ICIPANDE CA KUSAMBILILAMO 19
Ifyo Twingacita pa Kuti Tucetekele Ifyo Yehova Atulaya Ukuti Kukaba Icalo Cipya
“Bushe kwaliba ico [Yehova] alanda no kukanacicita?”—IMPE. 23:19.
ULWIMBO 142 Twikatishe Isubilo Twakwata
IFYO TWALASAMBILILA a
1-2. Cinshi tufwile ukucita ilyo tulelolela icalo cipya?
TWALITEMWA sana ifi Yehova alaya ukuti akaleta icalo cipya umukaba ubulungami. (2 Pet. 3:13) Nangu ca kuti tatwaishiba ilyo icalo cipya cikesa, ifilecitika mu calo filelangilila ukuti icalo cipya cili mupepi sana.—Mat. 24:32-34, 36; Imil. 1:7.
2 Te mulandu ne myaka iyo twabombela Yehova bonse fye tufwile ukulakosha icitetekelo cesu mu fyo Yehova atulaya. Mulandu nshi twalandila ifi? Pantu na bantu abakwata icitetekelo cakosa kuti banaka. Na kuba umutumwa Paulo alandile pa kukanaba ne citetekelo ukuti, “lubembu ulutwikata bwangu.” (Heb. 12:1) Pa kuti icitetekelo cesu tacinakile, tufwile ukutwalilila ukulatontonkanya pa fintu ifilangilila ukuti icalo cipya cili mupepi.—Heb. 11:1.
3. Finshi twalasambilila muli cino cipande?
3 Muli cino cipande twalalanda pa fintu fitatu ifingatwafwa ukukosha icitetekelo cesu mu fyo Yehova atulaya ukuti kukaba icalo cipya. Twalasambilila (1) ukulatontonkanya pa cilubula, (2) ukulatontonkanya pa maka Yehova akwata na (3) ukulacita ifintu ifingalenga twapalama kuli Lesa. Lyena twalasambilila pa mashiwi Yehova aebele Habakuki ayakosha icitetekelo cesu muno nshiku. Nomba intanshi natulande pa fintu fimo ifyo tufwile ukulangamo ukuti twalicetekela ifyo Yehova atulaya ukuti kukaba icalo cipya.
AMAFYA AYAKABILA UKUBA NE CITETEKELO CAKOSA
4. Finshi tusalapo ukucita ifikabila twaba ne citetekelo icakosa?
4 Cila bushiku tulasalapo ukucita ifintu ifilanga ukuti twaliba ne citetekelo cakosa. Ku ca kumwenako, kuti twasalapo abengaba ifibusa fyesu, ifyo twingalacita pa kulesha icitendwe, amasambililo tulefwaya ukukwata, uo tulingile ukuupana nankwe, nampo nga tulingile ukukwata abana nelyo iyo e lyo ne ncito tulingile ukubomba. Kuti cawama ukutontonkanya pali ifi fipusho, ‘Bushe ifyo nsalapo ukucita filanga ukuti nalishininkisha ukuti cino calo cili mu kupwa, kabili icalo ca kwa Lesa cili mupepi? Nelyo bushe ifyo nsalapo ukucita fyalipalana ne fyo abatontonkanya ukuti takwakabe icalo cipya bacita?’ (Mat. 6:19, 20; Luka 12:16-21) Tukalasalapo bwino ifya kucita nga twacetekela ukuti icalo cipya cili mupepi.
5-6. Mulandu nshi tukabila icitetekelo cakosa ilyo tuli na amafya? Langilileni.
5 Na kabili tulakwata amafya ayakabila twaba ne citetekelo cakosa. Amafya pamo nga ukutucusha, ukulwalilila, nelyo amafya yambi ayengalenga twafuupuka. Pa kubala kuti twamona kwati kuti twashipikisha aya mafya. Nomba aya amafya twalandapo ilingi tayapwa bwangu, kanshi tulakabila icitetekelo cakosa pa kuti tushipikishe no kutwalilila ukulasekelela ilyo tulebombela Yehova.—Rom. 12:12; 1 Pet. 1:6, 7.
6 Nga tuli na mafya kuti twalamona kwati icalo cipya ico Yehova atulaya cilekokola ukwisa. Bushe ici cilepilibula ukuti icitetekelo cesu tacakosa? Awe nakalya! Ku ca kumwenako, nga nakutalala sana nalimo kuti twaumfwa kwati takwakatale akukabapo. Nomba inshita ya lusuba nga yafika kulakaba. Ifi fine e fyo twingomfwa nga natufuupulwa sana kuti twamona kwati takwakabe icalo cipya. Nomba icitetekelo cesu nga nacikosa tuleshiba ukuti Lesa akafikilisha ifyo atulaya. (Amalu. 94:3, 14, 15; Heb. 6:17-19) Nga natucetekela ukuti ifyo Lesa atulaya fikacitika, kuti twatwalilila ukulabika amano ku kumupepa.
7. Finshi ifyo tatulingile ukulatontonkanyapo?
7 Na kabili tulakabila ukuba ne citetekelo cakosa pa kuti tulebila imbila nsuma. Abantu abengi abo tubilako imbila nsuma, bamona ukuti “imbila nsuma” iyo tubila pa calo cipya malanda kanwa fye. (Mat. 24:14; Esek. 33:32) Tatufwile ukulatontonkanya nge fyo batontonkanya. Tufwile ukutwalilila ukukosha icitetekelo cesu pa kuti twilatwishika ifyo Yehova atulaya. Natulande pa fintu fitatu ifyo tufwile ukucita pa kukosha icitetekelo cesu.
MULETONTONKANYA PA CILUBULA
8-9. Bushe ukutontonkanya pa cilubula kuti kwalenga shani twaba ne citetekelo cakosa?
8 Cimo ico twingacita pa kukosha icitetekelo cesu kulatontonkanya pa cilubula. Icilubula cilalenga twashininkisha ukuti ifyo Lesa atulaya fikacitika. Nga twatontonkanya sana pa mulandu Lesa atupeelele icilubula, e lyo ne fyo aipeeleshe pa kuti atupeele icilubula, icitetekelo cesu cilakoselako. Tulacetekela ukuti ifi Lesa atulaya ukuti tukaba no mweo wa muyayaya mu calo icipya, fikacitika. Mulandu nshi twalandila ifi.
9 Finshi fyaba mu cilubula? Yehova atumine umwana wakwe ibeli uo atemwisha uwali cibusa wakwe uwaishilefyalwa uwapwililika pano isonde. Ilyo Yesu ali pano sonde alishipikishe amafya ayengi lyena aliculile kabili alifwile imfwa ya museebanya. Ala Yehova aliipeleshe icine cine pa kutupeela icilubula. Lesa wesu uwatutemwa te kuti aleke Umwana wakwe ukucula no kufwa e lyo atupeela ubumi ubwa kwikala fye inshita inono. (Yoh. 3:16; 1 Pet. 1:18, 19) Apo Yehova alitupeele umwana wakwe uo atemwisha akashininkisha ukuti twaikala umuyayaya mu calo cipya.
MULETONTONKANYA PA MAKA YEHOVA AKWATA
10. Ukulingana na mashiwi yaba pa Abena Efese 3:20, finshi Yehova engacita?
10 Icalenga bubili icingalenga icitetekelo cesu ukukosa, kutontonkanya pa maka Yehova akwata. Alikwata amaka ya kufikilisha fyonse ifyo alaya ukucita. Ca cine abantu abengi bamona kwati ifyo Lesa atulaya ukuti tukekala umuyayaya mu calo cipya te kuti ficitike. Lelo Yehova alalaya ifintu ifingi ifyo abantu bashingacita. Na kuba ni Lesa wa maka Yonse. (Yobo 42:2; Marko 10:27) E co tatupapa nga ca kuti atulaya ifintu ifisuma nga nshi.—Belengeni Abena Efese 3:20.
11. Landeni pali fimo ifyo Yehova alaile ifyalemoneka kwati te kuti ficitike. (Moneni akabokoshi kaleti “ Fimo Ifyacindama Ifyo Lesa Alaile Ifyafikilishiwe.”)
11 Natulandeko pa fintu fimo ifyo Yehova alaile abantu bakwe ku kale ifyo bamwene kwati te kuti ficitike. Alyebele Abrahamu na Sara ukuti bali no kukwata umwana umwaume nangu ca kuti balikotele. (Ukute. 17:15-17) Na kabili aebele Abrahamu ukuti abali no kufuma mu lupwa lwakwe bali no kubapeela icalo ca Kaanani. Ilyo abena Israele abafumine mu lupwa lwa kwa Abrahamu bali mu busha mu Egupti pa myaka iingi, balemona kwati ifyo Lesa alaile Abrahamu tafyakacitike. Lelo fyalicitike. Pa numa, Yehova aebele Elisabete ukuti ali no kukwata umwana nangu ca kuti ali mukote. Na kabili Yehova aebele Maria uwali nacisungu ukuti ali no kukwata Umwana umwaume uwa kwa Lesa uo Yehova alaile imyaka iingi mwi bala lya Edeni ukuti ali no kwisa. Ifi fyacitike fyali no kufikilisha ubusesemo Yehova alaile.—Ukute. 3:15.
12. Bushe amashiwi yaba pali Yoshua 23:14 na Esaya 55:10, 11, yalenga twashininkisha cinshi pa maka Yehova akwata?
12 Nga twatontonkanya pa fyo Yehova alandile e lyo ne fyo afifikilishe tuleshiba ukuti alikwata sana amaka ne ci cilalenga tucetekele ukuti icalo cipya ico atulaya cikesa. (Belengeni Yoshua 23:14; Esaya 55:10, 11.) Ici cilalenga twaishiba ifya kwafwa abantu ukwishiba ukuti icalo cipya ico Lesa atulaya cikesa, te lyashi lya kwelenganya fye. Yehova umwine ilyo alelanda pa myulu ipya ne sonde lipya atile: “aya mashiwi ya cishinka kabili ya cine”—Ukus. 21:1, 5.
MULECITA IFINTU IFINGALENGA MWAPALAMA KULI YEHOVA
UKULONGANA
Bushe ifi kuti fyakosha shani icitetekelo cenu? (Moneni paragrafu 13)
13. Bushe ukulongana kuti kwakosha shani icitetekelo cesu? Londololeni.
13 Icalenga butatu ico tulingile ukucita pa kuti tukoshe icitetekelo cesu kulacita ifintu ifingalenga twapalama sana kuli Yehova. Ku ca kumwenako, tontonkanyeni pa fyo tunonkelamo ilyo tuli pa kulongana kwa pa cilonganino. Ba Anna, ababomba imilimo iingi mu mulimo wa nshita yonse uwaibela kabili ababomba pa myaka iingi batile: “Ukulongana kulalenga naba ne citetekelo icakosa nangu ca kuti uulelanda ilyashi taishiba sana ukusambilisha nelyo talandilepo icintu icili conse ico nshaishiba. Ilingi ndasambililako fimo ifilenga naishibilako icine icaba mu Baibolo ne fi filalenga icitetekelo candi ukukoselako.” b Icitetekelo cesu cilakoselako ilyo aba bwananyina ba-asukapo pa kulongana.—Rom. 1:11, 12; 10:17.
UKUBILA IMBILA NSUMA
Bushe ifi kuti fyakosha shani icitetekelo cenu? (Moneni paragrafu 14)
14. Bushe ukubila imbila nsuma kukosha shani icitetekelo cesu?
14 Na kabili tulakosha icitetekelo cesu nga tulebilako imbila nsuma. (Heb. 10:23) Ba Barbara ababombela Yehova ukucila pa myaka 70 batile: “Lyonse ndamona ukuti ukubila imbila nsuma, kulakosha icitetekelo candi. Nga nde-ebako abantu pa fisuma ifyo Yehova atulaya icitetekelo candi cilakoselako.”
UKUISAMBILISHA BAIBOLO
Bushe ifi kuti fyakosha shani icitetekelo cenu? (Moneni paragrafu 15)
15. Bushe ukuisambilisha Baibolo kukosha shani icitetekelo cesu? (Moneni ne cikope.)
15 Natulandeko na pali cimbi ico twingacita, icingakosha icitetekelo cesu. Ne ci, kulaisambilisha Baibolo. Ba Susan balandile ukuti, nga na batantikila kabela inshita ya kuisambilisha Baibolo cilabafwa sana. Batile: “Pa Mulungu ndapekanishisha limo Isambililo lya Ulupungu lwa kwa Kalinda ilya mulungu uleisa. Pali Cimo na pali Cibili ndapekanya ukulongana kwa Imikalile. Lyena inshiku shishala e mo njisambilisha fimbi ifyo ningatemwa ukwishiba.” Pa mulandu wa kuti ba Susan balakonka ifyo batantika inshita sha kuisambilisha, icitetekelo cabo cilaya cilekoselako. Ba Irene ababombela pa maofeshi yakalamba aya Nte sha kwa Yehova pa myaka iingi basanga ukuti, ukusambilila amasesemo ya mu Baibolo kulakosha icitetekelo cabo. Batile: “Ndapapa sana ukumona ukuti fyonse ifyo Yehova asobela filacitika.” c
“UKWISA CIKESA”
16. Mulandu nshi ifyo Yehova aebele Habakuki fingatukoselesesha na ifwe muno nshiku? (AbaHebere 10:36, 37)
16 Ababomfi ba kwa Yehova bamo, kale batendeka ukulolela ukuti icalo cabipa cikapwe. Abantu bamo bamona, kwati Yehova alakokola ukonaula cino calo cabipa. Nomba Yehova aleshiba ifyo ababomfi bakwe bomfwa e calengele ebe kasesema Habakuki ukuti: “icimonwa ca nshita ya ku ntanshi, lelo cilebutukisha ukulola ku mpela, kabili tacakabepe ubufi. Nangu fye nga cashingashinga, ulecilolela; pantu ukwisa cikesa. Tacakacelwe” (Haba. 2:3) Bushe aya mashiwi Lesa alandile yakoseshe fye Habakuki, nelyo kuti yatukoselesha na ifwe muno nshiku? Yehova alengele umutumwa Paulo ukulembela aya amashiwi Abena Kristu abalolela icalo icipya. (Belengeni AbaHebere 10:36, 37.) Kanshi kuti twacetekela ukuti, nangu ca kuti tulemona kwati icalo ico Yehova atulaya cilekokola ukwisa, ukwisa cikesa “tacakacelwe!”
17. Bushe nkashi umo abomfeshe shani ifyo Yehova aebele Habakuki?
17 Ababomfi ba kwa Yehova abengi balakonka amashiwi Yehova aebele Habakuki aya kuti, “ulecilolela,” kabili bamo balilolela pa myaka iingi. Ku ca ku mwenako, ba Louise batendeke ukubombela Yehova mu 1939. Batile: “Pali ilya nshita nalemona kwati Armagedone Yali no kwisa ninshi nshilapwisha ne sukulu. Lelo ifi tafyacitike. Pa myaka iingi nalisanga ukuti ukubelenga amalyashi ayalanda pa bantu abalelolela ukuti ifyo Yehova abalaile fifikilishiwe, kwalingafwa ukulolela ukuti Yehova akafikilisha ifyo atulaya. Ndabelenga amalyashi ya mu Baibolo ayalanda pali Noa, Abrahamu, Yosefe, e lyo na bambi, abalelolela pa myaka iingi ukuti ifyo Yehova abalaile fikafikilishiwe.” Abengi ababombela Yehova pa myaka iingi kuti balanda nge fyo ba Louise balandile.
18. Bushe ukumona ifyo Lesa abumba kuti kwalenga shani twacetekela ukuti icalo cipya cikesa?
18 Ca cine ukuti icalo cipya tacilaisa. Nomba tontonkanyeni pa fintu fimo ifyabako pamo nga, intanda, ifimuti, inama e lyo na abantu. Takuli uwingatwishika ukuti ifi fintu e ko fyaba nangu ca kuti kwali inshita imo ilyo tafyaliko. Nomba fyonse e ko fyaba pantu Yehova e wafibumbile. (Ukute. 1:1, 26, 27) Lesa wesu alilaya ukuti akaleta icalo cipya, kabili akafikilisha ifyo atulaya. Mu calo cipya abantu bakalaikala umuyayaya kabili bakaba no bumi bwapwililika. Kuti twacetekela ukuti icalo cipya cikesa pa nshita iyo Lesa umwine apekanya.—Esa. 65:17; Ukus. 21:3, 4.
19. Kuti mwakosha shani icitetekelo cenu?
19 Pali ino nshita twalilileni ukucita ifyo mwingakumanisha pa kuti mukoshe icitetekelo cenu. Lyonse muletasha pa cilubula. Muletontonkanya pa maka Yehova akwata. Mulecita ifintu ifingalenga mwapalama sana kuli Yehova. Nga mulecita ifi, mukaba pa bantu “abo abapokelelwe ifyalaiwe pantu balitetekele kabili balitekenye.”—Heb. 6:11, 12; Rom. 5:5.
ULWIMBO 139 Elenganyeni Ukuti E ko Muli Ilyo Fyonse Fyalengwa Ifipya
a Abantu abengi muno nshiku tabacetekela ifyo Baibolo yatulaya ukuti kukaba icalo cipya. Bamona ukuti ifyo Baibolo ilanda lushimi fye te kuti ficitike. Na lyo line, twalicetekela ukuti fyonse ifyo Yehova atulaya fikafikilishiwa. Nangu cibe fyo pa kuti tutwalilile ukucetekela ifyo Yehova atulaya tufwile ukukosha icitetekelo cesu. Kuti twacita shani pa kuti tukoshe icitetekelo cesu? Twalasambilila ifyo twingacita muli cino cipande.
b Amashina yamo na bayalula.
c Kuti twasanga ifipande ifingi ifilanda pa masesemo ya mu Baibolo mu Icisontelelo ca Mpapulo sha Watch Tower pa mutwe utila “Ubusesemo.” Ku ca kumwenako moneni icipande citila “Ifyo Yehova Asobela Filacitika” mu Ulupungu lwa kwa Kalinda ulwa January 1, 2008.
