Ku ca bulanda, ilyo nali ne myaka nalimo 13, nalilekele ukutemwa Yehova nge fyo namutemenwe kale. Abana be sukulu banandi balemoneka ukuti balikwete ubuntungwa ubwingi. Na ine nalefwaya ukukwatako ubuntungwa ubo bakwete. Nalemona kwati amafunde abafyashi bandi balempangila na mafunde Abena Kristu balingile ukulakonka, yalikosele sana. Kabili nalemona kwati ukubombela Yehova takwa-anguka. Nangu ca kuti nshaletwishika ukuti Yehova eko aba, nshaleumfwa ukuti nalipalama kuli ena.

Nshalekelele fye ukubila imbila nsuma, lelo nalebombako fye panono. Nga naya mu kubila imbila nsuma nshalepekanya ne fyo nalaya mu kulanda. Kanshi nalefilwa ukutendeka ukulanda na bantu nelyo ukutwalilila ukulanda nabo. Icafuminemo ca kuti, nshalekwata ifipempu fya kubwelelamo nelyo amasambililo ya Baibolo, kabili nshaleba ne nsansa nga ndebila imbila nsuma. Ici calengele mpantileko umulimo wa kubila imbila nsuma. Naleyipusha ukuti, ‘Bushe cinshi umuntu engalabilila imbila nsuma cila mulungu, kabili cila mweshi?’

Ilyo nali ne myaka 17, nalefwaya sana ukuba no buntungwa. Kanshi nalisendele ifintu fyandi no kufuma pa ng’anda kabili naile ku Australia. Abafyashi bandi  balyumfwile ububi ilyo nafumine pa ng’anda. Balisakamene, lelo baletontonkanya ukuti nalimo nkatwalilila ukubombela Yehova.

Ilyo naile ku Australia, e lyo nacililenamo ukuleka ukubika amano ku fya ku mupashi. Natendeke ukulalofwa mu kulongana. Nalipangile ifibusa na bacaice banandi abatemenwe ifyo na ine natemenwe, e kutila ukuya fye umuku umo mu kulongana no kuya ku fikulwa fya bwalwa ubushiku mu kunwa no kucinda. Nga natontonkanya pa fyo cali pali ilya nshita, ndamona ukuti lubali lumo nali mu cine e lyo lubali lumbi nali mu calo, lelo tapali ico natemenwe sana pali ifi fyonse.

Ilyo papitile imyaka nalimo ibili, nalikumenye nkashi uushaishibe ukuti alilengele natontonkanya pa fyo nalecita. Naleikala na bakashana banandi ba Nte abali 5 mu ng’anda imo, kabili twalitile kangalila wa muputule no mwina mwakwe Tamara ukuti twikale nabo umulungu umo. Ilyo kangalila wa muputule alebomba imilimo ya cilonganino, ba Tamara baleisha na ifwe kabili twaleseka nabo. Nalitemenwe ifyo ba Tamara balecita. Bali abaicefya nga nshi kabili bali abayangusha. Nalitemenwe sana ukwishiba ukuti kanshi no muntu uwabika sana amano ku kubombela Yehova kuti muleipakisha ukwisha pamo nankwe.

Ba Tamara bali abasansamuka icine cine. Ifyo ba Tamara batemenwe icine no mulimo wa kubila imbila nsuma, fyalelenga watemwa ukubombela Yehova nga ca kuti wasangwa nabo. Bali ne nsansa sana filya balebombela Yehova no mweo onse, lelo neushalebombela Yehova no mweo onse nshali ne nsansa. Filya babikile sana amano ku kubombela Yehova na filya bali ne nsansa sha cine cine, fyalilengele nalafwaisha ukubapashanya. Ica kumwenako ca ba Tamara calengele natontonkanya pa cine cimo icacindama icaba mu Malembo, ica kuti: Yehova afwaya bonse tulemubombela “no kusekelela . . . no kwaula akapundu.”—Amalu. 100:2.

Nalefwaisha ukuba ne nsansa nga filya ba Tamara bali, lelo pa kuba ne shi nsansa nalingile ukwaluka sana. Palipitile inshita iitali pa kuti njaluke, lelo nasukile natendeka ukwaluka panono panono. Nalitendeke ukupekanya ilyo nshilaya mu kubila imbila nsuma, kabili nalebombako na bupainiya bwa kwafwilisha  mu nshita mu nshita. Ici calilengele umwenso nakwete waya ulepwa, kabili nalitendeke no kuicetekela. Filya nalebomfya sana Baibolo pa kubila imbila nsuma, fyalengele ndeipakisha sana umulimo wa kubila imbila nsuma. Tapakokwele nalitendeke ukulabomba bupainiya bwa kwafwilisha cila mweshi.

Nalitendeke ukupanga ifibusa na bantu aba mishinku yalekanalekana abalebombela Yehova na maka yabo yonse, kabili abaleipakisha ukumubombela. Imibele yabo iisuma yalilengele natontonkanya pa fyo nacindamike sana mu bumi, kabili yalilengele natendeka ukubelenga Baibolo cila bushiku. Nalitendeke ukuipakisha sana ukubila imbila nsuma, kabili mu kupita kwa nshita nalitendeke na bupainiya bwa nshita yonse. Uyu wali e muku wa kubalilapo nali ne nsansa pa numa ya myaka iingi, kabili nalitemenwe nga nshi ukuba mu cilonganino.

Ilyo papitile umwaka umo, nalikumene na ba Alex aba cikuuku, aba cishinka kabili abatemenwe Yehova no mulimo wa kubila imbila nsuma. Bali babomfi batumikila kabili balibombele bupainiya bwa nshita yonse pa myaka 6. Pa nshita imo ba Alex balibombelepo no kwali ukukabila mu calo ca Malawi. Ilyo bali kulya, baleba pamo na bamishonari abali ifya kumwenako ifisuma kuli bena, kabili balibakoseleshe ukutwalilila ukulabika ifya Bufumu intanshi.

Twalyupene na ba Alex mu 2003, kabili twalitwalilila ukubomba umulimo wa nshita yonse ukufika na ino nshita. Twalisambilila ifintu ifingi sana, kabili Yehova alitupaala mu nshila ishingi isho tushingapenda no kupenda.

Mu 2009 balitutumine ukuya mu kubomba bu mishonari mu calo ca Timor-Leste, icaba pa fishi fya Indonesia. Twalipapile nga nshi, twalitemenwe, kabili pa nshita imo ine twali no mwenso. Ilyo papitile imyeshi 5, twalifikile mu musumba uukalamba uwa ici calo uo beta ukuti Dili.

Imikalile mu Timor-Leste yalipusene sana na iyo twabeleshe. Twalingile ukusambilila intambi sha kuli cilya calo, ululimi, ukubelesha ifya kulya, e lyo ne  mikalile. Mu mulimo wa mwi bala twalesanga abantu abapiina sana, abashasambilila, e lyo na bo bacusha. Kabili ilingi line twalesanga abantu ababa na mafya ya ku mubili na ya ku muntontonkanya pa mulandu wa nkondo e lyo no bunkalwe. *

Umulimo wa kubila imbila nsuma walewama sana! Ku ca kumwenako, bushiku bumo nalikumene no mukashana uwa myaka 13, Maria. * Tapakokwele ukutula apo banyina bafwiliile, kabili ilingi line talemonana na bawishi. Nga filya fine caba ku bana abengi, apo Maria ali mwaice taishibe ifyo ali no kucita mu bumi. Ndebukisha bushiku bumo ilyo alenondolwela ifyo aleumfwa ninshi alelila. Nomba nshaishibe ifyo alelandapo pantu ninshi nshilaishiba bwino ukulanda ululimi lwakwe. Nalipepele kuli Yehova ukuti angafwe ukukoselesha Maria, lyena natendeke ukumubelengela amalembo ayamusansamwishe. Pa myaka fye iinono, nalimwene ifyo icine calengele Maria, atendeka ukwalula ifyo aletontonkanya, ifyo alemoneka, ne fyo alecita. Alibatishiwe, kabili pali ino nshita alikwata na masambililo ya Baibolo ayo atungulula. Ino nshita Maria alikwata ulupwa lwa ku mupashi ulukalamba kabili alomfwa ukuti alitemwikwa.

Yehova alepaala umulimo wa kubila imbila nsuma mu Timor-Leste. Nangu ca kuti bakasankanya abengi babatishiwe fye mu myaka 10 iyapita, abengi ni bapainiya ba nshita yonse, ababomfi batumikila, nelyo baeluda. Bamo babombela pe ofeshi lya bakapilibula, kabili balabombako umulimo wa kupilibula impapulo shilanda pali Baibolo mu ndimi shabo. Nalitemenwe sana ukumfwa baleimba pa kulongana, ukumona ifyo balemwentula, no kumona ifyo balelunduluka mu fya kwa Lesa.

Ifyo twaleikala ku Timor-Leste fyalipusene sana ne fyo twaleikala ku Australia, lelo nali sana ne nsansa ukucila na pa fyo nale-enekela. Inshita shimo twalenina ka basi akanono kabili twalebamo abengi. Mwaleba ne sabi ilyauma e lyo ne misalu iingi ifyalefuma ku maliketi. Lyena pa nshiku shimo twaletungulula amasambililo ya Baibolo ninshi nakukaba icine cine, mu tuyanda utunono sana kabili umwakaba, umwaleba ifiko pa nshi ne nkoko shilebutauka. Lelo nangu ca kuti kwaleba amafya yonse aya, ilingi line naleipakisha icine cine!

Nga naibukisha ifyalecitika kale, ndatasha sana pa fyo abafyashi bandi baeseshe apo bengapesha ukunsambilisha ifyo Yehova afwaya no kuntungilila, na lintu nalekele ukubombela sana Yehova. Nalishininkisha ukuti ifyo Baibolo ilanda pa Amapinda 22:6 fya cine. Bamayo na batata balitemwa sana ifi ine na ba Alex tubombela Yehova, kabili balitutemwa icine cine. Ukufuma mu 2016, tubombela mu muputule uwaba mu ncende iyo iofeshi lya musambo ilya Australasia lyangalila.

Ndapapa sana nga naibukisha ukuti inshita imo nshatemenwe ukubila imbila nsuma. Pali ino nshita nalitemwa ukubila imbila nsuma! Nalishininkisha ukuti te mulandu ne fingacitika mu bumi bwesu, kuti twaba fye ne nsansa sha cine nga ca kuti tulebombela Yehova no mutima wesu onse. Ukwabula no kutwishika, imyaka 18 iyo nabombela Yehova pamo na ba Alex e myaka naba sana ne nsansa mu bumi bwandi. Nomba nalishininkisha ukuti amashiwi ayo kemba wa malumbo Davidi aebele Yehova ya cine. Atile: “Bonse abooba muli imwe bakasekelela; bakaula utupundu umuyayaya. . . . Na batemwa ishina lyenu bakaangila muli imwe.”—Amalu. 5:11.