Imfwa Ilalenga Tuleba Sana no Bulanda
Elenganyeni ukuti muletamba vidio umo balelanga kemba wa nyimbo uwalumbuka kabili uo mwatemwisha. Muli iyi vidio batendekelapo ukulanga ifyo uyu muntu alekula, ifyo alesambilila ukulisha inyimbo, e lyo ne fyo alebombesha pa kuti eshibe ukulisha bwino. Lyena balanga alelisha inyimbo ninshi abantu abengi baletamba, atendeka ukuya na ku fyalo fimbi mu kulisha inyimbo, kabili alumbuka. Ku mpela ya iyi vidio balanga uyu muntu ninshi nakota, lyena afwa no kufwa.
Ifyaba muli iyi vidio e ficitikila abantu bonse. Nampo umuntu nga ni kemba, ni sayantisti, alateya ifyangalo fya kucimfyanya nelyo kwaliba ifintu fimbi ifyalenga ukuti alumbuke, mu kupita kwa nshita kuti akota no kufwa. Kanshi na bantu abacita ifintu ifisuma ifingi, bushiku bumo bakafwa.
Nangu ca kuti tulaba no bulanda nga twatontonkanya pa fyo abantu bakota no kufwa, na ifwe bene ifi fine e fikatucitikila. (Lukala Milandu 9:5) Tapali ifyo twingacita pa kuti twilakota no kufwa. Na kabili, kwaliba ifintu ifingi ifingalenga twafwa ukwabula ukwenekela. Nga filya Baibolo ilanda, twaba fye nga fubefube “iimoneka akashita akanono no kufumapo.”—Yakobo 4:14.
Apo kuti twafwa inshita iili yonse, abantu bamo batontonkanya ukuti bafwile fye ‘ukulya no kunwa, pantu mailo kuti bafwa.’ (1 Abena Korinti 15:32) Icilenga baletontonkanya ifi ni co tabakwata isubilo lya kuti ifintu fikawama ku ntanshi. Nalimo na imwe bene nga mwakwata amafya kuti mwalatontonkanya ukuti, ‘Bushe tukatwalilila fye ukulakota no kufwa?’ Ni kwi twingasanga icasuko kuli ici cipusho?
Abantu abengi bamona kwati abasambilila ifya sayansi bakasanga icasuko pantu na kuba balisanga ifilenga abantu baleikalako imyaka iingi. Na kabili bacili balebombesha pa kuti bakasange inshila sha kulenga imyaka abantu bekala ukufulilako. Na lyo line, nangu bengasanga ifingalenga abantu baleikala imyaka iingi, te kuti basange amasuko ku mepusho pamo nga: Mulandu nshi tukotela no kufwa? Bushe kwaliba isubilo lya kuti imfwa bakaifumyapo? Mu fipande fikonkelepo, twalayasuka aya mepusho e lyo ne cipusho ca kuti: Bushe tukatwalilila fye ukulakota no kufwa?