Bushe mwalibelenga bwino bwino magazini ya Ulupungu lwa kwa Kalinda iya nomba line? Moneni nga kuti mwayasuka ifi fipusho:

Finshi Amalembo yalanda ifilanga ukuti Lesa alatulangulukilako?

Ilyo abena Israele bali abasha mu Egupti, Lesa alemona ifyo balecula kabili aleumfwa ububi. (Ukufu. 3:7; Esa. 63:9) Apo twapangwa mu cipasho ca kwa Lesa, na ifwe bene kuti twalalangulukilako abantu. Lesa alatulangulukilako na lintu tulemona ukuti talingile ukututemwa.—wp18.3, amabu. 8-9.

Bushe ifyo Yesu alesambilisha fyalelenga shani abantu baleka ukuba no musobolola?

Ilyo Yesu ali pano calo abaYuda abengi bali no musobolola. Yesu alekoselesha abantu ukuba abaicefya kabili alebeba ukuti tabalingile ukuba no musobolola wa mushobo. Alekoselesha abasambi bakwe ukulamona abasambi banabo ukuti ba bwananyina.—w18.06, amabu. 9-10.

Finshi tusambilila kuli filya Lesa ashasuminishe Mose ukwingila mu Calo ca Bulayo?

Mose ali ni cibusa sana uwa kwa Yehova. (Amala. 34:10) Ilyo imyaka 40 yali mu kupwa ninshi abena Israele bali mu ciswebebe, batendeke ukuilishanya pa muku walenga bubili pa mulandu wa kuti tabakwete amenshi. Lesa aebele Mose ukuti alande ku cilibwe. Nomba Mose ena aumine ici icilibwe. Yehova alikalipe nalimo pali filya Mose ashakonkele ifyo amwebele nelyo pali filya Mose ashacindike Lesa pa cipesha amano acitile. (Impe. 20:6-12) Ifi fyacitike fitusambilisha ukuti calicindama ukulaumfwila Yehova no kulalenga acindikwa.—w18.07, amabu. 13-14.

Cinshi cishawamina ukulapingula abantu ukulingana ne fyo tubamona?

Kwaliba ifintu fitatu ifilenga abantu abengi balepingula abantu banabo. Babapingula ukulingana no mushobo wabo nelyo umutundu wabo, ifyo bakwata e lyo no mushinku wabo. Tulingile ukulamona abantu ukulingana ne fyo Lesa uushaba no musobolola abamona. (Imil. 10:34, 35)—w18.08, amabu. 8-12.

Finshi fimo Abena Kristu abakoloci bengacita pa kwafwilisha abantu?

Lesa acili alitemwa Abena Kristu abakoloci nangu ca kuti balileka ukubomba imilimo imo, kabili aba Abena Kristu kuti bayafwilisha abantu mu nshila ishalekanalekana. Kuti balelanshanyako ifya mu Baibolo na bashili ba Nte abaupana na ba Nte, kuti balekoselesha abaleka ukulongana no kubila imbila nsuma, kuti baletungulula amasambililo ya Baibolo kabili kuti balabombesha mu mulimo wa kubila imbila nsuma.—w18.09, amabu. 8-11.

Ni mpapulo nshi tubomfya sana pa kusambilisha?

Tubomfya amakardi apaba webusaiti yesu, tulabomfya utupepala twa kwitilapo abantu, amatrakiti 8, Ulupungu lwa kwa Kalinda, Loleni!, amabroshuwa yamo yamo, ifitabo fibili ifyo tubomfya pa kusambilisha abasambi e lyo na mavidio 4. Imo pali aya mavidio itila Mulandu Nshi Mulingiile Ukusambilila Baibolo?—w18.10, ibu. 16.

Finshi Umwina Kristu engacita pa kuti ‘anonke icine’ nga fintu Amapinda 23:23 yatukoselesha?

Tatubomfya indalama pa kushita icine. Lelo tulingile ukubomfya inshita kabili tufwile ukuibikilishako sana pa kuti tunonke icine.—w18.11, ibu. 4.

Finshi twingasambilila ku lyashi lya kwa Hosea no mwina mwakwe Gomere?

Gomere alebwekeshapo fye ukucita ubucende, lelo Hosea alemubelela uluse kabili talekene nankwe. Nga ca kuti umo pa Bena Kristu abaupana acita ubucende, uo babembukila kuti aelela umunankwe. Uo babembukile nga atendeka ukupanga icupo no umubembukiile, ninshi umulandu wa kulekaninapo uo Baibolo yalandapo wapwa.—w18.12, ibu. 13.