Abantu mwi Sonde Lyonse Balalwala Amalwele ya Matontonkanyo
“Ilingi line nangu ndi fye neka mu muputule ndasakamikwa sana.”
“Inshita shimo nga ndeumfwa ukuti ndi bwino sana ndasakamikwa. Ndeshiba ukuti nga naumfwa bwino sana ninshi tapakokole nalaumfwa ‘ubulanda.’”
“Ndesha na maka ukubika fye amano ku filecitika pali ubo bwine bushiku, lelo inshita shimo ndapapa fye ukuti natendeka ukusakamikwa pa fintu fimbi.”
Bushe naimwe mwalyumfwapo ukuti ifi filacitika ku balwala amalwele ya matontonkanyo? Bushe mwalikwatapo ubu ubwafya nelyo umuntu umbi uo mwaishiba alikwatapo ubu bwafya?
Mukwai mwisakamana pantu tamwaba mweka. Abantu abengi shino nshiku balilwala amalwele ya matontonkanyo.
Tatutwishika no kutwishika ukuti twikala mu nshiku shakulekelesha “ishayafya nga nshi” umucitika ifintu ifilenga abantu abengi balesakamikwa. (2 Timote 3:1) Ilyo bafwailishe basangile ukuti pa bantu 8 ninshi umuntu umo alilwala amalwele ya matontonkanyo. Mu 2020 ilyo kwali icikuko ca COVID-19, casangilwe ukuti impendwa ya bantu abalwele amalwele ya masakamika e lyo nabo basangile na malwele ya matontonkanyo yalikuliileko ukucila ifyo cali mu 2019.
Calicindama ukwishiba impendwa ya bantu abalelwala amalwele ya matontonkanyo, lelo calicilapo ukucindama ukwishiba ifyo imwe na balupwa lwenu muleikala.
Bushe amalwele ya matontonkanyo cinshi?
Umuntu nga talwele amalwele ya matontonkanyo alaba bwino kabili alabomba fye bwino ne milimo. Alakumanisha ukushipikisha amafya, alacita bwino ifintu kabili alaba ne nsansa.
Ubulwele bwa matontonkanyo . . .
-
Icilenga umuntu ukulwala amalwele ya matontonkanyo TE KUILEKELESHA.
-
UBU BULWELE ubulenga umuntu alasakamikwa sana, alafilwa ukutontonkanya bwino, alakalipa sana kabili alafilwa no kucita bwino ifintu fimo.
-
Ubu bulwele bulalenga umuntu alafilwa ukumfwana bwino na banankwe, kabili bulalenga alafilwa ukushipikisha amafya alekwata cila bushiku.
-
Umuntu fye uuli onse kuti alwala ubu bulwele te mulandu ne ntambi akonka, umushinku, umushobo, umutundu, uko apepa, nampo nga alisambilila nelyo iyo kabili nampo nga wa ndalama nelyo mupiina.
Ifyo mwingacita nga mwalilwala amalwele ya matontonkanyo
Nga ca kuti ifyo muli pali ino nshita te fyo mwaba mu cifyalilwa, nga mwa-aluka mu fyo mulaala nelyo mu miliile, mwatampa ukumfwa sana ubulanda pa nshita iitali, mulesakamikwa sana, mulekalipa sana, nampo nga nimwe nelyo bantu bambi abo mwatemwa e baleumfwa ifyo, mukwai ninshi mulingile ukwishiba icilelenga muleumfwa ifyo. Nomba kuti mwacita shani?
Umuntu wa mano uwaliko pe sonde Yesu Kristu atile: “Abatuntulu tabakabila kondapa, kano abalwele.” (Mateo 9:12) Nga ca kuti namulwala e lyo mwayamona bwangu badokota kabili bamupeela umuti, kuti mwatendeka ukumfwako bwino kabili ici kuti calenga mwalabako ne nsansa. Te kuti cibe bwino ukukokola ukuyamona badokota nga ca kuti tamuleumfwa bwino pa nshita iitali. a
Nangu ca kuti Baibolo te citabo cifunda pa fya bumi, ifyo ilanda kuti fyamwafwa nga ca kuti mwalilwala amalwele ya matontonkanyo. Mukwai belengeni ifipande fyakonkapo pa kuti mumone ifyo Baibolo ingamwafwa nga ca kuti mwalilwala amalwele ya matontonkanyo.
a Magazini ya Ulupungu lwa kwa Kalinda tayeba abantu inshila balingile ukundapilwamo. Umwina Kristu umwine e ulingile ukusalapo inshila ya kundapilwamo iileumfwana ne fyo Baibolo ilanda.
Nalimo Kuti Mwatemwako ne fi
AMASUKO KU MEPUSHO YA MU BAIBOLO
Bushe Baibolo Kuti Yangafwa nga Nalilwala Amasakamika?
Kwaliba ifintu fitatu ifyo Lesa afwilamo abalwala amasakamika.
AMASAMBILISHO YA MU BAIBO AYACINDAMA
Mulandu Nshi Lesa Asuminishisha Ukucula?
Abantu abengi balepusha ico mu calo mwafulila ulupato no kucula. Mu Baibolo mwaliba amasuko kuli aya mepusho.
MULELOLA!
Imisepela Abengi Balelwala Sana Amalwele ya Matontonkanyo—Finshi Baibo Yalandapo?
Baibo yalilanda ifingafwa imisepela abalwala amalwele yamatontonkanya.
PA NTE SHA KWA YEHOVA
Lombeni Ukumutandalila
Lanshanyeni icipusho ca mu Baibolo, nelyo ishibilenipo na fimbi pa Nte sha kwa Yehova.
