IFYO TWINGACITA PA KULEKA UKUBA NO LUPATO
1 | Mwilaba Na Kapaatulula
Ifyo Baibolo Ilanda:
“Lesa taba na kapaatulula, lelo umuntu uwa mu luko lonse uutiina Lesa no kucita icalungama alapokelelwa kuli ena.”—IMILIMO 10:34, 35.
Umo aya Mashiwi Yalola:
Yehova * Lesa tatupingula ukulingana ne calo twafumako, umushobo wesu, ifyo inkanda yesu imoneka nelyo intambi tukonka. Lelo ico abikako sana amano fintu tutontonkanya ne fyo tufwaisha. Pantu na kuba, “umuntunse amona fye ifimoneka ku menso; lelo Yehova ena, amona mu mutima.”—1 Samwele 16:7.
Ifyo Mwingacita:
Nangu ca kuti ifwe tatwakwata amaka ya kumona abantu mu mitima, kuti tulepashanya Lesa nga ca kuti tatuleba na kapaatulula. Mwilapingula umuntu pa mulandu ne fyo mwaishiba incende afumako nelyo ulupwa akulilamo, lelo mulebika amano ku fyo aba. Nga mwamona ukuti mwalipata abantu bamo nalimo abafuma ku calo cimbi, mulepepa kuli Lesa ukuti alemwafwa ukuleka ukuba no lupato. (Amalumbo 139:23, 24) Nga mwapepa kuli Yehova ukufuma pa nshi ya mutima ukuti amwafwe ukuleka ukuba no lupato, mwilatwishika no kutwishika ukuti akaasuka amapepo yenu.—1 Petro 3:12.
^ para. 6 Yehova e shina lya kwa Lesa.—Amalumbo 83:18.
“Nshatalile njikalapo mu mutende na basungu . . . Nomba nalishininkisha ukuti naba mu lupwa ulwa mwi sonde lyonse umwaba abantu abatemwana ukufuma pa nshi ya mutima.”—E FYALANDILE BA TITUS
