1, 2. (a) Bushe ubusesemo bwaba pali Esaya 60:22 bulefikilishiwa shani muli shino nshiku sha ku mpela? (b) Kukabila nshi ukuli mu cilonganino ca kwa Yehova ica pano isonde?

PALI Esaya 60:22 patila: “Umunono akaba 1,000, kabili uwacepa akaba uluko lwa maka.” Ubu busesemo bulefikilishiwa muli shino nshiku sha kulekelesha. Mu mwaka wa mulimo uwa 2015 bakasabankanya ba Bufumu abalebila imbila nsuma mwi sonde lyonse bali 8,220,105! Amashiwi ya kulekelesha aya ubu busesemo yalikuma Abena Kristu bonse pantu Shifwe wa ku muulu atila: “Ine, ne Yehova, nkacilenga ukucitika bwangu bwangu mu nshita ya ciko.” Nga filya abali muli motoka beshiba ukuti motoka yatendeka ukubutuka, e fyo na ifwe twishiba ukuti umulimo wa kupanga abasambi ulekulilako. Bushe mumfwa shani ifi umulimo ulekulilako? Bushe mulebombesha mu mulimo wa Bufumu? Bamunyinefwe na bankashi abengi balebombako bupainiya bwa nshita yonse nelyo bupainiya bwa kwafwilisha. Tulatemwa nga nshi ukumona abengi baleipeelesha ukuya ukwaba ukukabila nelyo nga balebombesha mu milimo imbi iya kwa Lesa!

² Na lyo line, abakubomba uyu mulimo na bambi balefwaikwa sana. Cila mwaka ifilonganino 2,000 filapangwa. Nga ca kuti mu filonganino  fyonse ifipangwa muleba baeluda 5, ninshi ababomfi batumikila abafwile ukuba bakangalila cila mwaka bafwile ukuba 10,000. Ici cilolele mu kuti bamunyinefwe abengi nga nshi balingile ukufikapo ukuba ababomfi batumikila. Na kabili bonse fye tulingile ukuba “abacincila pe mu mulimo wa kwa Shikulu.”—1 Kor. 15:58.

3, 4. Bushe calola mwi ukulunduluka mu fya kwa Lesa?

³ Belengeni 1 Timote 3:1. Ishiwi lya ciGriki ilyo bapilibula ukuti “ukufwaya ukuba” lilosha ku kutambulula ukuboko pa kuti umuntu abule cimo icili apatali. Paulo abomfeshe ili shiwi pa kulanga ukuti umuntu alingile ukubombesha pa kuti alunduluke mu fya kwa Lesa. Tutile munyinefwe alefwaya ukulabombako imilimo mu cilonganino. Apo te mubomfi atumikila, atontonkanya ukuti alingile ukuba ne mibele ya Bwina Kristu pa kuti afikepo. Ica kubalilapo, abombesha ukufikapo ukuba umubomfi atumikila. Lyena mu kupita kwa nshita, alafwaya ukufikapo ukuba kangalila. Pa kuti uyu munyinefwe abe umubomfi atumikila nelyo kangalila alingile ukubombesha pa kuti afike pa milingo iifwaikwa.

⁴ Bamunyinefwe na bankashi abafwaya ukuba bapainiya, abafwaya ukubombela pa Bethel, nangu mu makuule ya Mayanda ya Bufumu nabo bene balingile ukubombesha pa kuti bakafishepo ifyo bapanga. Natulande pa fyo Icebo ca kwa Lesa cikoselesha bonse ukulalunduluka mu kupepa kwa cine.

5. Milimo nshi abacaice bengabombako mu mulimo wa Bufumu?

⁵ Abacaice balikwata amaka ya kulabomba imilimo iingi mu mulimo wa kwa Yehova. (Belengeni Amapinda 20:29.) Abacaice bamo ababombela pa Bethel babomba umulimo wa kupulinta no kupanga amaBaibolo e lyo ne mpapulo ishilanda pa fya mu Baibolo. Bamunyinefwe na bankashi abacaice abengi balabomba umulimo wa kukuula no kuwamya Amayanda ya Bufumu. Abacaice bambi balabombako umulimo wa kusakamana aba bwananyina abaponenwa na masanso. Bapainiya bacaice abengi balabila imbila nsuma ku bantu abalanda indimi ishalekanalekana isha mu calo cabo e lyo ne sha ku fyalo fimbi.

6-8. (a) Bushe munyinefwe umo ayalwike shani mu fyo alemona umulimo wa kwa Lesa, kabili finshi fyacitike? (b) Kuti twacita shani pa kuti ‘tusonde no kumona ukuti Yehova musuma’?

⁶ Ukwabula no kutwishika, mwalishiba ukuti calicindama ukubombela Lesa no mweo onse. Nomba kuti mwacita shani nga ca kuti na imwe mumfwa ifyo munyinefwe Aaron aleumfwa? Nangu ca kuti akulile mu lupwa lwa ba Nte, atile, “Naleumfwa ubunang’ani bwa kuya mu kulongana na mu kushimikila abantu imbila nsuma.” Uyu munyinefwe alefwaya ukulabombela Lesa ne nsansa lelo taishibe icalengele elaba ne nsansa mu mulimo wa kwa Lesa. Bushe acitile shani pa kuti alebombela Lesa ne nsansa?

⁷ Munyinefwe Aaron atendeke ukubelenga Baibolo cila bushiku, ukulapekanya ukulongana, no kulayasukapo. Na kabili atendeke ukulapepa lyonse. Ilyo aile aletemenwako Yehova, e lyo atendeke ukulunduluka. Ukutula ilya nshita, uyu munyinefwe alibombele bupainiya ne nsansa, alibombeleko umulimo wa kusakamana aba bwananyina abaponenwa na masanso, kabili aliilepo na ku calo cimbi ku kubila mbila nsuma. Pali ino nshita ba Aaron ni baeluda kabili babombela pa Bethel. Bushe bomfwa shani pa fyo bacitile? Batile: “‘Nalisonda kabili nalimona ukuti Yehova musuma.’ Pa mulandu wa kuti Yehova alimpaala, ndamutasha sana ne ci cilenga ndebombesha kabili na o alampaalilako.”

⁸ Uwaimbile amalumbo atile: “Abafwaya Yehova, tabakabulwe icisuma nangu cimo”  (Belengeni Amalumbo 34:8-10.) Cine cine Yehova talekelesha ababombesha mu mulimo wakwe. Ilyo tulebombesha mu mulimo wakwe ‘tulasonda kabili tulamona ukuti Yehova musuma.’ Na kabili nga tulepepa Lesa no mweo onse, tulaba ne nsansa nga nshi!

9, 10. Mulandu nshi ‘ukulindilila’ kwacindamina?

⁹ Ilyo mulebombesha ukufishapo ifyo mwapanga ukucita mu mulimo wa kwa Lesa, ‘mulelindilila’ Lesa. (Mika 7:7) Yehova lyonse alafwa ababomfi bakwe aba cishinka, nangu ca kuti limo kuti abaleka balolelako ilyo talabapeela imilimo mu cilonganino, nelyo kuti aleka balolelako mpaka ifintu fyayaluka. Yehova alilaile ukupeela Abrahamu umwana. Na lyo line Abrahamu alingile ukuba ne citetekelo kabili alingile ukutekanya. (Heb. 6:12-15) Nangu ca kuti Abrahamu alilolele pa myaka iingi pa kuti Isaki afyalwe, tatendelwe kabili Yehova alifikilishe ifyo amulaile.—Ukute. 15:3, 4; 21:5.

¹⁰ Kwena calyafya ukulolela. (Amapi. 13:12) Nomba nga twaikalila fye ukulatontonkanya pa fyo twaleenekela ifishacitika, kuti twafuupulwa icine cine. Lelo tulingile ukulabomfya inshita yesu ku kuwamyako umo tushicita bwino pa kuti tufikepo ukulabomba imilimo ya kwa Lesa. Natulande pa nshila shitatu ishingatwafwa ukufikapo.

11. Mibele nshi iyo tulingile ukukwata, kabili mulandu nshi yacindamina?

¹¹ Muleba ne mibele iyo Abena Kristu balingile ukukwata. Nga tulebelenga Icebo ca kwa Lesa e lyo tuletontonkanya na pa fyo tulebelenga kuti twaba na mano, kuti tuleiluka, kuti twaba no mulinganya, kuti twanonka ukwishiba, kuti tulelingulula  kabili kuti twaba na mano ayatuntulu. Abaletungulula mu kupepa kwa cine balingile bakwata iyi mibele. (Amapi. 1:1-4; Tito 1:7-9) Na kabili nga tulebelenga impapulo ishilanda pa fya mu Baibolo tukalailuka ifyo Lesa amona ifintu. Cila bushiku tulingile ukulapingulapo pa fya kuleseshamo icitendwe, pa mifwalile ne misakwile, pa fya kubomfya indalama na pa fyo tulingile ukulaumfwana na bantu banensu. Nga tulekonka ifyo tusambilila mu Baibolo, ifyo tukalapingula pa fintu fikalasekesha Yehova.

12. Bushe aba mu cilonganino kuti balanga shani ukuti ba cishinka?

¹² Muleba ne cishinka. Nampo nga ni fwe bamunyina nelyo ni fwe bankashi, bonse fye tulingile ukulabombesha nga batupeela umulimo mu cilonganino. Apo Nehemia ali mulashi alingile ukusala aba kubomba imilimo mu bantu ba kwa Lesa. Bantu ba musango nshi asalile? Asalile abaletiina Lesa, aba cishinka kabili abacetekelwe. (Nehe. 7:2; 13:12, 13) Na muno nshiku mwine, “icifwaikwa ku babomfi ca kuti umuntu asangwe uwa cishinka.” (1 Kor. 4:2) Abantu balamona imilimo iisuma iyo tubomba.—Belengeni 1 Timote 5:25.

13. Bushe kuti mwapashanya shani Yosefe nga ca kuti bamufyenga?

¹³ Muleleka Yehova alemulopolola. Bushe kuti mwacita shani nga ca kuti bamufyenga? Nalimo kuti mwafwaya ukupwisha ubu bwafya bwangu bwangu. Lelo nga mwatendeka ukuipokolola, ubwafya kuti bwakulilako. Ilyo Yosefe bamufyengele kuli bamunyina, taleenda ne cikonko ku mukoshi. Pa numa, Yosefe balimubepeshe kabili balimupoosele mu cifungo ukwabula umulandu. Lelo alilekele Yehova alamutungulula ilyo ali na aya amafya. Finshi fyafuminemo? “Icebo ca kwa Yehova e camusangulwile.” (Amalu. 105:19) Ilyo aya mesho yapwile, Yosefe alifikilepo ukubomba umulimo uwaibela. (Ukute. 41:37-44; 45:4-8) Nga namukwata amafya ayakalamba, mulepepa ukuti Lesa alemupeela amano, muleba abafuuka mu fyo mucita na mu fyo mulanda, kabili mulelomba Lesa ukuti alemukosha. Yehova akamwafwa.—Belengeni 1 Petro 5:10.

14, 15. (a) Mulandu nshi uo tulingile ‘ukubikila amano’ ku fyo tubila imbila nsuma? (b) Kuti mwayalula shani ifyo mubila imbila nsuma nga ifintu fyaaluka? (Moneni icikope pa ntendekelo ya cino cipande na kabokoshi akaleti: “Mulebomfyako Inshila Ishalekanalekana Ilyo Mulebila Imbila Nsuma!”)

¹⁴ Paulo aebele Timote ati: “Twalilila ukubika amano ku kubelenga pa cintubwingi, ukukonkomesha, no kusambilisha. Lyonse uleisakamana we mwine, ulesakamana ne fyo ulesambilisha.” (1 Tim. 4:13, 16) Ilyo Paulo alandile aya mashiwi, ninshi Timote ali ni kabila wa mbila nsuma uwaishiba ukusambilisha. Na lyo line, Timote ali no kubomba bwino uyu mulimo nga ca kuti “atwalilila ukubika amano” ku fyo alesambilisha. Talingile ukulamona kwati abantu bali no kukutika nga alebomfya inshila imo ine iyo alesambilishishamo. Pa kuti atwalilile ukubafika pa mitima, alingile ukulayalula inshila alesambilishishamo ukulingana ne fyo abantu abo asanga bali. Na ifwe bene ifi e fyo tulingile ukulacita.

¹⁵ Ilingi line nga tulebila ku ng’anda ne ng’anda, tatusanga abantu pa mayanda. Mu ncende shimo, tabatusuminisha ukwingila mu mayanda ayacingililwa na malinga. Ifi nga e fyo caba mu cifulo mushimikila, kuti mwabomfyako inshila shimbi isha kubililamo imbila nsuma!

16. Bushe ukushimikila ku cintubwingi kulenga shani abantu baumfwa imbila nsuma?

¹⁶ Ukushimikila ku cintubwingi ni nshila iisuma sana iya kubililamo imbila nsuma. Ba Nte abengi balebomfya sana iyi nshila kabili balebomba bwino. Balashimikila abantu pa fitesheni fye shitima ne fya mabasi, pa maliketi na mu maparka, na mu fifulo fimbi umusangwa sana abantu. Pa kutendeka ukulanshanya no muntu, kasabankanya kuti alanda pa ficitike mu calo, kuti atasha umufyashi pa fyo abana bakwe  baaba, nelyo kuti aipusha icipusho pa ncito umuntu abomba. Ilyo bacili balelanshanya, kasabankanya kuti alanda pa fyo Amalembo yalanda mu nshila ya kuti uo alelanshanya nankwe alanda ifyo aletontonkanyapo. Ifyo umuntu alanda kuti fyalenga mwalanshapo na fimbi pali Baibolo.

17, 18. (a) Bushe kuti mwacita shani pa kuti mulebila bwino imbila nsuma ku cintubwingi? (b) Bushe filya Davidi alelumbanya Yehova kuti fyamwafwa shani ilyo mulebila imbila nsuma?

¹⁷ Nga ca kuti cilamwafya ukubila imbila nsuma ku cintubwingi, tamufwile ukunenuka. Ba Eddie, bapainiya abekala mu musumba wa New York ku America balefilwa ukulanda na bantu pa cintubwingi. Lelo mu kupita kwa nshita balisukile balishipa. Cinshi calengele bashipe? Batile: “Pa mapepo ya lupwa, ine no mwina mwandi tulafwailisha ifyebo pa fyo twingacita umuntu nga talefwaya ukukutika. Na kabili tulepushako na ba bwananyina ukutwebako ifyakucita.” Pali nomba ba Eddie balitemwa ukushimikila imbila nsuma ku cintubwingi.

¹⁸ Ilyo muleishibilako ifya kubila bwino imbila nsuma kabili mwashipa no kushipa, abantu bakamona ukuti mulelunduluka. (Belengeni 1 Timote 4:15.) Na kabili mukalalumbanya Shifwe wa ku muulu nga filya Davidi acitile, ilyo aimbile ati: “Nkacindika Yehova inshita yonse; ukumutasha kukaba pe mu kanwa kandi. Muli Yehova e mo umweo wandi ukatakishisha; abafuuka bakomfwa no kusekelela.” (Amalu. 34:1, 2) Nga mulebila bwino imbila nsuma, abafuuka bakesa mu mupepa kwa cine.

19. Mulandu nshi umubomfi wa cishinka uwa kwa Yehova alingile ukubela ne nsansa nangu ca kuti cilamwafya ukubombela bwino Yehova?

¹⁹ Na kabili Davidi aimbile ati: “Fyonse ifyo mwabumba fikamulumbanya, mwe Yehova, na bantu benu aba cishinka bakamucindika. Bakalalanda pa bukata bwa bufumu bwenu, bakalalanda na pali bumpalume bwenu, ku kulenga abana ba bantu beshibe imilimo yakwe iya maka no bufumu bwakwe ubwa bukata nga nshi.” (Amalu. 145:10-12) Aya mashiwi yalanga ifyo Inte sha kwa Yehova isha cishinka shumfwa pali Yehova. Kuti mwacita shani nga ca kuti mulafilwa ukubombesha mu mulimo pa mulandu wa kuti mulalwalilila nelyo muli bakalamba? Muleibukisha ukuti nga mwalandako na bamusakamana mu cipatala e lyo na bantu bambi pali Lesa ninshi mulemulumbanya. Nga ca kuti balimukaka pa mulandu wa fyo mwasuminamo, e lyo nga mwakwata ishuko mulebako na bambi pa cine, mulalenga Yehova alesekelela. (Amapi. 27:11) Nga mwaba mu lupwa umwaba abapepa ukwapusanapusana lelo mulabombesha mu fya kwa Lesa, mulalenga Yehova alesekelela. (1 Pet. 3:1-4) Nangu ni lintu muli na mafya ayakalamba, kuti mwalumbanya Yehova kabili kuti mwalalunduluka mu fya kwa Lesa.

20, 21. Kuti mwaba shani ipaalo ku ba bwananyina nga mulebomba imilimo iingi mu cilonganino ca kwa Yehova?

²⁰ Yehova akamupaala nga mwatwalilila ukulunduluka mu fya kwa Lesa. Nalimo nga mwayalukako mu mikalile yenu na mu fyo mubomfya nshita, kuti mwalabombesha mu mulimo wa kushimikila abantu icine pali Lesa. Na kuba nga mulebombesha mu fya kwa Lesa kabili muleipeelesha no kuipeelesha, mukalenga aba bwananyina bakalenonkelamo. Kabili pa mulandu wa kuti mulabombesha mu cilonganino, aba bwananyina abatemwa Yehova bakamutemwa, bakalamutasha, kabili bakalamutungilila.

²¹ Nampo nga twalibombela Yehova pa myaka iingi nelyo nga twamubombela fye pa myeshi iinono, ifwe bonse kuti twalunduluka mu fya kwa Lesa. Nomba bushe Abena Kristu abakalamba mu fya kwa Lesa kuti bayafwa shani abapya ukulunduluka? Ili e lyashi tukalandapo mu cipande cikonkelepo.