1-2. (a) Yehova omfwa shani nga amona abantu abengi nga nshi basangwa ku Mulaalilo wa kwa Shikulu? (Moneni icikope pa nkupo.) (b) Finshi twalasambilila muli cino cipande?

ELENGANYENI ifyo Yehova omfwa nga amona abantu abengi nga nshi nabalongana pa kuti basefye Umulaalilo wa kwa Shikulu. Yehova tamona fye ibumba ililongene, lelo alamona na cila muntu uulongene. Ku ca kumwenako, alamona bonse aba cishinka abalongana cila mwaka. Bamo pali aba nalimo balabacusha sana. Bambi tabesa mu kulongana lyonse lelo bamona ukuti Icibukisho calicindama nga nshi, kanshi balingile fye ukusangwako. Na kabili Yehova alamona na basangwa ku Cibukisho pa muku wa kubalilapo nalimo pa mulandu wa kuti balefwaya fye ukumona ificitika pali uku kulongana.

² Ukwabula no kutwishika, Yehova alatemwa sana nga amona abantu abengi basangwa ku Cibukisho. (Luka 22:19) Nomba ico Yehova abikako sana amano mulandu abantu balonganina, te mpendwa ya bantu abalongana. Muli cino cipande twalayasuka icipusho icacindama sana ica kuti: Mulandu nshi tusangilwa ku Cibukisho e lyo na ku kulongana kumbi ukubako cila mulungu uko Yehova apekanishisha abantu abamutemwa?

3-4. (a) Mulandu nshi tulonganina? (b) Nga tulaya mu kulongana, ninshi twaba shani? (c) Ukulingana ne fyaba pali 1 Abena Korinti 11:23-26, cinshi tushilingile ukupushilwa ku Cibukisho?

³ Icikalamba icilenga tulelongana ni co ukulongana nako kupepa Lesa. Cimbi icilenga ni co nga tulelongana Yehova alatusambilisha. Abantu aba cilumba tabafwaya ukubasambilisha nangu fimo. (3 Yoh. 9) Lelo ifwe tulafwaisha Yehova aletusambilisha kabili tulasambilila ne fyo icilonganino cakwe cipekanya.—Esa. 30:20; Yoh. 6:45.

 ⁴ Nga tulaya ku kulongana ninshi twaliicefya kabili ninshi tufwaya Yehova aletusambilisha. Ico tusangilwa ku Cibukisho icungulo bushiku te pa mulandu wa kutila e fyo tulingile fye ukucita, lelo ni co tulakonka ifunde ilyo Yesu atupeela ilya kuti: “Mulecita ici ku kunjibukisha.” (Belengeni 1 Abena Korinti 11:23-26.) Ukusangwa ku Cibukisho kulalenga isubilo lyesu lyakoselako kabili kulenga twalaibukisha ukuti Yehova alitutemwa nga nshi. Nomba Yehova alishiba ukuti tulakabila ukutukoselesha no kutukosha cila nshita, te pa Cibukisho fye peka. E ico alitupekanishisha ukulongana cila mulungu kabili alatukoselesha ukuti tulesangwako. Ukuicefya e kulenga tulelongana. Cila mulungu tulapoosa amaawala ayengi pa kuti tuipekanye ukuya mu kulongana na pa kuti tupekanye ifyo tukasambilila.

5. Mulandu nshi abaicefya beshila ku Cibukisho Yehova nga abeta?

⁵ Cila mwaka Yehova aleta abantu ku kulongana pa kuti abasambilishe kabili abengi abaicefya balesa. (Esa. 50:4) Balatemwa nga basangwa ku Cibukisho kabili balatendeka ukusangwa na ku kulongana kumbi uko tukwata. (Seka. 8:20-23) Abapya abesa e lyo na ifwe bonse tulatemwa sana Yehova “kaafwa [wesu] kabili uwa kutupususha” nga aletusambilisha kabili nga aletutungulula. (Amalu. 40:17) Bushe kwena kwaliba icawamisha nelyo icacindamisha ukucila pa kulaya ku kulongana pa kuti Yehova no Mwana uo atemwa nga nshi baletusambilisha?—Mat. 17:5; 18:20; 28:20.

6. Finshi umwaume umo acitile pa mulandu wa kuti ali uwaicefya?

⁶ Cila mwaka tulabombesha pa kuti twite abantu abengi bese basangwe ku Cibukisho. Abantu abengi abaicefya abesa nga twabeta balanonkelamo. Natulande pali bamo. Ku numa sana, umwaume umo balimupeele akapepala ka kwitilapo abantu ku Cibukisho, lelo aebele munyinefwe uwamupeele ukuti takakwanishe ukuyako. Nomba icungulo bushiku pa bushiku bwa Cibukisho, munyinefwe alipapile sana ilyo amwene ulya mwaume aleingila mu Ng’anda ya Bufumu. Uyu mwaume alitemenwe sana ifyo bamupokelele ica kuti alitendeke ukusangwa ku kulongana uko tukwata cila mulungu. Na kuba, apushilwe fye imiku itatu ku kulongana mu mwaka onse. Cinshi calengele ese ku Cibukisho kabili atendeke no kulaisa mu kulongana konse uko tukwata? Ni co ali uwaicefya. Pa numa munyinefwe uwamwitile alandile ati, “Uyu mwaume aliicefya sana.” Ukwabula no kutwishika Yehova e wakulile ulya mwaume kabili ino nshita ni munyinefwe uwabatishiwa.—2 Sam. 22:28; Yoh. 6:44.

7. Bushe ifyo tusambilila ilyo tulelongana ne fyo tubelenga mu Baibolo kuti fyalenga shani twaba abaicefya?

⁷ Ifyo tusambilila ilyo tulelongana ne fyo tubelenga mu Baibolo kuti fyalenga twaba abaicefya. Ilyo kwashala imilungu iinono ukuti kube Icibukisho, ifingi ifyo tusambilila ilyo tulelongana filanda sana pali Yesu na pa fyo alangile ukuti aliicefya ilyo atufwilile. Na lintu kwashala inshiku ishinono ukuti kube Icibukisho, balatukoselesha ukulabelenga amalyashi ya mu Baibolo ayalanda pa fyacitike ilyo Yesu ashilafwa na yalanda pa kubuushiwa kwakwe. Ifyo tusambilila ilyo tulelongana ne fyo tubelenga mu Baibolo filenga twalatasha sana pa fyo Yesu atufwilile. Ifi filenga twaicefya nga fintu aba, kabili filenga twalacita ukufwaya kwa kwa Yehova na lintu ifintu fyafishe.—Luka 22:41, 42.

8. Finshi Yesu acitile ifilanga ukuti alishipa?

⁸ Na kabili tulaba abashipa nga fintu Yesu aba. Tontonkanyeni pa fyo alangile ukuti alishipa ilyo kwashele inshiku ishinono ukuti  afwe. Alishibe bwino ukuti abalwani bakwe bali no kumuseebanya, bali no kumupuma, kabili bali no kumwipaya. (Mat. 20:17-19) Lelo tatiinine ukumwipaya. Ilyo inshita ya kuti afwe yafikile, aebele abatumwa bakwe aba cishinka abo ali nabo mwi bala lya Getsemane ati: “Imeni, tuleyeni. Moneni! Uulemfutuka apalama.” (Mat. 26:36, 46) Na lintu ibumba lya balwani abali ne fyanso baile mu kumwikata, aile ku balwani no kubeba ukuti e wali Yesu, kabili aebele abashilika ukuti baleke abatumwa bakwe baye. (Yoh. 18:3-8) Ala Yesu alilangile ukuti alishipa! Muno nshiku Abena Kristu abasubwa na ba mu mpaanga shimbi balishipa nga fintu Yesu aba. Cinshi twalandila ifi?

9. (a) Mulandu nshi nalimo tulingile ukubela abashipa pa kuti tulelongana lyonse? (b) Bushe aba bwananyina abo bakaka mu fifungo kuti baumfwa shani nga twatwalilila ukuba abashipa na lintu tuli na mesho?

⁹ Apo tulakwata amafya tulingile ukuba abashipa pa kuti tulelongana lyonse. Aba bwananyina bamo balesa mu kulongana nangu ca kuti baleloosha, nabafuupuka, nelyo nabalwala. Bambi nabo balaba abashipa pa kuti balongane na lintu balebacusha sana kuli balupwa lwabo nelyo abalashi ba buteko. Tontonkanyeni pa fyo ciba ku ba bwananyina abo bakaka pa mulandu wa fyo basuminamo. (Heb. 13:3) Nga baumfwa ukuti tulatwalilila ukubombela Yehova nangu tuli na mesho, icitetekelo cabo cilakoselako, balashipa, kabili balatwalilila ukuba aba cishinka. Ifi twalandapo e fyo cali na ku mutumwa Paulo. Ilyo Paulo ali mu cifungo mu Roma, alesekelela nga aumfwa ukuti aba bwananyina balitwalilile ukubombela Lesa ne cishinka. (Fil. 1:3-5, 12-14) Ilyo Paulo bashilamufumya mu cifungo nelyo pa numa fye ya kumufumya mu cifungo, alembeele AbaHebere kalata. Muli iyi kalata akoseleshe Abena Kristu ba cishinka ‘ukutwalilila ukutemwa aba bwananyina’ kabili abakoseleshe ukulalongana.—Heb. 10:24, 25; 13:1.

10-11. (a) Ni bani tulingile ukwita ku Cibukisho? (b) Finshi fyaba pa Abena Efese 1:7 ifilenga tuleita abantu ku Cibukisho?

¹⁰ Nga tuleita balupwa lwesu, abo tubomba nabo, na bena mupalamano besu ku Cibukisho, ninshi twalishipa. Mulandu nshi tubetila ukwisasangwa ku Cibukisho? Tulatasha sana pa fyo Yehova na Yesu batucitila ica kuti tulafwaisha ukwita abantu ukwisasangwa ku Cibukisho. Tufwaya basambilila icine pa kuti nabo balenonkelamo mu “cikuuku” ca kwa Yehova pa kutupeela icilubula.—Belengeni Abena Efese 1:7; Ukus. 22:17.

¹¹ Na kabili nga twaba abashipa twaya na mu kulongana ninshi tulelanga ukuti twalikwata imibele na imbi iyo Lesa no Mwana wakwe balanga sana mu nshila ishalekanalekana.

12. (a) Bushe ifyo tusambilila ilyo tulelongana filenga shani twatemenwako Yehova na Yesu? (b) Bushe ilembo lya 2 Abena Korinti 5:14, 15 litweba ukulacita finshi pa kuti tulepashanya Yesu?

¹² Icilenga tulelongana ni co twalitemwa Yehova na Yesu. Ifyo tusambilila ilyo tulelongana,  filenga tuletemenwako Yehova no Mwana wakwe. Nga tulelongana, lyonse tulasambilila ifilenga twalaibukisha ifyo Yehova na Yesu batucitila. (Rom. 5:8) Icibukisho maka maka cilenga twalaibukisha ukuti Yehova na Yesu balitemwa abantu nga nshi, ukubikako fye na bashaishiba ifyo icilubula cacindama. Apo tulatasha sana pa cilubula, tulaibikilishako ukupashanya Yesu muli fyonse ifyo tucita cila bushiku. (Belengeni 2 Abena Korinti 5:14, 15.) Na kabili tulafwaya sana ukulumbanya Yehova pa kutupeela icilubula. Cimo ico twingacita pa kumulumbanya, kulaasukapo no mweo onse ilyo tulelongana.

13. Finshi tufwile ukulacita nga twalitemwa sana Yehova no Mwana wakwe? Londololeni.

¹³ Nga tuleipeelesha pa kuti tubombele Yehova na Yesu ninshi twalibatemwa nga nshi. Ilingi line tulaipeelesha pa kuti tulelongana. Mu filonganino ifingi balongana ukulongana kwa mu kati ka mulungu icungulo. Aba bwananyina baya mu kulongana ninshi nabanaka pantu balongana pa numa ya kwinuka ku ncito. Na kabili balaya mu kulongana na kumbi pa mpela ya mulungu ilyo abantu abengi batuusha. Bushe Yehova alamona filya tuya mu kulongana nangu ca kuti natunaka? Ukwabula no kutwishika, alamona! Na kuba, nga tuleibikilishako pa kuti tuleya mu kulongana ninshi tulelanga ukuti twalitemwa Yehova nga nshi, kabili alatasha sana pa fyo twamutemwa.—Marko 12:41-44.

14. Bushe Yesu alangile shani ukuti aleipeelesha pa mulandu wa kuti alitemenwe abantu?

¹⁴ Yesu aleipeelesha sana, kabili na ifwe tufwile ukulamupashanya. Aliitemenwe ukufwila abasambi bakwe, kabili fyonse ifyo alecita cila bushiku fyalelanga ukuti alibikile sana amano ku fingawamina abasambi bakwe te ku fingamuwamina fye. Ku ca kumwenako, alilanshenye na basambi bakwe na lintu anakile sana nelyo ilyo asakamene sana. (Luka 22:39-46) Na kabili Yesu abikile sana amano ku fyo engacitila abantu te ku fyo abantu bengamucitila. (Mat. 20:28) Nga twalitemwa sana Yehova na ba bwananyina, tukalaibikilishako pa kuti tulesangwa ku Mulaalilo wa kwa Shikulu na ku kulongana konse uko tukwata.

15. Ni bani abo tufwaya ukwafwa sana?

 ¹⁵ Twaba mu cilonganino umwaba Abena Kristu ba cine, kabili tulatemwa ukupoosa inshita iikalamba ku kwita abantu na bambi ku kulongana. Nomba abo tufwaya ukwafwa sana bantu “batetekela banensu” lelo abaleka ukulongana no kubila imbila nsuma. (Gal. 6:10) Nga tulebakoselesha ukwisa ku kulongana, maka maka ku Cibukisho ninshi twalibatemwa. Nga filya fine Yehova na Yesu basekelela, e fyo na ifwe tusekelela sana nga twamona aba bwananyina abaleka ukulongana no kubila imbila nsuma babwelela kuli Yehova Shifwe wa ku muulu kabili Kacema wesu.—Mat. 18:14.

16. (a) Finshi tulingile ukulacita pa kuti tulekoseleshanya, kabili tukaba shani nga tulelongana? (b) Mulandu nshi ino yabela ni nshita iisuma iya kulaibukisha ifyo Yesu alandile pali Yohane 3:16?

¹⁶ Mu milungu iileisa, mukabombeshe pa kuti mukete abantu abengi ku Cibukisho icikabako pali Cisano icungulo bushiku pa 19 April, 2019. (Moneni akabokoshi akaleti “ Bushe Mukabeta?”) Muli uno mwaka onse, lyonse tuleibikilishako pa kuti tulesangwa ku kulongana konse uko Yehova atupekanishisha pa kuti tulekoseleshanya. Apo cino calo cili mu kupwa, tufwile ukulalongana pa kuti tutwalilile ukuba abaicefya, abashipa, na pa kuti tuleba no kutemwa. (1 Tes. 5:8-11) Kanshi natulelanga ifyo tumfwa pa fyo Yehova no Mwana wakwe batutemwa nga nshi!—Belengeni Yohane 3:16.