha ukuti ukubelenga amalembo ayengi te kusambilisha. Na kuba, nga mwabomfya amalembo ayengi abantu te kuti bayebukishe. E ico mulesalamo fye amalembo ayaletungilila ifishinka mulelandapo, kabili muleteka umutima pa kubelenga, muleyalondolola, mulebomfya ne filangililo kabili mulelondolola bwino ifyo abantu bengabomfya ifyo ilembo lilelandapo. (Nehe. 8:8) Nga ca kuti ilyashi nalikwata autulaini iyo icilonganino capekanya, mufwile ukubelengamo sana no kubelenga amalembo ayalimo. Mulingile ukwishiba ifyo ifyebo fili muli autulaini fyampene na malembo. Lyena ilyo mulesambilisha  bomfyeni amalembo ayali mu autulani ayo musalile. (Kuti mwabomfya ne fyebo fyaba mwi sambililo 21 ukufika ku 23 mu citabo citila Nonkelenimo mu Masambililo ya Isukulu lya Butumikishi Ilya Bulesa.) Icikalamba ico tushilingile ukulaba, kupepa kuli Yehova ukuti atwafwe ukulanda bwino ifyebo ifyaba mu Cebo cakwe.—Belengeni Esra 7:10; Amapinda 3:13, 14.

13. (a) Bushe nkashi umo anonkelemo shani mu malembo ayabomfiwe pa kulongana? (b) Bushe mwanonkelamo shani mu malyashi ayashimpwa pa Malembo ayaba pa kulongana?

¹³ Amalembo ayo babelengele pa kulongana yalifikile nkashi uwikala ku Australia pa mutima. Nangu ca kuti aliculile sana ilyo alekula, alisumine ubukombe bwa mu Baibolo kabili aliipeele kuli Yehova. Na lyo line, calimwafishe ukusumina ukuti Yehova alimutemenwe. Nomba mu kupita kwa nshita asukile ashininkisha ukuti Lesa alimutemwa. Cinshi camwafwile ukusumina ukuti Lesa alimutemwa? Alitontonkenye sana pe lembo ilyo babelengele pa kulongana kabili ayampenye ili ilembo ku malembo yambi ayaba mu Baibolo. * Bushe na imwe mwalinonkelamo mu fyo babomfya Icebo ca kwa Lesa pa kulongana kwa cilonganino, ukwa muputule no kwa citungu?—Nehe. 8:12.

14. Kuti twalanga shani ukuti tulatasha pa Cebo ca kwa Yehova?

¹⁴ Ala tulatasha ifi Yehova atupeela Icebo cakwe, Baibolo! Tapeela fye abantu Baibolo lelo alifikilisha ne fyo alaile ukuti Icebo cakwe cikabako umuyayaya. (1 Pet. 1:24, 25) Kanshi tulingile ukulabelenga Icebo ca kwa Lesa lyonse, ukulacita ifyo tulebelenga e lyo no kulacibomfya ilyo tuleyafwa bambi. Nga tulecita ifi ninshi tulelanga ukuti twalitemwa Icebo ca kwa Lesa kabili tulatasha pali ici icuma, ne cacilapo ca kuti nga tulecita ifi ninshi tuletasha umwine wa Baibolo, Yehova Lesa.