1. Nangu ca kuti Yehova ni Lesa Uwapulamo, finshi acita?

YEHOVA ni Lesa Uwapulamo. E wabumbile ifintu fyonse kabili alikwatisha amano na maka. Ilyo Yehova alengele Yobo ukwishiba ici cishinka, Yobo aebele Lesa ati: “Ninjishiba ukuti mwalikwata amaka ya kucita fyonse fye ifyo mulefwaya, kabili kuti mwacita fyonse ifyo mutemenwe.” (Yobo 42:2) Yehova kuti acita fyonse ifyo alefwaya ukwabula uwa kumwafwa. Nomba apo alikwata ukutemwa, alipeelako na bambi imilimo pa kuti alebombela pamo nabo ku kufikilisha ubufwayo bwakwe.

2. Mulimo nshi uwacindama uo Yehova abombeele pamo na Yesu?

² Lesa abalilepo ukubumba Umwana wakwe Yesu ilyo ashilabumba nangu cimo. Lyena Yehova atendeke ukubombela pamo no Mwana wakwe umulimo wa kubumba ifintu fyonse. (Yohane 1:1-3, 18) Umutumwa Paulo alembele pali Yesu ati: “Muli  ena e mo ifintu fyonse fyapangiilwe mu muulu na pano isonde, ifimoneka ne fishimoneka, ifipuna fya bufumu, bumulopwe, amabuteko nangu aba maka bonse. Fyonse fyapangiilwe muli ena kabili e o fyapangiilwe.” (Abena Kolose 1:15-17) Kanshi Yehova tapelele fye pa kupeela Umwana wakwe umulimo uwacindama, lelo alyebako na bambi pali uyu wine umulimo amupeele. Yehova alicindika sana Yesu!

3. Mulimo nshi Yehova apeele Adamu kabili cinshi amupeelele?

³ Yehova na kabili alabombela pamo na bantunse. Ku ca kumwenako, alipeele Adamu umulimo wa kwinika inama amashina. (Ukutendeka 2:19, 20) Elenganyeni ifyo Adamu aleba ne nsansa ilyo alebomba uyu mulimo! Pa kwinika inama amashina, alebala amona ifyo shimoneka ne fyo shicita e lyo asala ishina ililingile. Yehova afwaya nga e wainike inama amashina pantu e washibumbile. Lelo filya apeele Adamu uyu mulimo, cilanga ukuti alimutemenwe. Lesa na kabili alipeele Adamu umulimo wa kulenga isonde ukuba paradaise. (Ukutendeka 1:27, 28) Lelo Adamu alilekele ukubombela pamo na Lesa, ne ci calengele ukuti ena na bana bakwe bonse batendeke ukulacula sana.—Ukutendeka 3:17-19, 23.

4. Bushe abantu bamo babombeele shani pamo na Lesa ku kufikilisha ubufwayo bwakwe?

⁴ Pa numa, Lesa alipeele na bambi imilimo pa kuti babombele pamo nankwe. Alipeele Noa umulimo wa kukuula icibwato umo ena no lupwa lwakwe bapusukile ilyo Ilyeshi lyaishile. Alipeele Mose umulimo wa kulubula abena Israele mu Egupti. Alipeele Yoshua umulimo wa kutungulula abena Israele ku Calo ca Bulayo. Solomone amupeele umulimo wa kukuula itempele mu Yerusalemu. Maria ena aali ni nyina wa kwa Yesu. Aba bonse ukubikako na bambi abengi nga nshi abali ne citetekelo, balibombeele pamo na Yehova ku kufikilisha ubufwayo bwakwe.

5. Mulimo nshi uo twingabombako, kabili cinshi Lesa atupeelela uyu umulimo? (Moneni icikope pa ntendekelo ya cino cipande.)

⁵ Na muno nshiku mwine, Yehova alitupeela umulimo wa kutungilila Ubufumu bwakwe. Kuti twabombela Lesa mu nshila ishingi. Nangu ca kuti te kuti tubombele Lesa mu nshila imo ine, bonse fye kuti twabilako imbila nsuma iya Bufumu. Yehova nga alefwaya kuti abomba umwine uyu mulimo, kuti alelanda fye na bantu mu kulungatika ukufuma ku muulu. Yesu alandile ukuti Yehova kuti abomfya na mabwe ukushimikila abantu pa Mfumu ya Bufumu bwakwe. (Luka 19:37-40) Lelo Yehova alitupeela umulimo pa kuti ‘tulebombela pamo’ nankwe. (1 Abena Korinti 3:9) Umutumwa Paulo alembele ukuti: “Apo tubombela pamo nankwe, tulemupapaata ukuti mwilacita ifipusene no bufwayo bwa cikuuku ico Lesa alanga kuli imwe.” (2 Abena Korinti 6:1) Lesa alitucindika nga nshi pa kutupeela umulimo uo tubombela pamo nankwe. Nomba natulande pa co tubela ne nsansa ilyo tulebombela pamo na Lesa.

6. Bushe Yesu, ibeli lya kwa Lesa alondolwele shani ifyo aumfwile ilyo alebombela pamo na Wishi?

⁶ Ukubombela pamo na Yehova kulalenga ababomfi bakwe bonse ukuba ne nsansa. Ilyo Umwana wa kwa Lesa ashilaisa pano isonde atile: “Yehova alimpangile, nine wa kubalilapo pali fyonse ifyo apangile, . . . [nali] nankwe, ngo waishibisha imilimo, kabili  nine atemenwe nga nshi inshiku shonse, na ine naleanga ku cinso cakwe inshita yonse.” (Amapinda 8:22, 30) Yesu alesekelela ilyo alebombela pamo na Wishi pantu imilimo iyo abombele yali iingi kabili alishibe ukuti Yehova alimutemenwe. Bushe na ifwe kuti twaba ne nsansa ilyo tulebombela pamo na Lesa?

7. Cinshi cilenga tuleba ne nsansa ilyo tulebomba umulimo wa kubila imbila nsuma?

⁷ Yesu atile tulaba ne nsansa nga tulepeela nelyo nga tulepokelela. (Imilimo 20:35) Twalitemenwe ilyo twasambilile icine, na kabili tulaba ne nsansa ilyo tulesambilishako abantu icine. Cinshi cilenga? Pantu tulamona ifyo baba ne nsansa nga baishiba icine ca mu Baibolo kabili batendeka no kuba ifibusa fya kwa Lesa. Tulatemwa nga twamona bayaluka mu fyo batontonkanya na mu mikalile yabo. Umulimo wa kubila imbila nsuma walicindama sana kabili e mulimo fye weka uwingalenga twaba ne nsansa. Uyu mulimo ukalenga ababa ifibusa fya kwa Lesa bakabe no mweo wa muyayaya.—2 Abena Korinti 5:20.

8. Finshi ifyo bamo balanda pa nsansa isho bakwata pa mulandu wa kubombela pamo na Yehova?

⁸ Nga twayafwa abantu ukwishiba Lesa, tuleshiba ukuti Yehova alasekelela kabili alatasha pa fyo tumubombela na maka yesu yonse. Ici na co cilalenga tuleba ne nsansa. (Belengeni 1 Abena Korinti 15:58.) Ba Marco abekala ku Italy balandile ati: “Naliba sana ne nsansa pa kulabombela Yehova pantu nalishiba ukuti ena taba nga abantunse, takalabe ifyo mubombela.” Ba Franco aba ku calo cimo cine nabo batile: “Cila bushiku Yehova alatweba ukuti alitutemwa ukubomfya Icebo cakwe e lyo na fimbi ifyo atuteyanishisha, kabili imilimo yonse iyo tumubombela yalicindama, nangu ca kuti fwe bene kuti twalamona kwati tapaba ifyo tucita. E ico ukubombela pamo na Lesa kulalenga ndeba ne nsansa nga nshi.”

9. Bushe Yehova na Yesu batemwanene shani ilyo balebombela pamo, kabili cinshi calengele ukuti batemwane?

⁹ Nga tulebombela pamo na bo twatemwa, tulapalama kuli bena kabili tulabeshiba bwino. Tuleshiba ifyo bapanga ukucita mu mulimo wa kwa Lesa nefyo bacita pa kuti bafishepo amapange yabo. Pa myaka iingi sana Yesu alebombela pamo na Yehova. Ici calengele ukuti batemwane nga nshi ica kuti takwaba icingonaula bucibusa bwabo. Yesu alilondolwele ifyo baikatene na Wishi ilyo atile: “Ine na Tata tuli bamo.” (Yohane 10:30) Yehova na Yesu balikatene sana, kabili lyonse balebombela pamo.

10. Bushe ukushimikila abantu imbila nsuma kutupalamika shani kuli Lesa na ku ba bwananyina?

¹⁰ Yesu alilombele Yehova ukuti alecingilila abasambi bakwe. Cinshi amulombeele? Yesu apepele ati: “Pa kuti babe umo ifyo na ifwe twaba umo.” (Yohane 17:11) Nga tulekonka amafunde ya kwa Lesa kabili tulebombako no mulimo wa kubila imbila nsuma, tuleshiba bwino imibele ya kwa Lesa. Tuleshiba ifyo cawamina ukumucetekela no kulakonka ifyo atweba. Nga twapalama kuli Lesa, na o alapalama kuli ifwe. (Belengeni Yakobo 4:8.) Ukupalama kuli Lesa kulatupalamika na kuli bamunyinefwe na bankashi pantu nabo balakwata amafya nge fyo na ifwe tukwata, tulaba ne nsansa nge fyo nabo baba ne nsansa, e lyo kabili bonse fye tufwaya ukutwalilila ukubombela Lesa. Kanshi kuti twatila tubombela pamo, tusekelela pamo, kabili bonse tulashipikisha amafya. Ba Octavia abekala ku Britain, batile: “Ukubombela pamo na Yehova kulampalamika ku ba bwananyina.” No mulandu balandile ifi wa kuti, aba bwananyina balafwaisha ukubombela Yehova nge fyo nabo bafwaisha. Ifi fine e fyo caba na kuli ifwe, nga twamona ifyo aba bwananyina besha ukucita ifilenga Yehova ukusekelela, tulapalama kuli bena.

11. Mulandu nshi uo tukapalamina sana kuli Yehova na ku ba bwananyina mu calo cipya?

¹¹ Twalitemwana sana na ba bwananyina, lelo mu calo cipya tukacilapo ukutemwana. Tontonkanyeni pa milimo iyo tukalabomba iikalenga tukaleba ne nsansa! Tukalapokelela abakalabuuka ku bafwa kabili tukalabasambilisha pali Yehova. Tukalabomba ne milimo iikalenga isonde ukuba paradaise. Ilyo Kristu akalateka, tukaba sana ne nsansa ilyo tukalabombela pamo, kabili panono panono tukalaya tulepwililika. Abantunse bonse bakekatana sana kabili bakapalama sana kuli Yehova uukapeela “ica mweo conse ifyo cilefwaya.”—Amalumbo 145:16.

12. Bushe ukubila imbila nsuma kutucingilila shani?

¹² Tufwile ukucingilila bucibusa bwesu na Yehova. Twikala mu calo icitekwa na Satana kabili tatwapwililika, kanshi kuti twatendeka ukulatontokanya no kulacita ifintu nge fyo  aba muli ici calo bacita. Ukuba muli ici calo kwaba kwati tuleowa mu mumana wa mukuku uwingatusenda no kututwala uko umukuku uleya. Nga tulefwaya ukuya ukulefuma umukuku tulingile ukowa na maka yesu yonse. Kanshi tulingile ukulaesha na maka yesu yonse pa kuti twilacita ifyo abantu ba muli cino calo bacita. Bushe ukubila imbila nsuma kutucingilila shani? Nga tuleshimikila abantu pali Yehova na pali Baibolo, tubika amano ku fintu ifyacindama kabili ifisuma, te ku fintu ifingalenga icitetekelo cesu canaka. (Abena Filipi 4:8) Ukubila imbila nsuma kulakosha icitetekelo cesu pantu kulalenga tuletontonkanya pa fyo Lesa atulaya na pa mafunde yakwe. E lyo kulatwafwa no kuba ne mibele iyo tulingile ukukwata pa kuti tuicingilile kuli Satana na ku bantu ba muli cino calo.—Belengeni Abena Efese 6:14-17.

13. Bushe Nte umo uwa ku Australia omfwa shani pa mulimo wa kubila?

¹³ Nga tulebomba sana umulimo wa kushimikila abantu, tuleisambilisha, no kwafwa aba bwananyina mu fintu fyalekanalekana, tulacingililwa pantu tatubika sana amano ku mafya yesu. Ba Joel abekala ku Australia batile: “Umulimo wa kushimikila abantu imbila nsuma ulalenga ndeishiba amafya yalekanalekana ayo abantu bakwata, kabili ulalenga ndetontonkanya na pa busuma nasanga mu kukonka ifyo Baibolo ilanda. Umulimo wa kubila ulangafwa ukuba uwaicefya; ulenga ndeshintilila sana pali Yehova na pa ba bwananyina.”

14. Bushe ifi tutwalilila ukushimikila abantu imbila nsuma cilanga shani ukuti umupashi wa kwa Lesa e utwafwa?

¹⁴ Umulimo wa kubila na kabili ulalenga twacetekela sana ukuti umupashi wa kwa Lesa ulatwafwa. Natulangilile: Elenganyeni ukuti mubomba incito ya kupeela abantu ifya kulya mu ncende mwikala. Mubomba iyi ncito ukwabula amalipilo, kabili pa kutwala ifya kulya mubomfya indalama shenu. Abantu abengi tabafwaya ifya kulya mubatwalila kabili bamo balimupatilanapo. Bushe kuti mwatwalilila ukubomba iyi ncito? Te kuti pakokole no kukokola kuti mwafuupulwa, mwaleka ne ncito. Lelo ifwe tatwaleka ukushimikila abantu imbila nsuma twalitwalilila, kabili tulabomfya inshita yesu ne ndalama nangu ca kuti abantu balatuseka, e lyo bambi balitupata no kutupata. Ifi tutwalilila ukushimikila abantu imbila nsuma cilanga fye apabuuta tuutu ukuti umupashi wa kwa Lesa ulatwafwa.

15. Bushe umulimo wa kubila imbila nsuma wakuma shani ubufwayo bwa kwa Yehova ku bantunse?

¹⁵ Bushe umulimo wa kubila imbila nsuma wakuma shani ubufwayo bwa kwa Yehova ku bantunse? Ubufwayo bwa kwa Lesa ubwa pa kutendeka bwali bwa kuti abantunse bakekale umuyayaya, kabili tayalwile ubufwayo bwakwe ilyo Adamu abembwike. (Esaya 55:11) Lesa alipekenye inshila ya kutulubwilamo ku lubembu ne mfwa. Cinshi acitile? Atumine Yesu pano calo uwaishilepeela  ubumi bwakwe ilambo. Lelo pa kuti abantu banonkelemo mwi lambo lyakwe bafwile ukulaumfwila Lesa. E ico Yesu alisambilishe abantu ifyo Lesa afwaya ukuti balecita, kabili aebele abasambi bakwe ukuti balesambilishako abantu na bambi. Nga tuleshimikila abantu no kubafwa ukuba ifibusa fya kwa Lesa, ninshi tulebombela pamo na Lesa umulimo uwa kulubula abantu ku lubembu ne mfwa.

16. Bushe umulimo wa kubila wayampana shani na mafunde ayakalamba aya kwa Lesa?

¹⁶ Nga tuleyafwa abantu ukusanga inshila iitwala ku mweo wa muyayaya, ninshi twalibatemwa kabili twalitemwa na Yehova, “uufwaya ukuti abantu balekanalekana bakapusuke no kwishiba bwino bwino icine.” (1 Timote 2:4) Ilyo umuFarise ayipwishe Yesu pe funde lya kwa Lesa ilikalamba, amwaswike ati: “‘Uletemwa Yehova Lesa obe no mutima obe onse, no mweo obe onse, no kutontonkanya kobe konse.’ Ili e funde ilikalamba kabili e lya ntanshi. Ilya cibili, ilyapalana ne li, litila, ‘Uletemwa umunobe nge fyo waitemwa we mwine.’” (Mateo 22:37-39) Nga tulebila imbila nsuma, ninshi tulekonka aya mafunde.—Belengeni Imilimo 10:42.

17. Mumfwa shani pa fyo Lesa amucindika pa ku mupeela umulimo wa kubila imbila nsuma?

¹⁷ Ala twalipaalwa nga nshi! Yehova alitupeela umulimo uulenga tuleba ne nsansa, uutupalamika kuli ena na ku ba bwananyina, kabili uucingilila bucibusa bwesu nankwe. Nga tulebomba uyu mulimo tulalanga ukuti twalitemwa Lesa na bantu. Yehova alikwata ababomfi bakwe abengi sana mwi sonde lyonse. Bamo baice e lyo bambi bakalamba, bamo bakankaala e lyo bambi bapiina, bamo balikwata amaka e lyo bambi tabakwata amaka, lelo bonse tulesha apapela amaka yesu ukulashimikilako abantu imbila nsuma. Tumfwa nga filya ba Chantel aba ku France bomfwa abatile: “Umuntu uwa kwatisha amaka mwi sonde lyonse na mu muulu, Kabumba wa fintu fyonse, Lesa wa nsansa e wanjeba ati: ‘Kabiye! Kalande! Kanandileko, ulelanda no mweo onse. Nakupeela amaka, Icebo candi Baibolo, bamalaika aba kukwafwa, bamunonko aba kubomba nabo, na kulakusambilisha, kabili nakulakweba ifya kucita pa nshita yalinga.’ Ala lishuko nga nshi ukulacita ifyo Yehova atweba no kulabombela pamo nankwe!”