Bushe Lesa Akafumyapo Shani Imfwa?
NANGU ca kuti abafyashi besu aba kubalilapo Adamu na Efa tabaumfwilile Lesa, ifyo bacitile tafyalengele Lesa ayalula ifyo alefwaya abantu baleikala pa kubala. Mu Malembo pamo nga yali pe samba, Lesa alitweba imiku iingi ukuti ifyo alefwaya abantu baleikala pa kubala tafyayaluka.
-
“Abalungama e bakekala mu calo, kabili bakekalamo umuyayaya.”—Amalumbo 37:29.
-
“Akamina imfwa umuyayaya, kabili Shikulu Mulopwe Yehova akafuuta ifilamba ku menso yonse.”—Esaya 25:8.
-
“Umulwani wa kulekelesha ukonaulwa ni mfwa.”—1 Abena Korinti 15:26.
-
“Imfwa tayakabeko na kabili, takwakabe no kuloosha nangu ukuteta nangu ukukalipwa na kabili.”—Ukusokolola 21:4.
Bushe Lesa ‘akamina shani imfwa’ nelyo ukuifumyapo? Baibolo itila, “abalungama e bakekala . . . umuyayaya.” Na kabili itila “pano isonde tapaba umuntu umulungami uucita icisuma lyonse.” (Lukala Milandu 7:20) Bushe ici cilolele mu kuti Lesa akaalula ifi alanda ukuti abalungama e bakekala umuyayaya pa kuti na bantu ababembu bakaleikala umuyayaya? Awe na kalya, takacite ifyo pantu ‘Lesa tabepa.’ (Tito 1:2) Nomba finshi Lesa akacita pa kuti abantu bakaleikala umuyayaya nga fintu afwaya baleikala?
LESA “AKAMINA IMFWA UMUYAYAYA.”—ESAYA 25:8.
ICILUBULA CIKALENGA LESA AKAFUMYEPO IMFWA
Yehova Lesa alipeela fwe bantunse icilubula pa kutulubula ku mfwa. Icilubula ni cilya balipila icalingana umutengo nelyo ukucindama ne cintu calufiwe. Apo fwe bantu bonse tulafwa pa mulandu wa kuti tuli babembu, Baibolo itila: “Tapali nangu umo pali aba uwingalubula nangu fye ni munyina, nelyo ukupeela kuli Lesa ica kumulubwilako; (Kabili umutengo wa kulubwilako umweo wabo ukalamba icine cine ica kuti washala fye ukwabula ukulipilwa umuyayaya).”—Amalumbo 49:7, 8.
Umuntu umubembu nga afwa, kuti apokelela fye icilambu ca membu shakwe; te kuti ailubule kabili te kuti alubule umuntu uuli onse. (Abena Roma 6:7) Pa kuti tulubulwe ku lubembu ne mfwa, twalekabila umuntu uwapwililika uwakufwila pa membu shesu, te pa membu shakwe iyo.—AbaHebere 10:1-4.
Ifi fine e fyo Lesa acitile. Atumine Yesu, Umwana wakwe, uwafumine ku muulu no kwisa pano calo ngo muntunse uwapwililika. (1 Petro 2:22) Yesu atile ico aishile “kupeela umweo wakwe icilubula pa kuti alubule abengi.” (Marko 10:45) Icalengele atufwile, kutulubula ku lubembu ne mfwa pa kuti tukabe no mweo wa muyayaya.—Yohane 3:16.
NI LILALI LESA AKAFUMYAPO IMFWA?
Muno nshiku, tuleikala mu “nshita ishayafya nga nshi” nga fintu Baibolo yasobele, kabili ici cilanga fye ukuti tuli mu “nshiku sha kulekelesha.” (2 Timote 3:1) Inshiku sha kulekelesha shikapwa ilyo “ubushiku bwa bupingushi kabili ubwa konaula abantu abashipepa” bukesa. (2 Petro 3:3, 7) Lelo abacita ifyo Lesa afwaya bakapusuka kabili bakaba no “mweo wa muyayaya.”—Mateo 25:46.
Yesu aishile mu “kupeela umweo wakwe icilubula pa kuti alubule abengi.”—Marko 10:45
Abantu abengi nga nshi nabo bakabuushiwa no kwikala umuyayaya. Ilyo Yesu aile ku Naini, alibuushishe umuntu uwafwile. Baibolo ilanda ukuti ilyo Yesu amwene umwana wa kwa mukamfwilwa umo fye mpo nafwa, ‘alyumfwile uluse’ kabili ici Luka 7:11-15) Umutumwa Paulo nao atile: “Nalicetekela Lesa . . . ukuti kukaba ukubuuka kwa balungama na bashalungama.” Ili isubilo lya kuti abafwa bakabuuka lilanga fye ukuti Lesa alitemwa sana abantunse.—Imilimo 24:15.
calengele amubuushe. (Abantu abengi balikwata isubilo lya kuti bakekala umuyayaya. Baibolo ilanda ukuti: “Abalungama e bakekala mu calo, kabili bakekalamo umuyayaya.” (Amalumbo 37:29) Pali ilya nshita abantu bakaba sana ne nsansa pantu amashiwi umutumwa Paulo alembele pa mfwa imyaka nalimo 2,000 iyapita yakafikilishiwa. Atile: “We Mfwa, kuli kwi ukucimfya kobe? We mfwa, luli kwi ulubola lobe?” (1 Abena Korinti 15:55) Lesa akafumyapo imfwa iyateka abantu ubusha.