ICIPANDE CA KUSAMBILILAMO 4
Ifyo Tusambilila ku Mulaalilo Uwayanguka pa Mfumu ya ku Muulu
“Uyu mukate cimpashanya ca mubili wandi. . . . Uyu mwangashi cimpashanya ca ‘mulopa wandi uwa cipangano.’”—MAT. 26:26-28.
ULWIMBO 16 Lumbeni Jah pa Mwana Wakwe Uwasubwa
IFYO TWALASAMBILILA *
1-2. (a) Mulandu nshi tushipapila ifi Yesu atulangile inshila iyayanguka iya kwibukishishamo imfwa yakwe? (b) Mibele nshi iyo Yesu akwata iyo twalasambililapo?
BUSHE kuti mwalondolola ificitika pa Cibukisho ca mfwa ya kwa Kristu icibako cila mwaka? Ukwabula no kutwishika fwe bengi kuti twaibukisha ificitika pa Mulaalilo wa kwa Shikulu. Mulandu nshi? Pantu ificitika fintu fyayanguka. Lelo uyu Mulaalilo walicindama nga nshi. Kanshi kuti twaipusha atuti, ‘Mulandu nshi ificitika pa Mulaalilo fyabela ifyayanguka?’
2 Ilyo Yesu alebila imbila nsuma pano isonde, abantu bamwishibe ukuti alesambilisha icine icacindama mu nshila iyayanguka ukumfwa. (Mat. 7:28, 29) Ifi fine e fyo acitile na pa kutulanga ifya kucita pa kwibukisha * imfwa yakwe. Natulande pa Mulaalilo, pa fyo Yesu alandile, e lyo na pa fyo acitile. Twalaumfwikisha ne fyo Yesu aba uwaicefya, uwashipa, ne fyo aba no kutemwa. Na kabili twalasambilila na pa fyo twingacita pa kuti tulemupashanya sana.
YESU ALIICEFYA
Umukate no mwangashi ifyo tubomfya pa Cibukisho filenga twalaibukisha ukuti Yesu alitufwilile no kuti nomba ni Mfumu ku muulu (Moneni paragrafu 3 ukushinta ku 5)
3. Ukulingana na mashiwi yaba pali Mateo 26:26-28, bushe Umulaalilo uo Yesu atendeke wayangwike shani, kabili umukate no mwangashi fyaleimininako finshi?
3 Ilyo Yesu atendeke Icibukisho ca mfwa yakwe, ali na batumwa bakwe aba cishinka 11. Abomfeshe ifyashelepo pa mutebeto wa Ca Kucilila pa kutendeka Icibukisho icayanguka. (Belengeni Mateo 26:26-28.) Abomfeshe fye umukate uushatutumuka no mwangashi ifyo akwete. Yesu aebele abatumwa bakwe ati umukate waleimininako umubili wakwe uwapwililika e lyo umwangashi waleimininako umulopa wakwe uwapwililika kabili ifi e fyo ali no kubatuulila. Abatumwa nalimo tabapapile pa fyo uyu Mulaalilo uwacindama wali uwayanguka. Cinshi bashapapile?
4. Bushe ifyo Yesu aebele Marita filenga shani twaishiba icalengele Yesu apange Umulaalilo uwayanguka?
4 Natulande pa fyacitike ilyo Yesu atandalile Lasaro, Marita, na Maria abali ifibusa fyakwe. Ilyo baleisha, Yesu atampile ukubasambilisha lelo Marita ena abikile sana amano ku kupekanishisha umweni wakwe ifya kulya. Ilyo Yesu amwene ifi, alilungike Marita cikuuku cikuuku pa kuti eshibe ukuti te lyonse alingile ukupekanya ifya kulya ifingi. (Luka 10:40-42) Pa numa, ilyo kwashele fye amaawala ayanono ukuti Yesu aituule nge lambo, alicitile ifyo asambilishe Marita. Apangile Umulaalilo uwayanguka. Bushe ifi acitile fitusambilisha finshi pali ena?
5. Bushe filya Umulaalilo uo Yesu apangile wali uwayanguka filanga ukuti Yesu ali shani kabili ifi fyalingana shani ne fyaba pa Abena Filipi 2:5-8?
5 Fyonse ifyo Yesu alelanda ne fyo alecita fyalelanga ukuti ali uwaicefya. E co tushipapila filya apangile Umulaalilo uwayanguka mu nshita ya bushiku pa bushiku alefwa. (Mat. 11:29) Alishibe ukuti ali mu kuipeela nge lambo ilyakulisha pa malambo yonse kabili alishibe no kuti Yehova ali no kumubuusha no kumulenga aba Imfumu ku muulu. Nangu alishibe ifi fyonse, taipangiile Umulaalilo uukalamba ilyo ashilafwa. Aebele abasambi bakwe ukuti cila mwaka balepanga Umulaalilo uwayanguka pa kumwibukisha. (Yoh. 13:15; 1 Kor. 11:23-25) Filya Yesu apangile Umulaalilo uwalinga lelo uwayanguka filanga ukuti tali ne cilumba. Ala twalitemwa nga nshi ifi Yesu Imfumu yesu iya ku muulu yaba iyaicefya.—Belengeni Abena Filipi 2:5-8.
6. Finshi tufwile ukucita nga twakwata amesho pa kuti tulepashanya Yesu uwaicefya?
6 Finshi tufwile ukucita pa kuti tube abaicefya nga fintu Yesu aba? Tulingile ukulabika amano ku fingawamina abanensu. (Fil. 2:3, 4) Ibukisheni ifyacitike mu nshita ya bushiku ilyo Yesu ashilafwa. Yesu alishibe ukuti ali mu kufwa kabili ali no kukalipwa sana ilyo ashilafwa; lelo abikile sana amano ku batumwa bakwe abali ne cishinka pantu bali no kuba no bulanda sana nga afwa. Kanshi alibasambilishe, alibakoseleshe, kabili alibakoseshe pa nshita iikalamba. (Yoh. 14:25-31) Filya Yesu abikile sana amano ku fyo abatumwa bakwe balekabila ukucila ukubika amano ku fyo alekabila filanga ukuti ali uwaicefya. Ifi acitile e fyo na ifwe tulingile ukulacita!
YESU ALISHIPA
7. Bushe Yesu alangile shani ukuti alishipa pa numa fye ya kutendeka Umulaalilo wa kwa Shikulu?
7 Pa numa fye ya kutendeka Umulaalilo wa kwa Shikulu, Yesu alilangile ukuti alishipa sana. Alangile shani? Alisumine ukucita ifyo Wishi alefwaya nangu ca kuti alishibe ukuti nga acita ifi bali no kumupeela umulandu wa kupontela Lesa kabili bali no kumwipailapo. (Mat. 26:65, 66; Luka 22:41, 42) Yesu alitwalilile uwa cishinka pa kuti acindike ishina lya kwa Yehova, pa kuti abantu beshibe ukuti Lesa e walinga ukuteka ku muulu na pano isonde, na pa kuti abantu abalapiila bakekale umuyayaya. Pa nshita imo ine Yesu aleyafwa abasambi bakwe pa kuti bakatwalilile aba cishinka nga bakwata amesho ku ntanshi.
8. (a) Finshi Yesu aebele abatumwa bakwe aba cishinka? (b) Ilyo Yesu afwile papita ne myaka, finshi abasambi bakwe batwalilile ukucita ifyalelanga ukuti bali abashipa?
8 Na kabili Yesu alilangile ukuti alishipa pantu taikalile fye ukuililila ubulanda lelo abikile amano ku fyo abatumwa bakwe aba cishinka balekabila. Umulaalilo uwayanguka uo atendeke pa numa ya kutamfya Yuda wali no kulenga abali no kuba abasambi bakwe abasubwa baleibukisha ukuti bakanonkelamo mu mulopa wa kwa Yesu na mu cipangano cipya. (1 Kor. 10:16, 17) Yesu alyebele abasambi bakwe ukuti ena na Wishi balefwaya abasambi bakatwalilile ukuba aba cishinka pa kuti bakateke na Yesu ku muulu. (Yoh. 15:12-15) Alibebele na mesho ayo bali no kukwata ku ntanshi. Lyena abebele ukuti balemupashanya kabili abebele ati “shipeni!” (Yoh. 16:1-4a, 33) Na lintu papitile imyaka iingi, abasambi ba kwa Yesu balitwalilile ukuipeelesha kabili balelanga ukuti bali abashipa. Baleyafwana ilyo balekwata amesho ayalekanalekana nangu ca kuti ifi balecita fyali no kulenga balecula.—Heb. 10:33, 34.
9. Kuti twacita shani pa kuti tulepashanya Yesu uwashipa?
9 Na muno nshiku mwine, tulaba abashipa nga fintu Yesu aba. Ku ca kumwenako, tulingile ukuba abashipa pa kuti twafwilishe aba bwananyina abo bakaka pa mulandu ne fyo basuminamo. Limo aba bwananyina kuti babakakila pa milandu iyo bashacitile no kucita. Ifya musango uyu nga fyacitika, tufwile ukubafwa apapela amaka yesu, ukubikako fye no kubalandilako. (Fil. 1:14; Heb. 13:19) Na cimbi ico twingacita pa kulanga ukuti twalishipa kutwalilila ukubila imbila nsuma “ukwabula umwenso.” (Imil. 14:3) Tulatwalilila ukubila pa Bufumu nangu abantu bengatusuusha na lintu baletucusha. Ifi fine e fyo Yesu alecita. Nomba limo kuti twafilwa ukuba abashipa. Finshi tulingile ukucita nga caba ifi?
10. Ilyo kwashala imilungu pa kuti kube Icibukisho, finshi tulingile ukulacita, kabili mulandu nshi?
10 Kuti twaba abashipa nga tuletontonkanya pe subilo twakwata pa mulandu wa cilubula ca kwa Kristu. (Yoh. 3:16; Efes. 1:7) Ilyo kwashala imilungu pa kuti kube Icibukisho, tulakwata inshita iisuma iya kulanga ukuti tulatasha sana pa cilubula. Muli iyi milungu, tulebelenga Amalembo ya mu nshiku sha Cibukisho kabili tuletontonkanya sana pa fyacitike ilyo Yesu ali mu kufwa. Lyena nga twalongana Umulaalilo wa kwa Shikulu, tukomfwikisha ifyo ifimpashanya fya Cibukisho fyacindama e lyo ne fyo fimininako. Nga twaumfwikisha ifyo Yesu na Yehova batucitila ne fyo tunonkelamo pamo na abo twatemwa, isubilo lyesu lilakoselako, kabili tulaba abashipa pa kuti tushipikishe mpaka na ku mpela.—Heb. 12:3.
11-12. Finshi twasambilila ukufika pano?
11 Ukufika pano, natusambilila ukuti Umulaalilo wa kwa Shikulu ulenga tuleibukisha ico icilubula cacindamina. Natusambilila na pa mibele iisuma nga nshi iyo Yesu akwata, e kutila ukuicefya no kushipa. Ala tulatasha sana pali ifi Yesu Shimapepo wesu Umukalamba uutupapaatilako atwalilila ukuba ne yi mibele! (Heb. 7:24, 25) Tulingile ukulasangwa ku kulongana pa bushiku bwa kwibukisha imfwa ya kwa Yesu nga fintu atwebele pa kuti tulelanga ukuti tulatasha ukufuma pa nshi ya mutima. (Luka 22:19, 20) Twibukisha imfwa yakwe apo ubushiku bwa Nisani 14 bukumanina ukulingana na kalenda balekonka kale. Ubu e bushiku bwacindamisha mu mwaka.
12 Filya Yesu apangile Umulaalilo wa kwa Shikulu uwayanguka filatusambilisha pa mibele na imbi iyalengele atufwile. Ilyo ali pano isonde, abantu bamwishibe ukuti alikwete iyi mibele. Mibele nshi akwete?
YESU ALITUTEMWA
13. Bushe ifyaba pali Yohane 15:9 na pali 1 Yohane 4:8-10 filanga shani ifyo Yehova na Yesu baba no kutemwa, kabili ni bani banonkelamo muli uku kutemwa?
13 Yesu alepashanya sana Yehova uwatutemwa muli fyonse ifyo alecita. (Belengeni Yohane 15:9; 1 Yohane 4:8-10.) Ne cacindamisha ca kuti ukutemwa atutemwa kwalengele atufwile. Nampo nga twalisubwa nelyo nga tuli ba mu “mpaanga shimbi,” bonse fye tulanonkelamo mu mfwa ya kwa Yesu kabili ilanga ifyo ena na Yehova batutemwa. (Yoh. 10:16; 1 Yoh. 2:2) Tontonkanyeni na pa fyo tubomfya pa Mulaalilo. Ifi filanga ukuti Yesu alitemenwe abasambi bakwe kabili alebalangulukilako. Cinshi twalandila ifi?
Pa mulandu wa kuti Yesu alitutemwa, apangile Icibukisho icayanguka ico abasambi bakwe bakwata ukutula mu nshita ya batumwa ukushinta na lelo konse uko bengaba (Moneni paragrafu 14 ukushinta ku 16) *
14. Finshi filanga ukuti Yesu alitemenwe abasambi bakwe?
14 Filya Yesu apangile Umulaalilo uwayanguka alangile ukuti alitemenwe abasambi bakwe abasubwa. Mu kupita kwa nshita abasambi bakwe abasubwa bali no kulakwata Umulaalilo cila mwaka, kabili ifintu fyali no kwafya ica kuti bamo bali no kulakwatila mu fifungo. (Ukus. 2:10) Bushe balecita ifyo Yesu abebele? Ee, balecita!
15-16. Bushe Abena Kristu bamo bakwanisha shani ukukwata Umulaalilo wa kwa Shikulu na lintu ifintu fyafishe?
15 Ukushinta na lelo Abena Kristu ba cine balabombesha pa kuti baleibukisha imfwa ya kwa Yesu. Bakonka filya fine Yesu acitile ilyo atendeke Umulaalilo wa kwa Shikulu nangu ifintu fyafye shani uko bali. Moneni ifya kumwenako fyakonkapo. Ilyo munyinefwe Harold King bamukakile mu cifungo ca ku China, alingile ukucitapo fimo pa kuti akwate Icibukisho. Abomfeshe ifyo akwete pa kupekanya ifimpashanya fya kubomfya pa Cibukisho mu bumfisolo. Na kabili alipendele bwino inshiku pa kuti eshibe ubushiku alingile ukukwatilapo Icibukisho. Ilyo ubushiku bwa kukwata Icibukisho bwafikile, alimbile inyimbo, alipepele, kabili alilandile ne lyashi lya Cibukisho ninshi ali fye eka mu muputule umo balemusungila.
16 Natulande pa ca kumwenako calenga bubili. Ibumba lya bankashi abo balesungila mu nkambi ya kucushishamo abantu ilyo kwali Inkondo ya Calo iya Cibili, baliibikile mu kapoosa mweo pa kuti fye bakwate Umulaalilo wa kwa Shikulu. Lelo pa mulandu wa kuti ifya kubomfya pa Cibukisho fyalyanguka, balikwete Icibukisho mu bumfisolo. Batile: “Twaliminine natushinguluka akalitebulo ako twayanshikepo insalu yabuuta apo twabikile ifimpashanya. Mu muputule twali, twayashishe fye kandulo. Twaletiina ukwasha amalaiti pantu nga balishibe ifyo twalecita. . . . Ifi fyalengele twafikilisha ifyo twalaile Yehova ukuti tukalabomfya amaka yesu yonse ku kucindika ishina lyakwe ilya mushilo.” Ala ifi bacitile fyalangile ukuti bali ne citetekelo icakosa! Na kabili filya Yesu abomfeshe ifimpashanya ifyayanguka pa kuti ciletwangukila ukulakwata Icibukisho na lintu ifintu fyafishe, filanga ukuti alitutemwa nga nshi!
17. Fipusho nshi twingayipusha?
17 Ilyo Icibukisho cilepalama, kuti cawama twalayipusha aya amepusho: ‘Kuti napashanya shani Yesu ilyo ndelanga ukutemwa? Bushe mbika sana amano ku fyo ndefwaya ukucila ukubika amano ku fyo aba bwananyina balefwaya? Bushe mfwaya aba bwananyina balencitila ifyo bashingaba na maka ya kuncitila nelyo nalishiba apo bengapela?’ Natulepashanya Yesu lyonse kabili ‘tulelangulukilana.’—1 Pet. 3:8.
LYONSE MULEIBUKISHA IFI MWASAMBILILA
18-19. (a) Cinshi ico abantu ba kwa Lesa bakalaibukisha? (b) Finshi mulefwaisha ukulacita?
18 Ifunde lya kulakwata Icibukisho ca mfwa ya kwa Kristu talyakatwalilile. Ilyo Yesu ‘akesa’ mu bucushi bukalamba, akalonganya “abasalwa bakwe” bonse abashalapo no kuya mu kuteka nabo ku muulu. Ifi nga fyacitika tukaleka ukukwata Icibukisho.—1 Kor. 11:26; Mat. 24:31.
19 Na lintu tukaleka ukukwata Icibukisho, te kuti tutwishike ukuti abantu ba kwa Yehova bakalaibukisha Umulaalilo uwayanguka uo Yesu alangilemo ukuti aliicefya, alishipa, kabili alitemwa abantu. Abalesangwa ku Mulaalilo wa kwa Shikulu bakalashimikilako abantu abakaba aba mweo pali ilya nshita pa kuti nabo bakawishibe. Lelo pa kuti na ifwe tulenonkelamo mu Mulaalilo wa kwa Shikulu na pali ino ine nshita, tulingile ukuba abaicefya, abashipa, kabili tufwile ukuba no kutemwa nga fintu Yesu ali. Nga tulecita ifi, ukwabula no kutwishika Yehova akatulambula.—2 Pet. 1:10, 11.
ULWIMBO 13 Tupashanya Kristu
^ para. 5 Tuli no kukwata Umulaalilo wa kwa Shikulu pa kuti tukebukishe imfwa ya kwa Yesu Kristu. Kuli uyu Mulaalilo uwayanguka tulasambililako ifingi pa mibele imo iyo Yesu akwata, e kutila ukuicefya, ukushipa, no kutemwa. Muli cino cipande twalasambilila ifyo twingacita pa kuti tulemupashanya.
^ para. 2 UBULONDOLOSHI: Ishiwi lya kuti ukwibukisha lipilibula ukucitapo fimo ifyaibela pa kulanga ukuti tamwalaba icintu cimo icacitike nelyo pa kulanga ukuti mwalicindika umuntu umo kabili tamwamulaba.
^ para. 56 UBULONDOLOSHI BWA FIKOPE: Ifikope filelanga aba bwananyina aba cishinka balekwata Icibukisho mu nshita ya batumwa; ku kupwa kwa ba 1800; mu nkambi ya baNazi iya kucushishamo abantu; na muno nshiku mu Ng’anda ya Bufumu iya mu calo cimo ica ku South America.
