ICIPANDE CA KUSAMBILILAMO 18
Mulekoseleshanya Ilyo Muli pa Kulongana
“Tutontonkanye pa banensu . . . tulekoseleshanya.”—HEB. 10:24, 25.
ULWIMBO 88 Nengeni Ukwishiba Inshila Shenu
IFYO TWALASAMBILILA a
1. Mulandu nshi twasukilapo pa kulongana?
MULANDU nshi twila mu kulongana? Umulandu uukalamba wa kuti tuya mu kulumbanya Yehova. (Amalu. 26:12; 111:1) Na kabili tulaya mu kulongana pa kuti tulekoseleshanya muli shino nshiku isha-afya. (1 Tes. 5:11) Nga twa-asukapo pa kulongana, ninshi tulelumbanya Yehova no kukoselesha aba bwananyina.
2. Ni lilali twingasukapo ilyo tuli pa kulongana?
2 Cila mulungu tulakwata ishuko lya kwasukapo pa kulongana. Ku ca kumwenako, mu kulongana kwa pa mpela ya mulungu, kuti twa-asukapo pa Isambililo lya Ulupungu lwa kwa Kalinda. Mu Ukulongana kwa Imikalile, kuti twa-asukapo pa Ukufwayafwaya Icuma Icaba mu Cebo ca kwa Lesa, pa Isambililo lya Baibolo Ilya pa Cilonganino, e lyo na malyashi yambi umuba ifipusho ne fyasuko.
3. Finshi nalimo ifingalenga cileafya ukwasukapo pa kulongana, kabili bushe amashiwi yaba pa AbaHebere 10:24, 25 kuti yatwafwa shani?
3 Bonse tulafwaya ukulumbanya Yehova no kukoselesha aba bwananyina. Nomba kwaliba ifingalenga ca-afya ukwasukapo. Nalimo tulomfwa umwenso wa kwasukapo, nelyo limo kuti tulefwaya ukwasukapo sana nomba tabaletusonta. Kuti twapwisha shani aya mafya? Ifyo umutumwa Paulo alembeele abaHebere kuti fyatwafwa ukusanga icasuko kuli ici cipusho. Ilyo alandile pa co cacindamina ukulalongana, alandile ukuti tufwile ukulabika amano ku ‘kulakoseleshanya.’ (Belengeni AbaHebere 10:24, 25.) Ukwibukisha ukuti ifyo twasuka filakoselesha aba bwananyina, cikalenga twikalaumfwa umwenso ukwasukapo. Kabili nga tabaletusonta sana, tufwile ukulasekelela ukuti bambi mu cilonganino nabo nabakwata ishuko lya kwasukapo.—1 Pet. 3:8.
4. Finshi fitatu ifyo twalasambilila muli cino cipande?
4 Muli cino cipande, twalalanda pa fyo twingalakoseleshanya nga ca kutila icilonganino cinono, kabili banono abasukapo. Kabili twalasambilila ifyo twingalakoseleshanya nge cilonganino cikalamba, kabili abantu abengi balafwaya ukwasukapo. Na pa kulekelesha, twalasambilila ifyo twingala-asuka amasuko ayengakoselesha aba mu cilonganino.
IFYO MWINGALAKOSELESHANYA NGA CA KUTI ICILONGANINO CENU CINONO
5. Kuti tulekoseleshanya shani na ba bwananyina nga ca kuti icilonganino cesu cinono?
5 Mu cilonganino icinono nelyo ibumba, tamuba aba kwasukapo abengi abo uuletungulula engasonta. Limo uuletungulula afwile ukulolelako pa kuti bemye amaboko. Ici cilalenga ukulongana ukukanawama, kabili takukoselesha aba bwananyina. Bushe ifi nga e fyo caba, kuti mwacita shani? Muleitemenwa ukwasukapo imiku iingi. Nga muleasukapo, mukalenga na bambi ukutendeka ukwasukapo.
6-7. Finshi twingacita pa kuti tatuleumfwa sana umwenso wa kwasukapo?
6 Finshi mwingacita nga ca kuti mulomfwa umwenso wa kwasukapo? Abengi balomfwa umwenso wa kwasukapo. Nomba pa kuti mulekoselesha aba bwananyina ilyo muli pa kulongana, mufwile ukwishiba ifyo mwingacita pa kuti mwilaumfwa umwenso wa kwasukapo. Finshi ifyo fine mwingacita?
7 Cimo icingamwafwa, kupituluka mu fipande fimo ifyafumine mu Ulupungu lwa kwa Kalinda. b Ku ca kumwenako, mulepekanya bwino. (Amapi. 21:5) Nga ca kuti mwaishiba bwino ifyo mukaya mu kusambililapo, tamwakaleumfwa umwenso wa kwasukapo. Na kabili, muleasuka ifyasuko ifipi. (Amapi. 15:23; 17:27) Tamwakaleumfwa umwenso nga ca kuti mupekenye ukuya-asuka icasuko icipi. Icasuko icipi umuli amashiwi ayanono kuti ca-angukila aba bwananyina ukumfwa ifyo mulelandapo ukucila icasuko icitali umo mulefwaya ukulanda pa fintu ifingi. Nga mwa-asuka icasuko icipi mu mashiwi yenu, mukalanga ukuti namupekanya bwino kabili namumfwikisha ne fyo mulesambililapo.
8. Bushe Yehova amona shani ifyo tuibikilishako ukwasukapo?
8 Nomba kuti mwacita shani nga ca kuti mucili muleumfwa umwenso wa kwasukapo ukucila pa muku umo nangu ca kuti namucita ifi twalandapo? Muleibukisha ukuti Yehova alatasha pa fyo muleibikilishako ukwasukapo apapelele amaka yenu. (Luka 21:1-4) Yehova tatweba ukucita ifyo tushingakumanisha. (Fil. 4:5) Ishibeni ifyo mwingakumanisha ukucita, esheni ukucita ifyo mwapanga, kabili pepeni ukuti mushipe. Nalimo ico mwingabalilapo ukupanga, kwasuka icasuko icipi.
IFYO MWINGAKOSELESHA ABA BWANANYINA NGE CILONGANINO CENU CIKALAMBA
9. Bwafya nshi mwingakwata nga ca kuti mwaba mu cilonganino umwaba bakasabankanya abengi?
9 Nga ca kuti mu cilonganino mulongana mwaba bakasabankanya abengi, nalimo ubwafya mwingakwata kuti bwapusana no bwaba mu cilonganino umwaba bakasabankanya abanono. Nalimo aba bwananyina abengi balasukapo ica kuti limo tabamusonta. Ku ca kumwenako, Ba nkashi Danielle balitemwa ukwasukapo ilyo bali pa kulongana. c Bamona ukuti ukwasukapo lubali lwa kupepa, ukukoselesha aba bwananyina, kabili kulalenga bacetekela sana ifyo Baibolo isambilisha. Nomba ilyo bakukiile mu cilonganino umwali bakasabankanya abengi, tabalebasontapo imiku iingi. Inshita shimo tabalebasonta no kubasonta. Ba Danielle batile: “Naleumfwa sana ububi. Nalemona kwati kuli fimo ifyo mpushilwe pa kulongana. Kabili nga ca kuti lyonse tabalekusonta, kuti watendeka ukutontonkanya ukuti balecitila fye ku mufulo.”
10. Finshi twingacita pa kuti tuleasukapo sana pa kulongana?
10 Bushe na imwe mwalyumfwapo nge fi ba Danielle baleumfwa? Nga ca kuti mwalyumfwapo, nalimo kuti mwafuupuka ica kuti mwaleka no kwasukapo pa kulongana. Nomba tamufwile ukuleka ukwasukapo. Finshi mwingacita pa kuti muleasukapo. Ilyo mulepekanya ukulongana konse, mulepekanya ifyasuko ifingi. Nga namupekanya ifyasuko ifingi, nga ca kuti tabamusontele mu lyashi lya kubalilapo, kuti bamusonta ilyo ukulongana kushilapwa. Ilyo mulepekanya Ulupungu lwa kwa Kalinda, muletontonkanya ifyo paragrafu imo na imo ikatene no mutwe mulesambililapo. Nga mulecita ifi, mukalakwata ifyasuko na fimbi ifyo mwingasuka ilyo muli pa kulongana. Na kabili kuti mwapekanya ukwasuka mu maparagrafu umuli ifishinka ifyashika ifya-afya ukulondolola. (1 Kor. 2:10) Mulandu nshi cacindamina ukwasuka mu maparagrafu ya musango uyu? Pantu nalimo banono fye abengasukapo. Nomba finshi mwingacita nga ca kuti mwalicita fyonse ifi twalandapo nomba tabamusonta? Kuti mwaebela limo uuletungulula, icipusho mulefwaya ukwasukapo ilyo ukulongana takulatendeka.
11. Bushe amashiwi yaba pa Abena Filipi 2:4, yatukoselesha ukucita cinshi?
11 Belengeni Abena Filipi 2:4. Lesa aebele umutumwa Paulo ukuti akoseleshe Abena Kristu ukuti belabika fye amano ku fyo balefwaya abene. Kuti twabomfya shani ifyo Paulo akoseleshe Abena Kristu ilyo tuli pa kulongana? Nga tuleibukisha ukuti aba bwananyina nabo balafwaya ukwasukapo.
Nga filya fine mufwaya ifibusa ukulandapo ilyo mulelanshanya, ilyo muli pa kulongana muleleka bambi nabo baleasukapo (Moneni paragrafu 12)
12. Ni nshila nshi imo iisuma iyo twingakoseleseshamo aba bwananyina ilyo tuli pa kulongana? (Moneni ne cikope.)
12 Tontonkanyeni pali ici. Bushe nga mulelanshanya ne fibusa fyenu ni mwe mufwaya fye ukuti mulelanda mweka? Awe. Mufwaya ukuti nabo balandapo. Ifi fine e fyo caba na pa kulongana. Tulafwaya ukuti aba bwananyina abengi baleasukapo. Na kuba, inshila imo iisuma iyo twingakoseleseshamo aba bwananyina kulaleka nabo baleasukapo pa kulongana. (1 Kor. 10:24) Natumone ifyo twingacita ifi.
13. Kuti twacita shani pa kuti aba bwananyina abengi baleasukapo pa kulongana?
13 Cimo ico twingacita, kulaipifya ifyasuko pa kuti abantu abengi nabo baleasukapo. Baeluda e lyo na bakasabankanya abakalamba mu fya kwa Lesa e balingile ukuba pa ntanshi ukulacita ifi twalandapo. Na lintu mwa-asuka icasuko icipi, mwilalanda ifishinka fyonse. Nga mwalanda pa fishinka fyonse ifili mu paragrafu, aba bwananyina te kuti bakwate ifishinka ifya kwasukapo. Ku ca kumwenako, muli ino paragrafu twasambilila ukuti mulingile ukula-asuka ifyasuko ifipi kabili tamufwile ukulanda ifishinka fyonse. Nga ca kuti ni mwe babalilapo ukusonta ukwasukapo muli ino paragrafu, kuti cawama mwa-asuka fye pa cishinka cimo.
Ni lilali twingasalapo ukukanaimya ukuboko ilyo tuli pa kulongana? (Moneni paragrafu 14) f
14. Cinshi cingatwafwa ukwishiba imiku twingemya ukuboko ukuti twasukepo? (Moneni ne cikope.)
14 Muleiluka pa kuti muleishiba imiku mwingasukapo. Nga tuleimya libili libili ukuboko, uuletungulula kuti alatusonta fye nangu ca kuti kuli bambi abemishe ukuboko abashaswikepo. Ici kuti calenga bambi ukuleka ukwimya amaboko.—Luk. Mil. 3:7.
15. (a) Finshi twingacita nga ca kuti tabatusontelepo? (b) Bushe uuletungulula kuti alanga shani ukuti alelangulukilako bonse abali pa kulongana? (Moneni akabokoshi akaleti “ Nga ni Mwe Muletungulula.”)
15 Nga ca kuti bakasabankanya abengi baleimya amaboko ukuti basukepo, nalimo te kuti batusonte imiki iingi iyo mulefwaya ukwasukapo. Inshita shimo uuletungulula nalimo te kuti atusonte no kutusonta. Lelo tatufwile ukufulilwa uwacilatungulula ukuti tatusontele.—Luk. Mil. 7:9.
16. Kuti twakoselesha shani aba bwananyina abacasukapo pa kulongana?
16 Nga ca kuti tamwaswikepo ukulingana ne fyo mwacilafwaya, kuti cawama mulekutikisha ilyo bambi baleasukapo kabili pa numa ya kulongana, kuti mwabatasha pa fyasuko ifisuma ifyo bacasuka. Nga ca kuti mwatasha aba bwananyina pa fyo bacasuka, mukabakoselesha sana nga filya fine mwingabakoselesha ilyo mwa-asukapo pa kulongana. (Amapi. 10:21) Ukutasha aba bwananyina ni nshila imo iyo twingakoseleseshanyamo.
INSHILA NA SHIMBI ISHO TWINGAKOSELESESHANYAMO
17. (a) Bushe abafyashi kuti ba-afwa shani abana babo ukupekanya ifyasuko ifibalingile? (b) Ukulingana ne fyo mwatambile muli vidio, fintu nshi 4 ifyo tulingile ukucita ilyo tulepekanya icasuko? (Moneni na futunoti.)
17 Finshi fimbi twingacita pa kuti tulekoseleshanya ilyo tuli pa kulongana? Nga ca kuti muli bafyashi, muleafwa abana benu ukupekanya ifyasuko ifibalingile. (Mat. 21:16) Limo pa kulongana tulasambilila amalyashi ayalelanda pa kuba abasanguluka e lyo na pa mafya ya mu cupo. Na lyo line, kulabako ama paragrafu yamo ayo umwana engasuka. Na kabili mulingile ukulondolwela umwana wenu umulandu te kuti balemusontela fye lyonse nga aimya ukuboko. Nga ca kuti mwabalondolwela, te kuti balefulwa nga ca kuti basonta umuntu umbi.—1 Tim. 6:18. d
18. Kuti twacita shani pa kuti twilamoneka kwati twalicindama ilyo tuleasukapo pa kulongana? (Amapinda 27:2)
18 Bonse fye kuti twapekanya ifyasuko ifingalenga Yehova acindikwa kabili ifingakoselesha Abena Kristu banensu. (Amapi. 25:11) Nangu ca kuti inshita shimo kuti twalandako pa fyatucitikila mu bumi, tatulingile ukulalanda sana pa fyatucitikila. (Belengeni Amapinda 27:2; 2 Kor. 10:18) Lelo tufwile ukulalanda sana pali Yehova, pa Cebo Cakwe, e lyo na pa bantu bakwe. (Ukus. 4:11) Nga ca kuti icipusho bepwishe mu paragrafu kulondolola ifyatucitikila, kuti twalondolola. Ifi fine e fyo balaipusha na mu paragrafu ikonkelepo.
19. (a) Cinshi cikafumamo nga ca kuti tulebika amano ku ba bwananyina ilyo tuli pa kulongana? (Abena Roma 1:11, 12) (b) Finshi mwatemwa sana pe shuko twakwata ilya kwasukapo pa kulongana?
19 Nangu ca kuti takwaba amafunde ayo tulingile ukukonka pa kwasuka, bonse tulingile ukulaesha na maka ukula-asuka ifyasuko ifingalakoselesha aba bwananyina. Ici cilepilibula ukuti nalimo tulingile ukula-asukapo sana. Tulingile no kulateka umutima ku miku iyo batusonta ukwasukapo e lyo no kulasekelela nga ca kuti bambi nabo babasonta ukuti basukepo. Nga tulebikako amano ilyo tuli pa kulongana, twakulakoseleshanya—Belengeni Abena Roma 1:11, 12.
ULWIMBO 93 Paaleni Ukulongana Kwesu
a Tulakoseleshanya nga tuleasukapo pa kulongana. Lelo bamo balomfwa umwenso wa kwasukapo. Bambi nabo balomfwa bwino ukwasukapo kabili bamona ukuti bafwile ukwasukapo imiku iingi. Nampo nga tulomfwa umwenso ukwasukapo nelyo tulatemwa ukwasukapo, kuti twalangulukilako shani aba bwananyina pa kuti tulekoseleshanya? Kabili kuti twacita shani pa kuti tuleasuka ifyasuko ifingacincisha aba bwananyina ku kutemwa kabili ku kubomba imilimo iisuma? Twalasambilila ifi muli cino cipande.
b Nga mulefwaya ukwishiba na fimbi ifyo mwingacita, belengeni Ulupungu lwa kwa Kalinda ulwa January 2019, amabu. 8-13, no lwa September 1, 2003, amabu. 19-22.
c Amashina yamo nabayalula.
d Tambeni vidio itila Beni Cibusa wa kwa Lesa—Pekanyeni Ifya Kwasuka pa jw.org.
f UBULONDOLOSHI BWA CIKOPE: Mu cilonganino umwaba bakasabankanya abengi, munyinefwe uwaswikepo kale aleka ukuti aba bwananyina bambi nabo basukepo.
