1-2. Cilangililo nshi cingatwafwa ukumfwikisha amashiwi yaba pali 1 Petro 2:21?

ELENGANYENI ukuti muli pe bumba lya bantu abale-enda mu mpanga iyafina kabili umwaba umucanga. Uwaishiba bwino sana iyi mpanga e ulemutungulula. Ilyo ale-enda, alesha intampulo nelyo amakasa umwa kuti mulekonka. Lyena pa nshita imo mwaleka ukumumona. Lelo tamusakamikwe. Imwe na bo muli nabo, mwatendeka ukukonka sana mu makasa ayalelanga umwacipita uulemutungulula!

² Cino calo cabipa caba kwati ni mpanga iyafina, kabili fwe Bena Kristu twaba kwati libumba lya bantu abale-enda muli iyi mpanga. Icawamako ca kuti Yehova alitupeela uwingatutungulula bwino sana, Umwana wakwe Yesu Kristu, kabili kuti tulekonka sana mu ntampulo shakwe. (1 Pet. 2:21) Pali ili ilembo Petro apashenye Yesu ku utungulula abantu. Nga filya fine uuletungulula abantu engasha intampulo ishilelangilila umo apitile, Yesu na o alisha intampulo nelyo amakasa umo tulingile ukulakonka. Lekeni twasuke amepusho yatatu ayalelanda pa kukonka mu ntampulo sha kwa Yesu. Bushe ukukonka mu ntampulo sha kwa Yesu kwalola mwi? Cinshi tulingile ukulakonkela mu ntampulo shakwe? Kabili finshi tulingile ukucita pa kuti tulekonka mu ntampulo sha kwa Yesu?

3. Bushe calola mwi ukukonka mu ntampulo sha muntu?

³ Bushe calola mwi ukukonka mu ntampulo sha muntu? Inshita shimo Baibolo nga yabomfya amashiwi ya kuti ‘ukwenda’ na “amakasa” ilosha ku fyo umuntu acita mu bumi bwakwe. (Ukute. 6:9;  Amapi. 4:26) Ifyo umuntu acita kuti twafipalanya ku ntampulo nelyo ku makasa ayashala ilyo ale-enda. Kanshi ukukonka mu ntampulo sha muntu kwalola mu kumupashanya.

4. Calola mwi ukukonka mu ntampulo sha kwa Yesu?

⁴ Calola mwi ukukonka mu ntampulo sha kwa Yesu? Mu mashiwi fye aya-anguka kuti twatila kulamupashanya. Mwi lembo apafumine umutwe wa cino cipande, umutumwa Petro alelanda pa fyo tufwile ukulapashanya Yesu filya ashipikishe ilyo balemucusha. Na lyo line, kwaliba ifingi ifyo twingapashanyamo Yesu. (1 Pet. 2:18-25) Kanshi tulingile ukulapashanya fyonse ifyo Yesu alelanda ne fyo alecita.

5. Bushe fwe bantunse abashapwililika kuti twapashanya Yesu? Londololeni.

⁵ Bushe fwe bantunse abashapwililika kuti twapashanya Yesu? Ee kuti twamupashanya. Ibukisheni ukuti Petro tatwebele ukuti tulingile ukulacita filya fine fye Yesu alecita. Lelo atukoseleshe ‘ukulakonka sana mu ntampulo sha kwa Yesu.’ Nga tulekonka sana mu ntampulo shakwe, e kutila ukulaesha na maka ukulamupashanya nangu ca kuti tatwapwililika, ninshi tulekonka ifyo umutumwa Yohane alandile ukuti: ‘Tufwile ukuba ne mibele iyo Yesu aali na yo.’—1 Yoh. 2:6.

6-7. Cinshi twingalandila ukuti nga tulekonka mu ntampulo sha kwa Yesu tukaba sana ifibusa fya kwa Yehova?

⁶ Ukulakonka sana mu ntampulo sha kwa Yesu kuti kwalenga twaba sana ifibusa na Yehova. Cinshi twalandila ifi? Ica kubalilapo, Yesu lyonse alecita ifyalesekesha Lesa. (Yoh. 8:29) Kanshi nga tulekonka sana mu ntampulo shakwe, tukalasekesha Yehova. Kabili tatwakulatwishika ukuti Shifwe wa ku muulu akapalama sana kuli ifwe nga tule-esha na maka ukuba ifibusa fyakwe.—Yako. 4:8.

⁷ Ica bubili, Yesu alepashanya Wishi muli fyonse. E mulandu wine Yesu alandile ukuti: “Uwamona ine, ninshi amona na Tata.” (Yoh. 14:9) Kuti twapashanya imibele ya kwa Yesu e lyo ne  fyo alecitila abantu. Ku ca kumwenako, alyumfwilile uwalwele ifibashi uluse, alilangulukiileko umwanakashi uwalwele ubulwele ubwabipisha, kabili aleumfwila uluse abafwililwe. Nga tulepashanya Yesu, ninshi tulepashanya na Yehova. (Marko 1:40, 41; 5:25-34; Yoh. 11:33-35) Kabili nga tulepashanya sana Yehova, tukapalama sana kuli ena.

8. Londololeni ico ukulakonka mu ntampulo sha kwa Yesu kwingalengela ‘twacimfya’ icalo.

⁸ Ukukonka mu ntampulo sha kwa Yesu kuti kwatwafwa ukukanapumbulwa ku fya muli ici calo cabipa. Mu nshita ya bushiku ilyo Yesu bali mupepi no kumwipaya, alandile ukuti: “Ine nincimfya icalo.” (Yoh. 16:33) Aloseshe mu kuti alikeene ukukonka ifyo aba muli ici calo baletontonkanya, ifyo balepanga ukucita, ne fyo balecita. Yesu tatalile aleka ukubika amano ku co bamutumiine pano isonde, e kutila ukulenga ishina lya kwa Yehova ukuba ilya mushilo. Inga ifwe? Muli cino calo mwaliba ifingi ifingatupumbula. Lelo nga tulebika amano ku kucita ukufwaya kwa kwa Yehova nga filya Yesu alecita, na ifwe ‘tukacimfya’ icalo.—1 Yoh. 5:5.

9. Finshi tulingile ukucita pa kuti tutwalilile ukwenda mu musebo uwaya ku mweo wa muyayaya?

⁹ Nga tulekonka mu ntampulo sha kwa Yesu tukaba no mweo wa muyayaya. Ilyo umulumendo wa fyuma aipwishe Yesu ifyo alingile ukucita pa kuti abe no mweo wa muyayaya, Yesu amwebele ati: “Wise ube umusambi wandi.” (Mat. 19:16-21) Yesu aebele abaYuda bamo abashasumine ukuti ali ni Kristu ati: “Impaanga shandi . . . shilankonka. Na ine ndashipeela umweo wa muyayaya.” (Yoh. 10:24-29) Na kabili, Yesu aebele Nikodemo uwali shicilye mu cilye ca Sanhedrini, kabili uwalefwaya ukwishibilapo na fimbi pa fyo Yesu alesambilisha ati: ‘Onse uumutetekela akaba no mweo wa muyayaya.’ (Yoh. 3:16) Tulalanga ukuti twalitetekela Yesu nga tulekonka ifyo alesambilisha no kulamupashanya. Nga tulecita ifi, tukatwalilila ukwenda mu musebo uwaya ku mweo wa muyayaya.—Mat. 7:14.

10. Finshi tufwile ukucita pa kuti ‘twishibe’ bwino Yesu? (Yohane 17:3)

¹⁰ Pa kuti tulekonka sana mu ntampulo sha kwa Yesu, tulingile ukubalilapo ukumwishiba. (Belengeni Yohane 17:3 na futunoti.) Pa kuti ‘twishibe’ Yesu tufwile ukutwalilila ukusambilila pali ena. Tulingile ukusambilila pa mibele yakwe, ifyo aletontonkanya, ne fyo alekonka pa kucita ifintu. Te mulandu ne fyo twakokola mu cilonganino ca kwa Yehova, tufwile ukutwalilila ukusambilila pali Yehova no Mwana wakwe pa kuti tubeshibe bwino.

11. Finshi fyaba mu mabuuku 4 aya Mbila Nsuma?

¹¹ Apo Yehova alitutemwa, alilenga amabuuku 4 aya Mbila Nsuma ukuti yabe mu Cebo cakwe, ayengatwafwa ukwishiba Umwana wakwe. Amabuuku ya Mbila Nsuma yalilanda pa bumi bwa kwa Yesu na pa fyo alebomba umulimo wa kubila imbila nsuma. Aya amabuuku yalalanda pa fyo Yesu alelanda, ifyo alecita, ne fyo aleumfwa. Kabili yalatwafwa ‘ukutontonkanya’ sana pa ca  kumwenako ca kwa Yesu. (Heb. 12:3) Kuti twatila muli aya mabuuku mwaliba intampulo ishilangilila umo Yesu alepita. Kanshi nga tuleyabelenga, kuti tuleishibilako bwino Yesu. Ne ci cikalenga tukalekonka sana mu ntampulo shakwe.

12. Finshi twingacita pa kuti tulenonkelamo sana mu mabuuku ya Mbila Nsuma?

¹² Pa kuti tunonkelemo mu mabuuku ya Mbila Nsuma, tatufwile ukupelela fye pa kuyabelenga. Kabili tatufwile ukubelengamo fye lubilo lubilo, lelo tufwile ukubikako sana amano ilyo tuleyabelenga no kutontonkanya sana pa fyo tulebelenga. (Linganyeniko Yoshua 1:8.) Natulande pa fintu fibili ifingatwafwa ukutontonkanya sana pa fyaba mu mabuuku ya Mbila Nsuma na pa fyo twingabomfya ifyo tulebelenga.

13. Kuti mwacita shani pa kuti mule-elenganya ukuti eko muli ilyo ifyo mulebelengapo mwi buuku lya Mbila Nsuma filecitika?

¹³ Ica kubalilapo, mule-elenganya ukuti eko muli ilyo ifyo mulebelengapo mwi buuku lya Mbila Nsuma filecitika. Ilyo mule-elenganya mulemona, muleumfwa ifiunda na mashiwi kabili muleumfwa ifyo abali mu lyashi mulebelengapo baleumfwa. Pa kuti cilemwangukila ukucita ifi, mulefwailapo ifyebo na fimbi mu mpapulo isho icilonganino ca kwa Yehova capekanya. Mulebelenga ifyacitike ilyo ifyo mulebelengapo tafilacitika e lyo ne fyacitike pa numa. Mulefwailapo ifyebo na fimbi pa bantu e lyo ne fifulo ifyo balumbwile mu lyashi mulebelenga. Mulelinganya ilyashi mulebelenga kwi lyashi limo line ilyaba mwi buuku limbi ilya Mbila Nsuma. Inshita shimo uwalembele ibuuku limo, kuti alanda ifingamwafwa ifyo uwalembele ibuuku limbi ilya Mbila Nsuma ashalandilepo.

14-15. Finshi tufwile ukucita pa kuti tulebomfya ifyo tulesambililako ilyo tulebelenga amabuuku ya Mbila Nsuma?

¹⁴ Ica bubili, mulebomfya ifyo mulesambililako ilyo mulebelenga ilyashi mwi buuku lya Mbila Nsuma. (Yoh. 13:17) Pa numa ya kubelenga bwino bwino ilyashi mwi buuku lya Mbila Nsuma, muleyipusha amuti: ‘Bushe kuli ifyo ndesambililako kuli ili lyashi ifyo ningabomfya mu bumi bwandi? Kuti nabomfya shani ili ilyashi pa kwafwa abantu bambi?’ Mule-esha ukutontonkanya pa muntu uo mwingafwa ukubomfya ifyebo musambilile  mu lyashi mwacilabelenga. Kabili nga mwamona ukuti nacilinga, kuti mwamwebako ifyo musambilile ukwabula ukumukalifya.

¹⁵ Lekeni nomba tulangilile ifyo twingabomfya ifi fibili ifyo twalandapo. Twalalanda pe lyashi lya kwa mukamfwilwa umupiina uo Yesu amwene pe tempele.

16. Londololeni ifyalecitika ifyalembwa pali Marko 12:41.

¹⁶ Mule-elenganya ukuti eko muli ilyo ifyo mulebelengapo filecitika. (Belengeni Marko 12:41.) Elenganyeni ifyacitike. Cali ni pa Nisani 11 mu mwaka wa 33, ninshi kushele fye inshiku ishinono ukuti Yesu afwe. Pali ubu bushiku Yesu apoosele inshita iikalamba ukusambilisha abantu mwi tempele. Lelo intungulushi sha mapepo shalemulwisha. Pa nshita imo bamo pali ishi intungulushi balimwipwishe uko afumishe amaka alebomfya pa kucita ifipesha amano. E lyo bambi balemwipusha amepusho ayo balemona kwati ta-asuke. (Marko 11:27-33; 12:13-34) Nomba Yesu aile ku lubali lumbi ulwe tempele. Nalimo aile ku ncende baleita ukuti ulubansa lwa banakashi. Ilyo ali kuli iyi incende alemona ifipao umo balepoosa indalama ifyali mupepi ne fibumba ifyashingulwike iyi ncende. Alikele kabili atendeke ukumona uko abantu balepoosa indalama muli ifi ifipao. Alimwene abakankala abengi balepoosamo indalama ishingi. Nalimo ali mupepi ica kuti aleumfwa no ko indalama shalelila nga shaponena mu cipao.

17. Finshi mukamfwilwa umupiina uo balandapo pali Marko 12:42 acitile?

¹⁷ Belengeni Marko 12:42. Ilyo papitile inshita, Yesu alimwene umwanakashi umo. Uyu umwanakashi ali ni “mukamfwilwa . . . umupiina.” (Luka 21:2) Ifintu fyalyafishe sana kuli uyu mwanakashi kabili nalimo talekwata ne ndalama ishalinga isha kushitamo ifyo alekabila mu mikalile. Na lyo line, alile ku cipao cimo no kupoosamo utundalama utunono tubili utwacela, kabili nalimo tatwapangile ne congo ilyo atupooselemo. Yesu alishibe ifyo uyu mwanakashi apoosele mu cipao, apooselemo utumalepta tubili. Utumalepta e twali utundalama utwacepesha pali ilya nshita, kabili tatwalekumana no kushita fye uluseba lumo. Inseba shali pa fyuni ifyanakile sana umutengo ifyo baleshita ukuti balye.

18. Ukulingana na Marko 12:43, 44, finshi Yesu alandile pa ndalama mukamfwilwa apoosele mu cipao?

¹⁸ Belengeni Marko 12:43, 44. Yesu alitemenwe sana ifyo uyu mukamfwilwa acitile. E ico aitile abasambi bakwe no kubalanga mukamfwilwa, kabili abebele ati: “Uyu mukamfwilwa umupiina apooselemo ukucila bonse.” Lyena abalondolwelele ukuti: “Bonse [maka maka abakankaala] bapooselemo indalama isho bafumishe pa fyuma fyabo, lelo ena, nangu mupiina, napoosamo shonse isho acikwata isha kuliilamo.” Filya mukamfwilwa uwali uwa cishinka apooselemo indalama shonse isho akwete, fyalelanga ukutila alicetekele ukuti Yehova ali no kumusakamana.—Amalu. 26:3.

19. Lisambililo nshi ilyacindama ilyo twingasambilila ku fyo Yesu alandile pali mukamfwilwa umupiina?

¹⁹ Mulebomfya ifyo mulesambililako kuli ili lyashi. Muleyipusha amuti, ‘Lisambililo nshi ningasambilila ku fyo Yesu alandile pali mukamfwilwa umupiina?’ Tontonkanyeni pali uyu mukamfwilwa. Ukwabula no kutwishika alefwaya ukupeela Yehova ifingi. Lelo acitile ifyo engakumanisha; apeele Yehova apapelele amaka yakwe. Kabili Yesu alishibe ukuti ubupe ubo mukamfwilwa apeele bwali ubwacindama mu menso ya kwa Wishi. Isambililo ilyacindama ilyo tulesambililako lya kuti, Yehova alatemwa nga tulemupeela apapelele amaka yesu, e kutila nga tulemubombela no mutima wesu onse, e lyo no mweo wesu onse. (Mat. 22:37; Kol. 3:23) Ala Yehova alatemwa nga nshi nga amona tulemubombela apapela amaka yesu! Pa fintu ifyo twingapeela Yehova apapela amaka yesu, paba inshita na maka yesu ifyo tubomfya mu kumupepa, pamo nga umulimo wa kubila imbila nsuma no kusangwa mu kulongana.

20. Kuti mwabomfya shani ifyo mwasambilila ku lyashi lya kwa mukamfwilwa umupiina? Landeni ica kumwenako.

 ²⁰ Kuti mwabomfya shani ifyo mulesambililako ku lyashi lya kwa mukamfwilwa? Mule-esha ukutontonkanya pa bantu abengakoseleshiwa nga mwabebukishako ukuti Yehova alatasha pa fyo baibikilishako ukumubombela. Ku ca kumwenako, bushe mwalishibako nkashi umukalamba nalimo uumfwa ububi, nelyo uumona kwati tacindama pa mulandu wa kuti alalwalilila nelyo takwata amaka ya kubombesha mu mulimo wa kubila imbila nsuma nga ifyo alebomba kale? Nelyo bushe mwalishibako munyinefwe uulwalilila kabili uufupuka pa mulandu wa kuti alafilwa ukusangwa mu kulongana lyonse pa Ng’anda ya Bufumu? Kuti mwakoselesha aba bwananyina ba musango uyu nga mulebeba “amashiwi ayasuma aya kukuula.” (Efes. 4:29) Mulebebako amasambililo ayasuma ayo tusambilile ku lyashi lya kwa mukamfwilwa umupiina. Ifyo mwingabakoselesha kuti fyalenga bashininkisha ukuti Yehova alatemwa nga nshi nga tulemubombela apapela amaka yesu. (Amapi. 15:23; 1 Tes. 5:11) Nga muletasha bambi pa fyo babombela Yehova apapela amaka yabo nangu ca kuti ifyo balebombela Yehova filemoneka kwati finono, ninshi mulekonka sana mu ntampulo sha kwa Yesu.

21. Finshi mulefwaisha ukulacita?

²¹ Ala tulatasha nga nshi pali ifi mu mabuuku ya Mbila Nsuma mwaba ifyebo ifingi ifilanda pali Yesu, pantu ici cilalenga tulemupashanya no kulakonka sana mu ntampulo shakwe! Kuti mwasambilila pa fyaba mu mabuuku ya Mbila Nsuma ilyo muleisambilisha Baibolo nelyo pa Mapepo ya Lupwa. Natuleibukisha ukuti pa kuti tunonkelemo mu fyo tuleisambilisha, tufwile ukulaelenganya ukuti eko tuli ilyo ifyo tulebelengapo filecitika, kabili tulingile no kulabomfya ifyo tulesambililako. Na kabili, tatulingile ukupelela fye mu kupashanya ifyo Yesu alecita, lelo tulingile no kukutika ku fyo alelanda. Mu cipande cikonkelepo tukalanda pa fyo twingasambilila ku mashiwi Yesu alekelesheko ukulanda ilyo ashilafwa.