ICIPANDE CA KUSAMBILILAMO 17
Yehova Alimutemwa Nga Nshi!
“Yehova asekelela mu bantu bakwe.”—AMALU. 149:4.
ULWIMBO 108 Ukutemwa kwa kwa Lesa
IFYO TWALASAMBILILA *
Shifwe wa ku muulu “asekelela muli ifwe” umo umo (Moneni paragrafu 1)
1. Finshi Yehova amona mu bantu bakwe?
YEHOVA LESA “asekelela mu bantu bakwe.” (Amalu. 149:4) Ukwishiba ifi kulalenga tuleba sana ne nsansa! Yehova alamona imibele yesu iisuma; alishiba ukutila kuti twaba abantu abasuma, kabili alatwafwa ukuba ifibusa fyakwe. Nga twatwalilila ukuba aba cishinka kuli ena akatwalilila ukupalama kuli ifwe umuyayaya!—Yoh. 6:44.
2. Cinshi cilenga bamo cilebakosela ukushininkisha ukuti Yehova alibatemwa?
2 Nalimo abantu bamo kuti balatontonkanya ukuti, ‘Nalishiba ukuti Yehova alitemwa abantu bakwe bonse, nomba kuti nashininkisha shani ukuti alintemwa pa lwandi?’ Cinshi nalimo cingalenga umuntu ukulatontonkanya ifi? Ba Oksana * abaculile sana ilyo bali abaice batile: “Nalitemenwe sana ilyo nabatishiwe no kutendeka bupainiya. Lelo ilyo papitile imyaka 15 nalitendeke ukwibukisha ifyalencitikila ilyo nali umwaice. Natendeke ukumona kwati Yehova tantemwa kabili nshilingile no kutemwikwa kuli ena.” Nkashi Yua uubomba bupainiya uwali na mafya ayengi ilyo ali umwaice atile: “Nali-ipeele kuli Yehova pantu nalefwaya ukumusekesha. Lelo naishibe ukuti takabale antemwa.”
3. Finshi twalasambilila muli cino cipande?
3 Mwalitemwa Yehova nga ifi aba Abena Kristu ba cishinka twalandapo bamutemwa, lelo nalimo mulatwishika nga ca kuti alimutemwa. Cinshi mulingile ukushininkishisha ukuti Yehova alamusakamana? Kabili cinshi mulingile ukucita nga ca kuti muletontonkanya ukuti Yehova tamutemwa? Twalalanshanya pa masuko ya aya mepusho.
UKUTWISHIKA NGA CA KUTI YEHOVA ALITUTEMWA KWALIBIPA
4. Cinshi cabipila ukulatwishika nga ca kuti Yehova alitutemwa?
4 Nga twashininkisha ukuti Yehova alitutemwa twakulaesha apo twingapesha ukumubombela na lintu tuli na mafya. Nomba nga ca kuti tuletwishika ukuti Lesa alatusakamana, ‘amaka yesu yakaba ayanono.’ (Amapi. 24:10) Na kabili nga twafuupuka no kulatontonkanya ukuti Lesa tatutemwa, cikalatukosela ukukaana amatunko ya kwa Satana.—Efes. 6:16.
5. Finshi ficitika ku ba bwananyina bamo nga batendeka ukumona kwati Lesa tabatemwa?
5 Bamunyinefwe na bankashi bamo balitendeka ukutwishika nga ca kuti Yehova alabasakamana, kabili ici calilenga icitetekelo cabo ukunaka. Ba James ba eluda batile: “Nangu ca kuti nalebombela pa Bethel kabili naleipakisha no kubila imbila nsuma mu cilonganino icalebomfya ululimi lwa ku calo cimbi, naletwishika nga ca kuti Yehova alitemenwe ifyo nalebomba. Inshita imo naletwishika nga ca kuti Yehova alekutika amapepo nalepepa.” Ba Eva ababomba umulimo wa nshita yonse batile: “Nalimwene ukuti ukutwishika nga ca kuti Yehova alikutemwa kwalibipa, pantu kuti kwalenga waleka ukubombela bwino Yehova. Kuti kwalenga waleka ukulafwaisha ukubombela Yehova, kabili kuti waleka ukuba ne nsansa ilyo ulemubombela.” Ba Michael bapainiya ba nshita yonse kabili ba eluda batile: “Nga ca kuti tawashininkisha ukuti Lesa alakusakamana kuti wasensenunwa ukufuma kuli ena.”
6. Finshi tulingile ukucita nga twatendeka ukutwishika nga ca kuti Lesa alatusakamana?
6 Ifi ifya kumwenako filetulanga ifyo ukutwishika nga Yehova alitutemwa kwingalenga icitetekelo cesu canaka. Nomba tufwile ukucita shani nga twatendeka ukutwishika nga ca kuti Lesa alitutemwa? Tufwile ukuleka ilyo line fye! Tufwile ukulomba Yehova ukuti atwafwe ukuleka ukutwishika no kuti atupeele ‘umutende wa kwa Lesa uwingalinda imitima yesu na matontonkanyo yesu.’ (Amalu. 139:23; Fil. 4:6, 7) Kabili muleibukisha ukuti te imwe mweka mwe batontonkanya ifi. Kwaliba bamunyinefwe na bankashi aba cishinka abatontonkanya ifyo mutontonkanya. Na babomfi ba kwa Yehova aba ku kale nabo inshita shimo baletwishika nga ca kuti Yehova alebasakamana. Natulande pa fyo twingasambililako ku mutumwa Paulo.
IFYO TUSAMBILILAKO KU FYACITIKIILE PAULO
7. Mafya nshi Paulo akwete?
7 Bushe inshita shimo mumona ukuti imilimo naimufulila ica kutila te kuti mukumanishe ukuibomba yonse? Nga ca kuti e fyo mumona ninshi kuti mwaumfwikisha ifyacitikiile Paulo. Alesakamikwa, te pa mulandu wa cilonganino cimo, lelo ni “pa mulandu wa filonganino fyonse.” (2 Kor. 11:23-28) Bushe ukulwalilila kwalilenga mwilaba ne nsansa? Paulo aleshipikisha “umuunga mu mubili.” Uyu munga nalimo wali bulwele ubo alwele, kabili alefwaisha ukupola. (2 Kor. 12:7-10) Bushe inshita shimo mulafuupuka pa mulandu wa kukanapwililika? Paulo na o alefuupuka inshita shimo. Apo ali uushapwililika ayitile ukuti “ne mulanda wine wine,” pantu alingile ukulaesha na maka pa kuti acite icalungama.—Rom. 7:21-24.
8. Cinshi ca-afwile Paulo ukushipikisha amafya?
8 Paulo alitwalilile ukubombela Yehova, nangu ca kuti aleba na mafya ayengi. Cinshi camwafwile? Nangu ca kuti alishibe ukuti tali uwapwililika alicetekele sana mu cilubula kabili alishibe ifyo Yesu alaile ukuti ‘onse uutetekela Yesu kuti aba no mweo wa muyayaya.’ (Yoh. 3:16; Rom. 6:23) Ukwabula no kutwishika Paulo ali pa batetekele sana mwi lambo lya kwa Yesu. Alishininkishe ukuti Yehova ali-iteyanya ukwelela na bacita imembu ishikalamba nga balapila.—Amalu. 86:5.
9. Finshi tulesambilila ku mashiwi Paulo alandile ayaba pa Abena Galatia 2:20?
9 Paulo alishibe ukuti Lesa alimutemenwe sana pantu atumine Yesu ukwisamufwila. (Belengeni Abena Galatia 2:20.) Umfweni amashiwi yakukoselesha ayo Paulo alandile ayaba kumpela ya cikomo 20. Atile: ‘Umwana wa kwa Lesa, alintemenwe no kuipeela pa mulandu wa ine.’ Paulo talemona kwati ali muntu umubi sana ica kuti Lesa te kuti amutemwe. Taletontonkanya ukuti, ‘Nalimona ico Lesa atemenwa bamunyinane, lelo ine te kuti antemwe.’ Paulo alibukisheko abena Roma ukuti: “Ilyo twali tucili ababembu, Kristu alitufwilile.” (Rom. 5:8) Takuli icingalesha Lesa ukututemwa!
10. Finshi tulesambilila ku mashiwi yaba pa Abena Roma 8:38, 39?
10 Belengeni Abena Roma 8:38, 39. Paulo alishibe ifyo ukutemwa kwa kwa Lesa kwakula. Alembele ukuti takuli nangu cimo icikaba “na maka ya kutupaatulako ku kutemwa kwa kwa Lesa.” Paulo alishibe ifyo Yehova atekanishishe uluko lwa bena Israele. Kabili alishibe ne fyo Yehova amulangile inkumbu. Kanshi mu mashiwi yambi kuti twatila Paulo alelanda ukuti, ‘Apo Yehova atumine Umwana wakwe ukwisamfwila, nshifwile ukulatwishika ukuti alintemwa.’—Rom. 8:32.
Ifyo Lesa abikako amano fintu tucita pali ino nshita ne fyo tukacita ku ntanshi, tabika amano ku fyo twalufyenye kale (Moneni paragrafu 11) *
11. Nangu ca kuti Paulo alicitile imembu pamo nge sho balandapo pali 1 Timote 1:12-15, cinshi calengele ashininkishe ukuti Lesa alimutemenwe?
11 Belengeni 1 Timote 1:12-15. Paulo afwile aleumfwa sana ububi nga atontonkanya pa fyo alecita ilyo ashilaba Umwina Kristu. Te kuti tupape filya Paulo ayitile ukuti umubembu “uwacilapo!” Ilyo Paulo ashilasambilila icine, alecusha Abena Kristu mu misumba iyalekanalekana. Bamo alebapoosa mu fifungo, kabili alesuminishako ukuti bamo babepaye. (Imil. 26:10, 11) Nga ca kuti Paulo alikumenyepo Abena Kristu bacaice abo abafyashi babo bafwile pa mulandu wa kuti alisuminisheko ukuti babepaye, ninshi aleumfwa sana ububi. Paulo aleumfwa ububi pa fyabipa ifyo alecita kale, lelo alishibe ukuti te kuti alule ifya ku numa. Alisumine ukuti Kristu alimufwilile kabili alembele ukuti: “Icikuuku ca kwa Lesa e calenga ukuti mbe fino ndi.” (1 Kor. 15:3, 10) Finshi tulesambililako? Mufwile ukushininkisha ukuti Yesu afwilile imwe, kabili alilengele mwakwata ishuko lya kuba cibusa wa kwa Yehova. (Imil. 3:19) Ifyo Lesa abikako sana amano fintu mucita pali ino nshita ne fyo mukacita ku ntanshi, tabika amano ku fyo mwalufyenye kale nampo nga mwali Inte ya kwa Yehova pali iyo nshita nelyo iyo.—Esa. 1:18.
12. Bushe amashiwi yaba pali 1 Yohane 3:19, 20 kuti yatwafwa shani nga tuleumfwa ukuti tuli bacabecabe, nelyo kwati tatwatemwikwa?
12 Nga mwatontonkanya pa fyo yesu afwilile pa membu shenu, nalimo kuti mwatontonkanya ukuti nshalinga ukupokelela ubu ubupe ubwacindamisha pantu ndi wacabecaba. Cinshi cingalenga mwalatontonkanya ifyo? Imitima yesu iishapwililika kuti yalatubepa no kulenga twalaumfwa kwati tuli bacabecabe nelyo kwati tatwatemwikwa. (Belengeni 1 Yohane 3:19, 20.) Nga twatendeka ukutontonkanya ifi tufwile ukwibukisha ukuti “Lesa alicila imitima yesu.” Nangu twingalaumfwa ukuti Yehova tatutemwa nelyo te kuti atwelele, Shifwe wa ku muulu akatwalilila ukututemwa kabili akatwelela. Tufwile ukushininkisha fwe bene ukuti Yehova alitutemwa. Pa kuti tushininkishe ukuti Yehova alitutemwa, tufwile ukulasambilila Icebo cakwe libili libili, tufwile ukulapepa lyonse, kabili tufwile ukulaba pamo na Bena Kristu banensu. Cinshi cacindamina ukulacita ifi fintu?
IFYO UKUSAMBILILA BAIBOLO, UKUPEPA, NO KUBA PAMO NE FIBUSA KWINGATWAFWA
13. Bushe ukubelenga Icebo ca kwa Lesa kuti kwatwafwa shani? (Moneni na kabokoshi akaleti “ Ifyo Icebo ca kwa Lesa Cibafwa.”)
13 Mulebelenga Icebo ca kwa Lesa cila bushiku. Nga mulecita ifi mukeshiba bwino imibele ya kwa Yehova iisuma. Mukeshiba ifyo amutemwa. Nga muletontonkanya sana pa fyaba mu Cebo ca kwa Lesa cila bushiku, ‘mukalalungika’ ifyo mutontonkanya ne fyaba mu mutima. (2 Tim. 3:16) Ba Kevin ba eluda abalemona ukuti tabacindama batile: “Ukubelenga no kutontonkanya sana pa fyaba mu Amalumbo 103 kwalilengele na-alula ifyo naletontonkanya, no kwishiba ifyo Yehova atontonkanya pali ine.” Ba Eva abo tulandilepo kale batile: “Ubushiku bumo nga bwapwa, ndatontonkanya pa fyo Yehova amona ukuti fyalicindama. Ici cilalenga naba no mutende kabili icitetekelo candi cilakoselako.”
14. Bushe ipepo kuti lyatwafwa shani?
14 Mulepepa lyonse. (1 Tes. 5:17) Nga mulefwaya ukuba ifibusa no muntu, mufwile ukulalanda nankwe sana no kumweba ifyo muleumfwa. Ifi fine e fyo caba na kuli bucibusa bwesu na Yehova. Nga tulemweba ifyo tuleumfwa, ifyo tuletontonkanya, ne fitusakamike ilyo tulepepa kuli ena ninshi tulelanga ukuti twalimucetekela, kabili twalishiba ukuti alitutemwa. (Amalu. 94:17-19; 1 Yoh. 5:14, 15) Ba Yua, abo tulandilepo kale batile: “Ilyo ndepepa nshipeleela fye pa kweba Yehova ifyacincitikila ubo ubushiku. Ndamweba ifyo ndetontonkanya ne fyo ndeumfwa. Ici calilenga nilamona Yehova ngo mukalamba wa pa kampani, lelo ndemumona ngo mufyashi uwatemwa sana abana bakwe.”—Moneni akabokoshi akaleti, “ Bushe Mwalicibelenga?”
15. Bushe Yehova alanga shani ukuti alitubikako amano?
15 Muleba pamo ne fibusa ifya cishinka. Ifi ifibusa bupe ubo Yehova atupeela. (Yako. 1:17) Ifi Shifwe wa ku muulu atupeela bamunyinefwe na bankashi abatulanga ukutemwa lyonse, filanga ukuti alitubikako amano. (Amapi. 17:17) Muli kalata Paulo alembeele abena Kolose alilandile pa Bena Kristu bamo abalemutungilila, alandile pali bena ukuti “e bankoselesha.” (Kol. 4:10, 11) Nangu fye ni Kristu Yesu alekabila ukumwafwa kabili aletasha pa fyo ifibusa fyakwe bamalaika na bantunse balemwafwa.—Luka 22:28, 43.
16. Bushe ifibusa ifya cishinka kuti fyalenga shani twaba sana ifibusa fya kwa Yehova?
16 Bushe muleba ifibusa mu cilonganino ukumwafwa, kabili bushe mulasumina nga balefwaya ukumwafwa? Ukwebako cibusa wesu umukalamba mu fya kwa Lesa ifiletusakamika tacipilibula ukuti ninshi icitetekelo cesu tacakosa, lelo ukucita ifi kuti kwatucingilila. Tontonkanyeni pa fyo ba James abo tulandilepo kale balandile, batile: “Ukupanga ifibusa na Bena Kristu abakalamba mu fya kwa Lesa kwalingafwa sana. Nga ninsakamikwa ifi ifibusa balantekanishisha no kukutika kuli ine, kabili balanjeba ukuti balintemwa. Ifi bacita filalenga ndemona ukuti Yehova alintemwa kabili alimbikako amano.” Kanshi calicindama ukupanga ifibusa na bamunyinefwe na bankashi!
MULEIKALA MU KUTEMWA KWA KWA YEHOVA
17-18. Ni nani tulingile ukumfwila, kabili mulandu nshi?
17 Satana afwaya twaleka ukwesha na maka ukucita icalungama. Afwaya tulemona kwati Yehova tatutemwa, kabili tatwalinga no kutupususha. Nomba nga fintu tusambilile, ubu bufi ubwafita fititi.
18 Yehova alimutemwa. Mwalicindama mu menso yakwe. Nga mulemumfwila, “mukekala mu kutemwa . . . kwakwe” umuyayaya nga filya Yesu aikala mu kutemwa kwa kwa Yehova umuyayaya. (Yoh. 15:10) Kanshi mwilaumfwila Satana nelyo umutima wenu nga ulemweba ukuti Yehova tamutemwa. Lelo mulekutika kuli Yehova uumona ifisuma muli ifwe umo umo. Mwilatwishika ukuti “asekelela mu bantu bakwe,” ukubikako fye na imwe!
ULWIMBO 141 Umweo Waba Cipesha Amano
^ para. 5 Bamunyinefwe na bankashi bamo cilabakosela ukusumina ukuti Yehova alibatemwa. Muli cino cipande twalasambilila pa fingalenga twashininkisha ukuti Yehova alitutemwa pa lwesu. Kabili twalasambilila na pa fyo twingacita nga ca kuti tuletwishika ukuti Lesa alitutemwa.
^ para. 2 Amashina yamo nabayalula.
^ para. 67 UBULONDOLOSHI BWA CIKOPE: Ilyo Paulo ashilasambilila icine, alecusha Abena Kristu kabili abengi alibapoosele mu cifungo. Ilyo asumiine mwi lambo lya kwa Yesu alekoselesha Abena Kristu banankwe, bamo abo alekoselesha nalimo bali ni balupwa wabo alecusha.
