Mulesekelela Ilyo Mulelolela Yehova Ukuti Akawamye Ifintu
BUSHE mulafwaisha ukuti inshita ikafike ilyo Yehova akafumyapo ifyabipa fyonse no kulenga ifintu fyonse fikabe ifipya? (Ukus. 21:1-5) Ukwabula no kutwishika mulafwaisha ukuti iyi nshita ikafike! Na lyo line, te lyonse canguka ukuba abatekanya ilyo tulelolela Yehova, maka maka nga tuli na mafya. Baibo itila: “Icile-enekelwa nga cakokola ukwisa cilalwalika umutima.”—Amapi. 13:12.
Nangu cibe fi, Yehova atwenekela ukuba abatekanya ilyo tulelolela ukuti acite ifyo alefwaya pa nshita yakwe umwine. Mulandu nshi atwenekela ukubela abatekanya? Cinshi cingalenga tuleba ne nsansa ilyo tulemulolela?
MULANDU NSHI YEHOVA AFWAILA UKUTI TULELOLELA?
Baibo itila: “Yehova akatwalilila ukulolela ukumupaala, kabili akema pa kuti amubelele uluse. Pantu Yehova ni Lesa wa mulinganya. Ba nsansa bonse abamulolela.” (Esa. 30:18) Aya mashiwi Esaya alembele yalelanda pa baYuda abali bacintomfwa. (Esa. 30:1) Nomba kwali abaYuda bamo abali aba cishinka, kabili aya mashiwi yalilengele bakwata isubilo. Aya yene amashiwi yalalenga na babomfi ba kwa Yehova aba cishinka muno nshiku balekwata isubilo.
Kanshi tulingile ukuba abatekanya ilyo tulelolela pantu Yehova alitwalilila ukulolela. Alisala ubushiku ne nshita ilyo akafumyapo ifyabipa fyonse, kabili alelolela ukuti ubo bushiku ne nshita fikafike. (Mat. 24:36) Ilyo iyo nshita ikafika, cikamoneka apabuuta tuutu ukuti ifyo Kaseebanya alanda pali Yehova na pa babomfi bakwe fya bufi. Lyena Yehova akafumyapo Satana kumo na bantu bakwe, lelo ifwe ‘akatubelela uluse.’
Pali ino nshita, Yehova te kuti afumyepo amafya ayo tukwata, lelo alitulaya ukutila kuti twalasekelela ilyo tulelolela. Nga fintu Esaya alandile, kuti twaba ne nsansa ilyo tulelolela ukuti ifisuma ficitike. (Esa. 30:18) Kuti twacita shani pa kuti tube ne nsansa ilyo tulelolela? Kuli ifintu 4 ifyo twingacita.
IFYO TWINGACITA PA KUTI TUBE NE NSANSA ILYO TULELOLELA
Muletontonkanya pa fisuma. Ilyo Imfumu DavidI yali no mweo yalimwene ifyabipa ifingi. (Amalu. 37:35) Na lyo line, yalembele ukuti: “Ba tondolo kuli Yehova kabili utekanye pa kumulolela. Wikalipa pa muntu onse uuletunguluka, pa muntu uulefisha amapange yakwe.” (Amalu. 37:7) Davidi alekonka ifi alembele pantu abikile amano ku fyo Yehova amulaile ukuti ali no kumupususha. Kabili aletasha sana pa fisuma fyonse ifyo Yehova alemucitila. (Amalu. 40:5) Na ifwe bene nga twalabika amano ku fisuma ifilecitika mu bumi bwesu ukucila ukubika amano ku fyabipa, cikatwangukila ukulolela ukuti Yehova akawamye ifintu.
Lyonse mulelumbanya Yehova. Cimoneka kwati Davidi e waimbile Amalumbo 71 kabili aebele Yehova ati: “Nkalalolela fye, kabili nkalundako ukumutasha.” (Amalu. 71:14) Bushe ali no kulalumbanya shani Yehova? Ali no kulaebako abantu pali Yehova kabili ali no kulaimba inyimbo sha kumulumbanya. (Amalu. 71:16, 23) Na ifwe kuti twalasekelela ilyo tulelolela Yehova nga filya fine Davidi alesekelela. Tulalumbanya Yehova ilyo tulebila imbila nsuma, ilyo tulelanshanya na bantu cila bushiku na lintu tuleimba inyimbo sha kulumbanya Yehova. Ilyo mukalaimba ulwimbo lwa Bufumu, mukaletontonkanya sana pa mashiwi yaba mu lwimbo e lyo na pa fyo yalenga mulesekelela.
Muleleka aba bwananyina balemukoselesha. Ilyo Davidi ali na mafya, aebele Yehova ati: “Nkasuubila mwi shina lyenu, pantu lisuma, ku cinso ca ba cishinka benu.” (Amalu. 52:9) Na ifwe bene aba bwananyina kuti batukoselesha nga tuleba pamo nabo. Tatufwile ukuba fye nabo ilyo tulelongana nelyo ilyo tulebila imbila nsuma, lelo tufwile ukulaba pamo nabo na lintu tuleangala fye.—Rom. 1:11, 12.
Mulekosha isubilo lyenu. Baibo pa Amalumbo 62:5 itila: “Lolela Lesa mu mutalalila, we mweo wandi, pantu isubilo lyandi lyaba kuli ena.” Calicindama sana ukuba ne subilo ilyakosa maka maka impela nga taishile pa nshita twaleyenekela ukwishilapo. Tufwile ukushininkisha ukuti ifyo Yehova atulaya fikacitika te mulandu ne nshita tufwile ukulolela. Kuti twakosha isubilo lyesu nga tuleisambilisha Icebo ca kwa Lesa. Ku ca kumwenako, tontonkanyeni pa fyo amasesemo ayo Baibo yalandapo yafikilishiwa, e lyo ne fyo ifyaba mu Baibo fishipusana. Kabili tontonkanyeni na pa fyo Baibo ilanda ukuti e fyo Yehova aba. (Amalu. 1:2, 3) Na kabili, tufwile ukutwalilila ‘ukulapepela mu mupashi wa mushilo’ pa kuti tutwalilile ukuba ifibusa fya kwa Yehova ilyo tulelolela ukuti ifyo atulaya fikacitike.—Yuda 20, 21.
Nga filya fine Davidi ashininkishe, na imwe bene muleshininkisha ukuti Yehova alamona bonse abamulolela kabili alabalanga icikuuku. (Amalu. 33:18, 22) Twalilileni ukuba abatekanya ilyo mulelolela Yehova ukupitila mu kubika amano ku fisuma, mu kumulumbanya, mu kuleka aba bwananyina balemukoselesha, e lyo na mu kukosha isubilo lyenu.
