Baibo yalilanda mu kulungatika ukuti Yehova kuti aishiba ifyo ifintu fikaba ku ntanshi. (Esa. 45:21) Lelo tayalondolola fyonse ifyo acita pa kwishiba nelyo ilyo engafishiba, kabili tayalanda na pa bwingi bwa fyo engasalapo ukwishiba. Kanshi tatwaishiba fyonse pa maka Yehova akwata aya kwishiba ifyo ifintu fikaba ku ntanshi. Na lyo line, lekeni tulandeko pali fimo ifyo twaishibapo.

Yehova kuti acita fyonse ifyo alefwaya, lelo limo alasalapo ukukanacita fimo. Apo Yehova alikwatisha amano, kuti asobela fyonse ifyo engafwaya ukusobela. (Rom. 11:33) Nomba apo Yehova alailama sana, kuti asalapo no kukanaishiba ifikacitika.—Linganyeniko Esaya 42:14.

Yehova alalenga ifyo alefwaya fyacitika. Bushe ifi kuti fyalenga shani twaumfwikisha amaka Yehova akwata aya kwishiba ifikacitika ku ntanshi? Baibo pali Esaya 46:10 ilondolola ukuti: “Ne usobela pa kutendeka ifikacitika ku mpela, no kufuma kale ifintu ifishilacitwa; ne utila, ‘Ukufwaya kwandi kukacitika, kabili conse ico natemwa nkacita.’”

Kanshi cimo icilenga Yehova aleishiba ifikacitika ku ntanshi ni co alikwata amaka ya kulenga ifintu fyacitika. Yehova takabila ukwishiba ifikacitika ku ntanshi nga filya tutamba ifili ku mpela ya vidio pa kuti twishibe ifili ku ntanshi, kwati ifikacitika ku ntanshi fyalicitika kale, nomba alefipitulukamo fye. Lelo Yehova kuti asala ukuti fimo fikacitike pa nshita alefwaya fikacitikilepo, kabili kuti alenga fyacitika ilyo iyo nshita yafika.—Ukufu. 9:​5, 6; Mat. 24:36; Imil. 17:31.

Ici e calenga Baibo ilebomfya amashiwi pamo nge shiwi lya kuti “nalipanga” pa kulondolola ifyo Yehova acita pa fintu ifikacitika ku ntanshi. (2 Isha. 19:25; Esa. 46:11) Ili ishiwi balipilibula ukufuma kwi shiwi lya ciHebere ilyapalana ne shiwi ilipilibula ukuti “nakabumba.” (Yer. 18:4) Nga filya fine nakabumba uwaishibisha ukubumba engapanga icipe ce bumba icisuma kwi loba, e fyo na Yehova engapanga nelyo engalenga fimo fyacitika pa kuti ifyo alefwaya ficitike.—Efes. 1:11.

Yehova alipeela abantu insambu sha kulaisalila abene ifya kucita. Yehova tatantikila limo ifikacitikila umuntu umo umo; kabili talenga abantu aba cishinka balacita ifingalenga baisafwa. Alaleka cila muntu alaisalilapo ifya kucita, kabili atukoselesha ukulacita ifisuma.

Tontonkanyeni pa fya kumwenako fibili. Ica kubalilapo cilelanda pa bantu abaleikala mu musumba wa Ninebe. Yehova alisobele ukuti umusumba wali no konaulwa pa mulandu ne fyabipa ifyo balecita. Nomba ilyo aba mu musumba balapiile, Yehova ‘alilangulwike pa bucushi ubo ali no kubaletela, kabili tabuletele.’ (Yona 3:​1-10) Yehova alyalwile ifyo asobele pa musumba wa Ninebe pantu abaleikala muli uyu musumba basalilepo ukwaluka ilyo baumfwile ifyo Yehova abasokele.

Ica bubili busesemo ubulanda pali Sailasi uwali no kulubula abaYuda muli bunkole no kubasuminisha ukukuulila Yehova itempele cipya cipya. (Esa. 44:26–45:4) Sailasi imfumu ya ku Persia yalifikilishe ubu busesemo. (Esra 1:​1-4) Lelo Sailasi talepepa Lesa wa cine. Yehova alibomfeshe Sailasi pa kuti afikilishe ubu busesemo, lelo tamupatikishe ukuti alemupepa.—Amapi. 21:1.

Ifi twalandapo ni fimo fye pa filenga Yehova asobela ifikacitika ku ntanshi. Ukulanda fye icishinka, takuli umuntu uwingomfwikisha ifyo Yehova atontonkanya e lyo ne fyo acita. (Esa. 55:​8, 9) Nangu cibe fi, ifyo twaishiba pali Yehova filalenga twacetekela sana ukuti fyonse ifyo acita fyalilungama, ukubikako ne fyo asobela ukuti fikacitika