BA LUZIA BALILEMANA UKUULU KWA KU KUSO. Ilyo bali abaice, balilwele ubulebe (Polio). Ubu ubulwele bulambukila kabili bulalenga bongobongo ya muntu ukufilwa ukulatungulula bwino imicincili. Ilyo ba Luzia bali ne myaka 16, abanakashi abo balebombako babebele ukuti, “Lesa e walengele ukuti ulwale ubu ubulwele pa kukukanda pantu tawaleumfwila banoko kabili tawalebacindika.” Nangu ca kuti palipita inshita, ba Luzia bacili balebukisha ifyo baumfwile ububi pa fyo babebele.

ILYO BA DAMARIS BAISHIBE UKUTI NABALWALA KANSA YA KULI BONGOBONGO, bawishi babepwishe ukuti: “Finshi wacita pa kuti ulwale ubu bulwele? Nalimo paliba ifyabipa ifyo wacita, e mulandu wine Lesa alekukandila.” Ba Damaris balyumfwile ububi sana pa fyo abafyashi babo balandile.

Ukufuma fye na kale, abantu abengi baishiba ukuti Lesa e ulenga abantu ukulwala pa kuti alebakanda. Icitabo citila Manners and Customs of Bible Lands cilanda ukuti ilyo Kristu ali pano calo, abantu abengi baishibe ukuti “imembu sha muntu nelyo isha balupwa wakwe e shilenga ukuti alwale, kabili iyi e nshila ya kukandilamo umuntu.” Icitabo citila Medieval Medicine and the Plague na co cilanda ukuti, abantu bamo abaliko mu myaka ya ba 500 ukushinta kuli ba 1500 “baishibe ukutila Lesa e walengele balecula pa kuti alebakanda pa membu shabo.” Bushe ilyo abantu abengi bafwile ku cikuko caliko mu Europe muli ba 1300, ni Lesa e wabapingwile pa fyabipa ifyo balecita? Nelyo bushe tushiishi fye e twalengele ukuti balelwala no kufwa nga fintu abafwailisha pa bumi balanda? Abantu bamo kuti baipusha ukuti, bushe ca cine Lesa alalenga abantu ukulwala pa kuti abakande pa membu shabo? *

TONTONKANYENI PALI ICI: Nga ca kuti Lesa e ulenga abantu ukulwala no kucula pa kuti abakande, Yesu nga taleposha abalwele. Na kabili, nga ca kuti abantu abo Yesu aleposha ni Lesa walebakanda, nga calemoneka kwati Yesu alesuusha ifyo Lesa apingwile. (Mateo 4:23, 24) Nomba Yesu te kuti asuushe ifyo wishi acitile. Atile: “Lyonse ncita ifya kumusekesha,” kabili alandile no kuti, “filya fine na Tata ampeela ifunde, e fyo na ine ndecita.”—Yohane 8:29; 14:31.

Baibolo taipita na mu mbali, lelo ilanda ukuti Yehova Lesa wa “mulinganya” kabili tafyenga abantu. (Amalango 32:4) Ku ca kumwenako, Lesa te kuti alenge indeke ukupona no kwipaya abantu abengi abakaele pa mulandu fye wa kufwaya ukukanda umuntu umo uuninine mu ndeke! Ifyalandile Abrahamu, umubomfi wa kwa Lesa uwa cishinka, fyalangile ukuti Lesa wa mulinganya. Atile Lesa te kuti ‘onaule umulungami kumo no mubifi.’ Alandile no kuti ‘te kuti acite ica musango uyu.’ (Ukutendeka 18:23, 25) Baibolo ilanda no kuti “Lesa tacita ifyabipa” kabili “te kuti afyenge umuntu nakalya.”—Yobo 34:10-12.

Nga tulecula te kuti ninshi Lesa aletukanda pa lubembu ulo twacitile. Yesu alilandile pali ici cishinka ilyo akumenye umuntu uwafyelwe impofu ninshi ali na basambi bakwe. “Abasambi bakwe bamwipwishe abati: ‘Mwe Kasambilisha, nani abembwike pa kuti uyu muntu afyalwe impofu, bushe ni uyu wine muntu nelyo bafyashi bakwe?’ Yesu ayaswike ati: ‘Uyu muntu tabembwike na bafyashi bakwe bene tababembwike, lelo ni pa kuti imilimo ya kwa Lesa imonekele muli ena.’”—Yohane 9:1-3.

Apo abengi balemona kwati umuntu nga alecula ninshi Lesa alemukanda pa lubembu acitile nelyo ulubembu lwa bafyashi bakwe, abasambi ba kwa Yesu nalimo balipapile ilyo abebele ati ulya muntu tabembwike kabili na bafyashi bakwe nabo tababembwike.  Ilyo Yesu aposeshe ulya muntu, alilengele abantu baishiba ukuti Lesa te ulenga abantu balecula pa kuti abakande. (Yohane 9:6, 7) Pali ino nshita, abantu abalwala amalwele yabipisha kuti basansamushiwa nga baishiba ukuti Lesa te ulenga ukuti balecula.

Ifyo Baibolo ilanda

• “Takuli uwingatunka Lesa ukucita ifyabipa, kabili umwine tatunka umuntu iyo.” (YAKOBO 1:13) Nomba line fye Lesa ali no kufumyapo “ifyabipa” pamo ngo kulwala, ukukalipwa ne mfwa.

• Yesu Kristu ‘alyundepe bonse abalwele.’ (MATEO 8:16) Ilyo Umwana wa kwa Lesa aundepe bonse abaleisa kuli ena, alilangile ifyo Ubufumu bwa kwa Lesa bukacitila abantu bonse.

• “[Lesa] akafuuta ifilamba fyonse ku menso yabo, ne mfwa tayakabeko na kabili, takwakabe no kuloosha nangu ukuteta nangu ukukalipwa na kabili. Ifya ntanshi nafiya.”—UKUSOKOLOLA 21:3-5.

Nomba cinshi calenga tulecula ifi? Pa myaka iingi abantu balatontonkanya pali ici cipusho. Nga ca kuti Lesa te ulenga, ninshi ni nani uulenga abantu balecula? Aya amepusho yalayasukwa mu cipande cikonkelepo.