Bemininako ifibumbwa fya ku mupashi ifya ku muulu ifyaonawileko Yerusalemu kabili ifyo Yehova akabomfya ku konaula icalo ca kwa Satana mu nkondo ya Armagedone. Uku kwaluka mu fyo twaishibe kale. Mulandu nshi kubelele uku kwaluka?

Mu mwaka wa 607 ilyo Kristu ashilaisa pano isonde, umusumba wa Yerusalemu walyonawilwe ukulingana fye ne fyo Yehova alangile Esekiele mu cimonwa ukuti e fyali no kucitika. Mu cimonwa, Esekiele amwene ifintu ifingi ifyabipa filecitika muli uyu musumba. Lyena amwene abaume 6 kabili cila muntu alikwete “icanso ca kutobawilako mu minwe yakwe.” Na kabili kwali umwaume uwali nabo “uwafwele insalu iisuma” kabili aali ne “co kalemba abikamo inki.” (Esekiele 8:6-12; 9:2, 3) Uyu mwaume bamwebele ukupita mu musumba no “kushila akashilwa pa mpumi sha bantu abateta no kuliliishika pa fya bunani ifilecitwa mu kati ka uko.” Lyena abaume 6 abakwete ifyanso babebele ukwipaya bonse abali mu musumba abashashililwe akashilwa. (Esekiele 9:4-7) Finshi twingasambilila kuli ici cimonwa, kabili nani uo umwaume uwakwete ico kalemba abikamo inki e mininako?

Esekiele amwene ici cimonwa mu mwaka wa 612 ilyo Kristu ashilaisa pano isonde. Ubusesemo bwa muli ici cimonwa bwafikilishiwe pa numa ya myaka 5 ukutula apo Esekiele amwenene ici cimonwa ilyo Yehova asuminishe abashilika abena Babiloni ukonaula Yerusalemu. Yehova abomfeshe abena Babiloni pa kukanda abantu bakwe abashalemumfwila. (Yeremia 25:9, 15-18) Bushe cali shani ku  baYuda abashalecitako ifyabipa? Yehova alibapuswishe.

Mu cimonwa, Esekiele taleshila abantu akashilwa ka cine cine kabili taonawileko umusumba. Lelo ni bamalaika e baletungulula ukonaulwa kwa Yerusalemu. Kanshi ubu busesemo bwalenga twaishiba ifyacitike ku muulu. Yehova aebele bamalaika bakwe ukuteyanya ifya konaula ababifi e lyo no kupususha abalungama. *

Ubu busesemo buli no kufikilishiwa na kabili ku ntanshi. Kale twaishibe ukuti umwaume uwali ne co kalemba abikamo inki emininako abasubwa abacili pano isonde. Na kabili twaishibe ukuti abantu baleshilwa akashilwa kakupusuka nga ca kuti basumina imbila nsuma iyo tubila. Nomba natwiluka ukuti tulingile ukwaluka mu fyo tulondolola ubu busesemo pantu pali Mateo 25:31-33 twasambilila ukuti Yesu e upingula abantu. Akacita ifi mu nshita ya bucushi bukalamba. Pali iyi nshita, abakapingulwa ukuti ni mpaanga bakapusuka lelo abakapingulwa ukuti ni mbushi bena bakonaulwa.

Ku cimonwa ico Esekiele amwene tulesambililako ifintu 5:

1. Ilyo Yerusalemu ishilaonaulwa, Esekiele alisokele abantu pa fyali no kucitikila uyu musumba nga filya fine Yeremia na Esaya bacitile. Bali kwati balinshi. Muno nshiku Yehova abomfya ubumba ilinono ilya basubwa pa kusambilisha abantu bakwe na pa kusoka abantu ilyo ubucushi bukalamba bushilatendeka. Na kuba, abantu ba kwa Lesa bonse e kutila, aba mu ng’anda ya kwa Kristu balabomba uyu mulimo wa kusoka abantu.—Mateo 24:45-47.

2. Esekiele te waleshila akashilwa pa mpumi sha bantu abali no kupusuka. Na muno nshiku mwine, abantu ba kwa Yehova te bashila abakapusuka. Lelo babila fye imbila nsuma ku bantu no kubasoka pa fikacitika ku ntanshi. Bamalaika balafwilisha abantu ba kwa Yehova ukubomba umulimo wa kubila imbila nsuma mwi sonde lyonse.—Ukusokolola 14:6.

3. Abapuswike mu nshita ya kwa Esekiele tabakwete utushilwa twa cine cine pa mpumi, e fyo cikaba na ku bakapusuka ku ntanshi nabo tabakakwate utushilwa twa cine cine pa mpumi shabo. Finshi abantu balingile ukucita pa kuti bakapusuke ubucushi bukalamba? Nga baumfwa ukusoka, bafwile ukulapashanya Kristu, bafwile ukuipeela kuli Lesa, kabili balingile ukulayafwa bamunyina ba kwa Kristu ukubila imbila nsuma. (Mateo 25:35-40) Mu bucushi bukalamba, bakashilwa akashilwa e kutila, bakasalwa ukuti nabalinga ukupusuka.

4. Umwaume uwali ne co kalemba abikamo inki, emininako Yesu. Mu nshita ya bucushi bukalamba, Yesu akashila aba mwi bumba likalamba akashilwa ilyo akabapingula ukuti ni mpaanga. Lyena bakekala umuyayaya pano pene pe sonde.—Mateo 25:34, 46. *

5. Muno nshiku abaume 6 abali ne fyanso fyakutobawilako bemininako ifibumbwa fya ku mupashi ifitungululwa na Yesu. Nomba line bali no konaula ifyalo, kabili bali no kufumyapo ifyabipa fyonse.—Esekiele 10:2, 6, 7; Ukusokolola 19:11-21.

Ifyo twasambilila kuli ici cimonwa fyalenga twacetekela ukuti Yehova takonaule abalungama pamo na babifi. (2 Petro 2:9; 3:9) Ifyo twasambilila na kabili fyalenga twamona ukuti umulimo wa kubila imbila nsuma walicindama sana muno nshiku. Abantu bonse balingile ukumfwa ukusoka ilyo impela ishilaisa!—Mateo 24:14.