Twalilileni Ukubombela Yehova ne Nsansa
BUSHE mulebukisha ubushiku mwali sana ne nsansa? Bushe ni lintu mwaupile nelyo ukuupwa, nelyo ni lintu mwakwete umwana wa kubalilapo? Bushe ni lintu mwabatishiwe? Ubu bushiku bufwile bwalicindeme sana kuli imwe kabili mwali ne nsansa nga nshi. Pali ubo bushiku, aba bwananyina nabo bene bali ne nsansa ilyo bamwene ukuti mwalitemwa Lesa no mutima wenu onse, no mweo wenu onse, no kutontonkanya kwenu konse na maka yenu yonse!—Marko 12:30.
Ukutula apo mwabatishiwilwa mufwile mulabombela Yehova ne nsansa. Lelo bakasabankanya abengi tababombela Lesa ne nsansa sana nge fyo balemubombela ilyo babatishiwe. Mulandu nshi? Bushe kwaliba ififwile ukulenga twatwalilila ukubombela Yehova ne nsansa?
FINSHI FYALENGA BAMO UKUKANABA NE NSANSA?
Imbila ya Bufumu ilalenga tuleba ne nsansa nga nshi. Mulandu nshi? Pantu Yehova alitulaya ukuti Ubufumu buli no konaula cino calo cabipa kabili bukalenga kukabe icalo cipya ica kwa Lesa. Baibolo pali Sefania 1:14 itweba ukuti: “Ubushiku ubukalamba ubwa kwa Yehova nabupalama. Nabupalama, kabili buleyangufyanya nga nshi.” Nga ca kuti tulemona kwati ubushiku bwa kwa Yehova bulekokola ukwisa, te kuti tutwalilile ukuba ne nsansa nge fyo twali kale. Ici kuti calenga twaleka ukubombesha mu mulimo wa kwa Lesa.—Amapinda 13:12.
Nga tuli pamo na ba bwananyina, balatukoselesha ukutwalilila ukubombela Yehova ne nsansa. Nalimo imibele iisuma iyo abantu ba kwa Yehova bakwata e yalengele twaisa mu kupepa kwa cine no kutendeka ukubombela Lesa ne nsansa. (1 Petro 2:12) Lelo cinshi cingacitika nga ca kuti munyinefwe nelyo nkashi bamusalapula pa mulandu wa kukanakonka amafunde ya kwa Lesa? Ici kuti calenga bamo mu cilonganino bafuupulwa, ne nsansa bakwete mu kubombela Lesa shapwa.
Ukutemwisha ifyuma nako kuti kwapwisha insansa twakwata. Kuti kwapwisha shani? Icalo ca kwa Satana cilatubeleleka ukuti tuleshita ifintu ifyo tushikabila sana. Kanshi lyonse tulingile ukulatontonkanya pa mashiwi ayo Yesu alandile aya kuti: “Takuli uwingabombela bashikulu babili; pantu kuti apatapo umo no kutemwa umbi, nalimo kuti aba uwa cishinka kuli umo no kusuula umbi. Te kuti mubombele Lesa ne Fyuma.” (Mateo 6:24) Te kuti tubombele Yehova ne nsansa nga ca kuti tulefwaisha ukukwata ifyuma.
MULEBA NE NSANSA ILYO MULEBOMBELA YEHOVA
Abatemwa Yehova tabamona ukuti ukumubombela kwalyafya. (1 Yohane 5:3) Yesu atile: “Iseni kuli ine imwe bonse mwe balecula kabili abafininwa, na ine nalamusansamusha. Sendeni ikoli lyandi no kusambilila kuli ine, pantu nalifuuka kabili nali-icefya, e lyo mwalasanga ukutuusha. Pantu ikoli lyandi talyafina, ne cipe candi calyanguka.” (Mateo 11:28-30) Ukuba Umwina Kristu wa cine kusuma kabili kulalenga tuleba ne nsansa. Kwaliba ifingi ifilenga tuleba ne nsansa ilyo tulebombela Yehova. Kanshi natulande pa fintu fitatu ifingalenga twaba ne nsansa.—Habakuki 3:18.
Tubombela Lesa wa nsansa, uwatupeela ubumi. (Imilimo 17:28; 1 Timote 1:11) Twalishiba ukuti umwine wa bumi ubo twakwata ni Kabumba wesu. Kanshi tufwile ukutwalilila ukumubombela nangu palipita imyaka iingi ukutula apo twabatishiwilwe.
Ba Héctor baliba ne nsansa pantu balatontonkanya pa fyo Ubufumu bukacita kabili balabila imbila nsuma
Natulande pali ba Héctor ababombeele Yehova mu mulimo wa kutandalila ifilonganino pa myaka 40. “Na mu bukote,” balitwalilila ukubombela Yehova kabili baliba ne nsansa. (Amalumbo 92:12-14) Nangu ca kuti ba Héctor pali nomba tababombesha mu mulimo wa kwa Lesa pa mulandu wa kulwalilila kwa bena mwabo, balitwalilila ukuba ne nsansa. Ba Héctor batile: “Nangu ca kuti naliba no bulanda pa fyo umwina mwandi alwalilila kabili calyafya ukumusakamana, nalitwalilila ukubombela Lesa wa cine ne nsansa. Apo nalishiba ukuti Yehova e wampeela ubumi, kabili kwali icalengele ukuti abumbe abantu, calilenga ukuti imutemwe nga nshi no kulamubombela no mutima wandi onse. Lyonse ndabombako umulimo wa kubila imbila nsuma, kabili pa kuti ntwalilile ukuba ne nsansa ndatontonkanya sana pa fyo Ubufumu bukacita.”
Yehova alitupeela ilambo lya cilubula, ililenga tuleba ne nsansa. “Lesa atemenwe nga nshi aba pano calo ica kuti apeele Umwana wakwe uwafyalwa eka, ukuti onse uumutetekela ekonaika lelo akabe no mweo wa muyayaya.” (Yohane 3:16) Nga ca kuti twaba ne citetekelo mwi lambo lya cilubula, Lesa kuti alatwelela imembu, kabili kuti twaba no bumi bwa muyayaya ku ntanshi. Ala ifi Yehova atucitila fifwile ukulenga tulemutasha! Nga tuletasha pa cilubula, tukalabombela Yehova ne nsansa.
Ba Jesús balyangwishe imikalile kabili balibombele Yehova ne nsansa pa myaka iingi
Munyinefwe Jesús uwaleikala ku Mexico atile: “Nali umusha wa ncito nalebomba, limo limo nalebomba amaawala ayengi nangu ca kuti te fyo balenjeba ukubomba. Ico nalebombela ifi ni co nalefwaya ukulakwata indalama ishingi. Ilyo nasambilile pali Yehova na pa fyo atupeele Umwana wakwe uo atemwa nga nshi, nalefwaisha ukulamubombela. E ico naliipeele kuli Yehova, kabili pa numa ya kubomba pa kampani imyaka 28, nalilekele incito no kutendeka umulimo wa nshita yonse.” E fyo munyinefwe Jesús atendeke ukubombela Yehova ne nsansa.
Ukuba ne mibele iisuma kulalenga twaba ne nsansa. Bushe mulebukisha ifyo mwali ilyo mushilasambilila pali Yehova? Umutumwa Paulo aebele Abena Kristu mu Roma ukuti “mwali abasha ba lubembu,” lelo mwaishileba “abasha ba bulungami.” Apo baishileba ne mibele iisuma, baletontonkanya pa kuba no mweo wa muyayaya. (Abena ) Na ifwe bene tulakonka amafunde ya kwa Yehova, e ico tatuba no bulanda ubo abacita ubulalelale e lyo na baba ne mibele imbi iyabipa bakwata. Ala ukuba ne mibele iisuma kulalenga tuleba ne nsansa! Roma 6:17-22
“Nshatalile nkwatapo insansa ishacila pa sho nakwata pa myaka yonse iyo nabombela Yehova.”—Ba Jaime
Natulande pali ba Jaime abashasumine ukuti Lesa e ko aba, lelo abasumine ukuti ifintu fyasangwike fye, kabili abali bakapoosa wa nkonya. Ilyo ba Jaime batendeke ukulongana, balitemenwe ukumona ifyo bamunyinefwe batemwana. Pa kuti ba Jaime baleke ukucita ifyo balecita, balepepa kuli Yehova ukuti abafwe ukusumina muli ena. Batile, “Panono panono natendeke ukwishiba ukuti Shifwe uwaba no kutemwa kabili Lesa uwa luse e ko aba.” Balandile no kuti, “Ukukonka amafunde ayalungama aya kwa Yehova kwalincingilila. Nga nshayalwike nalimo nga nalifwa, nge fyo bamo abalepoosa inkonya abali ifibusa fyandi bafwa. Nshatalile nkwatapo insansa ishacila pa sho nakwata pa myaka yonse iyo nabombela Yehova.”
MWINENUKA!
Bushe tulingile ukulaumfwa shani ilyo tulelolela impela ya cino calo cabipa? Tufwile ukwishiba ukuti nga tulebombela Lesa ninshi tulecita ukufwaya kwakwe, kabili ninshi tulafwaisha ukuba no mweo wa muyayaya. Baibolo itweba ukuti, “E ico twinenuka ukucita icawama, pantu mu nshita yalinga tukalobolola nga tatutompweke.” (Abena Galatia 6:8, 9) Apo Yehova alatwafwa, natutwalilile ukulashipikisha amafya, ukulaesha na maka ukuba ne mibele iikalenga tukapusuke “ubucushi bukalamba,” e lyo natutwalilile no kubombela Yehova ne nsansa.—Ukusokolola 7:9, 13, 14; Yakobo 1:2-4.
Twalicetekela ukuti Yehova akatulambula nga twatwalilila ukushipikisha pantu alishiba ifyo tumubombela, ifyo twamutemwa e lyo ne fyo twatemwa ishina lyakwe. Nga twatwalilila ukumubombela ne nsansa, tukalaumfwa nga filya uwaimbile amalumbo aleumfwa uwatile: “Nabika Yehova pa ntanshi yandi pe. Pantu aba ku kwa kulyo kwandi, nshakatelentenshiwe. E ico umutima wandi ulasekelela, no bukata bwandi bulaanga. No mubili wandi ukekala umutelelwe.”—Amalumbo 16:8, 9.