Cinshi calengele ukuti ilyo Yesu ali mu kufwa alande amashiwi ayo Davidi alandile ayaba pa Amalumbo 22:1?

Pa mashiwi Yesu alandile ilyo ali mupepi no kufwa, paba na yaba pali Mateo 27:46 ayatila: “Lesa wandi, Lesa wandi, cinshi mwandekelesesha?” Ilyo Yesu alandile aya mashiwi, afikilishe amashiwi ayo Davidi kemba wa malumbo alandile ayaba pa Amalumbo 22:1. (Marko 15:34) Te kuti cibe bwino ukulanda ukutila icalengele Yesu alande aya mashiwi ni co amwene ukuti Yehova namulekelesha nelyo ukuti alilekele ukuba ne citetekelo pali ilya nshita. Yesu alishibe bwino ico alingile ukufwila kabili ali-itemenwe ukufwa. (Mateo 16:21; 20:28) Na kabili alishibe ukuti pa nshita ali no kufwa Yehova ali no kuleka ‘ukumucingilila.’ (Yobo 1:10) Kanshi Yehova alilekele ukucingilila Yesu pa kuti Yesu alange ukuti ali no kutwalilila uwa cishinka te mulandu ne fyo imfwa yakwe yali no kuba.—Marko 14:35, 36.

Nomba cinshi calengele ukuti Yesu alande amashiwi yaba pali ili ilumbo? Nangu ca kuti tatwaishiba bwino icalengele alande aya mashiwi, twalalanda pali fimo nalimo ifyalengele alande aya mashiwi. *

Nalimo ico Yesu alandile aya mashiwi, alefwaya ukukomaila pa cishinka ca kuti Yehova tali no kumucingilila ukuti efwa. Yesu alingile ukupeela icilubula ukwabula ukuti Yehova amwafwe. Ali muntunse kabili alingile ukufwila abantu bonse.—Heb. 2:9.

 Nalimo icalengele alande amashiwi yamo ayaba muli ili ilumbo ni co alefwaya abantu babike sana amano ku mashiwi yonse ayaba muli ili ilumbo. Caliseekele sana pali ilya nshita ku baYuda ukusungila amalumbo ayengi ku mutwe. Kanshi nga baumfwa fye amashiwi ayaba mu cikomo cimo ice ilumbo, calelenga baibukisha amashiwi yonse ayaba muli ilyo ilumbo. Nga ca kuti ici e calengele Yesu alande aya mashiwi, ninshi calilengele abasambi bakwe abaYuda ukwibukisha amasesemo ayengi ayaba muli ili ilumbo ayalanda pa mfwa yakwe. (Amalu. 22:7, 8, 15, 16, 18, 24) Na kabili ifikomo fya kulekeleshako muli ili ilumbo filumbanya Yehova kabili fimulondolola ukuti ni Mfumu ya bantu bonse aba pe sonde.—Amalu. 22:27-31.

Nalimo icalengele Yesu alande amashiwi ayo Davidi alandile ni co alefwaya abantu beshibe ukuti wa kaele. Ilyo Yesu bashilamwipaya, ukwabula ukukonka amafunde icilye ca Sanhedrini calimulubulwishe no kumupeela umulandu wa kuti aleponta. (Mat. 26:65, 66) Aba mu cilye ca Sanhedrini balikumene bwangu bwangu mu nshita ya bushiku, kabili balitekele icilye ukwabula ukukonka amafunde. (Mat. 26:59; Marko 14:56-59) Kanshi ilyo Yesu alandile ukuti “Lesa wandi Lesa wandi cinshi mwandekelesesha,” nalimo alefwaya abantu beshibe ukuti ali wa kaele, kabili tabalingile ukumwipaya.

Nalimo icalengele alande aya mashiwi, alefwaya ukwibukishako abantu ukutila filya Yehova asuminishe Davidi uwalembele ili ilumbo ukucula, tacalepilibula ukuti alimulekeleshe. Filya Davidi aipwishe tafyalepilibula ukuti alilekele ukuba ne citetekelo muli Lesa. Pa numa yakwipusha cilya icipusho, alandile ukutila alicetekele ukuti Yehova ali no kupususha abantu bakwe, kabili Yehova alitwalilile ukumupaala. (Amalu. 22:23, 24, 27) Ifi fine e fyo cali na kuli Yesu Mwana Davidi. Nangu ca kuti alecula pa cimuti ca kucushiwilwapo, tacalepilibula ukuti Yehova alimulekeleshe.—Mat. 21:9.

Nalimo icalengele Yesu alande aya mashiwi, ni co alyumfwile ubulanda pantu Yehova alilekele ukumucingilila, pa kuti alange ukuti alitwalilile ukuba uwa cishinka kuli Yehova. Pa kutendeka tabwali bufwayo bwa kwa Yehova ukuti Umwana wakwe akacule no kufwa. Lelo filya Adamu na Efa bapondweke e fyalengele ukuti Yehova asuminishe ukuti Yesu ese afwe. Yesu talufyenye nangu cimo, lelo alingile ukucula no kufwa pa kuti asuke amepusho ku milandu iyo Satana aimishe, na pa kuti alipile umutengo we lambo uwalefwaikwa pa kubwesha ifyo abantunse balufishe. (Marko 8:31; 1 Pet. 2:21-24) Ifi fyali no kucitika fye nga ca kuti Yehova inshita imo aleka ukucingilila Yesu. Uyu wali e muku wakubalilapo uo Yehova ashali no kucingilila Yesu.

Nalimo ico Yesu alandile aya mashiwi ni co alefwaya abasambi bakwe babike sana amano ku co Yehova asuminishishe ukuti afwe pa cimuti ca kucushiwilwapo. * Yesu alishibe ukuti filya bamwipeye nge cipondo pa cimuti ca kucushiwilwapo fyali no kupunwisha abengi. (1 Kor. 1:23) Abasambi bakwe nga babika amano ku calengele ukuti afwe, bali no kwishiba ico imfwa yakwe yacindamine. (Gal. 3:13, 14) Ici cali no kulenga belamumona ukuti cipondo, lelo balemumona ukuti ni Kalubula.

Te mulandu ne calengele ukuti Yesu alande amashiwi ayo Davidi alandile, alishibe ukuti filya afwilile pa cimuti ca kucushiwilwapo alecita ukufwaya kwa kwa Yehova. Pa numa ya kulanda amashiwi ayaba muli ili ilumbo Yesu atile: “Fyonse nomba fyapwa!” (Yoh. 19:30; Luka 22:37) Kanshi filya Yehova alekele ukucingilila Yesu pa nshita imo, fyalengele Yesu afikilisha fyonse ifyo bamutumine ukwisacita pano isonde. Na kabili fyalilengele afikilisha fyonse ifyalembelwe pali ena “mu Mafunde ya kwa Mose na muli Bakasesema na mu Malumbo.”—Luka 24:44.